သိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဢွၵ်ႇဝႃႈ တီႉလႆႈႁူင်းႁုင်ယႃႈ (ဢမ်ႇမီးၸဝ်ႈၶွင်) တီႈဝၢၼ်ႈလုင်း ဝဵင်းမိူင်းၵူၵ်း ၸႄႈဝဵင်းမိူင်းသၢတ်ႇ ၼႂ်းပိုၼ်ႉတီႈပျီႇတူႉၸိတ်ႉတူင်ႉၼိုင်ၼၼ်ႉ ။
မိူဝ်ႈဝၼ်းတီႈ 24/02/2026 ယၢမ်းဝၢႆးဝၼ်း မွၵ်ႈ 2 မူင်း သိုၵ်းမၢၼ်ႈယိုတ်းမိူင်း ၶဝ်ႈၵႂႃႇသွၵ်ႈၼႂ်းထိူၼ်ႇ တၢင်းဝၢၼ်ႈလုင်း ဝဵင်းမိူင်းသၢတ်ႇသေ ထၢႆႇႁၢင်ႈပိုၼ်ၽၢဝ်ႇဝႃႈ ယိုတ်းလႆႈႁူင်း ႁုင်ယႃႈ ။ ၵူၺ်းၵႃႈ ပိုၼ်ၽၢဝ်ႇပႃးဝႃႈ ၵူၼ်းတႄႉဢမ်ႇတီႉလႆႈသေၵေႃႉ ဝႃႈၼႆ။
ၵူၼ်းမိူင်းပိုၼ်ႉတီႈ ၸႄႈဝဵင်းမိူင်းသၢတ်ႇလၢတ်ႈဝႃႈ “ ပိုၼ်ႉတီႈၼၼ်ႉ မီးၸုမ်းပျီႇတူႉၸိတ်ႉ၊ ၸုမ်းသိုၵ်းဝႃႉ လႄႈ သိုၵ်းမၢၼ်ႈၵူၺ်း။ တီႈၶဝ်ၵႂႃႇၺွပ်းၼၼ်ႉ ႁၢင်ႇၵႆၵၼ်တင်းမိူင်း ၵူၵ်း မွၵ်ႈ 10 လၵ်းပၢႆ။ ၶဝ်ဢမ်ႇလႆႈၵိၼ်ၽဵင်ႇၵၼ်လႄႈ ၸင်ႇၶဝ်ႈၵႂႃႇၺွပ်းၼႄ ႁဵတ်းဢဝ်ၼႄႁၢင်ႈၼႄၾၢင်မၼ်းၵူၺ်း ” ဝႃႈၼႆ။
ၽွင်းသိုၵ်းမၢၼ်ႈၶဝ်ႈၵႂႃႇယိုတ်းဢဝ်ႁူင်းႁုင်ယႃႈၼၼ်ႉ ထူပ်းႁၼ် ယႃႈလမ် 3 ထူင်၊ ၵွၼ်ႈယႃႈၽိူၵ်ႇ 1 ၵွၼ်ႈ၊ ထူင်ဢၼ်သႂ်ႇဝႆႉၽွင်သီၶၢဝ် ဢၼ်မီးၼမ်ႉၼၵ်း ၼိုင်ႈထူင် 1 ၵီႇလူဝ်ႇၵရမ်ႇၼၼ်ႉ တႃႇ 9 ထူင်၊ ႁေႃႇယႃႈမ ဢၼ်ဢဝ်တဵပ်ႉသီလိူင်ႁေႃႇဝႆႉ ၼိုင်ႈမတ်ႉ မွၵ်ႈ 6 ႁဵင်မဵတ်ႉၼၼ်ႉ တႃႇ 12 တုမ်း၊ ယႃႈမ ဢၼ်ပႃး မၢႆ 999 ၼိုင်ႈႁေႃႇမီးမွၵ်ႈ ၼိုင်ႈမိုၼ်ႇမဵတ်ႉ ၼၼ်ႉ 10 ႁေႃႇ၊ မဵတ်ႉယႃႈမ ဢၼ်မီးဝႆႉၼႂ်းထူင်ၸၢၼ်ႈ မွၵ်ႈၶိုင်ႈထူင်ၼၼ်ႉ တႃႇ 12 ထူင် လႄႈ ၽွင်ဢၼ်ႁဵတ်းဢွၵ်ႇယႃႈမၼၼ်ႉသမ်ႉ တႃႇ 12 ထူင် ၼႆယဝ်ႉ။
ၾၢႆႇသိုၵ်းမၢၼ်ႈပိုၼ်ၽၢဝ်ႇဝႃႈ တေၽဝ်ပႅတ်ႈ ႁူင်းႁုင်ယႃႈ လႄႈ ယႃႈမဝ်းၵမ် တင်း ၶိူင်ႈၸႂ်ႉတိုဝ်းၼၼ်ႉတင်းသဵင်ႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ