ႁၢင်လိူၼ်ၾႅပ်ႉပိဝ်ႊရီႊၼႆႉ သိုၵ်းမၢၼ်ႈယိုတ်းမိူင်း ၶဝ်ႈၵႂႃႇတီႉၺွပ်းဢဝ် ၵူၼ်းႁဵတ်းၵၢၼ်လွၵ်ႇလႅၼ်ၵိၼ် ငိုၼ်းတင်းဢွၼ်ႊလၢႆႊ တီႈၼႂ်းဢိူင်ႇဝၢၼ်ႈႁႅင်ႈ ၸႄႈဝဵင်းလၢႆးၶႃႈ ။
မိူဝ်ႈဝၼ်းတီႈ 22 ယၢမ်းၵၢင်ဝၼ်း 12 မူင်း လိူၼ်ၾႅပ်ႉပိဝ်ႊရီႊ သိုၵ်းမၢၼ်ႈတီႉၺွပ်းလႆႈ ၵူၼ်းမိူင်းၶႄႇ 25 ၵေႃႉ ၸိူဝ်းႁဵတ်းၵၢၼ်ၵျႃႊၽျႅၼ်ႉယူႇတီႈ ဝၢၼ်ႈပၢင်ႇ လႄႈ ဝၢၼ်ႈတၢတ်ႇမွၵ်ႇ ၊ ယိုတ်းဢဝ်လႆႈပႃး ၶိူင်ႈၸႂ်ႉတိုဝ်းၵူႈသႅၼ်းသႅၼ်းပႃးၸဵမ် ၶိူင်ႈသတႃႊလိင်ႉ (Starlink) 2 ၶိူင်ႈ ဝႃႈၼႆ။
သိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႃႈ – ၵူၼ်းမိူင်းၶႄႇၸိူဝ်းတီႉၺွပ်းလႆႈဝႆႉၼၼ်ႉ ပဵၼ်ၵူၼ်းမိူင်းၶႄႇ ၸိူဝ်းႁႃၵၢၼ်ၼႂ်း Wechat သေ ႁွတ်ႈၽႅဝ်မႃးထိုင် ၼႂ်း မိူင်းတႆး။ ၵူၼ်းမိူင်းၶႄႇၸိူဝ်းၼၼ်ႉ ၺႃးႁူၺ်းသူၼ်းဝႃႈ တေလႆႈႁဵတ်းၵၢၼ်ယူႇတီႈလႅၼ်လိၼ်မိူင်းမၢၼ်ႈ-မိူင်းၶႄႇသေ လႆႈငိုၼ်းလိူၼ်ၶႅမ်ႉ- ဝႃႈၼႆ။
လႆႈႁူႉဝႃႈ ၵူၼ်းမိူင်းၶႄႇၸိူဝ်းၶဝ်ႈၵႂႃႇႁဵတ်းၵၢၼ်ၵျႃႊၽျႅၼ်ႉၼႂ်းၸႄႈဝဵင်းလၢႆးၶႃႈၼၼ်ႉ ပဵၼ်ၵူၼ်းႁဵတ်း ၵၢၼ်ၵေႃႇသၢင်ႈ၊ ႁေႃႈရူတ်ႉၵႃး ၼႂ်းမိူင်းၶႄႇသေ ထုၵ်ႇၵူၼ်းႁူႉၸၵ်းၼႂ်း ဢ ၵွင်ႉ Wechat ႁူၺ်းႁွင်ႉဢဝ်တၢင်း သိပ်းသွင်ပၼ်းၼႃး ၶဝ်ႈမႃးတၢင်းဝဵင်းပၢင်သၢင်းသေ လူင်းမႃးတၢင်းဝဵင်းမိူင်းယႆ သဵၼ်ႈၼိုင်ႈ၊ လုၵ်ႉတၢင်းဝဵင်းၶျွင်ႊၶျုၼ်ႊ မိူင်းၶႄႇ ၶဝ်ႈမႃးတၢင်းဝဵင်းမိူင်းလႃးသေ လူင်းမႃးယူႇၼႂ်းမိူင်းတႆး ပွတ်းၸၢၼ်း၊ ပွတ်းဢွၵ်ႇၸိူဝ်းၼႆႉ သဵၼ်ႈၼိုင်ႈ။ ၽွင်းၵူၼ်းမိူင်းၶႄႇ လူင်းမႃးတၢင်းမိူင်းတႆးၼႆႉ ၺႃးၵူၼ်း(ပွႆးၸႃး)ဢၼ်ႁွင်ႉၶဝ်မႃးၼၼ်ႉ ယိုတ်းဝႆႉၾူၼ်ႊမိုဝ်းထိုဝ်ၶဝ်ဝႆႉၼႆ ၵူၼ်းဝၢၼ်ႈ ၼႂ်းၸႄႈဝဵင်းလၢႆးၶႃႈ ၸိူဝ်းႁူႉၸၵ်းၵၼ်တင်းၶႄႇ ဢၼ်မႃးယူႇသဝ်းၼႂ်းဝၢၼ်ႈၶဝ်ၼၼ်ႉလၢတ်ႈၼႄၽူႈတွႆႇႁွၵ်ႈၼင်ႇၼႆ။
မိူဝ်ႈလိူၼ်တီႊသႅမ်ႊပိူဝ်ႊ ပီ 2025 ၵူၼ်းမိူင်းၶႄႇ မွၵ်ႈ 60 ၵေႃႉ ၶဝ်ႈၵႂႃႇထိုင်တီႈဝၢၼ်ႈပၢင်ႇ ၸႄႈဝဵင်းလၢႆးၶႃႈ သေ ႁဵတ်းၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆး (ၵျႃႊၽျႅၼ်ႉ)။ တီႈၼၼ်ႉ မီးၸုမ်းယိပ်းၵွင်ႈၵၢင်ႇပႂ်ႉ ဢဝ်ႁူမ်ႇလူမ်ႈပၼ်ဝႆႉ ဝႃႈၼႆ။
ၼႂ်းၸႄႈဝဵင်းလၢႆးၶႃႈၼႆႉ မီးၸုမ်းပျီႇတူႉၸိတ်ႉ 758 ၊ တပ်ႉသိုၵ်းမၢၼ်ႈ လႄႈ ပႃႇတီႇမႂ်ႇသုင်ၸိုင်ႈတႆး (SSPP/SSA) တူင်ႉၼိုင်ၵႂႃႇမႃးဝႆႉ ၼႆယဝ်ႉ။
မိူဝ်ႈ ပၢင်ယၼ်ႇသိုၵ်း 1027 ၼၼ်ႉ ၸုမ်းၵျႃႊၽျႅၼ်ႉဢၼ်ထင်ယူႇၼႂ်းမိူင်းတႆးပွတ်းႁွင်ႇ ၽူင်ႉပၢႆႈတင်းၼမ်တင်းလၢႆ ။ ဢွၼ်ၵၼ်ၵႂႃႇၶွၼ်ႈ တီႈဝဵင်းမျႃႉဝတီႇ ။ ၽွင်းႁၢင်ပီ 2025 သိုၵ်းမၢၼ်ႈလႄႈပျီႇတူႉၸိတ်ႉ ဢဝ်ႁႅင်းသိုၵ်းၶဝ်ႈယိုဝ်းမျႃႉဝတီႇ ႁဵတ်းႁႂ်ႈၵူၼ်းၵျႃႊၽျႅၼ်ႉ တီႈၼၼ်ႉဢွၼ်ၵၼ်ပၢႆႈထႅင်ႈ။
မိူၼ်ၼင်ႇပွတ်းတၢင်း မိူင်းၼွင် ၊ မိူင်းသူႈ ၊ လၢႆးၶႃႈ ၊ ၶူဝ်လမ် ၊ ၵုၼ်ႁဵင် ၊ တႃႈၶီႈလဵၵ်း ၸိူဝ်းၼႆႉ ၸုမ်းၵျႃႊၽျႅၼ်ႉမႃးမူၵ်းယူႇဝႆႉ ။ ဢၼ် မူၵ်းယူႇၼႂ်းၵႄႈ ဢိူင်ႇ မိူင်းလိုမ်း လႄႈ ၼွင်တဝ်း ၸိူဝ်းၼႆႉၵေႃႈ မီး ဢၼ်ဢဝ်ႁူမ်ႇလူမ်ႈ ပၼ်ၶဝ်ၵေႃႈ ပဵၼ်ၸုမ်းဢၼ်ႁူမ်ႈႁွမ်းတင်းသိုၵ်းမၢၼ်ႈၵူၺ်းၼႆ ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ