တႄႇႁၢင်လိူၼ် ၾႅပ်ႉပိဝ်ႊရီႊၼႆႉမႃး ပၢင်တိုၵ်းတၢင်းဢိူင်ႇၵိူၼ်တူလူင် ၸႄႈဝဵင်းမွၵ်ႇမႆႇ ၸိုင်ႈတႆးပွတ်းၸၢၼ်း ယဵၼ်ဝႆႉသေတႃႉ ၵူၼ်းပၢႆႈၽေးသိုၵ်း ပႆႇၸၢင်ႈ ပွၵ်ႈမိူဝ်းႁိူၼ်းယေးၽႂ်မၼ်း ၊ လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ် ဝႆႉဝႃႈၼႆ ။

တႄႇဝၼ်းတီႈ 1 လိူၼ်ၵျႅၼ်ႊၼိဝ်ႊရီႊၼႆႉမႃး သိုၵ်းမၢၼ်ႈ တင်း ပျီႇတူႉၸိတ်ႉပဢူဝ်း PNO ထူဝ်းသိုၵ်းၸူး ငဝ်ႈငုၼ်း တပ်ႉသိုၵ်း PNLA တၢင်းဝၢၼ်ႈပၢင်မၢၵ်ႇ ဢိူင်ႇၵိူၼ်ႇတူလူင် ဝဵင်းမွၵ်ႇမႆႇ သေ ႁဵတ်းႁႂ်ႈ ၵူၼ်းဝၢၼ်ႈ 5 ဝၢၼ်ႈႁူဝ်ၵူၼ်း ႁဵင်ပၢႆ လႆႈငိူင်ႉပၢႆႈၽေးသိုၵ်း   ။

ၵူၼ်းဝၢၼ်ႈႁဵင်ပၢႆ ဢၼ်လႆႈပၢႆႈၽေးသိုၵ်းယူႇယၢမ်းလဵဝ်ၼၼ်ႉ ပဵၼ်ၵူၼ်းဝၢၼ်ႈႁမ်းပႂႃး (ဟံးဗွာရွာ) ၊ ဝၢၼ်ႈၼွင်ထဝ် (နောင်ထောဝ်ရွာ) လႄႈ ဝၢၼ်ႈပၢင်မၢၵ်ႇ (ဗန်းမက်) ၸိူဝ်းၼႆႉ ။  ငိူင်ႉပၢႆႈၽေးသိုၵ်း ၵႂႃႇယူႇတၢင်း ဝၢၼ်ႈၼႃးႁီး ယၢမ်းလဵဝ် လူဝ်ႇတင်းၸွႆႈထႅမ်ၶဝ်ႈၼမ်ႉတၢင်းၵိၼ် ဝႆႉၼႆယဝ်ႉ ။

ၼၢင်းယိင်းၸွႆႈထႅမ်ၵူၼ်းပၢႆႈၽေးသိုၵ်းလၢတ်ႈၽူႈတွႆႇႁွၵ်ႈဝႃႈ -“ ၼႂ်းဢိူင်ပၢင်မၢၵ်ႇၼႆႉ မီး 5 ဝၢၼ်ႈ ၊ ၵူၼ်းဝၢၼ်ႈ 5 ဝၢၼ်ႈၼၼ်ႉ ႁူဝ်ၵူၼ်းမီးႁဵင်ပၢႆ ၊ တလဵဝ် လႆႈႁူမ်ႈၵၼ် ယူႇဝႆႉတီႈဝၢၼ်ႈၼႃးႁီး  ၊ ဢၼ်ပၢႆႈၽေးသိုၵ်းဝႆႉၼႆႉ ပဵၼ်ၵူၼ်းထဝ်ႈလႄႈ လုၵ်ႈဢွၼ်ႇၵမ်ႈၼမ် ၊ မိူဝ်ႈလဵဝ် ပဵၼ်ၶၢဝ်းမႆႈမႃး ယဝ်ႉလႄႈ ပိုၼ်ႉတီႈၼၼ်ႈ ဢမ်ႇမီးၼမ်ႉ လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ်ဝႆႉ”- ဝႃႈၼႆ ။

ဝၢႆး သွင်ၾၢႆႇပဵၼ်ပၢင်တိုၵ်းၵၼ် ႁၢဝ်ႈႁႅင်း ႁိုင်ၶၢဝ်းတၢင်းလိူၼ်ပၢႆယဝ်ႉ မိူဝ်ႈဝႃး ဝၼ်းတီႈ 17/ 2 / 2026 ပျီႇတူႉၸိတ်ႉPNO ယိုတ်းၵုမ်းလႆႈၶိုၼ်း ဝၢၼ်ႈပၢင်မၢၵ်ႇ ၼႆ PNO ပိုၼ်ၽၢဝ်ႇဝႆႉ ၼင်ႇၼႆ ။ ယၢမ်းလဵဝ် ပၢင်တိုၵ်း ယဵၼ်ဝႆႉသေတႃႉ ၵူၼ်းပၢႆႈၽေးသိုၵ်း မႆႈၸႂ်လွင်ႈႁူမ်ႇလူမ်ႈ ပႆႇၸၢင်ႈပွၵ်ႈ မိူဝ်း ႁိူၼ်းၶိုၼ်း ၼႆယဝ်ႉ ။

မၼ်းၼၢင်းသိုပ်ႇလၢတ်ႈထႅင်ႈဝႃႈ – “ ပၢင်တိုၵ်းယဵၼ်ဝႆႉသေတႃႉ ၵူၼ်းပၢႆႈၽေးသိုၵ်း ပႆႇပွၵ်ႈ မိူဝ်း ၶိုၼ်း ၊ မၢင်ၸိူဝ်း ႁိူၼ်းယေးထုၵ်ႇၽဝ် ၽွင်းပၢင်တိုၵ်း ၊ မၢင်ၸိူဝ်းၵေႃႈ ဢမ်ႇမီးလွင်ႈႁူမ်ႇလူမ်ႈ လႄႈ ပႆႇပွၵ်ႈမိူဝ်း ၊ သဵၼ်ႈတႃႈသၢႆတၢင်းၵေႃႈ ပႆႇလီလႄႈ ပႆႇၸၢင်ႈပွၵ်ႈမိူဝ်းၶိုၼ်း”- ဝႃႈၼႆ ။

ၵူၼ်းပၢႆႈၽေးသိုၵ်း ႁဵင်ပၢႆ ၼၼ်ႉ လႆႈငိူင်ႉယူႇဝႆႉတီႈ ၵျွင်းမုၼ်ၸဝ်ႈ ၊ ႁူင်းႁဵၼ်းသွၼ်လိၵ်ႈ ၊ ႁူင်းႁေႃ လႄႈ ပၢႆႈယူႇႁိူၼ်းယေးပီႈၼွင်ႉၸမ်ၸႂ်ဝႆႉ ။ ယွၼ်ႉၼမ်ႉႁႃယၢပ်ႇ ၼမ်ႉဢမ်ႇၵုမ်ႇထူၼ်ႈလႄႈ  ၵူၼ်းထဝ်ႈလႄႈ လုၵ်ႈဢွၼ် ဢၼ်လႆႈပၢႆႈၽေးသိုၵ်းဝႆႉၼၼ်ႉ ၸၢင်ႈပဵၼ်တၢင်းပဵၼ် တွင်ႉၵႂႃႇ တွင်ႉႁႄႈ လႆႈမႆႈၸႂ် ပၢႆးယူႇလီဝႆႉပႃး – ၵူၼ်းၸွႆႈထႅမ် ၵူၼ်းပၢႆႈ ၽေးသိုၵ်း လၢတ်ႈ ။ 

မိူဝ်ႈဝၼ်းတီႈ 14/2/2026 ၼၼ်ႉ သိုၵ်းမၢၼ်ႈ ဢၼ်ပၵ်းတပ်ႉဝႆႉတီႈၾၢႆႇတူၵ်းၼမ်ႉပွၼ် လၢမ်းယိုဝ်းၶိူင်ႈၵွင်ႈလူင်မႃး ၼႂ်းဢိူင်ႇ ၵိူၼ်ႇတူလူင် လၢႆလၢႆၵမ်း၊ ႁဵတ်းႁႂ်ႈမၢၵ်ႇသိုၵ်းမၢၼ်ႈ တူၵ်းတိုဝ်ႉၵူၼ်းပၢႆႈၽေးသိုၵ်း 2 ၵေႃႉ ပဵၼ်လုၵ်ႈဢွၼ်ဢႃယု 10 ၶူပ်ႇၵေႃႉၼိုင်ႈလႄႈ ၼၢင်းယိင်း ဢႃယု 40 ၵေႃႉၼိုင်ႈလူႉတၢႆ ၼႆယဝ်ႉ ။