ၵၢၼ်ယူႇၵၢၼ်ၵိၼ်ၵူၼ်းႁဝ်းၼႆႉ မီးၽွၼ်းတုမ်ႉယွၼ်ႈၼိူဝ် ပၢႆးယူႇလီတႄႉတႄႉဝႃႈဝႃႈယူႇ ။ သင်ဢမ်ႇၾၢင်ႉ ဢမ်ႇသႂ်ႇၸႂ် သေ ယူႇၵိၼ်ၸလိူဝ်ႈၸလႃႈၸိုင် ၸၢင်ႈႁဵတ်းႁႂ်ႈပၢႆးယူႇလီၼွၵ်ႈတူဝ်ၼႂ်းတူဝ်ယူပ်ႈယွမ်း ။ ၼႂ်းၵူႈဝၼ်းဝၼ်းၼၼ်ႉ သင်ၵိၼ်မႅၼ်ႈ ဢၼ်ဢမ်ႇမူတ်းသႂ် ၊ ၵိၼ်ဢမ်ႇမႅၼ်ႈလွၵ်းမႅၼ်ႈလၢႆးပၢႆးယူႇလီၸိုင် တၢင်းပဵၼ်ရေႃးၵႃႇ ဢၼ်ဢမ်ႇထုၵ်ႇပဵၼ်ၵေႃႈ တေပဵၼ်မႃးၸွမ်း ။ ဢၼ်ၵမ်ႈၼမ် ဢမ်ႇၾၢင်ႉမႅၼ်ႈသေ တိတ်းၸပ်းလႆႈငၢႆႈငၢႆႈတႄႉ ပဵၼ် တၢင်းပဵၼ် မႅင်းတွင်ႉ ႁိုဝ် တိူၵ်ႇ လိူင်ႇၼမ် ၼႂ်းလမ်းသႆႈ ၼႂ်းၼိူဝ်ႉၼင် ၸိူဝ်းၼႆႉ ။ သင်ဝႃႈ ဢမ်ႇႁႄႉၵင်ႈလႆႈ ၶိုတ်းတၼ်းၼႆႉ တၢင်းပဵၼ် တိူၵ်ႇ လိူင်ႇၽႄႈၼႂ်းတူဝ်ၵူၼ်းၼႆႉ ၸၢင်ႈလူႉသုမ်းသၢႆၸႂ်ၵွပ်ႈမၼ်း ။ လွင်ႈၼႆႉ ၸၢႆးသႂ်ၸိုၼ်ႈမိူင်း တေႁၢႆးငၢၼ်းၼႄပၼ်ၵႂႃႇၶႃႈဢေႃႈ။

ၸၢတ်ႈပၢၼ်ၵူၼ်းၼိုင်ႈၵေႃႉၼႆႉ ၽၢၼ်မီးပီးယွမ် လဵၵ်ႉယႂ်ႇၼုမ်ႇထဝ်ႈ ၸိူင်ႉႁိုဝ်သေၵေႃႈယဝ်ႉ သင်ပၢႆးယူႇလီ ဢမ်ႇတဵမ်ထူၼ်ႈၼႆ တိုၼ်းဝႃႈ တေႁဵတ်းသင်ဢမ်ႇလႆႈ ၼင်ႇ ၸႂ်ၶႂ်ႈပဵၼ်။
တူဝ်လႄႈတင်းၸႂ် ဢၼ်ယၢၼ်ၽေးရေႃးၵႃႇၼႆႉ ပဵၼ်မင်ႇၵလႃႇလူင်ဢၼ်ၼိုင်ႈလႄႈ ၽႂ်ၵေႃႈ မုင်ႈမွင်းၶႂ်ႈႁႂ်ႈပၢႆးယူႇလီ ၶႅမ်ႉ ။ ၼႂ်းၵႃႈ တၢင်းပဵၼ်ၵူႈလၢႆသမ်ႇၼၼ်ႉ ဢၼ်ပဵၼ်ၸွမ်းၼိူဝ်ႉၸွမ်းလိူတ်ႈၵေႃႈမီး ၊ ဢၼ်ပဵၼ်ယူႇၸွမ်းၼႂ်းတူဝ် ၼႂ်းတွင်ႉ ၼႂ်းသႆႈၸိူဝ်းၼႆႉၵေႃႈပႃး ။

ပေႃးၶဝ်ႈၸိုဝ်ႈဝႃႈ တၢင်းပဵၼ်ရေႃးၵႃႇယူႇၼႆ ဢၼ်လႂ်ၵေႃႈ ဢမ်ႇမီးၽွၼ်းလီတေႃႇၵူၼ်း ။ ၵိုင်ႇလီၾၢင်ႉလႄႈ သႂ်ႇၸႂ်ၼိူဝ်ပၢႆးယူႇလီၸဝ်ႈၵဝ်ႇတႄႉတႄႉဝႃႈဝႃႈ ။ ဢမ်ႇဝႃႈ တၢင်းပဵၼ်သႅၼ်းလႂ်ၵေႃႈယဝ်ႉ ပေႃးတူၵ်းတူဝ်မႃးမၼ်းယၢပ်ႇၵိၼ်း ။ မိူၼ်ၼင်ႇၼႂ်းလမ်းသႆႈ ၊ ၼႂ်းတူဝ်ၵူၼ်းၼႆႉ သင်မီး မႅင်းတွင်ႉ(ႁိုဝ်) တိူၵ်ႇ လိူင်ႇၼမ်ၸိူဝ်းၼႆႉၸိုင် ၸၢင်ႈလၢမ်းၵႂႃႇထိုင် တၢင်းပဵၼ်လၢႆလၢႆသႅၼ်းလူးၵွၼ်ႇ ။

တိူၵ်ႇ ဢၼ်ဝႃႈၼႆႉ မၼ်းၸၢင်ႈတႄႇမီးမႃးၸွမ်း ၼိူဝ်ႉၼင် ၊ ၸွမ်းတၢင်းၵိၼ်တၢင်းယမ်ႉ ၸိူဝ်းၼႆႉငၢႆႈငၢႆႈ ။ ဢမ်ႇၾၢင်ႉသေ ၵူၼ်းႁဝ်း ၸၢင်ႈၵႂႃႇယဵပ်ႇမႅၼ်ႈ ယိပ်းမႅၼ်ႈ တိူဝ်ႉမႅၼ်ႈ ၶႆႇတိူၵ်ႇ သေ မႅင်းတိူၵ်ႇၼၼ်ႉ ၸၢင်ႈၸီးၶဝ်ႈ ၼႂ်းၼိူဝ်ႉၼင် ၵူၼ်းႁဝ်းငၢႆႈငၢႆႈယဝ်ႉ ၽႄႈတူဝ်ၵွပ်ႈယူႇဝႆႉ ၼႆ ဢမ်ႇတွၼ်ႉမီးၽႂ်ၾၢင်ႉၼၵ်း။

ၽွင်းမိူဝ်ႈ တႄႇ မီးမႅင်းတိူၵ်ႇ ၶဝ်ႈၼႂ်းတူဝ်ၵူၼ်းၼၼ်ႉ ၽႂ်ၵေႃႈ တေဢမ်ႇၵိုင်ႉၵၢင်ႉႁူႉလႆႈၵမ်းလဵဝ် မၼ်းဢမ်ႇၼႄပိူင်ၾၢင်သင်ၵမ်းသိုဝ်ႈ။

1)ဢၼ်ၸၢင်ႈၾၢင်ႉမႅၼ်ႈတႄႉ ၽွင်းမိူဝ်ႈတွင်ႉၵႂႃႇတွင်ႉႁႄႈ ။ သင်ဝႃႈ တွင်ႉၵႂႃႇၼႆ ၸၢင်ႈပဵၼ်လႆႈတၢင်းပဵၼ်လၢႆလၢႆသႅၼ်းယူႇသေတႃႉ ၵမ်ႈၼမ် ပဵၼ်ယွၼ်ႉ တၢင်းၵိၼ်ဢၼ်ၸဝ်ႈၵဝ်ႇၵိၼ်ယူႇတႃႇသေႇၼၼ်ႉသေ ၸင်ႇပဵၼ် ။
မိူဝ်ႈၵိၼ်ၼၼ်ႉ တေၸၢင်ႈပႃးမႃး ၸိူဝ်ႉမႅင်းဢၼ်ဢမ်ႇလီတေႃႇပၢႆးယူႇလီ ၸၢင်ႈတုမ်ႉတိူဝ်ႉၶိူင်ႈၼႂ်းတူဝ်ၵူၼ်း ။ သင်ဝႃႈ ၸိူဝ်ႉမႅင်းတွင်ႉ တိူၵ်ႇ ၸိူဝ်းၼႆႉၼမ် ၸၢင်ႈႁဵတ်းႁႂ်ႈ တွင်ႉႁႄႈတွင်ႉၵႂႃႇမိူၼ်ၵၼ် ။ သင်ၾၢင်ႉတူၺ်း ၸၢင်ႈလႆႈႁၼ်တူဝ်တိူၵ်ႇ ၼႂ်းၽၢႆႈလူင် ။
2) သင်ဝႃႈ တူဝ်တိူၵ်ႇၽႄႈၼႂ်းလမ်းသႆႈယဝ်ႉၸိုင် တွင်ႉတေၵႅၼ်း ၊ မၢင်ၵေႃႉ တေၵႅၼ်းႁႅင်း ထိုင်တီႈယိူၼ်ႉဢမ်ႇလႆႈ ။ ပေႃးပဵၼ်ၼၢင်းယိင်း ၸၢင်ႈထၢင်ႇၽိတ်းၵၼ်တၢင်း တွင်ႉၵႅၼ်းႁူဝ်လိူၼ် ။ ယွၼ်ႉဝႃႈ မၼ်းၵႅၼ်းငၢႆးၵၼ် ဝႃႈၼႆ။

ပေႃးပဵၼ် မႅင်းတိူၵ်ႇ ၽႄႈၼမ်တႄႉ ၵမ်ႈၼမ် တေၵႅၼ်းတီႈၼႂ်းတွင်ႉပွတ်းတႂ်ႈ ႁိမ်းႁူဝ်ၼဝ်ႇ ၼၼ်ႉ။ ၸွမ်းၶွပ်ႇႁိမ်းလမ်းသႆႈၸိူဝ်းၼၼ်ႉ တေမီးတူဝ်မႅင်းတိူၵ်ႇ ပႂ်ႉႁပ်ႉၵိၼ်တၢင်းၵိၼ်ဢၼ်တေမႃးၸူးၼၼ်ႉလႄႈ ယူႇယူႇ တွင်ႉတေၵႅၼ်းလိမ်ႇ ၵႅၼ်းလိမ်ႇ ပဵၼ်ၵမ်း ။
3)ပေႃးမႅင်းတွင်ႉၼမ်ပူၼ်ႉၸိုင် ၸၢင်ႈႁဵတ်းႁႂ်ႈ ၵူၼ်းဢမ်ႇယႂ်ႇမူႈလႆႈၽဵၼ်ႈၽဵၼ်ႈ ။ ဢၼ်ၼႆႉ လုၵ်ႈဢွၼ်ႇလဵၵ်ႉ ၸၢင်ႈပဵၼ်ၵၼ်ၼမ် ။ သင်ဝႃႈ လုၵ်ႈဢွၼ်ႇၵေႃႉလႂ် မီးမႅင်းတွင်ႉၼမ်ၸိုင် လုၵ်ႈဢွၼ်ႇၵေႃႉၼၼ်ႉ တေဢမ်ႇယႂ်ႇသုင်လႆႈငၢႆႈ။

ယွၼ်ႉဝႃႈ မႅင်းၼႂ်းတွင်ႉၼၼ်ႉ တေပႂ်ႉၵိၼ်ပႅတ်ႈ ထၢတ်ႈသၢၼ်ဢႁႃရ ဢၼ်လုၵ်ႈဢွၼ်ႇၵိၼ်လူင်းတွင်ႉၵႂႃႇၼၼ်ႉလႄႈ တိူၵ်ႇတေ သိုပ်ႇမီးၸႂ် ၵွပ်ႈယူႇဝႆႉၼႂ်းလမ်းသႆႈႁိုင် ။ သင်ဝႃႈ မႅင်းတွင်ႉလိူင်ႇ လိူၵ်ႈၵိၼ်တၢင်းၵိၼ် ဢၼ်မႅၼ်ႈၸွမ်းပၢႆးယူႇလီ ၊ၵိၼ်ဢၼ် မီးထၢတ်ႈဝီႊတမိၼ်ႊၼမ်ယူႇသေတႃႉ တေဢမ်ႇၵႂႃႇမီးၽွၼ်းလီတႃႇတူဝ်ၵူၼ်းသေဢိတ်းလႄႈ ၵိၼ်ၵေႃႈ မိူၼ်ဢမ်ႇလႆႈၵိၼ် ။ ဢမ်ႇသုင် ဢမ်ႇယႂ်ႇလႆႈငၢႆႈငၢႆႈ ။

သင်ဝႃႈ လုၵ်ႈလၢင်းၸဝ်ႈၵဝ်ႇ ၵိၼ်ယူႇဢမ်ႇပီး ဢမ်ႇသုင် ၊ ၼွၼ်းတိုၼ်ႇမႃးမိူဝ်ႈလႂ်ၵေႃႈ မိူၼ်ႁၢင်ႈႁိူဝ်ႉဢူၼ်ႈယူႇသေႇသေႇၸိုင် ၸၢင်ႈမီးမႅင်းၼႂ်းတွင်ႉၼမ် ။ ၵိုင်ႇလီ ၵႂႃႇၼႄမေႃယႃ ၶိုတ်းတၼ်း ။

4)သင်ဝႃႈ မႅင်းတွင်ႉၼမ်ၼႆ ၵူၼ်းၵေႃႉၼၼ်ႉ တေႁိူဝ်ႉတေဢူၼ်ႈငၢႆႈလိူဝ်သေတၢင်ႇၵေႃႉ ။ ၼႆႉတႄႉၵေႃႈ ၼႄပိူင်ၾၢင်ပႃးဝႃႈ ၵူၼ်းၵေႃႉၼၼ်ႉ ၶၢတ်ႇထၢတ်ႈဢႁႃရ ။ တေၶႂ်ႈလပ်းၶႂ်ႈၼွၼ်းယူႇသေႇသေႇ မိူၼ်ဢမ်ႇမီးႁႅင်း။

5)ၵူၼ်းဢၼ်မႅင်းတွင်ႉလိူင်ႇၼမ်ၼၼ်ႉ တေၸၢင်ႈဢႆႁႅင်ႈဢႆႁိူတ်ႇ ။ မိူဝ်ႈတိူၵ်ႇ မီးၶႆႇသေ တိုၵ်ႉတႅၵ်ႇဢွၵ်ႇမႃးပဵၼ်တူဝ်သႅၼ်းလဵၵ်ႉလဵၵ်ႉၼၼ်ႉ ၸၢင်ႈတူင်ႉၼိုင်ၵႂႃႇမႃးၼႂ်းတူဝ်ၵူၼ်းၸွတ်ႇတီႈ ။ တိူၵ်ႇမၢင်တူဝ် ၸၢင်ႈၵႂႃႇသွၼ်ႈယူႇဝႆႉၸွမ်းၼႂ်းပွတ်ႇ ၊ ၼႂ်းႁူင်းၶဝ်ႈ ၸိူဝ်းၼႆႉ။

တူဝ်တိူၵ်ႇၸိူဝ်းၼၼ်ႉ ၸၢင်ႈၵွပ်ႈသေ ၸပ်းယူႇဝႆႉၸွမ်းထႅပ်ႉယႅပ်ႉလမ်းသႆႈ เนื้อเยื่อ ၸိူဝ်းၼၼ်ႉလႄႈ တေၵႂ်ႈဝႆႉ ႁိမ်းႁွမ်းတိူၵ်ႇယူႇၼၼ်ႉ တေၵႂ်ႈတေပွင်းဝႆႉ ။ ထိုင်တီႈဝႃႈ ၵိၼ်ယူတ်းၵိၼ်ယႃယူႇၵေႃႈ တေဢမ်ႇၵႂႃႇတိူဝ်ႉမႅၼ်ႈ တီႈမၼ်းလီလီသေ ဢႆႁႅင်ႈဢႆႁိူတ်ႇၸိူဝ်းၼၼ်ႉၵေႃ တေဢမ်ႇႁၢႆလႆႈငၢႆႈငၢႆႈ ဝႃႈၼႆ။

6) သင်မႅင်းတွင်ႉၼမ် ၸၢင်ႈၸပ်းတၢင်းပဵၼ် ၸႂ်ၵပ်ႉ ၊ ထူၺ်ႈၸႂ်ဢမ်ႇဢိမ်ႇ ။ ၼႂ်းပွတ်ႇၼၼ်ႉ မႅင်းတိူၵ်ႇ ၸၢင်ႈၶွၼ်ႈယူႇ ဝႆႉလႄႈ ပွတ်ႇတေၵႂ်ႈသေ တေၸၢင်ႈဢႆ ထူၺ်ႈၸႂ်ယၢပ်ႇ ၊ မိူဝ်ႈထူၺ်ႈၸႂ်ၼၼ်ႉ တေဢွၵ်ႇသဵင်လွတ်ႇလူမ်း တေငိၼ်းပႃး သဵင်လူမ်းထိပ်ႇဢွၵ်ႇမႃးၼၼ်ႉပဵၼ်ၵမ်းပဵၼ်ၵမ်းလူးၵွၼ်ႇ ။ မၢင်ၵေႃႉ ဢူၵ်း ၸၢင်ႈ ၵႅၼ်းပႃး။

7) မႅင်းတွင်ႉၼႆႉ ၵမ်ႈၼမ် ဢမ်ႇၸႂ်ႈယူႇၼွၵ်ႈတူဝ်လႄႈ တေဢမ်ႇႁၼ်လႆႈၵမ်းသိုဝ်ႈ ။ ၵူၺ်းၵႃႈ လမ်းသႆႈ ဢၼ်တိူၵ်ႇယူႇဝႆႉၼၼ်ႉတႄႉ stimuli သဵၼ်ႈႁပ်ႉႁူႉမၼ်းတႄႉ ႁပ်ႉႁူႉယူႇဝႃႈ တိူၵ်ႇယူႇဝႆႉ ။ မၢင်ပွၵ်ႈမႃး ဢမ်ႇၵိၼ်သင်သေ stimuli ၼႆႉ တေသူင်ႇၶေႃႈမုလ်း ႁႂ်ႈဢွၵ်းဢေႃႁပ်ႉႁူႉဝႃႈ တွင်ႉတဵမ်ယဝ်ႉ ၼႆတႄႇၵႂႃႇၸိူဝ်းၼႆႉ။

ၵူၼ်းဢၼ်မႅင်းတွင်ႉၼမ်ၼႆႉ မၢင်ပွၵ်ႈ တေတွင်ႉမႆႈႁႅင်း မၢင်ပွၵ်ႈၵေႃႈ ဢမ်ႇၶႂ်ႈၵိၼ်သေဢိတ်း။ ၸႂ်ၶႂ်ႈၵိၼ်ယမ်ႉ တေဢမ်ႇမၢၼ်ႇၽဵၼ်ႈ ယွၼ်ႉဝႃႈ မိူဝ်ႈၶုၺ်ႉႁၼ်ဝႃႈ တွင်ႉတဵမ်ၼၼ်ႉ တဵမ်ယွၼ်ႉတိူၵ်ႇႁႃႉ တၢင်းၵိၼ်ဢၼ်ၵိၼ်လူင်းၵႂႃႇၼႆၼၼ်ႉ stimuli ဢမ်ႇသူင်ႇၶေႃႈမုလ်းပၼ်ဢွၵ်းဢေႃႈလႆႈၽဵၼ်ႈၽဵၼ်ႈ။

မၢင်ၵေႃႉ တေႃႉတႄႉၵိၼ်ၵူၺ်းၵေႃႈ ၶုၺ်ႉႁၼ်ဝႃႈ တွင်ႉၵပ်ႉတွင်ႉၵႂ်ႈသေ တေၵိၼ်ဢေႇၵႂႃႇတိၵ်းတိၵ်း။ မၢင်ၵေႃႉၵေႃႈ ၺႃးတိူၵ်ႇၵိၼ်ပႅတ်ႈဢႁႃရမူတ်းလႄႈ ၸၢင်ႈၸပ်းတၢင်းပဵၼ်ၶၢတ်ႇဢႁႃရထႅင်ႈ။ ပေႃးပဵၼ်ၼၼ် တေၵမ်းၵမ်းတွင်ႉမႆႈ ၵေႃႈမီး ၵိၼ်ပၼ်ယူႇၵေႃႈ မိူၼ်ဢမ်ႇထိုင်တီႈ ။

သင်ဝႃႈ မီးပိူင်ၾၢင်ၼင်ႇလၢတ်ႈမႃးၸိူဝ်းၼႆႉ ယႃႇပွႆႇဝႆႉ မဝ်မၢင် ။ ႁႂ်ႈမေႃဢုပ်ႇဢူဝ်းမေႃယႃဢၼ်ၵဵဝ်ႇၶွင်ႈသေ ၵိၼ်ယႃႁႄႉၵင်ႈတိူၵ်ႇ ႁိုဝ် မႅင်းတွင်ႉ ။ ၵၢပ်ႈယၢမ်းလဵဝ် ယႃႇႁႄႉၵင်ႈတိူၵ်ႇ ဢၼ်ၵတ်ႉယမ် မီးမႃးၼမ်လႄႈ ႁႂ်ႈလိူၵ်ႈသိုဝ်ႉၵိၼ် ၼင်ႇႁိုဝ် တေၸဵဝ်းၶႅၼ်း။
တိူၵ်ႇဢၼ်ဝႃႈၼႆႉ ပဵၼ်သတ်းသႅၼ်းလဵၵ်ႉၸိူဝ်ႉၼိုင်ႈ ဢၼ်ၵွပ်ႈၵိၼ်ၸွမ်းတူဝ်မီးၸႂ်ၵူႈပိူင်ပိူင် ။ ဢၼ်ၽႄႈလၢမ်းသေ ၵွပ်ႈယူႇလႆႈ ၵမ်ႈၼမ်ၼၼ်ႉ တေပဵၼ် လုၵ်ႈဢွၼ်ဢႃယု 5 ၶူပ်ႇထိုင် 10 ၶူပ်ႇ ။ ၵူၼ်းဢၼ်ယူႇၸွမ်းဢွင်ႈတီႈဢၼ်ဝူၺ်ႇႁင်ႈ ၊ ဢွင်ႈတီႈဢၼ် ၵူၼ်းလႄႈသတ်းယူႇႁူမ်ႈၵၼ်ၼမ်ပူၼ်ႉတီႈ ထိုင်တီႈႁဵတ်းလွင်ႈမူတ်းသႂ်ဢမ်ႇပေႉလႆႈၼၼ်ႉ ၸိူဝ်ႉတိူၵ်ႇၸိူဝ်းၼႆႉ ၸၢင်ႈတိတ်းၵွပ်ႈၸိးၶဝ်ႈယူႇၸွမ်းတီႈယူႇတိႈၵိၼ်ၵူၼ်းႁဝ်းလႆႈငၢႆႈငၢႆႈ ။ ၸင်ႇၼၼ် ဢၼ်တေသၢင်ႇထုၵ်ႇ သုတ်းတႄႉ သင်မီးပိူင်ၾၢင်ၼင်ႇလၢတ်ႈမႃးၼၼ်ႉ ႁႂ်ႈထတ်းတူၺ်းပၢႆးယူႇလီၽႂ်မၼ်းသေ ၼႅတ်ႈႁႄႉၵင်ႈ ၼႅတ်ႈယူတ်းယႃ ႁႂ်ႈၶိုတ်းတၼ်း ၸင်ႇတေၸၢင်ႈလွတ်ႈၽေးၶႃႈဢေႃႈ။

ၶေႃႈမုလ်း ၸိူဝ်းၼႆႉ ဢဝ်မႃးတီႈ Hello Health Group ၶႃႈ။