မိူဝ်ႈဝႃး ဝၼ်းတီႈ 23/2/2026 ယၢမ်းၵၢင်ၶမ်ႈ သိုၵ်းမၢၼ်ႈယိုတ်းမိူင်း ႁဵတ်းလိၵ်ႈပိုၼ်ၽၢဝ်ႇဢွၵ်ႇ ပဵၼ်တၢင်းၵၢၼ် မၵ်းမၼ်ႈဝၼ်းပိုတ်ႇလုမ်းသၽႃးၵူၼ်းမိူင်း၊ သၽႃးၸိူဝ်ႉၸၢတ်ႈ၊ သၽႃးၸႄႈမိူင်း လႄႈ တိူင်းတႃႇႁွင်ႉဢဝ် ၼေႃႇၽွင်းတႅၼ်းၸိူဝ်းဢွင်ႇပေႉပၢင်လိူၵ်ႈတင်ႈ 2025-2026 တႄႇၵႂႃႇၶဝ်ႈပၢင်ၵုမ်ၼႂ်းသၽႃး ။
ပၢင်ၵုမ်သၽႃးၵူၼ်းမိူင်း တေတႄႇၸတ်းႁဵတ်း ဝၼ်းတီႈ 16/03/2026၊ သၽႃးၸိူဝ်ႉၸၢတ်ႈ ပဵၼ်ဝၼ်းတီႈ 18/03/2026၊ သၽႃးၸႄႈမိူင်း လႄႈ တိူင်း ပဵၼ်ဝၼ်းတီႈ 20/03/2026 ။ ပၢင်ၵုမ် သၽႃးမိူင်းႁူမ်ႈတုမ် ၵူႈႁွင်ႈၵၢၼ်ၼႆႉ ပွၵ်ႈၼႆႉၸတ်းႁဵတ်းပဵၼ်ၵမ်းတီႈ 3 ဝႃႈၼႆ။
ၼေႃႇၽွင်းတႅၼ်းပႃႇတီႇၵၢၼ်မိူင်းၵူႈၸုမ်း ၸိူဝ်းဢွင်ႇပေႉပၢင်လိူၵ်ႈတင်ႈပီ 2025-2026 ဢၼ် သိုၵ်းမၢၼ်ႈယိုတ်းမိူင်းၼမ်းၸတ်းၼႆႉ တေလႆႈၵႂႃႇႁွတ်ႈထိုင်ဝႆႉ တီႈဝဵင်းၼေႇပျီႇတေႃႇသေ သႂ်ႇသဵၼ်ႈမၢႆ ပွင်ႇၶၢဝ်ႇထိုင်လုမ်းသၽႃးၵူၼ်းမိူင်းႁႂ်ႈၶိုတ်းတၼ်းၼႂ်း ဝၼ်းတီႈ 10 – 11 လိူၼ်မၢတ်ႉၶျ် ။
ၸိူဝ်းတူၵ်းပုၼ်ႈၽွၼ်း တေလႆႈၶဝ်ႈႁူမ်ႈပၢင်ၵုမ်သၽႃးၸိူဝ်ႉၸၢတ်ႈၼၼ်ႉ တေလႆႈသႂ်ႇသဵၼ်ႈမၢႆ လႄႈ ပွင်ႇၶၢဝ်ႇၵႂႃႇတီႈၸဝ်ႈၼႃႈတီႈ ႁႂ်ႈၶိုတ်းတၼ်း ၼႂ်းဝၼ်းတီႈ 12-13 လိူၼ် မၢတ်ႉၶျ်၊ ၼေႃႇၽွင်းတႅၼ်းၸႄႈမိူင်း လႄႈ ၸႄႈတိူင်းသမ်ႉ တေလႆႈသႂ်ႇသဵၼ်ႈမၢႆႁႂ်ႈၶိုတ်းတၼ်း ၼႂ်းဝၼ်းတီႈ 14-15 လိူၼ်မၢတ်ႉၶျ် ၼႆယဝ်ႉ။
သိုၵ်းမၢၼ်ႈၼႆႉ ဢဝ်ၶေႃႈဢၢင်ႈဝႃႈ ၶေႃႈတွပ်ႇပၢင်လိူၵ်ႈတင်ႈ 2020 ဢမ်ႇမီးလွင်ႈၽဵင်ႇပဵင်း လႄႈ ဢမ်ႇမီးလွင်ႈပူင်ႇသႂ်ၼႆသေ ပီ 2021 လိူၼ်ၾႅပ်ႉပိဝ်ႊရီႇ ယိုတ်းဢဝ်ဢႃႇၼႃႇ ၸိုင်ႈမိူင်း လိပ်းလိပ်းလႅင်လႅင်ယဝ်ႉ တီႉၺွပ်းတႅၼ်းၽွင်း ပႃႇတီႇ NLD လႄႈ ၽူႈဢွၼ်ႁူဝ်ပႃႇတီႇ ၵၢၼ်မိူင်း ၸိူဝ်းၶတ်းၶၢၼ်ႉၶဝ် ယဵတ်ႈသႂ်ႇၶွၵ်ႈၶင်ဝႆႉ။
ပၢင်လိူၵ်ႈတင်ႈ ပီ 2025-2026 ၼႆႉၵေႃႈ သိုၵ်းမၢၼ်ႈယိုတ်းမိူင်း ၼမ်းၸတ်းၵႂႃႇၼႂ်းၵႄႈၵူၼ်းမိူင်း၊ ၸုမ်းတူင်ႇဝူင်းၵူၼ်း လႄႈ ၸုမ်းၸၢတ်ႈၸိုင်ႈလုမ်ႈၾႃႉၶဝ်ဢမ်ႇႁၼ်လီၸွမ်းၵူၺ်းသေ တဵၵ်းၶိၼ် ၸတ်းႁဵတ်း ၵႂႃႇႁႂ်ႈပေႃးယဝ်ႉတူဝ်ႈ။
ၵွၼ်ႇၼႃႈ လႄႈ ဝၼ်းၸတ်းပၢင်လိူၵ်ႈတင်ႈၼၼ်ႉၵေႃႈ ၵူၼ်းမိူင်းၺႃးၶႃႈႁၢပ်ႇၵၢၼ်ၶုၼ်သိုၵ်းမၢၼ်ႈယိုတ်း မိူင်း လွၵ်ႇငိုတ်ႈ၊ တဵၵ်းတဵင်ၵႂႃႇပၼ်သဵင်ၵူၺ်းဢမ်ႇၵႃး ၽွင်းၼပ်ႉဢၢၼ်ႇ ၶႅပ်းၵၢင်ၸႂ်ၼၼ်ႉၵေႃႈ ဢမ်ႇမီးလွင်ႈပူင်ႇသႂ်ႇတေႉတေႉၼႆ ပႃႇတီႇၵၢၼ်မိူင်းၸိူဝ်းၶဝ်ႈပႃးလိူၵ်ႈတင်ႈၸွမ်း ၵမ်ႈၼမ်လၢတ်ႈဢွၵ်ႇမႃးၼႂ်းသိုဝ်ႇၶၢဝ်ႇ ၼင်ႇၼႆ။
ပၢင်လိူၵ်ႈတင်ႈ 2025-2026 ၼႆႉ ၸုမ်းတူင်ႉၼိုင်ၵၢၼ်တူင်ႇဝူင်းၵူၼ်း၊ ပႃႇတီႇၵၢၼ်မိူင်းၸိူဝ်းဢွင်ႇပေႉၵၢၼ် လိူၵ်ႈတင်ႈမိူဝ်ႈပီ 2020 လႄႈ ယူႇၾၢႆႇၶတ်းၶၢၼ်ႉသိုၵ်းမၢၼ်ႈ တင်း ၸုမ်းၸိူဝ်းမီးၵၢင်ၸႂ်ၶႂ်ႈၵေႃႇသၢင်ႈဝၢၼ်ႈမိူင်း ၵႂႃႇၸွမ်းသဵၼ်ႈတၢင်းၾႅတ်ႇတရႄႇတီႇမူဝ်ႇၶရေႇၸီႇၼႆႉ မၵ်းမၼ်ႈဝႃႈ ပဵၼ်ပၢင်လိူၵ်ႈတင်ႈဢၼ်ဢမ်ႇၶဝ်ႈတၢင်းၵၢၼ် ဝႃႈၼႆ။
ၼေႃႇၽွင်းတႅၼ်း ၸိူဝ်းဢွင်ႇပေႉပၢင်လိူၵ်ႈတင်ႈပွမ် သိုၵ်းမၢၼ်ႈယိုတ်းမိူင်း ပီ 2025-2026 ၼႆႉ ၾၢႆႇတူဝ်တႅၼ်းတပ်ႉသိုၵ်းမီးယူႇ 166 ၵေႃႉ၊ တူဝ်တႅၼ်းပႃႇတီႇသၢင်ႈသီႈ လႄႈ ပႃႇတီႇၸၢဝ်းၶိူဝ်း မီးယူႇ 420 ၵေႃႉ ႁူမ်ႈသဵၼ်ႈမီး 586 ၵေႃႉ တေလႆႈၵႂႃႇၶဝ်ႈပၢင်ၵုမ်လူင်လုမ်းသၽႃးမိူင်းႁူမ်ႈတုမ် ၼႆယဝ်ႉ။
ပၢင်လိူၵ်ႈတင်ႈဢၼ်သိုၵ်းမၢၼ်ႈယိုတ်းမိူင်းၼမ်းၸတ်းႁဵတ်းၵႂႃႇ ၼႂ်းႁၢင်ပီ 2025 လႄႈ ႁူဝ်ပီ 2026 ၼၼ်ႉ ပႃႇတီႇသၢင်ႇသီႈ လႆႈတီႈယူႇၼႂ်းလုမ်းသၽႃးၸိူဝ်ႉၸၢတ်ႈ 108 တီႈၼင်ႈ၊ သၽႃးၵူၼ်းမိူင်း 231 တီႈၼင်ႈ ႁူမ်ႈသဵၼ်ႈ 339 တီႈၼင်ႈ။
ၼႂ်းလုမ်းသၽႃးၵူႈတီႈမိူင်းႁူမ်ႈတုမ်ၼႆႉ ပႃႇတီႇသၢင်ႇသီႈ လႆႈတီႈၼင်ႈၼမ်ဝႆႉလိူဝ်ပိူၼ်ႈသုတ်းလႄႈ တႃႇၶွတ်ႈၽွတ်ႈ လူင်ပွင်ၸိုင်ႈ၊ တႃႇလိူၵ်ႈတူဝ်တႅၼ်း ၼေႃႇၸွမ်ၸိုင်ႈၼၼ်ႉ USDP တေလိူၵ်ႈၵူၼ်းၵေႃႉ ဢၼ်ပဵၼ်တူဝ်တႅၼ်းၼႂ်းတပ်ႉသိုၵ်းႁႃႉ ဢမ်ႇၼၼ် တေလိူၵ်ႈၵေႃႉဢၼ်ယူႇဝႆႉၼႂ်းတူင်ႇဝူင်းပႃႇတီႇၵၢၼ်မိူင်း တၢင်ႇၸုမ်းၼႆ မီးၶေႃႈထၢမ်ဝႆႉယူႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ