ဢိင်ၼိူဝ်သိုၵ်းၵဝ်ႈၵၢင်ႉ တင်း သိုၵ်းတဢၢင်း ပဵၼ်ပၼ်ႁႃၵၼ် လွင်ႈၵၢၼ်ၽွင်းငမ်း တီႈၸႄႈဝဵင်း သႅၼ်ဝီ – ၵူတ်ႉၶၢႆၼၼ်ႉသေ ၵူၼ်းမိူင်းၸိူဝ်းႁဵတ်းၵၢၼ်ၵႃႉၶၢႆ ဢိၵ်ႇ ရူတ်ႉၵႃးၸိူဝ်းတေဢွၵ်ႇၶၢဝ်းတၢင်း လတ်းၽၢၼ်ႇ ဝဵင်းသႅၼ်ဝီ – ၵူတ်ႉၶၢႆၵမ်ႈၼမ် ဢမ်ႇပႆႇႁတ်းၵႂႃႇမႃးလွတ်ႈလႅဝ်းတေႉတေႉ ၼႆယဝ်ႉ။
ၵူၼ်းမိူင်းၵေႃႉယူႇဝႆႉတီႈဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈလဵဝ်တႄႉလွင်ႈသိုၵ်းၶဝ် ပေႃႉႁႅမ်ၵၼ် ၽိတ်းၵၼ်ၼႆႉ ယဵၼ်ဝႆႉယူႇ။ ၵူၺ်းသိုၵ်းၵဝ်ႈၵၢင်ႉၶဝ်တႄႉ တိုၵ်ႉထတ်းဝႂ် လၢႆႊသိၼ်ႊ ရူတ်ႉၵႃး လႄႈ ၸႅတ်ႈၵူၼ်းၶဝ်ႈဢွၵ်ႇဝဵင်းယူႇ။ ၸွမ်းၵိဝ်ႇဢွၼ်ႇၵိဝ်ႇဢိတ်းၸိူဝ်းၼႆႉၵေႃႈ သိုၵ်း ပႂ်ႉဝႆႉ ၼိုင်ႈတီႈ 5-6 ၵေႃႉ 7-8 ၵေႃႉ ၵူႈတီႈ။ ၸွမ်းတၢင်းၵေႃႈ ၶဝ်ဢမ်ႇပႆႇပူတ်း ၵဵတ်ႉလၢၼ်ႇၶဝ်ၶိုၼ်း။ ၵူႈပွၵ်ႈၼႆႉ ပေႃးထိုင်ဝၼ်း ၵၢတ်ႇၽိတ်ႈၵူတ်ႉၶၢႆၼႆ ၵႃးၶဝ်ႈသၢၼ်၊ ၵႃးတၢင်ႇၵုၼ်ႇၸိူဝ်းၼႆႉ ၶိုၼ်ႈၼမ်ၼႃႇ။ မိူဝ်ႈၼႆႉ (23/2/2026) တႄႉ ယွၼ်ႉသင် ဢမ်ႇႁူႉၼႃႇ ၶဝ်ဢမ်ႇပႆႇပၼ်လတ်းလႄႈ ၵႃးၶိုၼ်ႈၵူတ်ႉၶၢႆၵေႃႈဢမ်ႇၼမ်။ မီးၵႃးဢၼ်လုၵ်ႉတၢင်း ၵူတ်ႉၶၢႆလူင်းမႃးၵူၺ်း ၼမ်ဢိတ်းၼိုင်ႈ” ဝႃႈၼႆ။
မိူဝ်ႈဝၼ်းတီႈ 13/2/2026 သိုၵ်းတဢၢင်း (TNLA) ႁွင်ႉဢဝ်ႁႅင်းသိုၵ်းသေ ၵႂႃႇၸွမ်းလိုပ်ႈလမ်း ပေႃႉထုပ်ႉႁႅမ် သိုၵ်းၵဝ်ႈၵၢင်ႉ (MNDAA) ၸိူဝ်းယူႇၸွမ်းလုမ်းၽွင်းငမ်းဝဵင်းၵူတ်ႉၶၢႆ ထိုင်တီႈဢွၵ်ႇလိူတ်ႈ ပဵၼ်ယၢင်။ ဝၢႆးလင် ၼၼ်ႉထႅင်ႈသၢမ်ဝၼ်း (17/2/2026) သိုၵ်းၵဝ်ႈၵၢင်ႉၸိူဝ်းယူႇၼႂ်းၸႄႈဝဵင်းသႅၼ်ဝီ ၵႂႃႇလိုပ်ႈလမ်း တေႃႉဢဝ်သိုၵ်းတဢၢင်း တၢင်ႇၵႃး ၵႂႃႇပွႆႇဝႆႉတၢင်းဝၢၼ်ႈဢီႇၼၢႆးတင်းသဵင်ႈ။
ဝၼ်းတီႈ 18/2/2026 ယၢမ်းၵၢင်ၼႂ် သိုၵ်းၵဝ်ႈၵၢင်ႉ သိုပ်ႇလိုပ်ႈလမ်းသိုၵ်းတဢၢင်း ၸိူဝ်းတူင်ႉၼိုင်ယူႇသဝ်း ၼႂ်းၵႄႈဝၢၼ်ႈၼမ်ႉၸလၢပ်ႈ လႄႈ မိူင်းပွၼ်းတႆးသေ ထိုင်ယၢမ်းၵၢင်ဝၼ်း သိုၵ်းတဢၢင်းႁွင်ႉဢဝ် ႁႅင်းသိုၵ်း ဢၼ်မီးတၢင်းဝၢၼ်ႈဢီႇၼၢႆး ပႃးၶွၼ်ႉမႆႉ ၶိုၼ်ႈမႃးပေႃႉႁႅမ်ၵၼ်တင်း သိုၵ်းၵဝ်ႈၵၢင်ႉ တီႈဢိူင်ႇမိူင်းပႃး ၸႄႈဝဵင်းသႅၼ်ဝီ။
ထိုင်ဝၼ်းတီႈ 19/2/2026 သိုၵ်းၵဝ်ႈၵၢင်ႉ ဢဝ်ၶွၼ်ႉမႆႉဢၼ်မီးလဵၵ်းတွၵ်ႇဝႆႉသေ ၵႂႃႇပေႃႉထုပ်ႉႁႅမ် ၵူၼ်းသိုၵ်းတဢၢင်း ၸိူဝ်းတူၵ်းပုၼ်ႈၽွၼ်းဝႆႉတီႈဝၢၼ်ႈၵႃလႅင် ၵႄႈၵၢင်ဝဵင်းသႅၼ်ဝီ – ၵူတ်ႉၶၢႆၼၼ်ႉသေ ပေႃႉထုပ်ႉႁႅမ်ၺႃးပႃး ၵူၼ်းမိူင်း မွၵ်ႈ 10 ၵေႃႉ လႆႈဢဝ်သူင်ႇၵႂႃႇယူတ်းယႃတူဝ်တီႈႁူင်းယႃ ဝဵင်းၵူတ်ႉၶၢႆဝႆႉ ၼႆ သိုဝ်ႇၶၢဝ်ႇတဢၢင်း ႁၢႆးငၢၼ်းဝႆႉ။
ၵဵဝ်ႇလူၺ်ႈလွင်ႈပၼ်ႁႃ သိုၵ်းတင်းသွင်ၸုမ်း ပဵၼ်ပၼ်ႁႃၵၼ်ၼၼ်ႉသေ ၾၢႆႇတပ်ႉသိုၵ်းၵဝ်ႈၵၢင်ႉတႄႉ ဢမ်ႇပႆႇတုမ်ႉတွပ်ႇသင်ဝႆႉၵူၺ်းဢမ်ႇၵႃး ႁဝ်းၶႃႈၸုမ်းၶၢဝ်ႇၽူႈတွႆႇႁွၵ်ႈၵပ်း ႁႃၵေႃႈ ဢမ်ႇလႆႈ။
ၽူႈၶၢၼ်ပၢၵ်ႇ သိုၵ်းတဢၢင်း လူၺ်းယေႇဢူး ဢွၵ်ႇမႃးလၢတ်ႈတီႈသိုဝ်ႇၶၢဝ်ႇတဢၢင်းဝႆႉဝႃႈ – တႃႇၵႄႈလိတ်ႈပၼ်ႁႃ လွင်ႈၶဵင်ႈၶႅင်ၵၢၼ်သိုၵ်းတဢၢင်း လႄႈ သိုၵ်းၵဝ်ႈၵၢင်ႉ ၼႂ်းပိုၼ်ႉတီႈ ၸႄႈဝဵင်းၵူတ်ႉၶၢႆ တင်း ၸႄႈဝဵင်းသႅၼ်ဝီၼႆႉၾၢႆႇတပ်ႉသိုၵ်းတဢၢင်း လႆႈႁဵတ်းၽိုၼ်လိၵ်ႈ သူင်ႇယိုၼ်ႈထိုင်ၸူး FPNCC ဝႆႉ ႁႂ်ႈယူႇၵၢင်သေၸွႆႈၵႄႈလိတ်ႈပၼ်ႁႃပၼ် ၼႆယဝ်ႉ။
လႆႈႁူႉဝႃႈ ယၢမ်းလဵဝ် လွင်ႈၶဵင်ႈၶႅင်ၵၢၼ်သိုၵ်းတဢၢင်း လႄႈ သိုၵ်းၵဝ်ႈၵၢင်ႉၸိူဝ်းယူႇၼႂ်းပိုၼ်ႉတီႈ ယဵၼ်ဝႆႉသေတႃႉ ၸွမ်းသဵၼ်ႈတၢင်းလူင် ၵႂႃႇမႃး ဝဵင်းၵူတ်ႉၶၢႆ – ဝဵင်းသႅၼ်ဝီတႄႉ တိုၵ်ႉမီးလွင်ႈ ၵူတ်ႇထတ်းႁၢဝ်ႈႁႅင်းယူႇလႄႈ ႁဵတ်းႁႂ်ႈၵူၼ်းမိူင်းပိုၼ်ႉတီႈၵေႃႈ ႁူပ်ႉတၢင်းယၢပ်ႇၸွမ်းသေ လႆႈမႆႈၸႂ်ၵူဝ်တင်းသွင်ၾၢႆႇၶိုၼ်းပဵၼ်ပၢင်တိုၵ်းၵၼ် ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ