ၼၢင်းယိင်းဢွၼ်ႇ ဢႃႇယု 21 ပီ ၵေႃႉၼိုင်ႈ ယူႇပႃႇလႅင် ပွၵ်ႉ 1 ဝဵင်းတႃႈၶီႈလဵၵ်း ၵႂႃႇဢႅဝ်ႇႁူင်းပျေႃႇမူၼ်ႈ KTV သေ ႁႆၢၵႂႃႇလႆႈ 3 ဝၼ်း ၽိူဝ်ႇထူပ်းၵၼ်ၶိုၼ်း ၶၢပ်ႈတူဝ်တၢႆ ၺႃးၽဝ်ဝႆႉ ၵူၼ်းႁိူၼ်းဢမ်ႇႁူႉတေလႆႈၸႂ်ယႂ်ႇပိုင်ႈဢိင်ၽႂ်။
မိူဝ်ႈဝၼ်းတီႈ 13/2/2026 ၼၢင်းယိင်းဢွၼ်ႇဢႃႇယု 21 ပီ ၵေႃႉၼိုင်ႈ ၵႂႃႇဢႅဝ်ႇတီႈႁူင်းပျေႃႇမူၼ်ႈ (Sky Club 1688 KTV) တီႈဝဵင်းတႃႈၶီႈလဵၵ်း- မၼ်းၼၢင်း ႁၢႆၵႂႃႇၽွင်းပွၵ်ႈႁိူၼ်း ၶိုၼ်း ။
ပီႈၼွင်ႉၸိူဝ်ႉၶိူဝ်းၼၢင်းယိင်းဢွၼ်ႇၵေႃႉၺႃးၶႃႈႁႅမ်တၢႆၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ၶမ်ႈၼၼ်ႉ မၼ်းၵႂႃႇဢႅဝ်ႇ 1688 KTV သေႁၢႆၵႂႃႇ။ ငိၼ်းဝႃႈ လိုၼ်းသုတ်းမိူဝ်ႈမၼ်းဢွၵ်ႇ KTV မႃးၼၼ်ႉ ဢွၵ်ႇမႃးၸွမ်းၽူႈမီး ၸၼ်ႉသိုၵ်းမၢၼ်ႈ ၵေႃႉၼိုင်ႈ ၼႆဢေႃႈ။ မၼ်းႁၢႆၵႂႃႇႁိုင် 3 ဝၼ်းယဝ်ႉ ၸင်ႇႁၼ်တူဝ်တၢႆ မၼ်း တီႈႁိမ်းၶၢင်ႈတၢင်း ဢဝ်ၽႃႈပူၵ်ႉဝႆႉ” ဝႃႈၼႆ။
ယွၼ်ႉၼၢင်းယိင်းဢွၼ်ႇၵေႃႉၼၼ်ႉ ၵႂႃႇလႄႇသေဢမ်ႇပွၵ်ႈမႃးၶိုၼ်းႁိူၼ်းႁိုင် 3 ဝၼ်းယဝ်ႉလႄႈ ၵေႃႉပဵၼ်ပီႈၼၢင်း ၸင်ႇတႅပ်းတတ်းၵႂႃႇတိူင်ႇၸႅင်ႈလိူင်ႈတီႈႁူင်းပလိၵ်ႈႁွင်ႈလိုၵ်ႉ ဢၼ်မီးၼႂ်းဝဵင်းတႃႈၶီႈလဵၵ်း။ ၽွင်းၼၼ်ႉ ပလိၵ်ႈလၢတ်ႈမၼ်းၼၢင်းဝႃႈ ထူပ်းႁၼ်ဝႆႉတူဝ်တၢႆၼၢင်းယိင်းဢွၼ်ႇၵေႃႉၼိုင်ႈ ။ ဢမ်ႇမီးပီႈၼွင်ႉၵူၼ်းႁူႉၸၵ်းမႃးႁႃမႃးထၢမ်လႄႈ ၽဝ်ပႅတ်ႈတူဝ်တၢႆမၼ်းယဝ်ႉဝႃႈၼႆ။
ပီႈၼွင်ႉၸိူဝ်ႉၶိူဝ်း ယိင်းဢွၼ်ႇၵေႃႉၺႃးၶႃႈတၢႆၵႂႃႇၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ပီႈၼၢင်းမၼ်းၵႂႃႇတိူင်ႇ တီႈႁူင်း ပလိၵ်ႈဝႃႈ ၼွင်ႉယိင်းမၼ်းႁၢႆၵႂႃႇမီး 3 ဝၼ်းယဝ်ႉ။ ဢမ်ႇမႃး ႁိူၼ်းၼႆ။ ၽိူဝ်ႇၵႂႃႇထၢမ်တီႈႁူင်းပလိၵ်ႈ ယႄးၶဝ်ဝႃႈ ၽဝ်ပႅတ်ႈယဝ်ႉၼႆ။ မိူဝ်ႈၶဝ်ပႆႇၽဝ်ၼၼ်ႉသမ်ႉဢမ်ႇလၢတ်ႈဢမ်ႇထၢမ်ၵူၼ်းၼႂ်းမုင်ႉႁေႃႁိူၼ်း မၼ်းၼၢင်း။ ပီႈၼၢင်း မၼ်းၵေႃႈ ဢမ်ႇတၼ်းႁူႉ၊ ဢမ်ႇတၼ်းလႆႈႁၼ်တူဝ်တၢႆမၼ်း” ဝႃႈၼႆ။
ၵဵဝ်ႇလူၺ်ႈၸုမ်းပလိၵ်ႈဝဵင်းတႃႈၶီႈလဵၵ်း ဢမ်ႇလၢတ်ႈၵူၼ်းၼႂ်းမုင်ႉႁေႃႁိူၼ်း ၼၢင်းယိင်းဢွၼ်ႇၵေႃႉၺႃးၶႃႈ ႁႅမ်တၢႆၵႂႃႇၼၼ်ႉသေ ၽဝ်တူဝ်တၢႆပႅတ်ႈဢွၼ်တၢင်းၼၼ်ႉ ၵူၼ်းမိူင်း ပိုၼ်ႉတီႈဝဵင်းတႃႈၶီႈလဵၵ်းၶဝ် ဢွၼ်ၵၼ် ထတ်းသၢင်ဝႃႈ ပဵၼ်ၵၢၼ်ယႃႉပႅတ်ႈသၢၵ်ႈသေႇလၵ်းထၢၼ် ႁႂ်ႈၵူၼ်းႁဵတ်းၽိတ်ႈပူၼ်ႉတူတ်ႈတၢမ်ႇၵူၺ်း ၼႆယဝ်ႉ။
ဝၢႆးလင်သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးၼႆႉ ၸႄႈဝဵင်းၸိူဝ်းယူႇတိတ်းၸပ်းလႅၼ်လိၼ် မိူင်းတႆး-မိူင်းထႆး မိူၼ်ၼင်ႇဝဵင်းတႃႈၶီႈလဵၵ်း ဢၼ်သိုၵ်းမၢၼ်ႈ ၽွင်းငမ်းပဵၼ်တၢင်း ၵၢၼ်ယူႇၼႆႉ ယိင်းၼုမ်ႇ၊ ၸၢႆးၼုမ်ႇ ဢႃႇယု 20 ပီပၢႆၶိုၼ်ႈၼိူဝ်ၵႆႉႁၢႆ၊ ၵူၼ်းမိူင်းပိုၼ်ႉတီႈၵႆႉၺႃးၸူၼ်၊ တီႉၺွပ်းတူဝ်ၵႂႃႇယဝ်ႉယွၼ်းၵႃႈ ထုတ်ႇတူဝ်ၶိုၼ်းၸိူဝ်းၼႆႉ ၵႆႉၵႆႉပဵၼ်ထပ်းၵၼ်မႃးႁၢဝ်ႈႁႅင်း။ ၾၢႆႇၼိုင်ႈၵေႃႈ ၸဝ်ႈၼႃႈတီႈပလိၵ်ႈ တင်း ၽူႈၵုမ်းၵၢၼ်ၽွင်းငမ်းဝဵင်းၶဝ် ဢမ်ႇဢဝ်လိူင်ႈလၢဝ်းသင်လႆႈပဵၼ်တၢင်းၵၢၼ်တေႉတေႉ – ၵူၼ်းပိုၼ်ႉတီႈလၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ