ပျီႇတူႉၸိတ်ႉ PNO ႁွင်ႉဢဝ်ၵူၼ်းဢၼ်မီးၼႂ်း ၸႄႈဝဵင်းတူၼ်ႈတီး ၊ ၸႄႈဝဵင်းသီႇသႅင်ႇ ၊ ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း ၸိူဝ်းယၢမ်ႈၾိုၵ်းၵၢၼ်သိုၵ်းၼႂ်းပျီႇတူႉၸိတ်ႉ PNO ၼၼ်ႉသေ သူင်ႇပိုၼ်ႉတီႈပဵၼ်ပၢင်တိုၵ်း ၼႆယဝ်ႉ  ။

တႄႇၼႂ်းႁူဝ်လိူၼ် ၾႅပ်ႊပိဝ်ႊရီႊမႃးၼႆႉ သိုၵ်းမၢၼ်ႈႁူမ်ႈပျီႇတူႉၸိတ်ႉပဢူဝ်း PNO ပဵၼ် ပၢင်တိုၵ်း ပိုတ်းယိုဝ်းၵၼ်တင်း PNLA တီႈဝၢၼ်ႈပၢင်မၢၵ်ႇ  ၼႂ်းၸႄႈဝဵင်းမွၵ်ႇမႆႇႁၢဝ်ႈႁႅင်း ။ ဝၢႆးၼၼ်ႉ ပျီႇတူႉၸိတ်ႉ PNO ႁွင်ႉဢဝ်ၶိုၼ်းၵူၼ်းယၢမ်ႈၵႂႃႇၾိုၵ်းၵၢၼ်သိုၵ်းၸိူဝ်းၼၼ်ႉ ႁႂ်ႈမႃးၶဝ်ႈႁၢပ်ႇၵၢၼ်သိုၵ်း။

ၼၢင်းယိင်းၼႂ်းၼွင်ႁၢႆးယႃႈလၢတ်ႈၽူႈတွႆႇႁွၵ်ႈဝႃႈ -“ ၶဝ်ႁွင်ႉၶိုၼ်းၵူၼ်းယၢမ်ႈၵႂႃႇၾိုၵ်းၵၢၼ်သိုၵ်း ။ မိူဝ်ႈဢွၼ်တၢင်းတွၼ်ႈတႃႇဢဝ်ႁူမ်ႇလူမ်ႈၼႂ်းဝၢၼ်ႈၼႆသေ ၸႂ်ႉၵူၼ်းပိုၼ်ႉတီႈ ၵႂႃႇၾိုၵ်း ၵၢၼ်သိုၵ်း 7 ဝၼ်း ။  ၸိူဝ်းၼႆႉ ၶဝ်ႁွင်ႉၶိုၼ်း ၊ ၵူၼ်းၸိူဝ်းၼၼ်ႉဢမ်ႇလူဝ်ႇ သွၼ်ပၼ် ၵၢၼ်သိုၵ်းၶိုၼ်းလႄႈ ၶဝ်ႁွင်ႉသေ သူင်ႇလႆႈၼႃႈသိုၵ်းလႆႈၵမ်းလဵဝ် ၊ ၽွင်းပၢင်တိုၵ်းၼၼ်ႉ ၸုမ်းၶဝ် မီးၵူၼ်းလူႉတၢႆမၢတ်ႇၼမ်ၼႃႇၼႆ”- ဝႃႈၼႆ ။

မိူၼ်ၼင်ႇၼႆ ပျီႇတူႉၸိတ်ႉ PNO ႁွင်ႉၵူၼ်းဝၢၼ်ႈၼႂ်းဢိူင်ႇထုင်ႉပူင်း ၊ ဢိူင်ႇၼွင်မွၼ် ၊ ဢိူင်ႇဝၢၼ်ႈ ယဵၼ်ႇ ၼႂ်းၸႄႈဝဵင်းသီႇသႅင်ႇၼိုင်ႈပွၵ်ႈၼႆႉ 25-30  ၵေႃႉ ၊ ၵူၼ်းၸိူဝ်းထုၵ်ႇႁွင်ႉၵႂႃႇၼၼ်ႉ ထုၵ်ႇသူင်ႇၼႃႈသိုၵ်း ဢမ်ႇမီးၵူၼ်းပွၵ်ႈမႃးၶိုၼ်းလႄႈ ႁဵတ်းႁႂ်ႈၵူၼ်းပိုၼ်ႉတီႈ ဢမ်ႇႁတ်းၵႂႃႇ ပၢႆႈတၢင်းၼမ် – ၵူၼ်းပိုၼ်ႉတီႈလၢတ်ႈ ။

ၵူၼ်းၸၢႆးၼႂ်းထုင်ႉပူင်းလၢတ်ႈၽူႈတွႆႇႁွၵ်ႈဝႃႈ – “ပေႃး PNO ႁွင်ႉၵူၼ်းၼႆႉၼိုင်ႈဝၢၼ်ႈၼႆႉ လႆႈၵႂႃႇ 24 – 25 ၵေႃႉ ။ ပေႃးၵႂႃႇၼႆႉ25 ဝၼ်းၼိုင်ႈပွၵ်ႈ ပၼ်ႇပုတ်ႈၵၼ် လႆႈၵႂႃႇၼႃႈသိုၵ်း ၊ၶဝ်ႁွင်ႉၵူၼ်းသေ  ထူဝ်းသိုၵ်းၵႂႃႇတၢင်းပဵၼ်ပၢင်တိုၵ်းယူႇမိူဝ်ႈလဵဝ် တၢင်းမွၵ်ႇမႆႇၸိူဝ်းၼႆႉ ။ ၵူၼ်းထုၵ်ႇႁွင်ႉၵႂႃႇၼႆႉ ပေႃးၵႂႃႇ30 ၼႆႉ ပွၵ်ႈမႃးၶိုၼ်း 1 ၵေႃႉ ၊ ပေႃးၵႂႃႇ 40 ၼႆႉ မႃးၶိုၼ်း 2-3 ၵေႃႉၵူၺ်း ၵႂႃႇတူၵ်းၼႃႈသိုၵ်းၼမ်ၼႃႇ  ႁဵတ်းႁႂ်ႈၵူၼ်းတၢင်းလင်ၼႆႉ ဢမ်ႇႁဵတ်းၵႂႃႇ”- ဝႃႈၼႆ။   

လိူဝ်သေ ၵူၼ်းယၢမ်ႈၵႂႃႇၾိုၵ်းၵၢၼ်သိုၵ်း 7 ဝၼ်းၼၼ်ႉယဝ်ႉ ယၢမ်းလဵဝ် မီးၶၢဝ်ႇဢွၵ်ႇမႃးဝႃႈ ပျီႇတူႉၸိတ်ႉပဢူဝ်း တေႁွင်ႉထႅင်ႈ ၵူၼ်းဢၼ်ပၼ်ဝႆႉ သဵၼ်ႈၸိုဝ်ႈတႃႇႁၢပ်ႇၵၢၼ်သိုၵ်း ၸိူဝ်းမီး တီႈၼႂ်းၸႄႈဝဵင်းတူၼ်ႈတီးၼႆလႄႈႁဵတ်းႁႂ်ႈၵူၼ်းပိုၼ်ႉတီႈ မႆႈၸႂ်လွင်ႈႁူမ်ႈလူမ်ႈဝႆႉၼႆယဝ်ႉ ။

ၵူၼ်းၸၢႆးၼႂ်းၸႄႈဝဵင်းသီႇသႅင်ႇလၢတ်ႈၽူႈတွႆႇႁွၵ်ႈဝႃႈ -“ပေႃးပၼ်သဵၼ်ႈၸိုဝ်ႈတီႈပျီႇတူႉၸိတ်ႉပဢူဝ်းယဝ်ႉ ထၢင်ႇဝႃႈ တေဢမ်ႇလႆႈၵႂႃႇႁၢပ်ႇၵၢၼ်သိုၵ်းမၢၼ်ႈယဝ်ႉၼႆ ၊ ၵမ်းၼႆႉလႆႈယိၼ်းဝႃႈ ၶဝ်ႁွင်ႉၵူၼ်းဢၼ်ပၼ်သဵၼ်ႈမၢႆၸိူဝ်းၼၼ်ႉၼႆဢေႃႈ ၊ ငိုၼ်းတႃႇသိုၵ်းမၢၼ်ႈၵေႃႈလႆႈသႂ်ႇ ၊ တႃႇPNO ၵေႃႈ လႆႈသႂ်ႇ ၊ ၵူၼ်းမိူင်းႁဝ်းၶႃႈႁဵတ်းႁိုဝ်ၵေႃႈယၢပ်ႇၼႃႇၶႃႈ”-ဝႃႈၼႆ ။

ၵူၼ်းဢၼ်မီးၼႂ်း ၺွင်ႇၽိဝ်ႇသၶၢၼ်း ၊ ၽြႃးၽိူၵ်ႇ ၊ ၵၢၼ်ႇၵျီး ၊ ၵျွင်းၵျီးသူႉ ၼႂ်းၸႄႈဝဵင်းတူၼ်းတီႈလႄႈ ၵူၼ်းဝၢၼ်ႈ ၼႂ်းထုင်ႉၸၢမ်ႇၵႃး ၼႂ်းၸႄႈဝဵင်းယွင်ႁူၺ်ႈ လႄႈ ၼႂ်းထုင်ႉပူင်း ၸႄႈဝဵင်းသီႇသႅင်ႇ ၸိူဝ်းၼႃႈတီႈပျီႇတူႉၸိတ်ႉၵုမ်းၵမ်ဝႆႉၼၼ်ႉ တေလႆႈၵႂႃႇႁၢပ်ႇၵၢၼ်သိုၵ်း ၼႆယဝ်ႉ ။

ၵဵဝ်ၵပ်းလွင်ႈၼႆႉ ၽူႈၶၢၼ်ပၢၵ်ႇ ပျီႇတူႉၸိတ်ႉPNO ၶုၼ်ႇတၢၼ်းၵျွႆႇလၢတ်ႈၽူႈတွႆႇႁွၵ်ႈဝႃႈ -“ ဢမ်ႇၸႂ်ႈဝႃႈႁွင်ႉၵႂႃႇႁၢပ်ႇၵၢၼ်သိုၵ်း ၊ တွၼ်ႈတႃႇတေဢဝ်ႁူမ်ႇလူမ်ႈၼႂ်းပိုၼ်ႉတီႈသေ ပၼ်ပၢင်သွၼ်ၵူၺ်း ၊ ပေႃးပၢင်သွၼ်ယဝ်ႉၵေႃႈ မိူဝ်းယူႇၶိုၼ်းတီႈဝၢၼ်ႈၽႂ်မၼ်းၵူၺ်း ၊ တွၼ်ႈတႃႇတေဢဝ်ႁူမ်ႇလူမ်ႈၼႂ်းဝၢၼ်ႈၸဝ်ႈၵဝ်ၽႂ်မၼ်းၼႆႉ ၵၢၼ်သိုၵ်းၼႆႉ လီမေႃဝႆႉၵူႈၵေႃႉ ”-ဝႃႈၼႆ ။

ပၢင်သွၼ်ဢၼ်ၸုမ်းပျီႇတူႉၸိတ်ႉၸတ်းႁဵတ်းၼၼ်ႉ မီး 45 ဝၼ်းထိုင် 6 လိူၼ် ယၢမ်းလဵဝ်တႄႉ ဢမ်ႇမီးပၢင်သွၼ်တွၼ်ႈတႃႇပၼ်သင်ၼႆ- မၼ်းၸၢႆးသိုပ်ႇလၢတ်ႈထႅင်ႈၼင်ႇၼႆ ။

မိူၼ်ၼင်ႇၼႆ ၼႂ်းလိူၼ်ဢွၵ်ႊထူဝ်ႊပိူဝ်ႊ ပီ2025 ပူၼ်ႉမႃးၼႆႉၵေႃႈ ပျီႇတူႉၸိတ်ႉ တဵၵ်းၸႂ်ႉၵူၼ်းဝၢၼ်ႈၵႂႃႇၼႃႈသိုၵ်းၼႆႉပဵၼ်ၵူၼ်းဝၢၼ်ႈၼမ်ႉဢုၼ်ႇလႄႈ ၊ ဝၢၼ်ႈထီႇရီး ဢၼ်ပဵၼ်ဝၢၼ်ႈယႂ်ႇၼႂ်းထုင်ႉၸၢမ်ၵႃး ၼိုင်ႈဝၢၼ်ႈ 20 ၵေႃႉ သူင်ႇၼႃႈသိုၵ်း တီႈတၢင်းၼႂ်းၸႄႈဝဵင်းပၢင်လွင်း – ၾၢႆၶုၼ် လႅၼ်လိၼ် တႆး- ယၢင်းလႅင် ၸိူဝ်းၼၼ်ႉ ဝႃႈၼႆ ။

ဝၢႆးလင် သိုၵ်းမၢၼ်ႈယိုတ်းမိူင်းမႃးၼႂ်းၶၢဝ်းတၢင်း 5 ပီၼႆႉ ပျီႇတူႉၸိတ်ႉပဢူဝ်း PNO ၶဝ်ၵဵပ်းၵူၼ်းၼႂ်းၸႄႈဝဵင်းသီႇသႅင်ႇ ၊ ပၢင်လွင်း ၊ ႁူဝ်ပူင်း သူင်ႇၾိုၵ်းၵၢၼ်သိုၵ်း သူင်ႇၼႃႈသိုၵ်း ၼႆယဝ်ႉ ၊ လိူဝ်ၼၼ်ႉ လႆႈတိုဝ်ႉတၢင်းၶဝ်ႈဢဝ်တီႈယူႇၼႂ်းဝၢၼ်ႈသေ ၵဵပ်းၵူၼ်းဝၢၼ်ႈ သူင်ႇၾိုၵ်းၵၢၼ်သိုၵ်းယဝ်ႉ ၼႄၶေႃႈဢၢင်ႈလွင်ႈၼိုင်ႈယဝ်ႉ လွင်ႈၼိုင်ႈ ၵဵပ်းၶွၼ်ႇၵူၼ်းမိူင်း ၼႂ်းထုင်ႉၸၢမ်ၵႃးမႃးၶိူဝ်းယႂ်း။