ပီၼိုင်ႈယဝ်ႉပီၼိုင်ႈၼႆႉ ၶၢဝ်းယၢမ်းလႅၵ်ႈလၢႆႈဝႆးၼႃႇ။ ၶၢဝ်းၵတ်းဢမ်ႇပေႃးတၼ်းႁိုင်ၵႃႈႁိုဝ် လိူၼ်ထူၼ်ႈ 2 ယင်းပႆႇမူတ်း ယၢမ်းလဵဝ်သမ်ႉပေႃးမႆႈၼႃႇယဝ်ႉ။ ပေႃးထိုင်ၶၢဝ်းမႆႈမႃးၸိူင်ႉၼႆ ၾႆးၵေႃႈလၢမ်းမႆႈဝႆး။ ပေႃးၾႆးမႆႈၼႂ်းဝၢၼ်ႈ ဢမ်ႇၼၼ်ၼႂ်းႁိူၼ်းႁဝ်း ႁဝ်းတေလႆႈႁဵတ်းသင်ဢွၼ်တၢင်း၊ ႁဝ်းတေလႆႈႁဵတ်းႁိုဝ်ဢဝ်တူဝ်လွတ်ႈ ။ ႁဝ်းတေလႆႈႁဵတ်းႁိုဝ်ၶႄ။ ၼင်ႇႁိုဝ်ၾႆးတေဢမ်ႇ မႆႈႁိူၼ်းႁဝ်းၼၼ်ႉ ႁဝ်းတေႁဵတ်းႁိုဝ်ၾၢင်ႉ။

ၸွမ်းၼင်ႇႁူဝ်ၼပ်ႉၵူၼ်းၼႂ်းလုမ်ႈၾႃႉ  ၼမ်ၶိုၼ်ႈမႃးၵူႈဝၼ်းသေ တီႈဝဵင်းယႂ်ႇဝဵင်းလူင်ၶႂ်ႈ ဝႃႈၵူႈဝဵင်းၵေႃႈမီး ႁိူၼ်းတိုၵ်းယႂ်ႇသုင်  ၼမ်ၶိုၼ်ႈမႃး ၵူႈဝၼ်းၵူႈဝၼ်း။

ယိင်ႈပဵၼ်ဝၢၼ်ႈဝဵင်းၶိုၼ်ႈယႂ်ႇၶိုတ်းၵၢပ်ႈလူင်ၵႃႈႁိုဝ်ၵေႃႈယဝ်ႉ ယိင်ႈမီးၽေးၼမ်လၢႆၵူၼ်းမိူင်းၵႃႈၼၼ်ႉ။ ၽေးသၽႃႇဝမၢင်ၸိူဝ်းႁဝ်းၶႃႈဢမ်ႇယၢမ်ႈၶုၵ်းဝူၼ်ႉႁွတ်ႈထိုင် ၊ ဢမ်ႇယၢမ်ႈထူပ်းယၢမ်ႈႁၼ်ၵေႃႈ လႆႈႁၼ်မႃး။ မိူၼ်ၼင်ႇ ၽေးၼမ်ႉထူမ်ႈ၊ ၽေးလိၼ်ယုပ်းလိၼ်လူမ်ႇ ၽေးတိုၵ်းၵူၼ်ႇႁိူၼ်းၵူၼ်ႇ ၽေးၾႆးမႆႈၸိူဝ်းၼႆႉ – ပဵၼ်ၽေးယႂ်ႇတႃႇၵူၼ်းမိူင်း။

ဝၢႆးသေလႆႈႁၼ် လွင်ႈပိူင်ပဵၼ်ၾႆးမႆႈတီႈ ႁွင်ႊၵွင်ႊယဝ်ႉ ၵူၼ်းၸိူဝ်း ယူႇသဝ်းၸွမ်းႁိူၼ်းတိုၵ်းသုင်လူင် ၼႂ်းလုမ်ႈၾႃႉလၢႆလၢႆတီႈ   မီးၶေႃႈထၢမ်ဝႆႉ ၼႂ်းၸႂ်ႁင်းၽႂ်မၼ်းယူႇဝႃႈ “သင်ၾႆးမႆႈ ႁိူၼ်းတိုၵ်းတီႈဢၼ်ႁဝ်းယူႇၼႆႉၸိုင် တေလႆႈႁဵတ်ႁိုဝ်” ၼႆၸိူဝ်းၼႆႉ။

သင်ၺႃးၽေးၾႆးမႆႈမႃးၸိုင် ႁိူၼ်းတိုၵ်းၼၼ်ႉသုင်ၵႃႈႁိုဝ်ၵေႃႈ လွင်ႈလွတ်ႈၽေးၵူၼ်းယူႇသဝ်းတီႈ ၼၼ်ႈ တေယွမ်းလူင်းၵႂႃႇၵႃႈၼၼ်ႉ။ ၵူၺ်းၵႃႈ ၼႂ်းၵႄႈငဝ်းလၢႆးၸိူင်ႉႁိုဝ်သေဢမ်ႇဝႃႈ တႃႇတေၸၢင်ႈ ဢဝ်တူဝ်လွတ်ႈလႆႈၼၼ်ႉ တိုၼ်းမီးဝႆႉလွၵ်းလၢႆးမၼ်းယူႇ။

တီႈမိူင်းယူႇၶေႇ(UK)တႄႉ သင်ထူပ်းႁၼ်ၾႆးမႆႈႁိူၼ်းတိုၵ်းသေလင်လင်ၸိုင် ႁႂ်ႈသိုပ်ႇၾူၼ်းၸူးတီႈ 999  ။ သင်ထူပ်းႁၼ်ၾႆးမႆႈႁိမ်းဢွင်ႈတီႈႁဝ်းယူႇသဝ်းၸိုင် ဢွၼ်တၢင်းသုတ်း တေလႆႈဢဝ် တူဝ်လွတ်ႈ။ ပေႃးတူဝ်ၸဝ်ႈၵဝ်ႇလွတ်ႈယဝ်ႉၸင်ႇၸွႆႈထႅမ်ပိူၼ်ႈ၊ ၸင်ႇပၼ်ၾၢင်ႉပိူၼ်ႈလႆႈႁႂ်ႈငိူင်ႉၸိူင်ႉႁိုဝ် -တေႁဵတ်းႁိုဝ်ႁႂ်ႈလွတ်ႈၽေး ၸဵမ်ၸိူဝ်းၼႆႉ။

ႁႂ်ႈၵပ်းသိုပ်ႇၸူးတီႈ မၢႆၾူၼ်းၾၢႆႇၸွႆႈထႅမ် ၽေးၵိုင်ႉၵၢင်ႉ၊ တေဢမ်ႇလႆႈဝူၼ်ႉဝႃႈ သေၵေႃႉၵေႃႉ သိုပ်ႇၾူၼ်းယွၼ်းတၢင်းၸွႆႈထႅမ်ဝႆႉယဝ်ႉ လႄႈ တူဝ်ႁဝ်းဢမ်ႇလူဝ်ႇသိုပ်ႇယဝ်ႉ ၼႆလႃးလႃး။ ယွၼ်ႉပိူဝ်ႈဝႃႈ ၽေးၾႆးၼႆႉ ႁူႉဝႆႉမွၵ်ႈႁိုဝ်ၵေႃႈ ၸွႆႈထႅမ်ၵၼ်လႆႈ ဝႆးမွၵ်ႈၼၼ်ႉသေ တေတိူဝ်းၸွႆႈထႅမ် သၢႆၸႂ်ၵူၼ်းလႆႈၼမ် ။

မိူၼ်ၼင်ႇမိူင်းတႆးႁဝ်းတႄႉ ဝဵင်းလႂ်ဝဵင်းၼၼ်ႉတေမီး ၸုမ်းၶႄၾႆး။ တႃႇတေၵပ်းသိုပ်ႇၸူးၸုမ်းၶႄၾႆးမႃးၸွႆႈၼၼ်ႉၵူႈၵေႃႉတၵ်းတေလႆႈမီးဝႆႉ မၢႆၾူၼ်ႊမၢႆၵပ်းသိုပ်ႇ ၸုမ်းၶႄၾႆး၊ ၸုမ်းၸွႆႈထႅမ်တူင်ႇဝူင်းၵူၼ်း၊ ၸုမ်းပရႁိတ  ၊ မၢႆၾူၼ်ႊၵၢင်ႉၵႄႇဝၢၼ်ႈဢိူင်ႇ တေႃႇထိုင် မၢႆၾူၼ်ႊလုမ်းၽွင်းငမ်းၸႄႈဝဵင်းၸိူဝ်းၼႆႉတၵ်းတေလႆႈၵဵပ်းဝႆႉလီလီ။

ၽွင်းထူပ်းၽေးၾႆးၼၼ်ႉ ဢၼ်ႁဝ်းတေလႆႈႁဵတ်းထီႉသွင်သမ်ႉ  ပိူင်လူင်တေလႆႈၶတ်းၸႂ်ႁဵတ်းႁႂ်ႈ ၸႂ်ၼိမ်။ ယႃႇပေတူၵ်းၸႂ်သေ လႅၼ်ႈပၢႆႈ။ ႁႂ်ႈဝႆႉၸႂ်ၼိမ်ၼိမ်သေ ပႆပၢႆႈဢွၵ်ႇၸွမ်း သဵၼ်ႈတၢင်း ဢၼ် တေလွတ်ႈၽေး။ သင်ၵူၼ်းၼမ်ၸိုင် ႁႂ်ႈဢွၵ်ႇပဵၼ်ထႅဝ်။ ယႃႇပေၽိုတ်ႉၵၼ်ႁိမ်ၵၼ်ဢွၵ်ႇ။   ပေႃးႁိမ် ၵၼ်ဢွၵ်ႇ  ၸၢင်ႈယဵပ်ႇၵၼ်တၢႆ ၊  ၵူၼ်းတေ ၵႂႃႇၶမ်ၵၼ်တီႈႁူးၽၵ်းတူသေ တေဢမ်ႇၸၢင်ႈဢွၵ်ႇ – ယိင်ႈၶႅၼ်းမီးၽေး။   

ၵူၺ်းၵႃႈ သဵၼ်ႈတၢင်းပၢႆႈၽေးၾႆး ၸွမ်းႁိူၼ်းတိုၵ်းသုင်ၼႆႉ လိူဝ်သေလူင်းၸွမ်း ၶူဝ်လႆယဝ်ႉ ဢမ်ႇမီး လွၵ်းလၢႆးတၢင်ႇဢၼ်ထႅင်ႈ။ ၵွပ်ႈၼၼ်လႄႈ ၵူၼ်းၸိူဝ်းယူႇသဝ်းၼိူဝ် ႁိူၼ်းတိုၵ်းသုင်ၵူႈၸၼ်ႉၸၼ်ႉ တေလႆႈၸႂ်ႉ ၶူဝ်လႆဢၼ်လဵဝ်ၵၼ်သေပၢႆႈၵူၺ်းလႄႈ တေၸၢင်ႈႁဵတ်းႁႂ်ႈၵူၼ်းပိၵ်ႉၶမ်ၸွမ်း  ၶူဝ်လႆ။

မိူဝ်ႈၽွင်းလူင်းၸွမ်းၶူဝ်လႆၼၼ်ႉၵေႃႈ ၶၢဝ်းယၢမ်းတေၸၢင်ႈႁိုင်လိူဝ်သေ ဢၼ်ၶၢတ်ႈလၢမ်းဝႆႉ။ ယွၼ်ႉ လႆႈပႆတၢင်ႈႁိုင်လႄႈ ယၢင်ႈတိၼ်တေထိူင်းသေ ၶၢဝ်းယၢမ်းတေတိူဝ်းႁိုင်ၵႂႃႇ။ တီႈႁိူၼ်းတိုၵ်းသုင်လူင် ၼႆႉ သင်ဝႃႈတေပႆတၢင်းလူင်းၸွမ်းၶူဝ်လႆၸိုင် တီႈဢေႇသုတ်းတႄႉ တေလႆႈၵိုတ်းလိုဝ်ႈႁိူဝ်ႉယူႇ ၼိုင်ႈ ၵမ်း။

မိူဝ်ႈၾႆးမႆႈႁိူၼ်းတိုၵ်းသုင်လူင် တီႈသျႅၼ်ႊႁၢႆး၊ မိူင်းၶႄႇ ပီ 2010 ၼၼ်ႉ ၵူၼ်းၸိူဝ်းဢႃယုယႂ်ႇသေ ပႆလူင်းၶူဝ်လႆ လွတ်ႈသၢႆၸႂ်မႃးမွၵ်ႈၼိုင်ႈၶိုင်ႈၼၼ်ႉ ဢွၼ်ၵၼ်လၢတ်ႈဝႃႈ ယၢင်ႈတိၼ်ထိူင်းၵႂႃႇသေ လႆႈ ၸႂ်ႉၶၢဝ်းယၢမ်းႁိုင် ဝႃႈၼႆ။

ယၢင်ႈပႆၽဵင်ႈၽဵင်ႈ ဢမ်ႇထိူင်းလႄႈဢမ်ႇဝႆး

မိူဝ်ႈၽွင်းပႆၵႂႃႇၸူး ဢွင်ႈတီႈလွတ်ႈၽေးၼၼ်ႉ သင်ပဵၼ်မုင်ႉႁေႃႁိူၼ်းၸိူဝ်းမီးဝႆႉ ၵူၼ်းထဝ်ႈ/ၵူၼ်း ဢႃယု ယႂ်ႇလႄႈ လုၵ်ႈဢွၼ်ႇၸိုင် ၶၢဝ်းယၢမ်းတေႁိုင်လိူဝ်။ ယွၼ်ႉပိူဝ်ႈတေလႆႈၸုင်ၸၼ်ၵၼ် သေၵႂႃႇ လႄႈ ၵူၼ်းတေၵႂႃႇၶွၼ်ႈတုမ်ၵၼ်သေ ဢမ်ႇၸၢင်ႈပႆၵႂႃႇၵမ်းၵေႃႉၵေႃႉ။ လွင်ႈၼႆႉ တေႁဵတ်းႁႂ်ႈၼၢၼ်း ၵႂႃႇထိုင် ဢွင်ႈတီႈဢၼ်လွတ်ႈၽေး။

  သင်ဝႃႈယိပ်းၸၼ်သိူဝ်ႈ/ႁူဝ်ၵူၼ်ၵၼ်သေၵႂႃႇပဵၼ်ထႅဝ်ၸိုင်ၼင်ႇငူးလိူၼ်ႈၼၼ်ႉၸိုင်တေၶႅၼ်းဝႆး။ၽွင်းယၢင်ႈၽွင်းပႆ လႄႈၽွင်းလူင်းၶူဝ်လႆၸိူဝ်းၼႆႉ တႃႇႁႂ်ႈၸႂ်ၼိမ် ယႃႇႁႂ်ႈၵူဝ်ႁႅင်းၸိုင် ႁႂ်ႈၼမ်ႉဢၢၼ်ႇ  1၊ 2၊ 3၊ 4 …ၼႆလူင်ၵႂႃႇယၢင်ႈတိၼ်ၽဵင်ႇၽဵင်ႇ။

မိူဝ်ႈၽွင်းလုၵ်ႉၼိူဝ်ႁိူၼ်းတိုၵ်းသုင်သေ လူင်းတၢင်းတႂ်ႈၼၼ်ႉ တေၸၢင်ႈႁူပ်ႉၺႃးၵၼ်တၢင်း ၽူႈႁၢပ်ႇ ၵၢၼ် ၾၢႆႇၶႄၾႆးၶဝ် ၸိူဝ်းၶိုၼ်ႈၵႂႃႇတၢင်းၼိူဝ်ႁိူၼ်းတိုၵ်းၼၼ်ႉလႄႈ တေလႆႈၾၢင်ႉသတိပႃး။

ၽူႈလူင်ႉလႅၼ်ႇၶဝ်လၢတ်ႈဝႃႈ – တႃႇတေပၢႆႈဢဝ်တူဝ်လွတ်ႈ မိူဝ်ႈၽွင်းၾႆးမႆႈႁိူၼ်းတိုၵ်းသုင်ၼၼ်ႉ လွင်ႈႁၢင်ႈႁႅၼ်းတူဝ်ႈတၼ်းဝႆႉၼႆႉ ပဵၼ်လမ်ႇလွင်ႈသုတ်းယဝ်ႉ ဝႃႈၼႆ။ ၵူၼ်းၸိူဝ်းယူႇသဝ်းၸွမ်း ႁိူၼ်း တိုၵ်းသုင်ၼႆႉ တေလႆႈႁူႉဝႆႉ သဵၼ်ႈတၢင်းပၢႆႈၽေးၾႆး မီးတီႈလႂ်၊ ပိူင်လူင်မၼ်း သင်ၺႃးၾႆးမႆႈယၢမ်း ၵၢင်ၶိုၼ်းၸိုင် သဵၼ်ႈတၢင်းပၢႆႈၽေးမီးတၢင်းလႂ် ၼႆၸိူဝ်းၼႆႉ။

တႅၼ်းတီႈတေၸႂ်ႉ ၶူဝ်လႆထၢတ်ႈသေၶိုၼ်ႈလူင်းယူႇတႃႇသေႇၼၼ်ႉ မၢင်ပွၵ်ႈၵေႃႈႁႂ်ႈပႆ ၶိုၼ်ႈလူင်းၸွမ်း ၶူဝ်လႆတူၺ်း ၼင်ႇႁိုဝ်တေၸၢင်ႈၶၢတ်ႈလၢမ်းႁူႉလႆႈဝႃႈ ပေႃးထူပ်းၽေးၵိုင်ႉၵၢင်ႉမႃးတေႁဵတ်းႁိုဝ်ဢဝ် တူဝ်လွတ်ႈ။ လွင်ႈႁၢင်ႈႁႅၼ်းတူဝ်ဝႆႉၼႆႉ ပဵၼ်လွင်ႈၽွမ်ႉတူဝ်ႈတၼ်း မိူဝ်ႈၽွင်းထူပ်းၺႃးၽေးၵိုင်ႉၵၢင်ႉ ၼႆယဝ်ႉ။

သင်ထူပ်းၺႃးၽေးၵိုင်ႉၵၢင်ႉ ဢမ်ႇၼၼ် ငိၼ်းသဵင်ပၼ်ၾၢင်ႉလွင်ႈၾႆးမႆႈၼႆၸိုင် ၵူၼ်းႁဝ်းတေမေႃ ၵႂင်သေ ဢမ်ႇႁူႉဝႃႈတေလႆႈႁဵတ်းသင်ဢွၼ်တၢင်း။ ၵူၼ်းၸိူဝ်းလွတ်ႈသၢႆၸႂ် ဢွၵ်ႇမႃးတီႈၽေး ၾႆးမႆႈၼႆႉ ၵမ်ႈၼမ် ပဵၼ်ၸိူဝ်း ႁဵတ်းသၢင်ႈတုမ်ႉတွပ်ႇလႆႈၼိူဝ်လွင်ႈၼၼ်ႉၼင်ႇဝႆးၽႂ်း၊ ပဵၼ်ၵူၼ်းၸိူဝ်းႁူႉဝႆႉ သဵၼ်ႈ တၢင်း ပၢႆႈၽေးၾႆး၊ ၵူၼ်းၸိူဝ်းၶဝ်ႈပႃးၼႂ်းလွင်ႈ ပၼ်ပိုၼ်ႉႁူႉၽေးၾႆးမႆႈသေ မၢႆတွင်းႁဵတ်းသၢင်ႈၸွမ်း လီငၢမ်း ၸဵမ်ၸိူဝ်းၼႆႉ။

လိူဝ်ၼၼ်ႉ ႁိူၼ်းတိုၵ်းၸိူဝ်းၼႆႉၵေႃႈ ထုၵ်ႇလီလႆႈၵေႃႇသၢင်ႈႁဵတ်းဝႆႉ ႁႂ်ႈမႅၼ်ႈၸွမ်းၼင်ႇ ပိူင်ၵႅတ်ႇ ၶႄႁႄႉၵင်ႈၽေးၾႆးလီလီ မိူၼ်ၼင်ႇသႂ်ႇဝႆႉၽၵ်းတူ ဢၼ်တေၸင်ႈၶၢမ်ႇတၢမ်ႇၾႆးလႆႈ၊  ၸႅၵ်ႇၽႄႁွင်ႈ တီႈယူႇသဝ်းဝႆႉ  ၼင်ႇႁိုဝ်တေၸၢင်ႈၵႅတ်ႇၶႄၽေးၾႆး၊ သင်ၺႃးၽေးၾႆးမႆႈမႃး ၼင်ႇႁိုဝ်တေၸၢင်ႈပၢႆႈ ဢွၵ်ႇလႆႈလူၺ်ႈလွတ်ႈၽေး  ။

 ၼင်ႇႁိုဝ်ၾႆးတေဢမ်ႇမႆႈႁိူၼ်းယေးၸဝ်ႈၵဝ်ႇၼၼ်ႉ တေလႆႈၾၢင်ႉၸိူင်ႉႁိုဝ် တေလႆႈယူႇသဝ်းၸိူင်ႉႁိုဝ်

ၼင်ႇႁိုဝ်ၾႆးတေဢမ်ႇမႆႈယွၼ်ႉၸဝ်ႈၵဝ်ႇၼၼ်ႉ – ယႃႇတႆႈၾႆးတဵၼ်းဝႆႉသေ ၵႂႃႇတႂ်ႈမိူဝ်းၼိူဝ် ယႃႇတင်ႈမေႃႈၶဝ်ႈမေႃႈၽၵ်းဝႆႉၼိူဝ်ၾႆးသေ ၵႂႃႇတႂ်ႈမိူဝ်းၼိူဝ်။ ယႃႇပၼ်လုၵ်ႈဢွၼ်ႇလဵၵ်ႉ ၵူၼ်းထဝ်ႈ ၵူၼ်းမီးတၢင်းပဵၼ်ပၢႆးတူဝ် ဢမ်ႇၼၼ်တၢင်းပဵၼ်ပၢႆးၸႂ်ၸိူဝ်းၼႆႉႁုင်ၶဝ်ႈႁဵတ်းၽၵ်း။ မဵဝ်းတေၸၢင်ႈပဵၼ်ၸိူဝ်ႉ/ယိူဝ်ႇၾႆးၼၼ်ႉယႃႇဝႆႉၸမ်ၽီးၾႆး။

တႃႇႁႂ်ႈၾႆးယႃႇမႆႈၼၼ်ႉ- တေလႆႈမီး ၽီးၾႆးလီလီ ႁိမ်းၵဵင်း ႁိမ်းၽီးၾႆးၼၼ်ႉ ႁႂ်ႈႁဵတ်းဝႆႉပၼ်ပၢင်ႇပၢင်ႇသႂ်သႂ်ၼင်ႇႁိုဝ်ၾႆးတေဢမ်ႇၸၢင်ႈလၢမ်းမႆႈငၢႆႈ။ တီႈႁိူၼ်းၸဝ်ႈၵဝ်ႇၼၼ်ႉ ႁႂ်ႈမီးပုင်းၼမ်ႉ ၊ မေႃႈၶႄၾႆးဝႆႉတဵမ်တဵမ်ထူၼ်ႈထူၼ်ႈ၊ ႁႂ်ႈဝႆႉတီႈဢၼ်ဢဝ်ငၢႆႈ၊ ၵူၼ်းႁိူၼ်းၵူႈၵေႃႉတၵ်းလႆႈမီးတၢင်းႁူႉၼႂ်းၵၢၼ်ၶႄၽေးၾႆး။ သၢႆၾႆး ပလၵ်ႉၾႆးၸိူဝ်းၼႆႉၵေႃႈႁႂ်ႈၵႆႉထတ်းၵႆႉတူၺ်း ၊ ပေႃးမၼ်းၶၢတ်ႇမၼ်းၵွႆ ႁႂ်ႈလႅၵ်ႈၵမ်းလဵဝ်။  ၼႂ်းဝၢၼ်ႈၼႂ်းၶူင်ႇၵေႃႈႁႂ်ႈၵႆႉသေႃႇၵႆႉလၢတ်ႈပၼ်ၾၢင်ႉၽေးၾႆးၵၼ်။ၵၢင်ၶမ်ႈၵၢင်ၶိုၼ်းၵေႃႈ ႁႂ်ႈပၼ်ႇပုတ်ႈၵၼ်ပႂ်ႉယၢမ်း။ ပေႃးပဵၼ်ၽီးၾႆးဢၼ်ၸႂ်ႉမေႃႈၵႅတ်ႉသ်ၼႆ ယႃႇဝႆႉတီႈတၼ်တီႈဢမ်ႇလႆႈလူမ်း။

ပေႃးၾႆးမႆႈႁိူၼ်းၸဝ်ႈၵဝ်ႇဢမ်ႇၼၼ်ပေႃးႁၼ်ၾႆးမႆႈၼႂ်းဝၢၼ်ႈၸိုင် – တေလႆႈတွႆႇတႅင်ႈလဵၵ်း တွႆႇမေႃႈ ပၼ်ၾၢင်ႉၵူၼ်းဝၢၼ်ႈ။ ယႃႇၶႄယူႇႁင်းၵူၺ်း။ ႁႂ်ႈယွၼ်းတၢင်းၸွႆႈထႅမ်ၵူၼ်းႁိမ်းႁွမ်း။ ပွင်ႇၶၢဝ်ႇၸူးၾၢႆႇၶႄၾႆး။ ႁႂ်ႈပၢၵ်ႈတၢင်းဝႆႉပၼ်ရူတ်ႉၵႃးၶႄၾႆးတေၶဝ်ႈမႃးၸွႆႈၶႄ။ ပေႃးပဵၼ်ၾႆးၾႃႉသျွတ်ႉၸိုင် ၼႅတ်ႈလႅၼ်ႈပိၵ်ႉၼဵၼ်ၾႆး ၼႅတ်ႈဢဝ်ၽႅၼ်ႇႁႅင်ႈမႃးၽတ်ႉမႃးၶႄ။

 တႃႇႁႂ်ႈၾႆးယႃႇမႆႈငၢႆႈၼၼ်ႉ ၸွမ်းႁိူၼ်းၸဝ်ႈၵဝ်ႇ ႁႂ်ႈၽဵဝ်ႈယုမ်းယွမ်ႇလႄႈယုၵ်းယၢၵ်းဝႆႉ မူတ်းမူတ်းသႂ်သႂ် ၊ ႁႂ်ႈဝႆႉပုင်းၶႄၾႆး လႄႈၶိူင်ႈယိပ်းဢၼ်ၶႄၾႆး တီႈဢၼ်ဢဝ်လႆႈငၢႆႈငၢႆႈမၼ်း။ ယႃႇၵဵပ်းဝႆႉ ၼမ်ႉမၼ်းၸၢၵ်ႈ ဢၼ်တေၸၢင်ႈပဵၼ်ၸိူဝ်ႉၾႆးလႆႈငၢႆႈ။ ပေႃးမီးၼမ်ႉမၼ်း လႄႈမေႃႈၵႅတ်ႉသ်ၸိုင်ယႃႇလႃႈလီတႆႈၾႆးတဵၼ်းဝႆႉႁိမ်းၸမ်။ ယႃႇၵႂႃႇလုတ်ႇလႅၼ်းယႃႈႁိမ်းၸမ်။

ပွင်ႈၵႂၢမ်းႁူဝ်ၼႆႉ ဢိင်ဢဝ်မႃးတီႈ BBC လႄႈ MRCA  ၶႃႈဢေႃႈ။