မိူဝ်ႈဝႃးဝၼ်းတီႈ 18/02/2026 ယၢမ်းၵၢင်ဝၼ်း သိုၵ်းၵဝ်ႈၵၢင်ႉ တင်း သိုၵ်းတဢၢင်း ၸိူဝ်းတူင်ႉၼိုင် ယူႇသဝ်းၼႂ်းဢိူင်ႇမိူင်းပႃး ၸႄႈဝဵင်းသႅၼ်ဝီ ပေႃႉထုပ်ႉႁႅမ်ၵၼ် တင်းသွင်ၾၢႆႇ မၢတ်ႇၸဵပ်းၵႂႃႇႁင်းၽႂ်မၼ်းတင်းၼမ်ယူႇဝႃႈၼႆ။

ဝၢႆးလင်သိုၵ်းၵဝ်ႈၵၢင်ႉ လိုပ်ႈလမ်း ႁွင်ႉဢဝ်ၵူၼ်းသိုၵ်းတဢၢင်း တၢင်ႇၵႃးၵႂႃႇဝႆႉတၢင်းထုင်ႉဢီႇၼၢႆးယဝ်ႉ ထႅင်ႈဝၼ်းၼိုင်ႈ ၵူၼ်းသိုၵ်း တဢၢင်းၶိုၼ်းႁွမ်ႁႅင်းသိုၵ်းသေၶိုၼ်ႈတၢင်း ထုင်ႉမိူင်းပႃးၸွမ်းသဵၼ်ႈတၢင်းထိူၼ်ႇ သေ ပေႃႉထုပ်ႉမင်ၵၼ်တင်းသိုၵ်းၵဝ်ႈၵၢင်ႉၼႆ ၵူၼ်းမိူင်းပိုၼ်ႉတီႈလၢတ်ႈ။

ၵူၼ်းမိူင်းၵေႃႉယူႇဝႆႉၼႂ်းဢိူင်ႇမိူင်းပႃး လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈဝႃးၶဝ်မင်ၵၼ် ပေႃႉၵၼ် ထုပ်ႉၵၼ် ၽၼ်းၵၼ်ၸွမ်းဝၢၼ်ႈ ၼႃးၵႅင်း ၼၼ်ႉ။ လမ်းႁႅမ်ၵၼ်ၸွမ်းၵႄႈၵၢင်ဝၢၼ်ႈၼႃးၵႅင်း တင်း ဝၢၼ်ႈၵွင်းဢၢႆႇ ႁိမ်းၼွင်ပႃလမ်ၸိူဝ်းၼၼ်ႉ ပေႃးပဵၼ်လိူတ်ႈပဵၼ်ယၢင်ၼၼ်ႉၼႃႇ။ ၶဝ်ဢမ်ႇလႆႈၶႂၢင်ႉလႄႈ ဢမ်ႇႁတ်းလၼ်ႇသဵင်ၵွင်ႈဢွၵ်ႇ။ ၸုမ်းလႂ်ပေႉ ၸုမ်းလႂ်ၸဵပ်းၼမ်တႄႉဢမ်ႇလႆႈႁူႉႁူဝ်ယွႆႈမၼ်း။ မၢင်ၵေႃႉၶႃပေႃးႁၵ်းပေႃးၵႅင်ႉၼင်ႇၵဝ်ႇဢိူဝ်ႈ” ဝႃႈၼႆ။

ဢိင်ၼိူဝ်ပၼ်ႁႃသိုၵ်းတဢၢင်း တင်းသိုၵ်းၵဝ်ႈၵၢင်ႉ ပေႃႉထုပ်ႉႁႅမ်ၵၼ် ယၢမ်းၵၢင်ၶမ်ႈ တီႈဝဵင်းၵူတ်ႉၶၢႆၼၼ်ႉသေ တင်းသွင်ၾၢႆႇၶဵင်ႇတီႉၺွပ်း လိုပ်ႈလမ်း ၵူၼ်းသိုၵ်းၸိူဝ်းပႂ်ႉလုမ်း၊ ပႂ်ႉၵဵတ်ႉလၢၼ်ႇၸိူဝ်းၼႆႉယဝ်ႉ ထႅမ်ႁႅင်းသိုၵ်း ၶဵင်ႈၶႅင်ၵၢၼ်သိုၵ်းတေႃႇၵၼ်ဝႆႉ ၼႆယဝ်ႉ။

ထိုင်မႃးမိူဝ်ႈၼႆႉ ဝၼ်းတီႈ 19/2/2026 ယၢမ်းၵၢင်ၼႂ်မွၵ်ႈ 7 မူင်းၼႆႉ လႆႈႁူႉဝႃႈ သိုၵ်းတဢၢင်းၸိူဝ်းပၼ်ႇၵၢၼ် ၽွင်းငမ်းဝႆႉတီႈဝဵင်းၼမ်ႉၶမ်း ၸတ်းႁႅင်းၵူၼ်းသိုၵ်းမွၵ်ႈ 150 ၵေႃႉ လုၵ်ႉတၢင်းဝဵင်းၼမ်ႉၶမ်း- လူင်းမႃးတၢင်း ဢိူင်ႇမိူင်းဝီး ဢၼ်မီးၼႂ်းၵႄႈၵၢင် ဝဵင်းၵူတ်ႉၶၢႆ တင်း ဝဵင်းၼမ်ႉၶမ်းၼၼ်ႉထႅင်ႈ ဝႃႈၼႆ။

ၵူၼ်းမိူင်းၵေႃႉယူႇၼႂ်းဝဵင်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈလဵဝ်ၼႆႉ လႆႈၾၢင်ႉယူႇၾၢင်ႇၵိၼ်ဝႆႉ ဢေႃႈ။ သဵင်ၵွင်ႈတႄႉဢမ်ႇပႆႇတႅၵ်ႇၼင်ႇၵဝ်ႇ။ တိုၵ်ႉယဵၼ်ဝႆႉယူႇ ၵူၺ်းႁဝ်းတႄႉဢမ်ႇႁတ်းယူႇမဝ်မၢင်။ ၶဝ်ထႅမ်ႁႅင်းယူႇႁင်းၽႂ်ႇႁင်းမၼ်း” ဝႃႈၼႆ။

ယွၼ်ႉငဝ်းလၢႆးၵၢၼ်သိုၵ်းၼႂ်းပိုၼ်ႉတီႈဢမ်ႇၼိမ်သဝ်း ၵူၼ်းသိုၵ်းၵဝ်ႈၵၢင်ႉ လႄႈ သိုၵ်းတဢၢင်း တူင်ႉတိုၼ်ႇမႃးၶိုၼ်းလိူဝ်ၵဝ်ႇလႄႈ ၸွမ်းတႃႈၸွမ်းတၢင်း ၼႂ်းဝဵင်းသႅၼ်ဝီ တင်း ၵူတ်ႉၶၢႆၼႆႉ ၵူၼ်းၵႂႃႇမႃးဢမ်ႇပေႃးၵိုၼ်း မိူၼ်ဢွၼ်တၢင်း ယဵၼ်ၵႂႃႇတေႉတေႉ ၼႆယဝ်ႉ။