မိူဝ်ႈဝႃးဝၼ်းတီႈ 17/02/2026 ယၢမ်းဝၢႆးဝၼ်းမွၵ်ႈ 3 မူင်းထိုင် 4 မူင်း သိုၵ်းၵဝ်ႈၵၢင်ႉ တီႈဝဵင်းသႅၼ်ဝီ ဢဝ်ၵႃးလူင် 3 လမ်း တေႃႉဢဝ်ၵူၼ်းသိုၵ်းတဢၢင်း ၸိူဝ်းပႂ်ႉၵဵတ်ႉလၢၼ်ႇလႄႈယူႇသဝ်းတူင်ႉၼိုင်ၸွမ်းၼႂ်းဢိူင်ႇမိူင်းပႃး ၸႄႈဝဵင်းသႅၼ်ဝီ တင်းသဵင်ႈ ၵႂႃႇသူင်ႇဝႆႉတၢင်းဝၢၼ်ႈဢီႇၼၢႆး ၸႄႈဝဵင်းလႃႈသဵဝ်ႈ ဝႃႈၼႆ။

ၵူၼ်းမိူင်းပိုၼ်ႉတီႈၵေႃႉယူႇဝႆႉၼႂ်းထုင်ႉမိူင်းပႃး လၢတ်ႈတီႈၽူႈတွႆႇႁွၵ်ႈဝႃႈ “ ၵွၼ်ႇၶဝ်ပႆႇလိုပ်ႈၵၼ် ဢဝ်ၵၼ်တၢင်ႇၵႃးၵႂႃႇတၢင်းဢီႇၼၢႆးၼၼ်ႉ ၶဝ်လၢတ်ႈၵူၼ်းဝၢၼ်ႈဝႃႈ ယႃႇဢွၵ်ႇ ႁိူၼ်း၊ ယႃႇၵႂႃႇတၢင်းလႂ်ၼႆ ယူႇ။ ၽိူဝ်ႇမိူဝ်ႈဝႃးတၢမ်းၶမ်ႈမွၵ်ႈ 3 မူင်းပၢႆ ၸိူဝ်းၼႆႉ ၶဝ်ပႃးၶွၼ်ႉပႃးမႆႉႁႄ လမ်းပေႃႉၵၼ်ထုပ်ႉၵၼ်တီႈ ၵဵတ်ႉ လွႆၵိဝ်ႇၸူင် ဢၼ်လွႆၶဝ်ယူႇၼၼ်ႉၼႃႇ” ဝႃႈၼႆ။

တီႈၼႂ်းထုင်ႉဢိူင်ႇမိူင်းပႃးၼႆႉ ၵဵတ်ႉလၢၼ်ႇဢၼ်သိုၵ်းတဢၢင်း ပႂ်ႉဝႆႉ မီးယူႇမွၵ်ႈ 5 တီႈ ပဵၼ်ၼိူဝ်သဵၼ်ႈတၢင်း ၵႂႃႇမႃး မိူင်းယဵၼ်- မိူင်းပႃး- သႅၼ်ဝီ၊ မိူင်းယဵၼ်- မိူင်းပႃး- ၵူတ်ႉၶၢႆ ၸိူဝ်းၼႆႉသေတႃႉ ၼႂ်းဢိူင်ႇမိူင်းပႃးၼႆႉ သိုၵ်းတဢၢင်း ဢမ်ႇပေႃး ၽႄႈႁႅင်းသိုၵ်းဝႆႉတဵမ်ထူၼ်ႈ ဝႃႈၼႆ။

ၼၢင်းယိင်း ၵေႃႉယူႇဝႆႉၼႂ်းဢိူင်ႇမိူင်းပႃးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ပၼ်ႁႃၵၢၼ်လိုပ်ႈၵၼ်၊ လမ်းၵၼ်ၸိူဝ်းၼႆႉ တႄႇမိူဝ်းၸဵမ်မိူဝ်ႈၶဝ်သုၵ်ႉသၵ်ႉၵၼ် တီႈၵူတ်ႉၶၢႆဝူင်ႈပူၼ်ႉၼၼ်ႉယဝ်ႉ။ ၵမ်းၼႆႉ ၶႄႇ(ၵဝ်ႈၵၢင်ႉ) တီႈသႅၼ်ဝီၼႆႉသမ်ႉ ၶိုၼ်းမႃးလိုပ်ႈသိုၵ်းလွႆ တီႈမိူင်းပႃးၼႆႉၼၼ်ႉၼႃႇ။ ႁႅင်းၵူၼ်းၶဝ်ၵေႃႈ ဢမ်ႇၼမ်။ တေမီးမွၵ်ႈ 40 -50 ၵေႃႉၼႆႉ ၵူၺ်း။ တေႃႈလဵဝ် သိုၵ်းလွႆ ဢမ်ႇမီးသေၵေႃႉယဝ်ႉတီႈမိူင်းပႃးၼႆႉ ပဵၼ်သိုၵ်းၶႄႇ (ၵဝ်ႈၵၢင်ႉ) မူတ်းမူတ်းယဝ်ႉ” ဝႃႈၼႆ။

ပူၼ်ႉမႃးဝၼ်းတီႈ 13/2/2026 ယၢမ်းၵၢင်ၶမ်ႈ မွၵ်ႈ 9 မူင်းပၢႆ သိုၵ်းတဢၢင်း (TNLA) လႄႈ သိုၵ်းၵဝ်ႈၵၢင်ႉ (MNDAA) ပဵၼ်ပၼ်ႁႃ လွင်ႈၵၢၼ်ဢုပ်ႉပိူင်ႇၼႃႈတီႈၽွင်းငမ်းၵၼ်သေ တီႈဝဵင်းၵူတ်ႉၶၢႆ ၊ ၽိတ်းၵၼ်ထုပ်ႉၵၼ် ထိုင်တီႈပူၼ်ႉၶၵ်ႉမိုဝ်းပဝ်ႇ လၼ်ႇၵွင်ႈတေႃႇၵၼ်သေ ၵူၼ်းသိုၵ်းတင်းသွင်ၾၢႆႇ လႆႈဢွၵ်ႇလိူတ်ႈပဵၼ်ယၢင် ။

ဝၢႆးလင်သိုၵ်းၵဝ်ႈၵၢင်ႉ တေႃႉဢဝ်ၵူၼ်းသိုၵ်းတဢၢင်း ၵႂႃႇလူင်းဝႆႉၸွမ်းၾင်ႇၼမ်ႉတူႈယဝ်ႉ သိုၵ်းတဢၢင်း ၶိုၼ်းႁွမ်ႁႅင်းသိုၵ်း မွၵ်ႈ 200 ၵေႃႉ တၢင်းဝၢၼ်ႈဢီႇၼၢႆး မုင်ႈၼႃႈမႃးၶိုၼ်းတၢင်းမိူင်းပႃး။ ဢိင်ၼိူဝ် ပၼ်ႁႃ သိုၵ်းတဢၢင်း တင်း သိုၵ်းၵဝ်ႈၵၢင်ႉ တီႈဝဵင်းၵူတ်ႉၶၢႆ ၼၼ်ႉသေ ယၢမ်းလဵဝ် တင်းသွင်ၸုမ်း ပဵၼ်ငဝ်းလၢႆး ၶဵင်ႈၶႅင်ၵၢၼ်သိုၵ်းတေႃႇၵၼ်ဝႆႉ ၼႆယဝ်ႉ။

လႆႈႁူႉဝႃႈ မိူဝ်ႈၼႆႉ(18/2/2026) ယၢမ်းၵၢင်ၼႂ် သိုၵ်းၵဝ်ႈၵၢင်ႉ သိုပ်ႇလိုပ်ႈလမ်းသိုၵ်းတဢၢင်း ၸိူဝ်းတူင်ႉၼိုင် ယူႇသဝ်းၼႂ်းၵႄႈဝၢၼ်ႈၼမ်ႉၸလၢပ်ႈ လႄႈ မိူင်းပွၼ်းတႆးၼၼ်ႉထႅင်ႈယူႇၼႆ ၵူၼ်းမိူင်းပိုၼ်ႉတီႈ ၵေႃႉယူႇဝႆႉ ၼႂ်းဝဵင်းသႅၼ်ဝီ လၢတ်ႈၼင်ႇၼႆ။

သိုၵ်းၵဝ်ႈၵၢင်ႉ တင်း သိုၵ်းတဢၢင်း ပဵၼ်ပၼ်ႁႃ ၽိတ်းထဵင်မေႃးပေႃႉထုပ်ႉၵၼ် ထိုင်တီႈလၼ်ႇၵွင်ႈတေႃႇၵၼ် ၸွမ်းၸႄႈဝဵင်းၵူတ်ႉၶၢႆ တင်း ၸႄႈဝဵင်းသႅၼ်ဝီလႄႈ ၵူၼ်းမိူင်းၸိူဝ်းယူႇသဝ်းၼႂ်းပိုၼ်ႉတီႈ မႆႈၸႂ်ၵူဝ် ပဵၼ်ပၢင်တိုၵ်းၵၼ်ထႅင်ႈ ၼႆယဝ်ႉ။

ၾၢႆႇၼိုင်ႈၵေႃႈယၢမ်းလဵဝ် သိုၵ်းၵဝ်ႈၵၢင်ႉ တင်ႈၵဵတ်ႉလၢၼ်ႇ ၽိူမ်ႉမႃးထႅင်ႈ ၼႂ်းဝဵင်းသႅၼ်ဝီသေ ပႂ်ႉၵူတ်ႇထတ်း ရူတ်ႉၵႃးၸိူဝ်းလတ်းၽၢၼ်ႇၵႂႃႇမႃး ၼႂ်းၸႄႈဝဵင်းသႅၼ်ဝီႁၢဝ်ႈႁႅင်းယူႇလႄႈ ႁဵတ်းႁႂ်ႈၵူၼ်းမိူင်းပိုၼ်ႉတီႈ ဢွၵ်ႇၶၢဝ်းတၢင်း ၵႂႃႇမႃးယၢပ်ႇၽိုတ်ႇလိူဝ်ၵဝ်ႇ ဝႃႈၼႆ။

လွင်ႈသိုၵ်း 2 ၸုမ်းလိုပ်ႈလမ်းၵၼ် ပဵၼ်ပၼ်ႁႃၵၼ်ယူႇယၢမ်းလဵဝ်ၼႆႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇၸူး သိုၵ်း 2 ၸုမ်းယူႇၵေႃႈ ၵပ်းသိုပ်ႇဢမ်ႇလႆႈ။