ပျီႇတူႉၸိတ်ႉ PNO ပိုၼ်ၽၢဝ်ႇလၢတ်ႈဝႃႈ ပိုတ်းယိုဝ်းၵၼ်တင်း  PNLA သေ ယိုတ်းလႆႈတပ်ႉငဝ်ႈငုၼ်းၵဝ်ႇ PNLA   တီႈဝၢၼ်ႈပၢင်မၢၵ်ႇ  ၼႂ်းၸႄႈဝဵင်းမွၵ်ႇမႆႇ ဝႃႈၼႆ။

တႄႇဝၼ်းတီႈ 1 လိူၼ်ၵျႅၼ်ႊၼိဝ်ႊရီႊၼႆႉမႃး သိုၵ်းမၢၼ်ႈ တင်း ပျီႇတူႉၸိတ်ႉပဢူဝ်း PNO လုၵ်ႉတီႈဢိူင်ႇႁူဝ်ၼမ်ႉသေ ထူဝ်းသိုၵ်းလတ်းထိူၼ်ႇ မုင်ႈၼႃႈၸူး ငဝ်ႈငုၼ်း တပ်ႉသိုၵ်း PNLA တၢင်းဝၢၼ်ႈပၢင်မၢၵ်ႇ ဢိူင်ႇၵၼ်ႇတူးလူင် (ၵိူၼ်ႇတူလူင်) ဝဵင်းမွၵ်ႇမႆႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။

ဝၢႆး သွင်ၾၢႆႇပဵၼ်ပၢင်တိုၵ်းၵၼ် ႁၢဝ်ႈႁႅင်း ႁိုင်ၶၢဝ်းတၢင်းလိူၼ်ပၢႆယဝ်ႉ မိူဝ်ႈဝႃး ဝၼ်းတီႈ 17/ 2 / 2026 ပျီႇတူႉၸိတ်ႉPNO ယိုတ်းၵုမ်းလႆႈၶိုၼ်း ဝၢၼ်ႈပၢင်မၢၵ်ႇ ၼႆ PNO ပိုၼ်ၽၢဝ်ႇဝႆႉ ၼင်ႇၼႆ ။

ၽူႈၶၢၼ်ပၢၵ်ႇ ပျီႇတူႉၸိတ်ႉPNO ၶုၼ်ႇတၢၼ်းၵျွႆႇလၢတ်ႈၽူႈတွႆႇႁွၵ်ႈဝႃႈ –  “ ၼႂ်းၶၢဝ်းတၢင်း ၸမ်သွင်လိူၼ်ၼႆႉ ၸုမ်းႁဝ်းၶႃႈ ယိုတ်းလႆႈၶိုၼ်းဝၢၼ်ႈပၢင်မၢၵ်ႇ ။ ယိုတ်းၵုမ်းလႆႈၶိုၼ်း မိူဝ်ႈဝၼ်းတီႈ 13-14 ၼႆႉ ၊ တၢင်းဝၢၼ်ႈပၢင်မၢၵ်ႇၼႆႉ ၸဵမ်မိူဝ်ႈ PNLA ၶဝ် ပႆႇမႃးယူႇၼၼ်ႉ ပဵၼ်ပိုၼ်ႉတီႈၼႃႈလိၼ်ႁဝ်းၶႃႈ တူင်ႉၼိုင်ႈယူႇဝႆႉ ။  မိူဝ်ႈဝႃႈ (ဝၼ်းတီႈ 17 ) ၵူၼ်းပၢႆႈၽေးသိုၵ်းၶဝ် ပွၵ်ႈမိူဝ်ႈႁိူၼ်းၶိုၼ်းၽွင်ႈယဝ်ႉ ”- ဝႃႈၼႆ ။

ၽွင်းပၢင်တိုၵ်းၼၼ်ႉ သိုၵ်းမၢၼ်ႈႁူမ်ႈပျီႇတူႉၸိတ်ႉ PNO ထူဝ်းသိုၵ်းၶဝ်ႈၼႂ်ႈဝၢၼ်ႈ ပၢင်မၢၵ်ႇ  ၽဝ်ႁိူၼ်းၵူၼ်းဝၢၼ်ႈပႃးလႄႈ  ၵူၼ်းဝၢၼ်ႈဢွၼ်ၵၼ်ငိူင်ႉပၢႆႈၽေးသိုၵ်း- မႆႈၵႂႃႇလၢႆလင်တႄႉဢမ်ႇႁူႉတႅတ်ႈတေႃး-  ၵူၼ်းပိုၼ်ႉတီႈလၢတ်ႈ ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“PNO ယိုတ်း ငဝ်ႈငုၼ်းၵဝ်ႇ PNLA တီႈဝၢၼ်ႈပၢင်မၢၵ်ႇၼၼ်ႉ ၶဝ်ၽဝ်ပႃးႁိူၼ်းၵူၼ်းမိူင်း ။ ငိၼ်းဝႃႈမႆႈၵႂႃႇၼမ်ယူႇ။ လၢႆလင်တႄႉဢမ်ႇႁူႉတႅတ်ႈတေႃး။ ၵူၺ်းၵႃႈ PNLA ၶဝ်တႄႉၶၢႆႉပၢႆႈဝႆႉႁိုင်ယဝ်ႉ။ တီႈၼၼ်ႉၵိုတ်းၵူၼ်းဝၢၼ်ႈဢိတ်းဢွတ်းၵူၺ်း။ ” – ဝႃႈၼႆ ။

ၵဵဝ်ၵပ်းလွင်ႈၽဝ်ႁိူၼ်းၵူၼ်းပိုၼ်ႉတီႈၼႆႉယူႇတီႈၸုမ်းပျီႇတူႉၸိတ်ႉ တွပ်ႇထဵင်လၢတ်ႈဝႆႉဝႃႈ ၸုမ်းႁဝ်းၶႃႈ ဢမ်ႇလႆႈၽဝ် ။ ပေႃးပဵၼ်ပၢင်တိုၵ်းၵၼ်ၼႆ ၼႂ်းဝၢၼ်ႈၼႆႉ တိုၼ်းၸၢင်ႈမီးလွင်ႈ ၾႆးမႆႈယူႇ  – ၼႆယဝ်ႉ ။

ၽွင်းပၢင်တိုၵ်း သိုၵ်းပဢူဝ်းသွင်ၾၢႆႇပိုတ်းယိုတ်းၵၼ်ၼႆႉ ႁဵတ်းႁႂ်ႈၵူၼ်းဝၢၼ်ႈႁမ်းပႂႃး (ဟံးဗွာရွာ) ဝၢၼ်ႈၼွင်ထဝ် (နောင်ထောဝ်ရွာ) လႄႈ ဝၢၼ်ႈပၢင်မၢၵ်ႇ (ဗန်းမက်) ႁူဝ်ၵူၼ်းၸမ်ႁဵင် ငိူင်ႉပၢႆႈၽေးသိုၵ်း ၵႂႃႇယူႇတၢင်း ဝၢၼ်ႈၼႃးႁီး ယၢမ်းလဵဝ် လူဝ်ႇတင်းၸွႆႈထႅမ် ၶဝ်ႈၼမ်ႉတင်းၵိၼ်လႄႈ ယႃႈယႃဝႆႉၼႆယဝ်ႉ ။

ၵူၼ်းၸၢႆးဢႃယု 30 ပီလၢတ်ႈၽူႈတွႆႇႁွၵ်ႈဝႃႈ -“ဝၢၼ်ႈၼႃးႁီးၼႆႉပဵၼ်ဝၢၼ်ႈဢၼ်ဢမ်ႇပေႃးမီးၵူၼ်းၵႂႃႇ ၵူၼ်းမႃး ။ ၼမ်ႉၵေႃႈႁႃယၢပ်ႇ ၊ သဵၼ်ႈတၢင်းၵေႃႈ ဢမ်ႇလီ ၊ ၽွင်းပဵၼ်သိုၵ်းၵူၼ်းဝၢၼ်ႈပၢႆႈမႃးၼၼ်ႉ  ဢမ်ႇတၼ်းလႆႈဢဝ်သင်မႃး ၊ ယွၼ်ႉၼၼ် လူဝ်ႇတၢင်းၸွႆႈထႅမ် ၶဝ်ႈၼမ်ႉလႄႈ ယႃႈယႃ ၸိူဝ်းၼႆႉ” ဝႃႈၼႆ ။  

မိူဝ်ႈဝၼ်းတီႈ 14/2/2026 ၼၼ်ႉ သိုၵ်းမၢၼ်ႈ ဢၼ်ပၵ်းတပ်ႉဝႆႉတီႈၾၢႆႇတူၵ်းၼမ်ႉပွၼ် လၢမ်းယိုဝ်းၶိူင်ႈၵွင်ႈလူင်မႃး ၼႂ်းဢိူင်ႇ ၵိူၼ်ႇတူလူင် လၢႆလၢႆၵမ်း၊ ႁဵတ်းႁႂ်ႈမၢၵ်ႇသိုၵ်းမၢၼ်ႈ တူၵ်းတိုဝ်ႉၵူၼ်းပၢႆႈၽေးသိုၵ်း 2 ၵေႃႉ ပဵၼ်လုၵ်ႈဢွၼ်ဢႃယု 10 ၶူပ်ႇၵေႃႉၼိုင်ႈလႄႈ ၼၢင်းယိင်း ဢႃယု 40 ၵေႃႉၼိုင်ႈလူႉတၢႆ ၼႆယဝ်ႉ ။

ပူၼ်ႉမႃး ဝၼ်းတီႈ 31/12/2024 ၼႆႉ သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇသႂ်ႇ တီႈငဝ်ႈငုၼ်း တပ်ႉသိုၵ်း ပူတ်းပွႆႇၸိူဝ်ႉၸၢတ်ႈပဢူဝ်း PNLO/ PNLA တီႈဝၢၼ်ႈပၢင်မၢၵ်ႇ ဢိူင်ႇ ၵိူၼ်ႇတူလူင် ၊ ဝၢႆးၼၼ်ႉယူႇတီႈတပ်ႉသိုၵ်းပူတ်းပွႆႇၸိူဝ်ႉၸၢတ်ႈပဢူဝ်း PNLA ၶၢႆႉငဝ်ႈငုၼ်းဝႆႉ – လႆႈႁူႉၼင်ႇၼႆ ။

ၼႂ်းဢိူင်ႇ ၵိူၼ်ႇတူလူင်ၼၼ်ႉ ၶွင်ႇသီႇဢဝ်ၶိုၼ်းၸိုင်ႈတႆး RCSS လႄႈ သိုၵ်းပဢူဝ်း PNLA ၶဝ်ယူႇသဝ်းတူင်ႉၼိုင်ဝႆႉ။

မီးၶၢဝ်ႇလိုဝ်းဢွၵ်ႇဝႆႉဝႃႈ တပ်ႉသိုၵ်းမၢၼ်ႈၼႆႉ လုၵ်ႉတၢင်း ၵိူၼ်ႇတူလူင် ၸႄႈဝဵင်းမွၵ်ႇမႆႇ ဢၢၼ်းတေထူဝ်းသိုၵ်းၶဝ်ႈထိုင် ဝဵင်းသျႃးတေႃး မိူင်းယၢင်းလႅင်၊ ၶၢမ်ႈၼမ်ႉၶူင်းသေ ႁႂ်ႈၵုမ်းလႆႈထိုင်တီႈလႅၼ်လိၼ် ယၢင်းလႅင် – မိူင်းထႆး ဝႃႈၼႆ။