ယွၼ်ႉပၼ်ႁႃၵၢၼ်ၶုတ်းၶမ်း ၼႂ်းဢိူင်ႇဝၢၼ်ႈၸေႈ ထုင်ႉၼမ်ႉပွင်ႈ ၸႄႈဝဵင်းလႃႈသဵဝ်ႈသေ သိုၵ်းၵဝ်ႈၵၢင်ႉ တီႉၺွပ်းဢဝ်ၵူၼ်းမိူင်းၵႂႃႇၵုမ်းၶင်တူဝ်ဝႆႉ တီႈဝဵင်းသႅၼ်ဝီ ႁိုင်ၽၢၵ်ႇလိူၼ်ပၢႆယဝ်ႉၵေႃႈ ပႆႇယွမ်းပွႆႇတူဝ်ဢွၵ်ႇမႃးပၼ်ၶိုၼ်း ၼႆယဝ်ႉ။

မိူဝ်ႈဝၼ်းတီႈ 9 လိူၼ်ၾႅပ်ႊပိဝ်ႊရီႇ ၾၢႆႇသိုၵ်းၵဝ်ႈၵၢင်ႉ ပွႆႇမႃးပၼ်ၶိုၼ်း ၵူၼ်းမိူင်းဝၢၼ်ႈၸေႈ 4 ၵေႃႉသေတႃႉ ၾၢႆႇသိုၵ်းၵဝ်ႈၵၢင်ႉ မၢပ်ႇၼႄးဝႃႈ ၵူၼ်းမိူင်း 5 ၵေႃႉၸိူဝ်းၵိုတ်းဝႆႉၼႆႉ ၶဝ်ႈပႃးၼႂ်းၵၢၼ် ဢွၼ်ႁူဝ် ႁႂ်ႈၵူၼ်းဝၢၼ်ႈလုၵ်ႉႁိုၼ်ႇသၢၼ်ၶတ်းၼႆလႄႈ သိုပ်ႇၵုမ်းၶင်ဝႆႉယူႇၼႆ – ၵူၼ်းဝၢၼ်ႈၸေႈလၢတ်ႈ။

ၵူၼ်းမိူင်းဝၢၼ်ႈၸေႈ ထုင်ႉၼမ်ႉပွင်ႈလၢတ်ႈ တီႈၽူႈတွႆႇႁွၵ်ႈဝႃႈ “ဢၼ်လီထၢင်ႇထိူမ်ယူႇမိူဝ်ႈလဵဝ် ၼႆႉ ယွၼ်ႉသင်လႄႈ ၶဝ်ဢမ်ႇပႆႇယွမ်းပွႆႇဢွၵ်ႇမႃးၼႆၼၼ်ႉယဝ်ႉ။ ၵူၼ်းၸိူဝ်း လွတ်ႈမႃး 4 ၵေႃႉၼႆႉၵေႃႈ ၺႃးႁႅမ်တင်းသီႇၵေႃႉၼႃႇ။ ၵူၼ်းၸိူဝ်းၵိုတ်းဝႆႉ 5 ၵေႃႉၼၼ်ႉ ယိုင်ႈၶႅၼ်းတေၺႃးႁႅမ် မွၵ်ႈၵႃႈႁိုဝ်ၵွၼ်ႇ” ဝႃႈၼႆ။

ၼင်ႇႁိုဝ်ၵူၼ်းမိူင်းဝၢၼ်ႈၸေႈ တေလႆႈဢွၵ်ႇၶွၵ်ႈၶင်မႃးၼၼ်ႉၵေႃႈ ၸုမ်းၵူၼ်းၼုမ်ႇ လႄႈ ၸိူဝ်း ႁဵတ်းၵၢၼ်တူင်ႉၼိုင်ၵၢၼ်တူင်ႇဝူင်းတႆး ၼႂ်းမိူင်းၼွၵ်ႈမိူင်းႁူမ်ႈၵၼ် ဢွၵ်ႇလိၵ်ႈသၢၼ်ၶတ်းတေႃႇ ၸုမ်းသိုၵ်းၵဝ်ႈၵၢင်ႉ ၵမ်းသိုဝ်ႈ လႄႈ တုၵ်းယွၼ်းဝႆႉထိုင်ပႃး ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈ တႆး (SSPP/SSA) ဝႆႉၼမ်ႉၼၵ်းလွင်ႈၼႆႉသေ ၸွႆႈထႅမ်ပၼ်ၵူၼ်းမိူင်းထႅင်ႈယူႇ။

ၵဵဝ်ႇလူၺ်ႈတႃႇယူႇၵၢင်ၸွႆႈထႅမ်ၵူၼ်းမိူင်းဝၢၼ်ႈၸေႈ ထုင်ႉၼမ်ႉပွင်ႈ ထႅင်ႈ 5 ၵေႃႉ ၸိူဝ်းၵိုတ်းၶမ်ယူႇ ၼႂ်းၶွၵ်ႈၶင် ၸုမ်းသိုၵ်းၵဝ်ႈၵၢင်ႉ တီႈဝဵင်းသႅၼ်ဝီၼၼ်ႉၵေႃႈ ၾၢႆႇ SSPP/SSA ယၢမ်ႈ တွပ်ႇလၢတ်ႈဝႆႉတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ – သူင်ႇလိၵ်ႈယိုၼ်ႈထိုင်ၸူး ၸုမ်းသိုၵ်းၵဝ်ႈၵၢင်ႉဝႆႉ ႁႂ်ႈပွႆႇပၼ်ၶၼ်ၶၼ်ဝႆးဝႆးယူႇၼႆသေတႃႉ တႃႇလႆႈႁူႉလွင်ႈၶိုပ်ႈၼႃႈထႅင်ႈ ၼၼ်ႉ ၸုမ်းၶၢဝ်ႇၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇၸူး ၽူႈၶၢၼ်ပၢၵ်ႇ SSPP/SSA ထႅင်ႈယူႇၵေႃႈ ဢမ်ႇႁပ်ႉၾူၼ်း။

မိူဝ်ႈဝၼ်းတီႈ 16/2/2026 ၵူၼ်းမိူင်းၵေႃႉယူႇဝႆႉၼႂ်းပိုၼ်ႉတီႈ သေ ၶတ်းၸႂ်ၸွႆႈထႅမ်ၵူၼ်းမိူင်းဝၢၼ်ႈၸေႈယူႇၼၼ်ႉ လၢတ်ႈၼႄတီႈၽူႈတွႆႇႁွၵ်ႈဝႃႈ “ၵူၼ်းဝၢၼ်ႈ 5 ၵေႃႉ ဢၼ်ၵိုတ်းဝႆႉၼႂ်းၶွၵ်ႈၶင်တီႈသႅၼ်ဝီၼႆႉ တိုၵ်ႉယူႇလွတ်ႈမီးသၢႆၸႂ်ယူႇၼႆဢေႃႈ။ မေးၼၢင်းၶဝ် ၵႂႃႇယွၼ်းတၢင်းၸွႆႈထႅမ်လၢတ်ႈတီႈသိုၵ်းၵဝ်ႈၵၢင်ႉၶဝ်ႁႂ်ႈပွႆႇပၼ်ၼႆႁႄ ၶဝ်လႆႈၶဝ်ႈၵႂႃႇႁၼ် ၵႂႃႇၺႃး ၵူၼ်း 5 ၵေႃႉၼၼ်ႉမႃးယူႇၶႃႈ။ ၾၢႆႇသိုၵ်းၵဝ်ႈၵၢင်ႉၶဝ်တွပ်ႇမႃးဝႃႈ – တေပွႆႇပၼ်ယူႇမိူဝ်ႈလဵဝ် ပႆႇထိုင်ၶၢဝ်းယၢမ်း- ၼႆဢေႃႈ” ဝႃႈၼႆ။

ယွၼ်ႉသိုၵ်းၵဝ်ႈၵၢင်ႉတီႉၺွပ်းၵူၼ်းဝၢၼ်ႈယဵတ်ႈၶွၵ်ႈဝႆႉ ႁိုင်ၽၢၵ်ႇလိူၼ်ပၢႆယဝ်ႉလႄႈ ၸုမ်းၵူၼ်းၼုမ်ႇတႆး တင်း ၸုမ်းတူင်ႉတိုၼ်ႇႁဵတ်းသၢင်ႈၼႃႈၵၢၼ်တူင်ႇဝူင်းတႆး ၼႂ်းပိုၼ်ႉတီႈ ႁူမ်ႈၵၼ် ဢွၵ်ႇလိၵ်ႈပိုၼ်ၽၢဝ်ႇထႅင်ႈ မိူဝ်ႈဝၼ်းတီႈ 14/2/2026 ၼၼ်ႉဝႃႈ – ၵၢၼ်တီႈသိုၵ်းၵဝ်ႈၵၢင်ႉ တီႉၺွပ်းဢဝ် ၵူၼ်းမိူင်းၵႂႃႇပေႃႉထုပ်ႉႁႅမ် ယဵတ်ႈၶွၵ်ႈၶင်ၼႆႉ တိုၼ်းဢမ်ႇႁၼ်လီၸွမ်းလႄႈ ဢမ်ႇယွမ်းႁပ်ႉလႆႈလႃးလႃး။ ဢႃႇၼႃႇသုင်သုတ်းၼႂ်းပိုၼ်ႉတီႈမိူင်းတႆးၼႆႉ တေလႆႈမီးၼႂ်းမိုဝ်းၵူၼ်းမိူင်းတႆးၵူၺ်း။ ၵွပ်ႈၼၼ် တေလႆႈဝူၼ်ႉၶပ်ႉၼပ်ႉသွၼ်ႇတႃႇ တႃႇယူႇႁူမ်ႈလူၺ်ႈၵႂႃႇၸွမ်းၵၼ်ၵတ်းၵတ်းယဵၼ်ယဵၼ်မိူဝ်းၼႃႈ ၼၼ်ႉသေ တုၵ်းယွၼ်းႁႂ်ႈပွႆႇပၼ်ၵူၼ်းမိူင်းဝၢၼ်ႈၸေႈ ဢၼ်ၵိုတ်းယူႇဝႆႉထႅင်ႈ 5 ၵေႃႉၼၼ်ႉ ၶၼ်ၶၼ်ဝႆးဝႆး – ဝႃႈၼႆ။

သင်ၾၢႆႇၸုမ်းသိုၵ်းၵဝ်ႈၵၢင်ႉဢမ်ႇယွမ်းပွႆႇမႃးပၼ် ၵူၼ်းမိူင်းဝၢၼ်ႈၸေႈ 5 ၵေႃႉၼၼ်ႉႁိုဝ် ဢမ်ႇၼၼ် ၵူၼ်းမိူင်း 5 ၵေႃႉၼၼ်ႉ ပဵၼ်ၵႂႃႇလွင်ႈၸိူဝ်းဢမ်ႇထုၵ်ႇလီပဵၼ် လႄႈ ဢမ်ႇ ထၢင်ႇထိူမ်သေ ပဵၼ်ၵႂႃႇသေလွင်ႈလွင်ႈၸိုင် ဝၢႆးလင်မႃးမႆႈၸႂ်ၵူဝ်လႆႈထိုင်ၵႂႃႇၸၼ်ႉ ပၼ်ႁႃၸၢဝ်းၶိူဝ်းၼၼ်ႉၼႆ – ၸုမ်းၵူၼ်းၼုမ်ႇတႆး ၼႂ်းမိူင်း ၼွၵ်ႈမိူင်း 11 ၸုမ်း ႁူမ်ႈၵၼ်ပိုၼ် ၽၢဝ်ႇ ဢွၵ်ႇဝႆႉၼင်ႇၼႆ။