ဝၢႆးလင်သိုၵ်းၵဝ်ႈၵၢင်ႉ တင်း သိုၵ်းတဢၢင်း ပဵၼ်ပၼ်ႁႃၵၼ် လွင်ႈၵၢၼ်ၽွင်းငမ်းဝဵင်းၵူတ်ႉၶၢႆ ၼၼ်ႉယဝ်ႉ သိုၵ်းၵဝ်ႈၵၢင်ႉ ၸိူဝ်းတူင်ႉၼိုင်ယူႇသဝ်း ၸွမ်းၸႄႈဝဵင်းသႅၼ်ဝီတင်ႈၵဵတ်ႉလၢၼ်ႇသေပႂ်ႉၵူတ်ႇထတ်းရူတ်ႉၵႃး လႄႈ ၵူၼ်းၸိူဝ်းလတ်းၶဝ်ႈၵႂႃႇၼႂ်းဝဵင်းႁၢဝ်ႈႁႅင်းလၢႆတီႈ မိူင်းတႆးပွတ်းႁွင်ႇ ။
သိုၵ်းၵဝ်ႈၵၢင်ႉ တင်ႈၵဵတ်ႉလၢၼ်ႇမႂ်ႇထႅင်ႈသေ ၵူတ်ႇထတ်းရူတ်ႉၵႃး လႄႈ ၵူၼ်းမိူင်းၸိူဝ်းၶဝ်ႈဢွၵ်ႇ ဝဵင်းႁၢဝ်ႈႁႅင်း ၼိူဝ်သဵၼ်ႈတၢင်းလူင်ဝဵင်းသႅၼ်ဝီ-ၵူတ်ႉၶၢႆ-မူႇၸေႊ၊ သႅၼ်ဝီ-ၵၢတ်ႇ ၵဝ်ႇ (လၢဝ်ႇၵၢႆး) – ၶျိၼ်းသူၺ်ႇႁေႃႇၼၼ်ႉလႄႈ ရူတ်ႉၵႃးၵူၼ်းမိူင်းၸိူဝ်းဢွၵ်ႇၶၢဝ်းတၢင်း၊ တေႃႉၶူဝ်းၵုၼ်ႇၵႂႃႇတႂ်ႈဝဵင်းၼိူဝ် လႆႈၵိုတ်းၶမ်ၶင်ႉဝႆႉပဵၼ်ထႅဝ် ဝႃႈၼႆ။
ၵူၼ်းမိူင်းၵေႃႉယူႇဝႆႉတီႈဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “ၶဝ်ထတ်းႁႅင်းၸိူင်ႉၼႆ မီးမွၵ်ႈၼိုင်ႈဝူင်ႈ ယဝ်ႉဢေႃႈ။ ၵႃးသိုၵ်းၶဝ်ၵေႃႈ သၢၼ်ႈၵႂႃႇသၢၼ်ႈမႃး။ ၵမ်ႉတၢင်ႇၶူဝ်းလူင်း ၵႂႃႇတၢင်းလႃႈသဵဝ်ႈ။ ၵမ်ႉတၢင်ႇၶူဝ်းတၢင်းလႃႈသဵဝ်ႈမႃး ။ ၵမ်ႉတေႃႉဢဝ်ၵူၼ်းသိုၵ်းၶဝ် တၢင်းၼမ်ႉၸလၢပ်ႈၵႂႃႇတၢင်းမိူင်းပႃး ၸိူဝ်းၼႆႉ။ မိူဝ်ႈလဵဝ်ၵေႃႈ ၵဵတ်ႉၶဝ်ၼႆႉ ထိုင်မႃးႁိမ်းႁူဝ် ၶူဝ် တၢင်းၶဝ်ႈဝဵင်းၼႆႉယဝ်ႉဝႃႈ။ တီႈၵဵတ်ႉၼမ်ႉဢုၼ်ႇ ၼၼ်ႉၵေႃႈ ၶဝ်ထတ်းႁႅင်းမႃးလိူဝ်ၵဝ်ႇ” ဝႃႈၼႆ။
ၼႂ်းၶၢဝ်းတၢင်းသိုၵ်းၵဝ်ႈၵၢင်ႉ ၵုမ်းၵမ်ၽွင်းငမ်းဝဵင်းသႅၼ်ဝီ ႁိုင်မွၵ်ႈ 2 ပီပၢႆၼႆႉ တႄႇႁူဝ်ပီ 2026 ၼႆႉမႃး ၸဝ်ႈၵၢၼ်ပၢႆးမၢၵ်ႈမီးၶႄႇ (လၢဝ်းပၢၼ်းၶႄႇ) ၸိူဝ်းယူႇသဝ်းတၢင်းၵၢတ်ႇၵဝ်ႇ (လၢဝ်ႇၵၢႆး) လူင်းမႃးၶၢတ်ႈ တီႈလိၼ် ၸွမ်းႁိူၼ်းယေး၊ သူၼ်ႁႆႈၼႃး ၵူၼ်းမိူင်းပိုၼ်ႉတီႈသေ ၵေႃႇသၢင်ႈႁူင်းၵေႃႇၵၢႆႇမႂ်ႇမႂ်ႇမႃးတင်းၼမ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ