တႄႇႁူဝ်လိူၼ် ၾႅပ်ႉပိဝ်ႊရီႊၼႆႉ သိုၵ်းမၢၼ်ႈၵဵပ်းသိုၵ်းမႂ်ႇ တႃႇၸုပ်ႈ 20  တီႈထုင်ႉပူင်း ၸိုင်ႈတႆးပွတ်းၸၢၼ်း  ပျီႇတူႉၸိတ်ႉ PNO ဢမ်ႇၵႅတ်ႇၶႄႁႄႉၵင်ႈသေဢမ်ႇၵႃး ပၢႆလွၵ်ႇငိုတ်ႈၵူၼ်းမိူင်းပႃးဝႃႈ  တေဢမ်ႇဢဝ်ပုၼ်ႈၽွၼ်းလွင်ႈႁူမ်ႇလူမ်ႈပၼ်ပႃးယၢမ်းၵၢင်ၶမ်ႈ ၵၢင်ၶိုၼ်း ဝႃႈၼႆ ။

ၼႂ်းထုင်ႉပူင်းၼႆႉ ၸူဝ်ႈသိုၵ်းမၢၼ်ႈပိုၼ်ၽၢဝ်ႇၵဵပ်းသိုၵ်းမႂ်ႇမႃးၼႆႉ ၶၢၼ်းၵူၼ်းမိူင်း   သႂ်ႇငိုၼ်း တႃႇၸွႆႈ ၵူၼ်းၵႂႃႇႁၢပ်ႇၵၢၼ်သိုၵ်း ၼိုင်ႈလင် 1 မိုၼ် ထိုင် 3 မိုၼ်ႇပျႃး ၵူႈလိူၼ် ။ လိူဝ်ၼၼ်ႉ ဢမ်ႇၵႃး တႃႇၵမ်ႉထႅမ် ပျီႇတူႉၸိတ်ႉ PNO ၼႆသေ လႆႈပၼ်ထႅင်ႈ 6 လိူၼ်ၼိုင်ႈပွၵ်ႈ။  ၼိုင်ႈပွၵ်ႈ 1 မိုၼ်ပျႃး ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ပေႃးၶဝ်( ပျီႇတူႉၸိတ်ႉ PNO ) ၵဵပ်းငိုၼ်း 6 လိူၼ် ၼိုင်ႈပွၵ်ႈ ၼႆႉသမ်ႉ ဝႃႈတႃႇၵႅတ်ႇၶႄဝၢၼ်ႈဢိူင်ႇၼႆ။ ၵူၼ်းဝၢၼ်ႈႁဝ်းၶႃႈ ဢမ်ႇမီးၵေႃႈႁႃသေ သႂ်ႇပၼ်  ဢမ်ႇပၼ်လွတ်ႈ သေလိူၼ်။  ၵမ်းၼႆႉၶဝ်သမ်ႉဝႃႈ ပေႃးၽႂ်ဢွၵ်ႇႁိူၼ်းယၢမ်းၵၢင်ၶမ်ႈၵၢင်ၶိုၼ်းသေ ၺႃးသိုၵ်းမၢၼ်ႈတီႉၵႂႃႇတႃႇၾိုၵ်းၵၢၼ်သိုၵ်းၼႆ ၶဝ်တေဢမ်ႇဢဝ်ပုၼ်ႈၽွၼ်း ၸွႆႈပၼ်သင် ၼႆထႅင်ႈ ။ ပေႃးၼႆငိုၼ်းဢၼ်ၶဝ်ၵဵပ်း ၵႂႃႇၸိူဝ်းၼၼ်ႉသမ်ႉ    ၶဝ်ဢဝ်ၵႂႃႇႁဵတ်းသင်လႃႇ ”- ဝႃႈၼႆ ။ 

တႃႇၾိုၵ်းၵၢၼ်သိုၵ်းၸုပ်ႈ 20 ဢၼ်သိုၵ်းမၢၼ်ႈၶၢၼ်းႁွင်ႉဢဝ်တီႈထုင်ႉပူင်းၵမ်းၼႆႉ ၼမ်လိူဝ်ၵူႈပွၵ်ႈ။ ၵူႈပွၵ်ႈၼိုင်ႈဢိူင်ႇလႆႈပၼ် 2 ၵေႃႉၵူၺ်း။ ၵမ်းၼႆႉၶဝ်ယွၼ်း 3 ၵေႃႉ။ ၵွပ်ႈၼႆလႄႈ ငိုၼ်းတႃႇၸွႆႈၵူၼ်းၾိုၵ်းၵၢၼ်သိုၵ်းၵေႃႈ ၶဝ်ယွၼ်းတီႈၵူၼ်းမိူင်း လုၵ်ႉတီႈ 1 မိုၼ်ႇပျႃးသေၶိုၼ်ႈပဵၼ် 1 မိုၼ်ႇ 5 ႁဵင်ပျႃးဝႃႈၼႆ။

လိူဝ်ၼၼ်ႉ ပေႃးပဵၼ် ၵူၼ်းဢၼ်ပႃးၼႂ်းသႅၼ်းပၢၼ်တႃႇႁၢပ်ႇ ၵၢၼ်သိုၵ်းၼၼ်ႉ သင်ဝႃႈဢမ်ႇယူႇ တီႈႁိူၼ်း(ပေႃးပဵၼ်ၵူၼ်းၵႂႃႇႁဵၼ်းလိၵ်ႈတီႈၸၼ်ႉၸွမ်၊ ၵႂႃႇႁဵတ်းၵၢၼ်မီးဝႆႉတၢင်ႇဝဵင်း) ၸိူဝ်းၼႆႉၵေႃႈ တီႈႁိူၼ်းလႆႈသႂ်ႇငိုၼ်းတႅၼ်းတၢင်ဝႆႉပၼ်ၵူႈလိူၼ်။  

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “ တႄႇၼႂ်းလိူၼ်ၼႆႉၵႂႃႇ ၵူၼ်းၵေႃႈ ၼိုင်ႈဢိူင်ႇ တေလႆႈပၼ် 3 ၵေႃႉဝႃႇ ။ ၼႂ်းၼႃႈတီႈ ပျီႇတူႉၸိတ်ႉပဢူဝ်း ၵုမ်းဝႆႉ မၢင်ဢိူင်ႇၼႆႉ ဢွၼ်တၢင်းၶဝ်ဢမ်ႇၵဵပ်း ၵမ်းၼႆႉတႄႉ တေႇၵဵပ်းမႃးယဝ်ႉ ၊ ပေႃးၶဝ်ယွၼ်းၵူၼ်းၽိူမ်ႉၵေႃႈ ငိုၼ်းၵေႃႈ လႆႈသႂ်ႇၽိူမ်ႉၶႃႈဢေႃႈ ၼိုင်ႈလိူၼ်ၼိုင်ႈပွၵ်ႈ လႆႈသႂ်ႇၵူႈလိူၼ်ၼႆႉမီးမႃး ၸမ် 2 ပီယဝ်ႉ ”- ဝႃႈၼႆ ။

ဢိူင်ႇဢၼ်တေလႆႈၸူၵ်းမႄးတႃႇၵႂႃႇႁၢပ်ႇၵၢၼ်သိုၵ်းမၢၼ်ႈၼၼ်ႉ ပဵၼ်ၼႂ်း ဢိူင်ႇဢတူင်းတေႃႇ ၊ ဢိူင်ႇၼႃးႁီး ၊ ဢိူင်ႇၵၢတ်ႇၵူႇ ထုင်ႉပူင်း ၸႄႈဝဵင်းတူၼ်ႈတီး ၸိူဝ်းၼႆႉ။   ယဝ်ႉၵေႃႈ ၵူႈပွၵ်ႈၼႆႉ ဢိူင်ႇထုင်ႉပူင်း ၊ ဢိူင်ႇၼွင်မွၼ် ၊ ဢိူင်ႇဝၢၼ်ႈယဵၼ်ႇ ၼႂ်းၸႄႈဝဵင်းသီႇသႅင်ႇတႄႉ ၵူႈပွၵ်ႈၼႆႉ ၶဝ်ဢမ်ႇၵဵပ်း  ၵူၺ်းတႄႇၼႂ်းလိူၼ်ၼႆႉၵႂႃႇ တႄႇၵဵပ်းမႃး ႁဵတ်းႁႂ်ႈၵူၼ်းပိုၼ်ႉတီႈ ပၢႆႈဢွၵ်ႇၼႂ်းဢိူင်ႇၼႂ်းဝၢၼ်ႈ တင်းၼမ် ဝႃႈၼႆ ။

ၼၢင်းယိင်းဢႃယု 30 လၢတ်ႈၽူႈတွႆႇႁွၵ်ႈဝႃႈ – “ ပေႃးပဵၼ် ဝၢၼ်ႈၼႂ်းၸႄႈဝဵင်းသီႇသႅင်ႇ ၼႆႉ ၵူၼ်းမိူင်းၼႆႉ လႆႈယၢပ်ႇသွင်မဵဝ်း ။ ငိုၼ်းတႃႇသိုၵ်းမၢၼ်ႈၵေႃႈ လႆႈသႂ်ႇ ။ ပေႃးပျီႇတူႉၸိတ်ႉ PNO ၵဵပ်းၵူၼ်းၵေႃႈ လႆႈၵႂႃႇ ၊ မိူဝ်ႈဢွၼ်တၢင်းတႄႉ ပေႃးၶဝ်ႈၼႂ်းပျီႇတူႉၸိတ်ႉ တူဝ်ဢမ်ႇၵႂႃႇၾိုၵ်းၸွမ်း သိုၵ်းမၢၼ်ႈၵေႃႈလႆႈယူႇ။ ၵူၺ်းၵႃး  ငိုၼ်းတႃႇႁၢပ်ႇၵၢၼ်သိုၵ်းတႄႉ လႆႈသႂ်ႇ ၵူႈလိူၼ်  ။ ပေႃးၵႂႃႇ ၾိုၵ်း ၵၢၼ်သိုၵ်း ၼႂ်းပျီႇတူႉၸိတ်ႉပဢူဝ်းၵေႃႈ လႆႈၵႂႃႇၼႃႈသိုၵ်းမိူၼ်ၵၼ်။  မၢင်ၸိူဝ်းၶဝ်သူင်ႇၵႂႃႇၼႃႈသိုၵ်းသေ  ၵႂႃႇတၢႆၼႃႈသိုၵ်းၵေႃႈ မီးၼမ် ၊ ယွၼ်ႉၼၼ်ၵူၼ်းၼႂ်းဝၢၼ်ႈ ဢွၼ်ၵၼ် ပၢႆႈၵႂႃႇမိူင်းထႆးတင်းၼမ် ၵူၼ်းၼုမ်ႇၼႂ်းဝၢၼ်ႈပေႃးဢမ်ႇမီးယဝ်ႉ”- ဝႃႈၼႆ ။

တီႈၼႂ်းထုင်ႉပူင်းၼႆႉ သိုၵ်းမၢၼ်ႈပိုၼ်ၽၢဝ်ႇ ၵူၼ်းမိူင်းသႅၼ်းပၢၼ်ၼုမ်ႇ ဢႃယု 18 -35 တေလႆႈႁၢပ်ႇ ၵၢၼ်သိုၵ်းၼႆၼႆႉ တႄႇမႃးမိူဝ်ႈပီ 2024  လိူၼ် February သေ  တႄႇၵဵပ်းၵူၼ်းၵႂႃႇၾိုၵ်းသိုၵ်းၼႂ်းလိူၼ် March ထိုင်ယၢမ်းလဵဝ်ပဵၼ် ၸုပ်ႈတီႈ 20 ယဝ်ႉ လႆႈႁူႉၼင်ႇၼႆ ။