မိူဝ်ႈဝႃး ဝၼ်းတီႈ 11/02/2026 ယၢမ်းဝၢႆးဝၼ်းမွၵ်ႈ 3 မူင်း ၸၢႆးၼုမ်ႇ ၸိုဝ်ႈႁွင်ႉ ၸၢႆးၶဵမ်ၼၼ်း လုၵ်ႈႁဵၼ်းၵဝ်ႇၶွင်ႁူင်းႁဵၼ်း ၽတူင်ႊ ပရထၢၼ်ႊ ၶီႊရီႊဝတ်ႊ ဝဵင်းသူင်ၶလႃ ၸႄႈတွၼ်ႈသူင်ၶလႃ မိူင်းထႆး ၶဝ်ႈယိုဝ်းၼႂ်းႁူင်းႁဵၼ်း ႁဵတ်းႁႂ်ႈၶူးသွၼ်(ၽူႈၵုမ်းႁူင်းႁဵၼ်း) တၢႆ လႄႈလုၵ်ႈႁဵၼ်းမၢတ်ႇၸဵပ်း2 ၵေႃႉ။
ၸၢႆးၶဵမ်ၼၼ်း တိုၵ်ႉမီးဢႃယု 18 ပီၵူၺ်း။ မၼ်းၸၢႆးမီးလွင်ႈဢမ်ႇႁၢၼ်ႉၸႂ်ၼိူဝ်ၶူးသွၼ်တီႈႁူင်းႁဵၼ်းၽတူင်ႊ ၸိုဝ်ႈႁွင်ႉ ၶူးၵျဵမ်း ။ မၼ်းၸၢႆးဝႃႈၶူးၵျဵမ်း သင်ႇသွၼ်ပေႃႉလုၵ်ႈႁဵၼ်းမၼ်း (ဢၼ်ပဵၼ်ၼွင်ႉယိင်းၸၢႆးၶဵမ်ၼၼ်း) ၼၼ်ႉၼႆသေ ၸၢႆးၶဵမ်ၼၼ်း ၸင်ႇၵႂႃႇႁွင်ႉလႃႇမေႃးမႄးၼႃႈႁူင်းႁဵၼ်း။ သမ်ႉပဵၼ်ၶၢဝ်းယၢမ်း လူင်းႁူင်းႁဵၼ်းလႄႈ ႁဵတ်းႁႂ်ႈပေႃႈမႄႈလုၵ်ႈဢွၼ်ႇ ၸိူဝ်းမႃးပႂ်ႉႁပ်ႉလုၵ်ႈလၢင်းၸဝ်ႈၵဝ်ႇၼႃႈႁူင်းႁဵၼ်းတူၵ်းၸႂ်တူင်ႉတိုၼ်ႇ။
ၽွင်းၸဝ်ႈၼႃႈတီႈပလိၵ်ႈလႄႈၵူၼ်းဝၢၼ်ႈၸွႆႈၵၼ်တီႉၺွပ်းၸၢႆးၶဵမ်ၼၼ်းၼၼ်ႉ ၸၢႆးၶဵမ်ၼၼ်းလႅၼ်ႈၵႂႃႇႁိမ်ဢဝ်ၵွင်ႈၼႂ်းမိုဝ်းပလိၵ်ႈသေ လႅၼ်ႈၶဝ်ႈၵႂႃႇၼႂ်းႁူင်းႁဵၼ်း။ ၶဝ်ႈၵႂႃႇယိုဝ်းၵွင်ႈၼႂ်းႁူင်းႁဵၼ်း။ ၵႂႃႇတီႉဢဝ်လုၵ်ႈႁဵၼ်း3-4 ၵေႃႉၵႂႃႇၶင်ဝႆႉပဵၼ်ၵၢင်သေ သေႃႇၼႂ်းဢူတ်ႇ ႁွင်ႉႁႃၶူးၵျဵမ်း ႁႂ်ႈမႃးၸူးမၼ်း။
ၽွင်းၽူႈၵုမ်းႁူင်းႁဵၼ်း ၼၢင်းသႃႇသီႇၽတ်း ၶဝ်ႈၵႂႃႇၸူးမၼ်းၸၢႆးတီႈႁွင်ႈပိုၼ်ၽၢဝ်ႇၼၼ်ႉ မၼ်းၸၢႆးယိုဝ်း ၽူႈၵုမ်းႁူင်းႁဵၼ်း မၢတ်ႇၸဵပ်းတီႈတွင်ႉလႄႈတီႈဢူၵ်း။ ထိုင်တီႈလႆႈႁၢမ်တူဝ်သူင်ႇႁူင်းယႃ။ မၼ်းၼၢင်းမၢတ်ႇၸဵပ်းႁႅင်းလႄႈလူႉတၢႆၵႂႃႇၼႂ်ၼႆႉ ၶၢဝ်းယၢမ်းၵၢင်ၼႂ်မွၵ်ႈ 3 မူင်း။
လိူဝ်ၼၼ်ႉမၢၵ်ႇၵွင်ႈမၢတ်ႇၸဵပ်းလုၵ်ႈႁဵၼ်းယိင်းထႅင်ႈၵေႃႉၼိုင်ႈ မၢတ်ႇၸဵပ်းတီႈတွင်ႉ ၼၼ်ႉၵေႃႈလႆႈႁၢမ်သူင်ႇႁူင်းယႃ။
လုၵ်ႈႁဵၼ်းဢွၼ်ႇထႅင်ႈၵေႃႉၼိုင်ႈ ၵူဝ်ႁႅင်းၼႃႇသေ လုၵ်ႉၸၼ်ႉသွင် ဝႅၼ်တူၵ်းလူင်းမႃး။ မၢတ်ႇၸဵပ်းတီႈၶေႃႈတိၼ်။
လုၵ်ႈဢွၼ်ႇႁူင်းႁဵၼ်းထႅင်ႈ 5 ၵေႃႉဢွၼ်ၵၼ်တူၵ်းၸႂ် သေပဵၼ်လူမ်း လႆႈဢဝ်သူင်ႇႁူင်းယႃၼင်ႇၵဝ်ႇ။
ထိုင်မႃးၶၢဝ်းယၢမ်းမွၵ်ႈ 6 မူင်းႁူဝ်ၶမ်ႈ ၸဝ်ႈၼႃႈတီႈပလိၵ်ႈၶဝ်ႈႁူင်းႁဵၼ်း ဢဝ်မၢၵ်ႇၵွင်ႈပွမ်ပိုတ်းယိုဝ်းၸၢႆးၶဵမ်ၼၼ်းသေ တီႉၺွပ်းဢဝ်တူဝ်မၼ်းၸၢႆးၵႂႃႇၵူတ်ႇထတ်း ၸွင်ႇမၼ်းၸၢႆးမီးတၢင်းပဵၼ်ပၢႆးၸႂ် ၸွင်ႇမၼ်းၸၢႆး ၵိၼ်ယႃႈမဝ်းၵမ် ၼႆၸိူဝ်းၼႆႉ။
ပိူင်ပဵၼ်ၸၢႆးၶဵမ်ၼၼ်းၶဝ်ႈယိုဝ်းၼႂ်းႁူင်းႁဵၼ်းၼႆႉ ႁဵတ်းႁႂ်ႈ ၶူးသွၼ် ပေႃႈမႄႈလုၵ်ႈႁဵၼ်းဢွၼ်ၵၼ်မႆႈၸႂ်လွင်ႈႁူမ်ႇလူမ်ႈ တင်းဝၢၼ်ႈတင်းမိူင်း။
သိုဝ်ႇၶၢဝ်ႇထႆးပိုၼ်ၽၢဝ်ႇဝႃႈ ပလိၵ်ႈတေၸၢင်ႈဢဝ်လိူင်ႈလူၺ်ႈတၢင်းၽိတ်း ႁိမ်ဢဝ်ၶူဝ်းၶွင်ၸဝ်ႈၼႃႈတီႈၾၢႆႇႁူမ်ႇလူမ်ႈ။ ႁဵတ်းႁႂ်ႈၶူဝ်းၶွင်ၾၢႆႇၵႅတ်ႇၶႄၵူၼ်းမိူင်းလူႉၵွႆ။ တင်ႈၸႂ်ႁဵတ်းႁႂ်ႈၵူၼ်းတၢႆ။ ၶႃႈႁႅမ်ၵူၼ်းတၢႆ ။ ၶဝ်ႈႁဵတ်းႁႂ်ႈသုၵ်ႉယုင်ႈၼႂ်းႁူင်းႁဵၼ်းၸဵမ်ၸိူဝ်းၼႆႉလႄႈ လႅပ်ႈတေလႆႈၺႃးတူတ်ႈတၢမ်ႇၶွၵ်ႈလႄႈတၢမ်ႇၼၵ်းယူႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ