ၼႂ်းၵၢင်လိူၼ်ၾႅပ်ႉပိဝ်ႊရီႇၼႆႉ သိုၵ်းမၢၼ်ႈ တင်း သိုၵ်းၵဝ်ႈၵၢင်ႉ ၶဵင်ႈၶႅင်ၵၢၼ်သိုၵ်းတေႃႇၵၼ် ၼႂ်းဝဵင်းလႃႈသဵဝ်ႈ မိူင်းတႆးပွတ်းႁွင်ႇၶိုၼ်း ႁၢဝ်ႈႁႅင်းလႄႈ ၵူၼ်းမိူင်းၼႂ်းဝဵင်းလႃႈသဵဝ်ႈ ဢွၼ်ၵၼ်မႆႈၸႂ် ၵူဝ်တင်းသွင်ၸုမ်းပဵၼ်ပၢင်တိုၵ်းၵၼ်ၶိုၼ်း ၼႆယဝ်ႉ။

မိူဝ်ႈဝၼ်းတီႈ 7 ယၢမ်းၵၢင်ၼႂ်ၸဝ်ႉမွၵ်ႈ 8 မူင်း မၢၵ်ႇလူင် (သျွတ်ႉတၢႆႉတူင်း) ၵိုင်ႉၵၢင်ႉမႃးတူၵ်းသႂ်ႇ ၼႂ်းပွၵ်ႉ 11 ဝဵင်းလႃႈသဵဝ်ႈ 2 လုၵ်ႈ။ ဝၢႆးလင်ၼၼ်ႉ သိုၵ်းမၢၼ်ႈ ႁၢင်ႈႁႅၼ်းဢဝ် သိုၵ်း ၽိုတ်ႉဢွၵ်ႇၶႂၢၵ်ႈဢဝ်တီႈယူႇၶိုၼ်း ၸွမ်းသၢပ်ႇဝဵင်းလႃႈသဵဝ်ႈဝႆႉသေ ယၢမ်းလဵဝ် ၼႂ်းဝဵင်းလႃႈသဵဝ်ႈၼႆႉ သိုၵ်းမၢၼ်ႈတင်း သိုၵ်းၵဝ်ႈၵၢင်ႉ ၶဵင်ႈၶႅင်ၵၢၼ်သိုၵ်းတေႃႇၵၼ်ဝႆႉယူႇ ဝႃႈၼႆ။

တင်ႈတႄႇၼၼ်ႉမႃး ၾၢႆႇသိုၵ်းမၢၼ်ႈ ဢဝ်ၶေႃႈဢၢင်ႈလွင်ႈႁူမ်ႇလူမ်ႈၼႂ်းဝဵင်းၼႆသေ ၵူတ်ႇထတ်းရူတ်ႉၶိူင်ႈ၊ ၵႃး လႄႈ သွၵ်ႈထူင် တူၺ်းပႃးၾူၼ်းၵူၼ်းၸိူဝ်းၶဝ်ႈဢွၵ်ႇဝဵင်း၊ ၵူတ်ႇ ထတ်းပႃးသဵၼ်ႈမၢႆၶႅၵ်ႇၸွမ်းႁိူၼ်းၵူၼ်း မိူင်းၸိူဝ်းယူႇသဝ်းဝႆႉ ၼႂ်းဝဵင်းလႃႈသဵဝ်ႈယူႇ ၼႆယဝ်ႉ။

ၵူၼ်းမိူင်းၵေႃႉယူႇဝႆႉၼႂ်းဝဵင်းလႃႈသဵဝ်ႈၵေႃႉၼိုင်ႈ လၢတ်ႈၼႄဝႃႈ “ၸွမ်းတႃႈၸွမ်းတၢင်းၵေႃႈ ၶဝ်ၵႆႉပႂ်ႉထတ်း ၶိုၼ်းဢိူဝ်ႈမိူဝ်ႈလဵဝ်။ ပေႃးပဵၼ်ရူတ်ႉၶိူင်ႈၼႆ ၶဝ်ၸႂ်ႉပိုတ်ႇၵူၼ်ႈတူးပွၵ်ႉႁႄတူၺ်းပႃးၵွၼ်ႇ။ ၾူၼ်းၸိူဝ်းၼႆႉၵေႃႈ ၶဝ်ၸႂ်ႉပိုတ်ႇၼႄႁႄ ထတ်းတူၺ်း။ ပေႃးၵၢင်ၶမ်ႈမႃးၼႆ ႁိူၼ်းလႂ်ၶဝ်ထၢင်ႇထိူမ် ၵေႃႈ ဢဝ်ၶေႃႈဢၢင်ႈဝႃႈၸႅတ်ႈၸရၢင်းၶႅၵ်ႇၼႆႁႄ ၶဝ်ႈသွၵ်ႈၶဝ်ႈထတ်းၶိုၼ်း” ဝႃႈၼႆ။

ႁၢၼ်ႉတေႃႇထိုင်ဝၼ်းမိူဝ်ႈၼႆႉ (12/2/2026) ၵေႃႈ သိုၵ်းမၢၼ်ႈယင်းပႆႇႁူႉဝႃႈ ပဵၼ်ၸုမ်းလႂ် ၽႂ် ယူႇတၢင်းလႂ် သေယိုဝ်းမၢၵ်ႇလူင်ၶဝ်ႈမႃးၼႂ်းဝဵင်းလႃႈသဵဝ်ႈၼႆသေတႃႉ ၵူၼ်းၸိူဝ်းပဵၼ် ၸႂ်ၾၢႆႇသိုၵ်းမၢၼ်ႈတႄႉ မၢပ်ႇၼေးဝႃႈ ပဵၼ်ၸုမ်းသိုၵ်းၵဝ်ႈၵၢင်ႉၶဝ် ၸိူဝ်းယူႇဝႆႉၾၢႆႇၼွၵ်ႈဝဵင်းၼၼ်ႉ ယိုဝ်းၶဝ်ႈမႃး ဝႃႈၼႆ။

ဝဵင်းလႃႈသဵဝ်ႈၼႆႉ သိုၵ်းၵဝ်ႈၵၢင်ႉယၢမ်ႈၶဝ်ႈမႃးၵုမ်းၵမ် ဝၢႆးလင်ၽႅၼ်ၵၢၼ်ယၼ်ႇသိုၵ်း 1027 ယဝ်ႉ ႁိုင်ၶၢဝ်းတၢင်း 9 လိူၼ်။ ယွၼ်ႉလူင်ပွင်ၸိုင်ႈမိူင်းၶႄႇ ယူႇၵၢင်ႁဵတ်းၶဵဝ်ပၼ်သေ မိူဝ်ႈၵၢင်လိူၼ်ဢေႇပရႄႇ လင်ပွႆးသွၼ်းၼမ်ႉယဝ်ႉၼၼ်ႉ သိုၵ်းၵဝ်ႈၵၢင်ႉ လႆႈထွႆထွၼ်ႁႅင်းသိုၵ်းဢွၵ်ႇၵႂႃႇၼႂ်းဝဵင်းယဝ်ႉ လႆႈပိုတ်ႇသဵၼ်ႈတၢင်း ပၼ်သိုၵ်းမၢၼ်ႈၶဝ်ႈမႃးၵုမ်းၵမ်ၶိုၼ်း ၼႂ်းဝဵင်း တႃႇ 12 ပွၵ်ႉ။