ၽူႈၼမ်းပႃႇတီႇၸုမ်းသိုၵ်းၵဝ်ႈၵၢင်ႉ (MNTJP/MNDAA) ၵႂႃႇႁူပ်ႉထူပ်းၵၼ်တင်း ၽူႈၼမ်းပႃႇတီႇ ၸုမ်းသိုၵ်းဝႃႉ(UWSA/UWSP) တီႈငဝ်ႈငုၼ်းတပ်ႉသိုၵ်းဝႃႉ ဝဵင်းပၢင်သၢင်း ၼႆ ယဝ်ႉ။
ၵၢၼ်ႁူပ်ႉထူပ်းၵၼ်ၼႆႉ ၽူႈမီးပုၼ်ႈၽွၼ်းၶဝ် ဢမ်ႇပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉဝႃႈ ၸုမ်းပႃႇတီႇ လႄႈ ၽူႈၼမ်းသိုၵ်းတင်းသွင်ၸုမ်း ႁူပ်ႉထူပ်းဢုပ်ႇဢူဝ်းၵၼ်လွင်ႈသင် လႄႈ ဝၼ်းလႂ်တေႉတေႉၼႆသေတႃႉ သိုဝ်ႇၶၢဝ်ႇဝႃႉ WSTV တႄႉ ပိုၼ်ၽၢဝ်ႇဢွၵ်ႇၶၢဝ်ႇဝႆႉ မိူဝ်ႈဝၼ်းတီႈ 8 ယၢမ်းတၢမ်းၶမ်ႈ။
ၼႂ်းပၢင်ႁူပ်ႉထူပ်းၼၼ်ႉ ၾၢႆႇၸုမ်းသိုၵ်းၵဝ်ႈၵၢင်ႉ ပႃးၽူႈမီးပုၼ်ႈၽွၼ်းၼႂ်းႁွင်ႈၵၢၼ်ၵပ်းသိုပ်ႇၾၢႆႇၼွၵ်ႈ ၼႃႈလိၼ်ၶိုၵ်ႉတွၼ်းမၢႆ 1 ၵဝ်ႈၵၢင်ႉ လႄႈ ၽူႈၼမ်းၼႂ်းပႃႇတီႇၵဝ်ႈၵၢင်ႉ MNTJP သေ ၾၢႆႇၽူႈၼမ်း ဝႃႉ တႄႉ ပဵၼ်ၽူႈမီးၸၼ်ႉၼႂ်းၵေႃႇမတီႇငဝ်ႈငုၼ်း UWSA/UWSP ၸဵမ်ၸိူဝ်းၼႆႉ ၼႆယဝ်ႉ။
ၼႂ်းသိုဝ်ႇၶၢဝ်ႇဝႃႉWSTV တႄႉ ႁၢႆးငၢၼ်းဝႃႈ တင်းသွင်ၸုမ်းႁူပ်ႉထူပ်းၵၼ်ၼႆႉ – ပဵၼ်ၵၢၼ်ဢႅဝ်ႇယဵမ်ႈသူႇၸႆးၵၼ် ၶၢဝ်းပီမႂ်ႇၶႄႇလႄႈ မၢႆတွင်းလွင်ႈမိုတ်ႈၵိုဝ်းၸမ်ၸႂ်ၵၼ်ၵႄႈၵၢင်သွင် ၸုမ်းၵူၺ်း – ၼႆယဝ်ႉ။
ဢိင်ၼိူဝ်လွင်ႈၽူႈၼမ်းတင်းသွင်ၸုမ်းႁူပ်ႉထူပ်းၵၼ်ၼၼ်ႉ ဢမ်ႇမီးၽႂ်ႁူႉၸွမ်းၵၢၼ်ဢုပ်ႇဢူဝ်းႁူဝ်ယွႆႈယႅမ်း ႁႂ်ႈတႅတ်ႈတေႃး။
ဝၢႆးလင်သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃး ပီ 2021 ၼႆႉ ၽူႈၼမ်းသိုၵ်းၵဝ်ႈၵၢင်ႉ တင်း ၽူႈၼမ်းသိုၵ်းဝႃႉ ၵႆႉႁူပ်ႉၵၼ် သူႇၸႆးၵၼ်ယူႇၵူႈပီ။ မိူဝ်ႈပီ 2024 ၵွၼ်ႇၼႃႈပီမႂ်ႇၶႄႇၼၼ်ႉၵေႃႈ တၢမ်တူဝ်ႁူဝ်ပဝ်ႈၸုမ်းသိုၵ်းၵဝ်ႈၵၢင်ႉ ၵေႃႉၵႂႃႇႁူပ်ႉၵၼ်တင်း ၽူႈၼမ်းၸုမ်းသိုၵ်းဝႃႉ တီႈဝဵင်းပၢင်သၢင်းယူႇ မိူၼ်ၵၼ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ