ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး ၊ တပ်ႉသိုၵ်းၸိုင်ႈတႆး SSPP/SSA ၸတ်းႁဵတ်းပၢင်ၵႅဝ်ႈ ဝၼ်း ၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 79 ပီ တီႈငဝ်ႈငုၼ်းဝၢၼ်ႈႁႆး။
မီးၽူႈယႂ်ႇၵူၼ်းလူင် ၵေႃႇမတီႇငဝ်ႈငုၼ်း ၊ သၢႆသိုၵ်း ၊ ၸုမ်းၼၢင်းယိင်း ၊ တပ်ႉၼၢင်းႁၢၼ် ၊ လုၵ်ႈႁဵတ်းသႅင်ၵိုင်ႇမိူင်း ၊ ၵူႈတပ်ႉၵူႈႁွင်ႈၵၢၼ် ၊ ဢိၵ်ႇပႃး ပေႃႈမႄႈၵူၼ်းမိူင်း ၶဝ်ႈႁူမ်ႈမီး 2000 ပၢႆ -SSPP Info တႅမ်ႈတၢင်ႇပိုၼ်ၽၢဝ်ႇဝႆႉၼင်ႇၼႆ။
ပၢင်ၵႅဝ်ႈတေႇၶၢဝ်းယၢမ်းၵၢင်ၼႂ် 7:30 မူင်း ၵႅမ်ႁူဝ်ပဝ်ႈ 3 ၸွမ်သိုၵ်း သိူဝ်ပိူင်ႇၾႃႉ မွၵ်ႇလၢတ်ႈၶေႃႈၵႂၢမ်း ပိုတ်ႇပၢင် သပ်းလႅင်း လွင်ႈပဵၼ်မႃးဝၼ်းၸိူဝ်ႉၸၢတ်ႈၸိုင်ႈတႆး၊
ၽူႈၼမ်းၼႂ်း 2 ၽူႈၵွၼ်းႁွင်ႈၵၢၼ် ပိုၼ်ၽၢဝ်ႇသူၼ်းတုမ် ပႃႇတီႇမႂ်ႇသုင်ၸိုင်ႈတႆး ၊ တပ်ႉသိုၵ်း ၸိုင်ႈတႆး SSPP/SSA ၸဝ်ႈသိုၵ်းလူင်ၸၢႆးသူႉ လူ ဢၢၼ်ႇၼႄလိၵ်ႈပိုၼ်ၽၢဝ်ႇ ၵေႃႈႁူမ်ႈသၢင်ႈၸိုင်ႈတႆး SSJAC ယိုၼ်ႈထိုင်ၸူး မၢႆတွင်းဝၼ်းၸိူဝ်ႉၸၢတ်ႈၸိုင်ႈတႆးၶွပ်ႈၶူပ်ႇ(79) ပီ။
ၸဝ်ႈသိုၵ်း ၽုင်းႁၢၼ် မွၵ်ႇလၢတ်ႈ ၶေႃႈၵႂၢမ်း သပ်းလႅင်း ၼႄ ပိုၼ်းၵႅပ်ႈဝၼ်းၸိူဝ်ႉၸၢတ်ႈၸိုင်ႈတႆး လႄႈ ထိုင်မႃး ၶၢဝ်းယၢမ်း ၵၢင်ၼႂ် (8:26) မူင်းၼၼ်ႉ ယူႇတီႈ ၽူႈၶပ်ႉပၢင် ပိုၼ်ၽၢဝ်ႇ ပၢင်ၵႅဝ်ႈဢွင်ႇမၢၼ် ယဝ်ႉတူဝ်ႈၵႂႃႇလီငၢမ်း ။
ၼွၵ်ႈလိူဝ်တီႈငဝ်ႈငုၼ်း SSPP ယဝ်ႉ တီႈၸေႈဝဵင်း မၢႆ (36)မိူင်းၵိုင်(ၵၢတ်ႇၽုၺ်း) ၸေႈတွၼ်ႈမၢႆ (15) ၼၼ်ႉၵေႃႈ SSPP/SSA ဢွၼ်ႁူဝ်သေ လႆႈ ၸတ်းႁဵတ်း ပၢင်ပွႆးမၢႆတွင်း ဝၼ်းၸိူဝ်ႉၸၢတ်ႈၸိုင်ႈတႆးၶွပ်ႈၶူပ်ႇ(79) ပီ လႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ