မိူဝ်ႈ 7/2/1947 ၼၼ်ႉ ၽူႈၼမ်းၸိုင်ႈတႆး တၢင်းလၢႆ ပႃးၸဵမ်ၸဝ်ႈၾႃႉၼမ်ႉသၼ်ႇပလွင်ႈ မၵ်းမၢႆ ဝၼ်းတီႈ 7 ၾႅပ်ႊပိဝ်ႊဝရီႊ ပဵၼ်ဝၼ်းၸိူဝ်ႉၶိူဝ်းတႆး ၼၼ်ႉ ………

ဢိင်ၶေႃႈၵႂၢမ်း ၽူႈၼမ်းမိူင်းတႆး တၢင်းလၢႆလႆႈၸႂ်ၸႂ်ႉ မိူဝ်ႈပူၼ်ႉမႃး 79 ပီ ဝႃႈပဵၼ်ဝၼ်းၶိူဝ်းတႆးၼၼ်ႉသေ ယွၼ်းၸႂ်ႉၶိုၼ်းၶေႃႈၵႂၢမ်း ၸိူဝ်ႉၶိူဝ်းတႆး ပဵၼ်ၶေႃႈၵႂၢမ်းတၢင်တူဝ် ၽႅၼ်ႇလိၼ်မိူင်းတႆး  ၸိူဝ်ႉၸၢတ်ႈ ၸိူဝ်ႉၶိူဝ်းၵူၼ်းမိူင်းတႆး ၸိူဝ်းယူႇၼိူဝ်ၽႅၼ်ႇလိၼ်မိူင်းတႆးတင်းသဵင် သေၵမ်းၼိုင်ႈၵွၼ်ႇ။

ပိူင်လူင်တႄႉ ဝၼ်းမိူဝ်ႈၼႆႉ ၽူႈတွႆႇႁွၵ်ႈ ၶႂ်ႈယွၼ်းတူၵ်ႇလၢတ်ႈ တူပ်းတွႆႇပွႆႇသဵင် ၾၢင်ႉတိူၼ် လၢတ်ႈထိုင် ၽူႈႁၵ်ႉၸိူဝ်ႉၶိူဝ်း ဝၢၼ်ႈမိူင်းတႆး ၸိူဝ်ႉၶိူဝ်းတႆးတၢင်းလၢႆဝႃႈ  ထိုင်ၶၢဝ်းလူဝ်ႇ ႁတ်းလၢတ်ႈ ၸိူင်ႉၸွမ်ၸိုင်ႈ မိူင်းဢမေႊရီႊၵၼ်ႊ  ဝႃႈ – “Make America Great Again”  ၼႆၼၼ်ႉ တႆးၵေႃႈတၵ်းႁဵတ်းႁႂ်ႈတႆးယႂ်ႇ ၶိုၼ်း “Make Tai Great Again” ၼၼ်ႉယဝ်ႉ။

ပေႃးဢမ်ႇၽွမ်ႉၵၼ် ဢမ်ႇႁဵတ်းႁႂ်ႈတႆးယႂ်ႇထႅင်ႈၸိုင် – ၽႂ်တေထၢင်ႇယႂ်ႇ ၽႂ်တေႁပ်ႉဢုပ်ႇ ၽႂ်တေဝႆႉ တႆးၽဵင်ႇပဵင်း။ သမ်ႉတေႁဵတ်းႁိုဝ် ႁဵတ်းႁႂ်ႈမီးႁႅင်းတေႃႇႁႅင်းလေႃႇတၢင်းၵၢၼ်မိူင်းၸူးပိူၼ်ႈ။ ပေႃးႁဵတ်းၽႂ် ႁဵတ်းမၼ်းတေႁဵတ်းႁိုဝ်ပေႉပုၼ်ႈ။  ၵုမ်ႇပႂ်ႉဝၼ်း “သူလူဝ်ႇမႃးၽွမ်ႉၵဝ်” ယူႇတိၵ်းတိၵ်း ဢမ်ႇပဵၼ်ၵၢၼ်ယဝ်ႉ။

ၵႂၢမ်းႁဝ်းၵေႃႈမီးဝႆႉဝႃႈ ၸိူဝ်ႉမူင်ႈၵေႃႈ မူင်ႈပႅင်း ၸိူဝ်ႉမႅင်းၵေႃႈ မႅင်းႁၵ်ႉ ၼႆဢမ်ႇႁိုဝ်လႃႇ။ ၵွႆးၼႃႇတေႃႈလဵဝ် ၸုမ်းလႂ် ၸွင်ႇသမ်ႉ ႁၵ်ႉၸိူဝ်ႉၶိူဝ်းတႆး ဝၢၼ်ႈမိူင်းတႆးတေႉတေႉယူႇႁိုဝ်။ ၸုမ်းလႂ်ၵေႃႈဢမ်ႇႁဵတ်း ၸွမ်းလၵ်း ၼမ်း မူႇၸုမ်းၸဝ်ႈၵဝ်ႇလႄႈ ယၢမ်းလဵဝ် ၵူၼ်းၼုမ်ႇတႆး သဵၼ်ႈတၢင်းႁၢႆ ပေႃးလၢတ်ႈလွင်ႈႁၢပ်ႇၵၢၼ်ၸိူဝ်ႉၸၢတ်ႈၸွင်ႇၶဝ်ၶႂ်ႈလၢတ်ႈၸွမ်းယဝ်ႉႁိုဝ် ။ ႁွင်ႉဢဝ်လုၵ်ႈမႄႈပိူၼ်ႈမႃးႁၢပ်ႇၵၢၼ်ၸိူဝ်ႉၸၢတ်ႈၼႆသေ ၸႂ်ႉႁုင်ၶဝ်ႈ ႁုင်ၽၵ်း တၵ်းၼမ်ႉ သၵ်ႉၶူဝ်း ပၼ်လုၵ်ႈပၼ်မေးၸဝ်ႈၵဝ်ႇယူႇတိၵ်းတိၵ်းၵွႆးယဝ်ႉၼႄႇ။

ၸိုဝ်ႈတႄႉ မူႇၸုမ်းႁၵ်ႉၸိူဝ်ႉၸၢတ်ႈ မူႇၸုမ်းဢၼ်တေပူၵ်းပွင်မိူင်းၶိုၼ်ႈယႂ်ႇ မူႇၸုမ်းဢၼ်တေ ဢဝ်ၶိုၼ်း ဝၢၼ်ႈ ဢဝ်ၶိုၼ်းမိူင်း သမ်ႉၶႂ်ႈႁႂ်ႈ ၵူၼ်းတၢင်းလၢႆ ႁွင်ႉတူဝ်ၵဝ်ႇ ပဵၼ်ၸဝ်ႈပဵၼ်ၶုၼ် ဢၼ်တေႉမၼ်း ၸဝ်ႈၵဝ်ႇႁဵတ်းတႃႇႁိူၼ်းၸဝ်ႈၵဝ်ႇႁႃႉ ႁဵတ်းတႃႇၸိူဝ်ႉၶိူဝ်းဝၢၼ်ႈမိူင်း။ ဝႃႈလႃးၵေႃႈ ဢိင်ၸိုဝ်ႈမူႇၸုမ်းသေ ႁဵတ်းတႃႇၸုမ်းၸဝ်ႈၵဝ်ႇႁႂ်ႈယႂ်ႇၼႆသေ ၵႂၢတ်ႇသႂ်ႇ ႁိူၼ်းလုၵ်ႈႁိူၼ်းမေး ၸဝ်ႈၵဝ်ႇယူႇတိၵ်းတိၵ်းၵွႆးႁိုဝ်။

ပေႃးလၢတ်ႈၵႂၢမ်းၵူၼ်းပိင်း ၽႃႇမႆႉဢမ်ႇဝႄႈတႃတႄႉ “ဝၢၼ်ႈမိူင်းတေၵွႆၽီမၼ်းယဝ်ႉ သမ်ႉၵုမ်ႇႁႃ ငိုၼ်း  တႃႁႃမေးၼွႆႉမေးၼၢင်းယူႇတိၵ်းတိၵ်းၵွႆးယဝ်ႉႁိုဝ်” – “ၵွင်တပ်ႉ Drone Force ၸွင်ႇပႃႈ မီးၵႅၼ်ႇၶႅင်”။ “ၽႅၼ်တၢင်းၸိူဝ်ႉၸၢတ်ႈ ဝၢၼ်ႈမိူင်းလပ်းသိင်ႇၽိတ်း ၵူၼ်းၼုမ်ႇတေလႆႈပႆႈၸွမ်းၵူၼ်ႈၽႂ် သဵၼ်ႈတၢင်း ပေႃးတၼ်တိၵ်း”။ ပိူင်လူင်တေႉ ၽူႈၼမ်းဢမ်ႇ ပုတ်းၶၢတ်ႇ ဢမ်ႇတမ်းၼႄ သဵၼ်ႈတၢင်း လုၵ်ႉၽိုၼ်ႉ တႅတ်ႈတေႃး ဢမ်ႇႁဵတ်းၼႄၸွမ်းၼင်ႇၸိုဝ်ႈသဵင်မူႇၸုမ်းၸဝ်ႈၵဝ်ႇၼၼ်ႉယဝ်ႉ။

ဢမေႊရီႊၵၼ်လၢတ်ႈဝႃႈ I need Greenland for US security ၼႆသေ ၶိုင်ၶႂ်ႈယိုတ်းဢဝ် ၵုၼ်လူင်ၵရိၼ်ႊလႅၼ်ႊ ယူႇမႅၵ်းမႅၵ်း။ ပိူဝ်ႈတႃႇၽွၼ်းပၢင်ႈၶႄႇသေ ၶႄႇၵေႃႈ ႁၢင်ႈႁႅၼ်းတႃႇလႆႈ ၵုၼ်ထၢႆႇဝၢၼ်း ယူႇတိၵ်းတိၵ်း။ ရတ်ႉသျႃႊၵေႃႈ ဢမ်ႇတူၺ်းၼႃႈၽီၼႃႈၵူၼ်းသေ လေႃႇတိုၵ်း ယူႊၶရဵၼ်ႊ ပိူဝ်ႇတႃႇ ၵႅတ်ႇၵင်ႈ ၽွၼ်းပၢင်ရတ်ႉသျႃႊယူႇဝၼ်းဝၼ်း ၶိုၼ်းၶိုၼ်း။

တႃႇပူၼ်ႉလွတ်ႈတႂ်ႈၸဝ်ႈဢႃႇၼႃႇတဵၵ်းတဵင်ၼၼ်ႉ ၽူႈၼမ်းတႆး ထုၵ်ႇလႆႈတူၺ်း ပုၼ်ႈပၢင်ႈၸိူဝ်ႉၶိူဝ်းတႆး ဝၢၼ်ႈမိူင်းတႆးသေ ထိုင်ၶၢဝ်းႁတ်းလၢတ်ႈပုတ်းၶၢတ်ႇ ႁတ်းႁဵတ်းတႅၵ်ႇလႅင်း တႃႇၸိူဝ်ႉၶိူဝ်းတႆး မိူင်းတႆး ယဝ်ႉ။ ပေႃးထိုင်ဝၼ်းတီႈ 7  Feb ႁဵတ်းပွႆး ယူႇၵူႈပီၼၼ်ႉ ဝၢၼ်ႈမိူင်း လႄႈ ၽဝ ၵူၼ်းမိူင်း လႅၵ်ႈလၢႆႈသင်တေႉ?  တေပွႆႇပၼ်ပိူၼ်ႈပေႉၵိၼ်ၶိူဝ်းတႆး တေပွႆႇပၼ်ပိူၼ်ႈ လူလၢႆမိူင်းတႆး ပေႃးတၢၼ်ႇ မိူင်းယႃႈမွၵ်ႇလမ် ၵႂႃႇထႅင်ႈတိၵ်းတိၵ်းႁိုဝ်?

ဢမေႊရီႊၵၼ်ႊ ၶႂ်ႈၶႂၢၵ်ႈဢႃႇၼႃႇၵုမ်းၵမ် ၶႄႇၶႂ်ႈၶႂၢၵ်ႈပၢႆးမၢၵ်ႈမီးယိပ်းၵႅဝ် ရတ်ႉသျႃႊ ၶႂ်ႈမင်ယူႊၶရဵၼ်ႊ လႅဝ်လႅဝ်သေ တဵၵ်းၶိုင်တႃႇပေႉပုၼ်ႈ –

• USA: Wants to control.
• China: Wants to expand.
• Russia: Wants to influence.

တူဝ်ယၢင်ႇၸၢဝ်းၶိူဝ်းၼႂ်းမိူင်းတႆးၵေႃႈ မီးတၢင်းလူဝ်ႇ တၢင်းၶႂ်ႈလႆႈ တၢင်းမုင်ႈမွင်းႁင်းၽႂ်မၼ်း။ ဝၼ်းၶိူဝ်းတႆး ဢၼ်ၸဝ်ႈၾႃႉတွင်ႇပႅင်ႇ ၼမ်ႉသၼ်ႇ မၵ်းမၼ်ႈၼၼ်ႉ မိူၼ်ဢမ်ႇၵဵဝ်ႇၽႂ်ယဝ်ႉလိူဝ်သေၶိူဝ်းတႆး။ ယၢမ်းလဵဝ် ၵမ်ႈၽွင်ႈ ပေႃးႁၢင်ႈႁႅၼ်း ၽၢတ်ႇဢွၵ်ႇမိူင်းတႆး သေ တင်ႈၸႄႈမိူင်းမႂ်ႇယူႇယဝ်ႉ။

ၽွၼ်းပၢင်ႈမိူင်းတႆး The Interests of Shan State ၽွၼ်းပၢင်ႈၸိူဝ်ႉၸၢတ်ႈတႆး Tai National Interest ၽႂ်တေပဵၼ်ၵေႃႉၵႅတ်ႇၵင်ႈ။ ၵွပ်ႈၼၼ်  တႆးၶႂ်ႈလႆႈသင် တႆးၶႂ်ႈပဵၼ်သင် ၼႂ်းဝၼ်းၸိူဝ်ႉၸၢတ်ႈ ၸိူဝ်ႉၶိူဝ်းတႆး ၼႆႉ ထုၵ်ႇတမ်းၼႄ ႁႂ်ႈတႅၵ်ႇလႅင်းယဝ်ႉ။ မွၵ်ႈၶႂ်ႈပေႉပုၼ်ႈၼိူဝ် တႆးတေႃႇတႆး ၵူၺ်းတေႉ လီလၢႆႈပၢႆးဝူၼ်ႉမႂ်ႇယဝ်ႉ။

ယႃႇလၢတ်ႈလၢႆလၢႆၵူၺ်း ထိုင်ၶၢဝ်းယၢမ်းလူဝ်ႇၶွၼ်ႈႁႅင်းၵၼ် ပွင်ႈသၢင်ႈ “ႁႅင်းၸိူဝ်ႉၶိူဝ်းတႆး မိူင်းတႆး ယႂ်ႇၶိုၼ်း ထႅင်ႈၵမ်း႞ယဝ်ႉ”

သဵင်ၶဝ်ႇႁွၵ်ႈ