ဝၼ်းတီႈ 7/2/2026 ၶွင်ႇသီႇဢဝ်ၶိုၼ်းၸိုင်ႈတႆး တပ်ႉသိုၵ်းၸိုင်ႈတႆး RCSS/SSA ဢွၼ်ၼမ်းၸတ်းပၢင်ပွႆးဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 79 ပီ တီႈငဝ်ႈၸိုင်ႈလွႆတႆးလႅင်း။

မီးၵူၼ်းသိုၵ်းၵူၼ်းမိူင်းလႄႈ ၶႅၵ်ႇၶိုၵ်ႉတွၼ်းမႃးၶဝ်ႈႁူမ်ႈၼပ်ႁူဝ်ႁဵင်။

ၸွမ်သိုၵ်းလူင်ယွတ်ႈသိုၵ်း မွၵ်ႇလၢတ်ႈၶေႃႈၵႂၢမ်းပိုတ်ႇပၢင်ဝႃႈ – ယွၼ်ႉၽူႈဢွၼ်ႁူဝ်ၶၢတ်ႇထမ်းတြႃးၽႃႇၵၢင်ဝၢင်းၶိုင်ႈလႄႈ ဝၢၼ်ႈမိူင်းဢမ်ႇၶိုၼ်ႈယႂ်ႇဝႃႈၼႆ။

ၼႂ်းၶေႃႈၵႂၢမ်းၸွမ်သိုၵ်းလူင်ယွတ်ႈသိုၵ်းမွၵ်ႇလၢတ်ႈၵႂႃႇတီႈပိုတ်ႇပၢင်ၼၼ်ႉ ပႃးလွင်ႈ – ပိုၼ်းပဵၼ်မႃးဝၼ်းၸိူဝ်ႉၸၢတ်ႈၸိုင်ႈတႆး ။ ပေႃးဢမ်ႇမီး 7 February ၸိုင်တႃႇတေမီးမႃး ဝၼ်းမိူင်းႁူမ်ႈတုမ် 12 February တေဢမ်ႇပဵၼ်လႆႈ။ ဢၼ်မီးမႃး 1947 February 12 ၼႆႉ မၼ်းပိူင်းၼေဝႃႈ မိူင်းႁူမ်ႈတုမ်ၼႆႉ ဢမ်ႇၸႂ်ႈမၢၼ်ႈဢၼ်လဵဝ်ၵေႃႇတင်ႈၶိုၼ်ႈမႃး။

ၶၢဝ်းတၢင်း 78 ပီ ၼႆႉ ၸၢဝ်းၶိူဝ်းၼႂ်းမိူင်းႁူမ်ႈတုမ် လႆႈတိုဝ်းၵမ်ႁဵတ်းၸွမ်းလိၵ်ႈႁူမ်ႈမၢႆပၢင်လူင်ဢၼ်ၵေႃႇတင်ႈမိူင်းႁူမ်ႈတုမ်ၼၼ်ႉယူႇသေတႃႉ မၢင်ၵေႃႉမၢင်ၸုမ်းၼႂ်းမိူင်းမၢၼ်ႈဢမ်ႇမီးၸႂ်သိုဝ်ႈယူဝ်းလႄႈၸင်ႇႁဵတ်းႁႂ်ႈၵၢၼ်မိူင်းယုင်ႈ။ ယိုတ်းဢႃႇၼႃႇၸိုင်ႈမိူင်းမႃး 3-4 ၵမ်း ။ ပိူင်ပိုင်းၸိုင်ႈမိူင်းၵေႃႈ ၶိုၼ်းမႄးတႅမ်ႈပဵၼ် 14 ပီ။ ပၢင်လိူၵ်ႈတင်ႈၵေႃႈႁဵတ်းမႃးလၢႆၵမ်းယဝ်ႉ။

ယၢမ်းလဵဝ် ဝၢၼ်ႈမိူင်းသုၵ်ႉယုင်ႈလႄႈၵူၼ်းမိူင်းလႆႈပၢႆႈၽေး လႆႈလူႉႁၢႆတႆ ဝၢၼ်ႈလႆႈႁၢမ်းၸိူဝ်းၼႆႉ ပဵၼ်ယွၼ်ႉၽူႈဢွၼ်ႁူဝ်ဝၢၼ်ႈမိူင်း မႃႇၼယႂ်ႇ လေႃးၽယႂ်ႇ ႁဵတ်းၸွမ်းၵၢင်ၸႂ်ၵေႃႉလဵဝ် ဢမ်ႇႁဵတ်းၸွမ်းၵၢင်ၸႂ်ၵူၼ်းမိူင်း ။ ဝၢၼ်ႈမိူင်းဢမ်ႇၶိုၼ်ႈယႂ်ႇၼႆႉပဵၼ်ယွၼ်ႉၽူႈဢွၼ်ႁူဝ်ဝၢၼ်ႈမိူင်း ၶၢတ်ႇတြႃးၽႃႇၵၢင်ဝၢင်းၶိုင်ႈ ။

ၵွပ်ႈၼႆ ပေႃးၶႂ်ႈႁႂ်ႈမိူင်းႁူမ်ႈတုမ် ၶိုၼ်ႈယႂ်ႇၵတ်းယဵၼ်ၸိုင်- ၸွမ်သိုၵ်းလူင်ယွတ်ႈသိုၵ်း ႁၼ်ထိုင်မီး 4 ၶေႃႈ။

1- ၽူႈဢွၼ်ႁူဝ်မၢၼ်ႈ ပၢၼ်မႂ်ႇလႄႈ ၽူႈဢွၼ်ႁူဝ်ၸၢဝ်းၶိူဝ်း လီဝူၼ်ႉတူၺ်းတၢင်းၽိတ်းၾၢႆႇလင်သေ ဢဝ်ပဵၼ်တွၼ်ႈသွၼ်တႃႇမိူဝ်းၼႃႈ- တူၺ်းၶိုၼ်းတၢင်းၽိတ်းတူဝ်ၵဝ်ႇ လိူဝ်သေတၢင်ႇတၢင်းၽိတ်းပိူၼ်ႈွ

2- လူဝ်ႇသၢင်ႈလွင်ႈယုမ်ႇယမ်ၵၼ် လူဝ်ႇႁဵတ်းၸွမ်းၵႂၢမ်းမၼ်ႈလႄႈ ၶေႃႈလႆႈၸႂ်လိၵ်ႈႁူမ်ႈမၢႆပၢင်လူင် 1947။

3- လူဝ်ႇယွမ်းၶဝ်ႈႁႃၵၼ် ဢုပ်ႇဢူဝ်းၵၼ် ႁႂ်ႈလႆႈၽွၼ်းလီတင်းသွင်ၾၢႆႇ ယႃႇႁႃတၢင်းပေႉပုၼ်ႈၶီႇၼဵၵ်းတဵၵ်းတဵင်ၵၼ်။

4- တႃႇဢဝ်ႁူမ်ႇလူမ်ႈဝၢၼ်ႈမိူင်းၼၼ်ႉ လူဝ်ႇမႄးၶွတ်ႇၽွတ်ႈတပ်ႉသိုၵ်း ႁႂ်ႈပဵၼ်တပ်ႉၾႅတ်ႇတရႄႇ – ဝႃႈၼႆ ။

ပၢင်ၵႅဝ်ႈဝၼ်းၸိူဝ်ႉၸၢတ်ႈ 79 ပီ တီႈလွႆတႆးလႅင်း ပီၼႆႉမီးတူဝ်တႅၼ်းလၢႆမူႇလၢႆၸုမ်းမိူၼ်ၼင်ႇ – Shan-ni Solidarity Party (SSP) ပႃႇတီႇတႆးလႅင်၊ SNDP ပႃႇတီႇသိူဝ်ၽိူၵ်ႇ၊ SSNDF တပ်ႉသိုၵ်းၽွမ်ႉႁူမ်ႈမိူင်းတႆး၊ SNA တပ်ႉသိုၵ်းတႆးလႅင်၊ PNO ၸုမ်းသိုၵ်းပဢူဝ်း၊ LDU လႃးႁူႇ၊ DKBA သိုၵ်းယၢင်းၽိူၵ်ႇ၊ CNF သိုၵ်းၶျၢင်း လႄႈတူဝ်တႅၼ်းပႃႇတီႇဝႃႉ ။ ပီၼႆႉတူဝ်တႅၼ်းသိုၵ်းမၢၼ်ႈတႄႉဢမ်ႇမႃးၶဝ်ႈႁူမ်ႈ။

ၶပ်းမၢႆပၢင်ၵႅဝ်ႈ တႄႇၸဵမ်ၵၢင်ၼႂ်ၸဝ်ႉ 7 မူင်းၶိုင်ႈ။ ၵူၼ်းမိူင်းၵူၼ်းသိုၵ်းဢဝ်တီႈယူႇ၊ ၶႅၵ်ႇဢဝ်တီႈယူႇ၊ ၸွမ်သိုၵ်းလူင်ယွတ်ႈသိုၵ်းဢဝ်တီႈယူႇ၊ ဝၢႆးၼၼ်ႉႁူမ်ႈၵၼ်ႁွင်ႉၽဵင်းၵႂၢမ်းၸိူဝ်ႉၸၢတ်ႈတၢင်ႇတုင်း/ၸွမ်ပိဝ်။ တူဝ်တႅၼ်းသင်ႇၶႃႇၸဝ်ႈ ပၼ်ဢေႃးဝႃႇတ ၊ ၽူႈၼင်ႈၸိုင်ႈမွၵ်ႇလၢတ်ႈၶေႃႈၵႂၢမ်း၊ ၸွမ်သိုၵ်းလူင်ယွတ်ႈသိုၵ်း မွၵ်ႇလၢတ်ႈၶေႃႈၵႂၢမ်း၊ တူဝ်တႅၼ်းၸုမ်းဢူၺ်းလီ 7 ၸုမ်း၊ တူဝ်တႅၼ်းၸုမ်းယိပ်းၵွင်ႈၵၢင်ႇၸၢဝ်းၶိူဝ်း ERO ၊ တူဝ်တႅၼ်း NUG ၊ တူဝ်တႅၼ်း SSJAC ၊ တူဝ်တႅၼ်းပႃႇတီႇၵၢၼ်မိူင်း လႄႈ ၽူႈတၢင်တူဝ်ၵူၼ်းမိူင်း ၶဝ်ၸိူဝ်းၼႆႉ မွၵ်ႇလၢတ်ႈၶေႃႈၵႂၢမ်း သေ ပၢင်ၵႅဝ်ႈယၢမ်းၵၢင်ၼႂ်ၵေႃႈယဝ်ႉတူဝ်ႈ။

ဝၢႆးပၢင်ၵႅဝ်ႈၵၢင်ၼႂ်ယဝ်ႉၼၼ်ႉ ၽူႈသိုဝ်ႇၶၢဝ်ႇ တေမီးတိုဝ်ႉတၢင်းလႆႈဢုပ်ႇထၢမ် ဢိၼ်ႊတႃႊပိဝ်း ၸွမ်သိုၵ်းလူင်ယွတ်ႈသိုၵ်း။