မိူဝ်ႈဝၼ်းတီႈ 5 လိူၼ်ၾႅပ်ႉပိဝ်ႊရီႊ ၸွမ်ၸိၵ်းသိုၵ်းမၢၼ်ႈယိုတ်းမိူင်း မိၼ်းဢွင်ႇလၢႆႇ ၶိုၼ်ႈႁပ်ႉဢဝ် ၸုမ်ႈၶူး ပႃႇရၵူႇ ၾၢႆႇၸတ်းၵၢၼ်ၵူၼ်း (ဂုဏ်ထူးဆောင် ပြည်သူ့ရေးရာ စီမံခန့် ခွဲမှုပါရဂူဘွဲ့) တီႈၸၼ်ႉၸွမ်လူင် ဝဵင်းလူင်တႃႈၵုင်ႈ။
ၼႂ်းဝၼ်းၸၼ်ႉၸွမ်မွပ်ႈပၼ် ၸုမ်ႈၶူးၼၼ်ႉ တွၵ်ႇတိူဝ်ႊၶျေႃးၶျေႃးသဵင်ႇ (ဒေါက်တာချောချောစိန်) ၽွင်းလူင်ၾၢႆႇပၢႆးပၺ်ႇၺႃႇ ၵေႃႉၶိုၼ်ႈမွပ်ႈပၼ်ၸုမ်ႈၶူး (ဂုဏ်ထူးဆောင်ပါရဂူဘွဲ့) တၢမ်တူဝ် မိၼ်းဢွင်ႇလၢႆႇ ၵေႃႉၶိုၼ်ႈႁပ်ႉ။
ၵဵဝ်ႇလူၺ်ႈမိၼ်းဢွင်ႇလၢႆႇ ႁပ်ႉၸုမ်ႈၶူး ၸၼ်ႉပႃႇရၵူႇ တီႈၸၼ်ႉၸွမ်တႃႈၵုင်ႈ (ယၼ်ႇၵုင်ႇ) ၼၼ်ႉသေ လုၵ်ႈႁဵၼ်း လႄႈ ၶူးသွၼ် တီႈၸၼ်ႉၸွမ်တႃႈၵုင်ႈ ပိုၼ်ၽၢဝ်ႇဢွၵ်ႇပဵၼ် တၢင်းၵၢၼ်မႃးဝႃႈ – ဢမ်ႇႁၼ်လီၸွမ်း လႄႈ သၢၼ်ၶတ်း လွင်ႈၸၼ်ႉ ၸွမ်မွပ်ႈပၼ်ၸုမ်ႈၶူး ႁႂ်ႈမိၼ်းဢွင်ႇလၢႆႇမီးၸၼ်ႉထႅင်ႈ။ ႁဵတ်းၸိူင်ႉၼႆၼၼ်ႉ မိူၼ်ၵၼ်တင်း ဢဝ်ၶူဝ်းၸုမ်ႈ ၶူးၵႂႃႇသုပ်းသႂ်ႇပၼ် “မႃငရၢႆးလူင်” ၵူၺ်းသေ ႁဵတ်းႁႂ်ႈပိူင်ၾၢင်ၵၢၼ်ပၢႆးပၺ်ႇၺႃႇတူၵ်းၵႂႃႇယူႇတႂ်ႈဢၢမ်းၼၢတ်ႈသိုၵ်းလွၼ်ႉလွၼ်ႉ – ဝႃႈၼႆ။
ၸၼ်ႉၸွမ်ဝဵင်းတႃႈၵုင်ႈ (ယၼ်ႇၵုင်ႇ) ၼႆႉ တႄႇပီ 1921 တေႃႇထိုင် 2020 မႃး မွပ်ႈပၼ်ၸုမ်ႈၶူး (ဂုဏ်ထူးဆောင်) ၵူႈသႅၼ်းသႅၼ်းတီႈ ၽူႈဢွၼ်ႁူဝ်ၵူၼ်းၼွၵ်ႈမိူင်း လႄႈ သင်ႇၶ ၊ ၵူၼ်းမိူင်းယူဝ်းယူဝ်း ႁူမ်ႈသဵၼ်ႈမီးယူႇ 72 ၵေႃႉ။
ၼႂ်းၽူႈဢွၼ်ႁူဝ်ၵူၼ်းၼွၵ်ႈမိူင်းၼၼ်ႉ ပႃးၽူႈၼမ်းယူႊၵူဝ်ႊသလႃႊပီႊယိူဝ်ႊ ၸွမ်ၸိုင်ႈမႃႊသျႄႊတီးတူဝ်း လႄႈ ၸွမ်ၸိုင်ႈမိူင်းဝႅတ်ႉၼမ်း ႁူဝ်ႊၶျီႊမိၼ်ႊၶဝ်လႆႈႁပ်ႉၸုမ်ႈၶူး ပႃႇရ ၵူႇၾၢႆႇပၵ်းပိူင်ႈၾိင်ႈမိူင်းၵႂႃႇ။
ဝၢႆးလင်သိုၵ်းမၢၼ်ႈယိုတ်းဢဝ်ဢႃႇၼႃႇၸိုင်ႈမိူင်းမႃး မိူဝ်ႈလိူၼ်ၵျုၼ်ႊ ပီ 2021 ၼၼ်ႉ ၸၼ်ႉၸွမ်ၾၢႆႇတပ်ႉသိုၵ်း မိူင်းရတ်ႉသျႃႊၵေႃႈ ယၢမ်ႈပၼ်ၸုမ်ႈၶူး မိၼ်းဢွင်ႇလၢႆႇ ပဵၼ် ၸၼ်ႉ ပႃႇမွၵ်ႉၶ ( ဂုဏ်ထူးဆောင်ပါမောက္ခ) ဝႆႉ မိူၼ်ၵၼ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ