ဢိင်ၼိူဝ်ပၼ်ႁႃၵၢၼ်ၶုတ်းၶမ်းတီႈဢိူင်ႇဝၢၼ်ႈၸေႈ ၸႄႈတွၼ်ႈလႃႈသဵဝ်ႈသေ သိုၵ်းၵဝ်ႈၵၢင်ႉ (MNDAA) ၸိူဝ်းတူင်ႉၼိုင်ယူႇၼႂ်းထုင်ႉၼမ်ႉပွင်ႈ ပႃးၵွင်ႈၵၢင်ႉတဵၵ်းႁွင်ႉၵူၼ်းမိူင်းဝၢၼ်ႈၸေႈ သႅၼ်းၼုမ်ႇၸၢႆး ဢႃႇယု 20 ပၢႆ ထိုင် 40 ပီပၢႆ ၶိုၼ်ႈၵႃးႁွင်ႉၵႂႃႇၵႄႈလိတ်ႈပၼ်ႁႃၵၼ်တီႈပၢင်သဝ်း တပ်ႉသိုၵ်းၵဝ်ႈၵၢင်ႉ ဢၼ်ပၵ်းဝႆႉယူႇတၢင်းၸႄႈဝဵင်းသႅၼ်ဝီ ၼႆယဝ်ႉ။

လွင်ႈၼႆႉ ၽူႈယႂ်ႇၵူၼ်းလူင်ၵေႃႇမတီႇဝၢၼ်ႈဢိူင်ႇ ၼႂ်းပိုၼ်ႉတီႈဢွၼ်ႁူမ်ႈၵၼ်ၵႂႃႇၸွႆႈလၢတ်ႈလႄႈ ၵူၼ်းမိူင်း ၸိူဝ်းၺႃးတီႉၺွပ်းၵႂႃႇ တႃႇ 27 ၵေႃႉလႆႈဢွၵ်ႇမႃးၶိုၼ်းသေတႃႉ တႃႇ 9 ၵေႃႉၼႆႉ ႁၢၼ်ႉတေႃႇထိုင်ဝၼ်းမိူဝ်ႈၼႆႉၵေႃႈ ပႆႇလႆႈဢွၵ်ႇမႃးၶိုၼ်းသေ ၺႃးသိုၵ်းၵဝ်ႈၵၢင်ႉ ပေႃႉထုပ်ႉႁႅမ်ဝႆႉ လႄႈ လႆႈမႆႈၸႂ်တႃႇလွင်ႈႁူမ်ႈလူမ်ႈၶဝ်ဝႆႉ – ၼႆ ၵူၼ်းမိူင်းပိုၼ်ႉတီႈလၢတ်ႈ ၼင်ႇၼႆ။

ဢွင်ႈတီႈပဵၼ်ပၼ်ႁႃယူႇၼၼ်ႉ ပဵၼ်ၼႃႈတီႈၸုမ်းသိုၵ်းလၢႆလၢႆၸုမ်းၵုမ်းၵမ်ဝႆႉလႄႈ ၼင်ႇႁိုဝ် တေဢမ်ႇၵိူတ်ႇ ပဵၼ်ပၼ်ႁႃယႂ်ႇၶိုၼ်ႈမႃးထိုင်တီႈလႆႈပဵၼ်ပၢင်တိုၵ်း ဢွၵ်ႇလိူတ်ႈဢွၵ်ႇယၢင်ၵၼ်ၼၼ်ႉ ၾၢႆႇပႃႇတီႇမႂ်ႇသုင်ၸိုင်ႈ တႆး ၊ တပ်ႉသိုၵ်းၸိုင်ႈတႆး (SSPP/SSA) ၵေႃႈ လႆႈႁဵတ်းၽိုၼ်လိၵ်ႈ လၢႆးသူင်ႇထိုင်ၸူးတီႈၸုမ်းသိုၵ်းၵဝ်ႈၵၢင်ႉ (MNDAA) ႁႂ်ႈပွႆႇပၼ်ၶိုၼ်း ၵူၼ်းမိူင်းၶၼ်ၶၼ်ဝႆးဝႆးၼႆ ၽူႈၶၢၼ်ပၢၵ်ႇ ပႃႇတီႇမႂ်ႇသုင်ၸိုင်ႈတႆး SSPP/SSA လၢတ်ႈၼင်ႇၼႆ။

ၸဝ်ႈသိုၵ်းၽုင်းႁၢၼ် ၽူႈၶၢၼ်ပၢၵ်ႇပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး လၢတ်ႈတီႈၽူႈတွႆႇႁွၵ်ႈဝႃႈ “လွင်ႈၵူၼ်းမိူင်းလႄႈ ၵူဝ်းၵၢင်ႉပဵၼ်ပၼ်ႁႃၵၼ် ၵဵဝ်ႇလွင်ႈၶုတ်းၶမ်း ၼၼ်ႉ ႁဝ်းၶႃႈၵေႃႈမႆႈၸႂ်ႁႄ လႆႈတႅမ်ႈလိၵ်ႈ သူင်ႇၸူးၶဝ်ဝႆႉ မိူဝ်ႈဝႃး (3/2/2026)။ ၶေႃႈတွပ်ႇမၼ်းတေမီးၸိူင်ႉ ႁိုဝ်ၼႆ လူဝ်ႇပႂ်ႉတူၺ်း ၾၢႆႇပီႈၼွင်ႉၵဝ်ႈၵၢင်ႉၶဝ်ထႅင်ႈၵမ်းၼိုင်ႈ။ ၼင်ႇ ႁိုဝ်ၵူၼ်းမိူင်းတေဢမ်ႇလႆႈသၢင်ႈၸဵပ်း၊ တေဢမ်ႇလႆႈၺႃးထုပ်ႉပေႃႉထႅင်ႈၼၼ်ႉၼႆ ႁဝ်းၶႃႈလႆႈလၢတ်ႈၵႂႃႇပႃးၼႂ်းလိၵ်ႈႁဝ်းၶႃႈၼၼ်ႉယဝ်ႉ။ မိူဝ်ႈလဵဝ်ၼႆႉႁဝ်းတေပႂ်ႉတူၺ်းဝႃႈ ၾၢႆႇပီႈၼွင်ႉၵူဝ်းၵၢင်ႉႁဝ်းတေဢဝ်ပုၼ်ႈၽွၼ်း ႁႄၵႄႈလိတ်ႈၸိူင်ႉႁိုဝ် ၼႆၵူၺ်း။ ႁဝ်းၶႃႈၵေႃႈတုၵ်းယွၼ်းဝႃႈ လၢႆးၼႆႉတႄႉ လူဝ်ႇလႆႈပဵၼ်လၢႆးဢၼ် ႁႂ်ႈၵူၼ်းမိူင်းပေႃးႁၢၼ်ႉၸႂ်၊ ယႃႇႁႂ်ႈပၼ်ႁႃလႆႈၵိူတ်ႇၶိုၼ်ႈ။ ယႃႇႁႂ်ႈလႆႈမႃးတုမ်ႉတိူဝ်ႉၵၢၼ်လုၵ်ႉၽိုၼ်ႉလၢႆမူႇလၢႆၸုမ်း လႄႈၵူၼ်းမိူင်းႁဝ်း ၼႆ ပၼ်ၶေႃႈၺၢၼ်ႇၵႂႃႇဝႆႉၸိူင်ႉၼၼ်ယဝ်ႉ” ဝႃႈၼႆ။

ၵူၼ်းမိူင်းၼႂ်းဢိူင်ႇဝၢၼ်ႈၸေႈၸိူဝ်းၺႃးတီႉၺွပ်းၵႂႃႇၼၼ်ႉ ႁၢၼ်ႉတေႃႇထိုင်ဝၼ်းမိူဝ်ႈၼႆႉ 5/2/2026 ယဝ်ႉ ၵေႃႈ သိုၵ်းၵဝ်ႈၵၢင်ႉ ပႆႇပွႆႇဢွၵ်ႇမႃးပၼ်ၶိုၼ်းလႄႈ ၾၢႆႇပီႈၼွင်ႉၸိူဝ်ႉၶိူဝ်း မုင်ႉႁေႃႁိူၼ်း လႄႈ ၽူႈယႂ်ႇၵူၼ်းလူင်ၸွမ်းဝၢၼ်ႈဢိူင်ႇ ၼႂ်းပိုၼ်ႉတီႈ တင်း ပႃႇတီႇမႂ်ႇသုင်ၸိုင်ႈတႆး (SSPP/SSA) လႆႈၶွတ်ႇၽွတ်ႈၵေႃႇမတီႇသေ ၵႂႃႇဢုပ်ႇဢူဝ်းငူပ်ႉငီႉပၼ် တႃႇႁႂ်ႈ ၵူၼ်းမိူင်းလႆႈဢွၵ်ႇမႃးၶၼ်ၶၼ်ဝႆးဝႆးယူႇ ၼႆယဝ်ႉ။

“လႆႈငိၼ်းဝႃႈတႄႇမႃး မိူဝ်ႈႁၢင်လိူၼ်ၵျႅၼ်ႊၼိဝ်ႊရီႇ 29-30 ဝၼ်းၼၼ်ႉ။ လွင်ႈပၼ်ႁႃၼႆႉ ၵိုင်ႉၵၢင်ႉၵိူတ်ႇပဵၼ်မႃးလႄႈ ၸုမ်းၵူဝ်းၵၢင်ႉၶဝ် မႃးႁႃၶုတ်းၶမ်းၸွမ်းၼႂ်းၼႃႈတီႈၼၼ်ႉ။ သမ်ႉဢမ်ႇလႆႈလွင်ႈၵမ်ႉထႅမ်ၵူၼ်းမိူင်း။ တႃႇပၼ်ၶႂၢင်ႉႁႂ်ႈ သိုၵ်းၵဝ်ႈၵၢင်ႉ မႃးၶုတ်းၶမ်းၼႆႉ ၵူၼ်းမိူင်းၵေႃႈဝႃႈ ႁဝ်းပႆႇလႆႈတူၵ်းလူင်းၵၼ်ၼႆလႄႈ ပၼ်ႁႃၼႆႉ တႄႇတီႈၼႆႈမႃး” ၼႆ ၸဝ်ႈၽုင်းႁၢၼ် သပ်းလႅင်းလၢတ်ႈလွင်ႈငဝ်ႈငႃႇပၼ်ႁႃ ဝႆႉၼင်ႇၼႆ။

လိူဝ်ၼၼ်ႉ ၸုမ်းတူင်ႉၼိုင်ႁဵတ်းၵၢၼ်တူင်ႇဝူင်းတႆး လႄႈ ၸုမ်းၵူၼ်းၼုမ်ႇလၢႆမူႇလၢႆၸုမ်းၵေႃႈ ဢွၼ်ၵၼ် ဢွၵ်ႇသဵင်ၵၢင်ၸႂ် ၼိူဝ်သိုဝ်ႇတူင်ႇဝူင်းၵူၼ်း တုၵ်းယွၼ်းႁႂ်ႈၸုမ်းသိုၵ်းၵဝ်ႈ ၵၢင်ႉပွႆႇပၼ်ၶိုၼ်း ၵူၼ်းမိူင်းၸိူဝ်းၺႃး တီႉၺွပ်းဝႆႉၼၼ်ႉ ၶၼ်ၶၼ်ဝႆးဝႆးယူႇ မိူၼ်ၵၼ်။

သိုၵ်းၵဝ်ႈၵၢင်ႉ ၼႆႉ ဝၢႆးလင်ယိုဝ်းတိုၵ်းသိုၵ်းမၢၼ်ႈ ဢွင်ႇပေႉပၢင်တိုၵ်းမိူဝ်ႈၽႅၼ်ၵၢၼ်ယၼ်ႇသိုၵ်း 1027 ၼၼ်ႉမႃးယဝ်ႉ ၵုမ်းၵမ်ပၼ်ႇၵၢၼ်ၽွင်းငမ်းဝႆႉတီႈၸႄႈဝဵင်းၵၢတ်ႇၵဝ်ႇ (လၢဝ်ႇၵၢႆး)၊ ၸႄႈဝဵင်းသႅၼ်ဝီ၊ ၾၢႆႇၼွၵ်ႈဝဵင်း ဝဵင်းလႃႈသဵဝ်ႈ မူႇဝၢၼ်ႈ ဢိူင်ႇၸွမ်းၵႄႈၵၢင် ဝဵင်းလႃႈသဵဝ်ႈ လႄႈ ဝဵင်းမိူင်းယႆၼၼ်ႉယူႇ။

ၼႂ်းၶၢဝ်းတၢင်း သိုၵ်းၵဝ်ႈၵၢင်ႉတႄႇၵုမ်းၵမ် ပၼ်ႇၵၢၼ်ၽွင်းငမ်းဝဵင်းႁိုင်မွၵ်ႈ 2 ပီပၢႆၼႆႉ ၼႂ်းပိုၼ်ႉတီႈၸႄႈဝဵင်းသႅၼ်ဝီ၊ ၸႄႈဝဵင်းလႃႈသဵဝ်ႈ၊ ၸႄႈဝဵင်းမိူင်းယႆ ၵူၼ်းမိူင်းၺႃးမိပ်ႇငႅၼ်း ႁႂ်ႈတဵၵ်းၶၢတ်ႈပၼ်တီႈလိၼ်တႃႇၽုၵ်ႇသွမ်ႈၵူၺ်ႈ၊ ၽုၵ်ႇသွမ်ႈဢွႆႈ လႄႈ ဢွင်ႈတီႈၶုတ်းၶမ်းၸိူဝ်းၼၼ်ႉၵူၺ်း ဢမ်ႇၵႃး ၺႃးႁွင်ႉၵႂႃႇႁၢပ်ႇၵၢၼ်သိုၵ်း ၼႂ်းတပ်ႉသိုၵ်းၵဝ်ႈၵၢင်ႉထႅင်ႈ ၼႆယဝ်ႉ။