ဝၼ်းတီႈ 29 /1/2026 ယၢမ်းဝၢႆးဝၼ်း 2 မူင်းသိုၵ်းၵဝ်ႈၵၢင်ႉ တီႉၺွပ်းထဝ်ႈၸၢႆး ၵူၼ်းဝၢၼ်ႈပၢင်မႅင်း ဢိူင်ႇၼွင်ၵေႃႈ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ၵူတ်ႇထတ်းပေႃႉထုပ်ႉႁၢဝ်ႈႁႅင်း ထိုင်တီႈလႆႈလူႉတၢႆ ဝႃႈၼႆ။
ထဝ်ႈၸၢႆးဢၼ်လႆႈလူႉသဵင်ႈၵႂႃႇၼၼ်ႉ ၸိုဝ်ႈႁွင်ႉလုင်းပၢင်ႇ ဢႃယု 63 ပီ ပဵၼ်ၵူၼ်းၼႂ်းပွၵ်ႉပၢင်သႅၼ်ႇ ဝၢၼ်ႈပၢင်မႅင်း ဢိူင်ႇၼွင်ၵေႃႈ ။ မၼ်းၸၢႆး ဢၢၼ်းလုၵ်ႉတီႈႁိူၼ်းသေ ဢၢင်ႈတေၵႂႃႇၼွၼ်းပႂ်ႉႁႆႈ ။
ၽွင်းထိုင် ပွတ်းတၢင်း ႁူပ်ႉၺႃးၸုမ်းသိုၵ်းၵဝ်ႈၵၢင်ႉသေ တီႉဢဝ်မၼ်းၸၢႆးၵႂႃႇ တီႈၵဵတ်ႉလၢၼ်ႇ ဢၼ်သိုၵ်းၵဝ်ႈၵၢင်ႉၶဝ်ဢဝ်ႁူမ်ႇလူမ်ႈဝႆႉ ၾၢႆႇႁွင်ႇဝၢၼ်ႈပၢင်မႅင်း တၢင်းၵႂႃႇဝၢၼ်ႈၼမ်ႉပူၵ်ႇ ဢိူင်ႇၼွင်ၵေႃႈ ။
ဝၢႆးၼၼ်ႉ ၽူႈၵွၼ်းဢိူင်ႇ ၼွင်ၵေႃႈ လႆႈၵႂႃႇႁပ်ႉႁွင်းသေ ဢဝ်တူဝ်ႇ လုင်းပၢင်ႇ သူင်ႇၶိုၼ်းတီႈႁိူၼ်း ၊ ယွၼ်ႉထုၵ်ႇသိုၵ်းၵဝ်ႈၵၢင်ႉ ပေႃႉထုပ်ႉဝႆႉလႄႈ လႆႈလူႉတၢႆၵႂႃႇ ၼႂ်းဝၼ်းတီႈ 30/1/2026 ယၢမ်းၵၢင်ဝၼ်း 11 မူင်းဝႃႈၼႆ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၵွၼ်းဢိူင်ႇၼွင်ၵေႃႈ လႆႈၵႂႃႇယွၼ်းထုၵ်ႇတူဝ်ဢဝ် မႃးၶိုၼ်း ၊ ယွၼ်ႉသိုၵ်းၵဝ်ႈၵၢင်ႉၶဝ် တီႉၺွပ်းၸႅတ်ႈထၢမ် ပေႃႉထုပ်ႉလႄႈ ႁဵတ်းႁႂ်ႈ မၢတ်ႇၸဵပ်းၼၵ်းၼႃ ၽွင်းလုင်းပၢင်ႇႁွတ်ႈထိုင်ႁိူၼ်းၶိုၼ်းၵေႃႈ လႆႈလူႉတၢႆ ”- ဝႃႈၼႆ ။
လႆႈႁူႉဝႃႈ သိုၵ်းၵဝ်ႈၵၢင်ႉဢၼ်ပေႃႉထုပ်ႉ လုင်းပၢင်ႇၼၼ်ႉ ပဵၼ်သိုၵ်းၵဝ်ႈၵၢင်ႉ မၢႆတပ်ႉ 511 ဢၼ်တူင်ႉၼိုင်ဝႆႉယူႇၼႂ်းၸႄႈဝဵင်းသီပေႃႉ ဝႃႈၼႆ ။ ဝၢႆးလုင်းပၢင်ႇတၢႆယဝ်ႉဝၼ်းၼိုင်ႈ ၼႂ်းဝၼ်းတီႈ 31/1/2026 သိုၵ်းၵဝ်းၵၢင်ႉမႃးပၼ်ငိုၼ်းတီႈပီႈၼွင်ႉ လုင်းပၢင်ႇ 20 သႅၼ်ပျႃး ဝႃႈၼႆ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ တီႈၼွင်ၵေႃႈၼႆႉငဝ်းလၢႆးၵေႃႈယဵၼ်ဝႆႉ ဢမ်ႇႁူႉဝႃႈယွၼ်ႉသင်ၶဝ်ၵူတ်ႇထတ်းပေႃႉထုပ်ႉထိုင်တၢႆၸိူင်ႉၼႆ ၊ မိူဝ်ႈဝႃးၼႆႉၵဝ်ႈၵၢင်ႉၶဝ် ဢဝ်ငိုၼ်း 20 သႅၼ်ပျႃးမႃးပၼ်ၶိုၼ်းၼႆ ၊ ပီႈၼွင်ႉၶဝ်တႄႉလၢတ်ႈဝႃႈ ဢမ်ႇမီးလွင်ႈ ပဵင်းပေႃးႁၢၼ်ႉၸႂ်သေဢိတ်း ၵူၺ်း ဢမ်ႇႁတ်းတွပ်ႇထဵင်ၶိုၼ်းလႄႈ ဢမ်ႇၸၢင်ႈလၢတ်ႈသင်ၶိုၼ်းၼႆ ၶဝ်ၵေႃႈၵူဝ်ဢေႃႈ”- ဝႃႈၼႆ ။
ဝၢႆးလင်ပၢင်တိုၵ်းၽႅၼ်ယၼ်ႇသိုၵ်း 1027 ပွၵ်ႈၵမ်းသွင်မႃး သိုၵ်းတဢၢင်း လႄႈ ၸုမ်းဢူၺ်းလီၶဝ် ယိုတ်းဢဝ်လႆႈၸႄႈဝဵင်းသီႇပေႃႉ ၵမ်းၼိုင်ႈ ။ ၼႂ်းဝၼ်းတီႈ 16/10/2025 သိုၵ်းမၢၼ်ႈႁႅၼ်းသိုၵ်းလေႃႇတိုၵ်း သိုၵ်းတဢၢင်းႁၢဝ်ႈႁႅင်း ၾၢႆႇသိုၵ်းမၢၼ်ႈ ၵုမ်းလႆႈ ၼႂ်းဝဵင်းသီပေႃႉၶိုၼ်းသေ ၾၢႆႇဢွၵ်ႇဝဵင်းသီႇပေႃႉတႄႉ ပဵၼ်သိုၵ်းၵဝ်ႈၵၢင်ႉၵုမ်းၵမ်ဝႆႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ