မိူဝ်ႈၼႆႉဝၼ်းတီႈ 30/1/2026 ယၢမ်းၵၢင်ၼႂ် ၶၼ်ၶမ်းလုမ်ႈၾႃႉ ၼိုင်ႈဢွင်ႊသ်လႂ် မီးယူႇ 5,195 တေႃႊလႃႊ။ သင်တႅၵ်ႈၼိူင်းၵၼ်တင်း မိူဝ်ႈဝႃး 29/1/2026 ၸိုင် လူင်းၵႂႃႇမွၵ်ႈ 340 တေႃႊလႃႊ။

ယၢမ်းလဵဝ် ၼိုင်ႈၵျၢပ်ႈ (ဢၼ်မီးၼမ်ႉၼၵ်း 16 ပႄး) ၼႆႉ မီးယူႇ 11,000,000 ပျႃး (ၼႆႉပဵၼ်ၵႃႈၶၼ်ၸဝ်ႈႁၢၼ်ႉၶဝ်ၶၢႆ) ၊ ပေႃးပဵၼ်ၶၼ်ၸဝ်ႈႁၢၼ်ႉ ႁပ်ႉသိုဝ်ႉသမ်ႉ မီးယူႇ 10,960,000 ပျႃး ၼႆယဝ်ႉ။

ပူၼ်ႉမႃးသွင်သၢမ်ဝၼ်း ၼႂ်းႁၢင်လိူၼ်ၵျႅၼ်ႊၼိဝ်ႊရီႊၼႆႉ ၶၼ်ၶမ်းလုမ်ႈၾႃႉ ဢမ်ႇၼိမ်သဝ်း ၵိုင်ႉၵၢင်ႉပုင်ႈ ၶိုၼ်ႈၵႂႃႇၸူဝ်ႈၽႅပ်ႉတႃလႄႈ ႁဵတ်းႁႂ်ႈၶၼ်ၶမ်းၼႂ်းမိူင်းထႆး၊ မိူင်းႁူမ်ႈတုမ် (မိူင်းမၢၼ်ႈ) ပုင်ႈၶိုၼ်ႈၸွမ်း ထိုင်ၵႂႃႇ ၶၼ်တီႈဢမ်ႇယၢမ်ႈထိုင်သေပွၵ်ႈလႄႈ ဢဝ်ၵိုၵ်းပိုၼ်းၵႂႃႇ။

မိူဝ်ႈဝႃးဝၼ်းတီႈ 29/1/2026 ၵႃႈၶၼ်ၶမ်းၼႂ်းမိူင်းႁူမ်ႈတုမ်ၼႆႉ ထိုင်ၵႂႃႇ မွၵ်ႈ 120 သႅၼ်ပျႃး ၼႂ်းၶၢဝ်းတၢင်း ၶမ်ႈၶိုၼ်းလဵဝ်ၵူၺ်း ၶၼ်ၶမ်းပုင်ႈၶိုၼ်ႈၵႂႃႇ မွၵ်ႈ 8 သႅၼ်ပျႃးၼႆႉ ပွၵ်ႈၼႆႉ ပဵၼ်ဢၼ်ၵိုၵ်းပိုၼ်းလုမ်ႈၾႃႉၵႂႃႇ။ ၶၼ်ၶမ်းမိူင်းထႆးသမ်ႉ ဝၼ်းလဵဝ်ၵူၺ်းၶိုၼ်ႈၵႂႃႇ 4000 ၿၢတ်ႇပၢႆ ၼႆယဝ်ႉ။

ဢိင်ၼိူဝ်ငဝ်းလၢႆးၵၢၼ်မိူင်း လုမ်ႈၾႃႉဢမ်ႇၼိမ်သဝ်းသေ ၵႃႈၶၼ်ၶမ်းၵေႃႈ ၶိုၼ်ႈၶိုၼ်ႈလူင်းလူင်း ႁၢၼ်ႉတေႃႇထိုင်ယၢမ်းလဵဝ်ၵေႃႈ ပႆႇၼိမ်တေႉတေႉ။ ၵွပ်ႈၼၼ် သင်ပီႈၼွင်ႉတႆးၸိူဝ်းယိပ်းၶမ်းဝႆႉႁိုဝ်ႉ ဢမ်ႇၼၼ် ၸိူဝ်းတေသိုဝ်ႉတေၶၢႆၶမ်းၸိူဝ်းၼႆႉ ထုၵ်ႇလီဢွၼ်ၵၼ်ၾၢင်ႉယႂ်ႇၼမ်တေႉတေႉ။ ယွၼ်ႉဝႃႈ ဢိင်ၼိူဝ်ၶၼ်ၶမ်းဢမ်ႇၼိမ်သဝ်းၵူႈမိုဝ်ႉၵူႈဝၼ်းၼႆႉသေ လွင်ႈၵေႃႇၵၢၼ်ႁၢႆႉ လွင်ႈလွၵ်ႇလႅၼ်ၵိၼ်ၵၼ်ၵေႃႈ ၸၢင်ႈမီးလႆႈၵူႈၶၢဝ်းၼႆ – ၸုမ်းၸွႆႈထႅမ်ႁႅင်းၵၢၼ်ယၢၼ်မိူင်း ဝဵင်းၵဵင်းမႂ်ႇမိူင်းထႆး လၢတ်ႈပၼ်ၾၢင်ႉဝႆႉၼင်ႇၼႆ။