မိူဝ်ႈၼႆႉ ဝၼ်းတီႈ 29 လိူၼ်ထူၼ်ႈၼိုင်ႈ သိုဝ်ႇလူင်ပွင်ၸိုင်ႈမိူင်းၶႄႇ ႁၢႆးငၢၼ်းဢွၵ်ႇမႃးဝႃႈ ပၼ်တၢမ်ႇတၢႆ ၵူၼ်းႁူမ်ႈႁိူၼ်း ၶိူဝ်းႁိူၼ်း မိင် ႁူဝ်ၼႃႈပျီႇတူႉၸိတ်ႉၵဝ်ႈၵၢင်ႉ ႁူမ်ႈသဵၼ်ႈ 11 ၵေႃႉ ဝႃႈၼႆ။

ၸိူဝ်းၶဝ်ၼႆႉ ၵဵဝ်ႇၶွင်ႈလွင်ႈလွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊ (ၵျႃႊၽျႅၼ်ႉ)၊ လိူင်ႈၶႃႈႁႅမ်ၵူၼ်းတၢႆ၊ လိူင်ႈတေႃႇလွင်းၸိူဝ်းၼႆႉသေ လုမ်းတြႃးမိူင်းၶႄႇ ပူင်တၢမ်ႇတၢႆဝႆႉ ၸဵမ်မိူဝ်ႈ လိူၼ်ထူၼ်ႈၵဝ်ႈ ပီၵၢႆ 2025။ ႁိုင်ၶၢဝ်းတၢင်း 4 လိူၼ်ယဝ်ႉ ၸင်ႇလူင်းမိုဝ်းၶႃႈႁႅမ်တၢႆ ဝႃႈၼႆ။

ၵူၼ်းႁူမ်ႈႁိူၼ်း မိင်ၼႆႉ ပဵၼ်ၸုမ်း ဢၼ်ယၢမ်ႈၵုမ်းၵမ်ၽွင်းငမ်း ဝဵင်းလၢဝ်ႇၵၢႆး ဢၼ်မီးတီႈလႅၼ်လိၼ် တႆး – ၶႄႇ။ လုၵ်ႉတီႈဝဵင်းဢွၼ်ႇသေ လႅၵ်ႈလၢႆႈပဵၼ်မႃး ဝဵင်းယႂ်ႇၵူၼ်းၵိုၼ်း၊ မီးပႃး ပၢင်တေႃႇလွင်း ၵႃႊသီႊၼူဝ်ႊ။ ၾၢႆႇၼိုင်ႈသမ်ႉ လိူင်ႈႁဵတ်းႁၢႆႉႁႅမ်ၵၼ်တၢႆၵေႃႈ ၼမ်ၶိုၼ်ႈမႃး။

ၼႂ်းပီ 2023 ပူၼ်ႉမႃးၼႆႉ ယွၼ်ႉမိူင်းၶႄႇပၼ်ႁႅင်းဢီးသေ တပ်ႉသိုၵ်းမၢၼ်ႈ လႆႈတီႉၺွပ်းၵူၼ်းႁူမ်ႈႁိူၼ်း မိင် ဢိၵ်ႇ ၽူႈမၢၵ်ႈၵူၼ်းမီးၼႂ်းသိုၵ်းၵဝ်ႈၵၢင်ႉထႅင်ႈလၢႆလၢႆၶိူဝ်း သူင်ႇမွပ်ႈပၼ်တီႈ လူင်ပွင်ၸိုင်ႈမိူင်းၶႄႇ။

ၸွမ်းၼင်ႇ လုမ်းတြႃးမိူင်းၶႄႇ ပိုၼ်ၽၢဝ်ႇဢွၵ်ႇဝႆႉၼၼ်ႉ တႄႇပီ 2015 တေႃႇထိုင်ပီ 2023 ၼႆႉ ယွၼ်ႉၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊ ဢိၵ်ႇပႃး ၵၢၼ်တေႃႇလွင်းသေ ၸုမ်းႁူဝ်ၼႃႈပျီႇတူႉၸိတ်ႉၵဝ်ႈၵၢင်ႉ မီးငိုၼ်းၶဝ်ႈ မိုၼ်ႇလၢၼ်ႉယႂၼ်ႊ (10 ပီႊလီႊယႅၼ်ႊယႂၼ်ႊ)ပၢႆ (ၵိုင်ႇငိုၼ်း ဢမေႊရိၵၼ်ႊ တေႃႊလႃႊ ႁဵင်လၢၼ်ႉ (1 ပီႊလီႊယႅၼ်ႊ) ပၢႆ ။ လိူဝ်ၼၼ်ႉ ယွၼ်ႉပၼ်ႁႃၸိူဝ်ႉၼႆႉသေ ၵူၼ်းမိူင်းၶႄႇ 14 ၵေႃႉလႄႈ ဢိၵ်ႇပႃး ၵူၼ်းတၢင်ႇတီႈ လူႉတၢႆတင်းၼမ် ဝႃႈၼႆ။

ႁူဝ်ၼႃႈ ပျီႇတူႉၸိတ်ႉၵဝ်ႈၵၢင်ႉ မိင်သိုဝ်းၶျၢင်း တႄႉ ၸဵမ်မိူဝ်ႈမိူင်းၶႄႇဢွၵ်ႇလိၵ်ႈ တေတီႉၺွပ်းၼၼ်ႉ မၼ်းၸၢႆးၶႃႈႁႅမ်တူဝ်တၢႆပႅတ်ႈဢွၼ်တၢင်း။ မၼ်းၸၢႆးၼႆႉ ယၢမ်ႈပဵၼ် ၽူႈတႅၼ်းသၽႃးၵဝ်ႈၵၢင်ႉ ၼႂ်းပႃႇတီႇသၢင်ႇသီႈ။