မိူဝ်ႈၼႆႉဝၼ်းတီႈ 28/1/2026 ယၢမ်းၵၢင်ၼႂ် ၶၼ်ၶမ်းလုမ်ႈၾႃႉ ၼိုင်ႈဢွၼ်ႊသ် ထိုင်ၵႂႃႇ 5,243 တေႃႊလႃႊ။ ၶၼ်ၶမ်းၼႂ်းမိူင်းႁူမ်ႈတုမ် ၼိုင်ႈၵျၢပ်ႈလႂ် ထိုင်ၵႂႃႇႁိမ်းႁွမ်း 109 သႅၼ်ပျႃး ၼႆယဝ်ႉ။

ၵႃႈၶၼ်ၶမ်းၼႂ်းမိူင်းႁူမ်ႈတုမ်ၼႆႉ ယၢမ်းလဵဝ် ၼိုင်ႈၵျၢပ်ႈ (ဢၼ်မီးၼမ်ႉၼၵ်း 16 ပႄး) ၼႆႉ မီးယူႇ 10,870,000 ပျႃး (ၼႆႉပဵၼ်ၵႃႈၶၼ်ၸဝ်ႈႁၢၼ်ႉၶဝ်ၶၢႆ) ၊ ပေႃးပဵၼ်ၶၼ်ၸဝ်ႈႁၢၼ်ႉ ၶဝ်သိုဝ်ႉသမ်ႉ မီးယူႇ 10,830,000 ပျႃး ၼႆယဝ်ႉ။

မိူဝ်ႈဝႃး 27/1/2026 ယၢမ်းတၢမ်းၶမ်ႈၼႆႉ ၶၼ်ၶမ်းၼိုင်ႈၵျၢပ်ႈၼႆႉ ယင်းတိုၵ်ႉမီး 10,650,000 ၵူၺ်းသေ ဝၼ်းလဵဝ်ၵူၺ်းၵိုင်ႉၵၢင်ႉၶိုၼ်ႈၵႂႃႇ 2 သႅၼ်ပျႃး၊ ၼႂ်းၶၢဝ်းတၢင်းဝူင်ႈလဵဝ်ၵူၺ်း ၶၼ်ၶမ်းၼႆႉ ၸမ်မႃးထိုင် 110 သႅၼ်ပျႃး။

တီႈၼႂ်းဝူင်းၵၢၼ်လွၵ်းၵၢတ်ႇၵႃႉၶၢႆၶမ်း ၼႂ်းမိူင်းထႆးတႄႉ ယၢမ်းၵၢင်ၼႂ်ၸဝ်ႉၼႆႉ ပိုတ်ႇၵႃႈၶၼ်ဝႆႉ ၼိုင်ႈၿၢတ်ႇ (ဢၼ်မီး 15 ၵရႅမ်ႊ) ၼႆႉ 76,100 ၿၢတ်ႇ၊ ၶမ်ႈဝႃးၼႆႉ ပိၵ်ႉၵႂႃႇတီႈ 74800 ၶိုၼ်းလဵဝ်ၵူၺ်း ပုင်ႈၶိုၼ်ႈမႃး 1,300 ၿၢတ်ႇ ဝႃႈၼႆ။

ၶၼ်ၶမ်းၼႆႉၼႂ်းမိူင်းထႆးၵေႃႈ ၶိုၼ်ႈၸွမ်းငဝ်းလၢႆးယူႇၵူႈၶၢဝ်းယၢမ်းလႄႈ ၼႂ်းၶၢဝ်းတၢင်းၼိုင်ႈၸူဝ်ႈမူင်းၼႆႉ ၶိုၼ်ႈမႃးထႅင်ႈတႃႇ 800 ၿၢတ်ႇ။ ဢိင်ၼိူဝ်ၶၼ်ၶမ်းလုမ်ႈၾႃႉသေ ၶၼ်ၶမ်းမိူင်းမၢၼ်ႈ တင်း မိူင်းထႆးၵေႃႈ ၶိုၼ်ႈၸွမ်းယူႇၶၢဝ်းယၢမ်း။

ဢိင်ၼိူဝ်ၶၼ်ၶမ်းပုင်ႈၶိုၼ်ႈယူႇၵူႈမိုဝ်ႉၵူႈဝၼ်းၼႆႉသေ လွင်ႈၵေႃႇၵၢၼ်ႁၢႆႉ လွင်ႈလွၵ်ႇလႅၼ်ၵိၼ်ၵၼ်ၵေႃႈၸၢင်ႈမီးလႆႈၵူႈၶၢဝ်းလႄႈ ပီႈၼွင်ႉတႆးၸိူဝ်းယိပ်းၶမ်းဝႆႉႁိုဝ်ႉဢမ်ႇၼၼ် ၸိူဝ်းတေသိုဝ်ႉတေၶၢႆၶမ်းႁိုဝ်ႉၸိူဝ်းၼႆႉၵေႃႈႁႂ်ႈဢွၼ်ၵၼ်ၾၢင်ႉယႂ်ႇၼမ်သေၵမ်း – ၸုမ်းၸွႆႈထႅမ်ႁႅင်းၵၢၼ်ယၢၼ်မိူင်း ဝဵင်းၵဵင်းမႂ်ႇမိူင်းထႆး လၢတ်ႈဝႆႉၼင်ႇၼႆ။