မိူဝ်ႈၼႆႉ ဝၼ်းတီႈ 28 /1/2026 ယၢမ်းၵၢင်ၼႂ် 6 မူင်းၶိုင်ႈ  သင်ၶၸဝ်ႈတူၼ်ၼိုင်ႈ  တီႈၵျွင်းမႁႃႇ ပေႃးၻႃႉယူင်ႇ ဢၼ်မီးၼႂ်းပွၵ်ႉ 4  တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ထုၵ်ႇၵူၼ်းဢမ်ႇႁူႉၾၢႆႇ ၶႃႈႁႅမ် လႄႈလႆႈ လူႉလွၼ်ႇၵႂႃႇ- ဝႃႈၼႆ ။

ၽွင်းၵူၼ်းႁိမ်းႁွမ်းလႄႈ ၸုမ်းပရႁိတ ၵႂႃႇႁၼ်ၶၢပ်ႈတူဝ်သင်ၶၸဝ်ႈပႃးၼၼ်ႉ   မီးႁွႆးမိတ်ႈတႅင်းဝႆႉၸွမ်း  တွင်ႉ လႄႈ ၼႃႈဢူၵ်း ဢမ်ႇယွမ်း 12 ၵမ်း ၊  မီးႁွႆးထုပ်ႉတွႆႇဝႆႉပႃး တီႈၵွၵ်းႁူဝ် လႄႈ တီႈသူပ်း ၊ ၶဵဝ်ႈမၼ်းၸဝ်ႈၵေႃႈ ႁၢၵ်းႁူင်ႈဝႆႉ  ။

ၵူၼ်းၸၢႆးပိုၼ်ႉတီႈဢၼ်မိုတ်ႈၵိုဝ်းၵၼ်တင်း သင်ၶၸဝ်ႈၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ -“ၺႃးၵူၼ်းၶဝ်ႈႁဵတ်းႁၢႆႉဝႆႉဢေႃႈ ၊ ထိုင်ယၢမ်းလဵဝ် ပႆႇတီႉၺွပ်းၵူၼ်းႁၢႆႉၼၼ်ႉလႆႈၶႃႈ၊ ၸဝ်ႈၸၢင်းပႃးၼၼ်ႉ  ႁဝ်းၶႃႈၵႆႉပၢင်းမႃးသုင်းသွမ်းတီႈႁိူၼ်း ၊  မၼ်းၸဝ်ႈ ၸႂ်လီၼႃႇၶႃႈ လီသေးလၢႆၵျႃႉ ၊ မိူဝ်ႈၽွင်းပၢင်တိုၵ်းၼၼ်ႉၵေႃႈ မၼ်းၸဝ်ႈၸွႆႈပၼ်ၵူၼ်းပၢႆႈၽေးသိုၵ်း တင်းၼမ်ဢေႃႈ”-ဝႃႈၼႆ ။

သင်ၶၸဝ်ႈတူၼ်ဢၼ်ထုၵ်ႇၶႃႈႁႅမ်ၼၼ်ႉ  ၼႃႇမၸဝ်ႈႁွင်ႉ – ၸဝ်ႈၵေႇတရ ဢႃယုမွၵ်ႈ 60 ပီ   ။

ၵူၼ်း/ၸုမ်းဢၼ်ၶႃႈႁႅမ်ၼၼ်ႉပဵၼ်ၽႂ်တႄႉပႆႇလႆႈႁူႉ တေႃႇထိုင်ယၢမ်းလဵဝ်။

ယၢမ်းလဵဝ် ၼႂ်းဝဵင်းလႃႈသဵဝ်ႈၼႆႉ ၾၢႆႇသိုၵ်းမၢၼ်ႈ ၶဝ်ႈၵုမ်းၵမ်ဝႆႉၶိုၼ်းယဝ်ႉသေတႃႉ ၵဵဝ်ႇလူၺ်ႈလွင်ႈ ၽူႈလၵ်ႉၸၵ်ႉၶုတ်ႈၸိူဝ်ႈၼႆႉ  ပႆႇၸတ်းၵၢၼ်ပၼ်သင်လႆႈတႄႉတႄႉ။ သင်တီႉၺွပ်းလႆႈၵေႃႈ – ၵုမ်းၶင်ဝႆႉၸူဝ်ႈၶၢဝ်းသေ ၶဝ်ႈပွႆႇပၼ်ၶိုၼ်း- ၵူၼ်းပိုၼ်ႉတီႈလၢတ်ႈၼင်ႇၼႆ ။

တီႈဝဵင်းလႃႈသဵဝ်ႈၼႆႉ လွင်ႈၽူႈလၵ်ႉၵူၼ်းၸူၼ် ၊ ႁဵတ်းႁၢႆႉၶႃႈႁႅမ်ၼႆႉၵႆႉပဵၼ်ၼႃႇ ။ ပူၼ်ႉမႃး မိူဝ်ႈႁၢင်လိူၼ်ဢေႊပရိူဝ်ႊ ပီ 2025 ၼၼ်ႉၵေႃႈ ၼၢင်းယိင်းၵေႃႉၼိုင်ႈ ၽွင်းၵႂႃႇၸွမ်းတၢင်းၼၼ်ႉ ၺႃးၵူၼ်းၵေႃႉၼိုင်ႈၸူၼ်မိုဝ်းထိုဝ်မၼ်းၼၢင်းသေႁဵတ်းႁၢႆႉမၼ်းၼၢင်း ထိုင်တီႈမိုဝ်းလႄႈ ၶႅၼ်မၢတ်ႇ ၸဵပ်းၵႂႃႇ။ တေႃႇထိုင်ဝၼ်းမိူဝ်ႈၼႆႉပလိၵ်ႈမၢၼ်ႈဢမ်ႇတီႉလႆႈ ၵူၼ်းႁၢႆႉၵူၼ်းၸူၼ်ၼၼ်ႉ။   ယွၼ်ႉၼၼ် ၵူၼ်းမိူင်း  လႆႈၾၢင်ႉၵိၼ်ယူႇသဝ်းဝႆႉ ႁင်းၽႂ်မၼ်း ယွၼ်ႉဢမ်ႇမီးၽူႈလႂ် ၸုမ်းလႂ်  ၵႅတ်ႇၶႄႁႄႉၵင်ႈပၼ် ။

ၸႄႈဝဵင်းလႃႈသဵဝ်ႈၼႆႉ တင်းမူတ်းမီးယူႇ 12 ပွၵ်ႉ လႄႈ 70 ဢိူင်ႇ ႁူဝ်ၼပ်ႉၵူၼ်းယူႇသဝ်းမီး 3 သႅၼ်ပၢႆ။ ဝၢႆးလင်ပၢင်တိုၵ်းၽႅၼ်ယၼ်ႇသိုၵ်း 1027 ႁဵတ်းႁႂ်ႈဝဵင်းလႃႈသဵဝ်ႈလႅဝ်ၽႅဝ်ႉယဝ်ႉမွၵ်ႈ 1 ပီ သိုၵ်းၵဝ်ႈၵၢင်ႉထွႆထွၼ်ဢွၵ်ႇပၼ်လီလီ ထိုင်တီႈဢမ်ႇမီးသဵင်မၢၵ်ႇသဵင်ၵွင်ႈတႅၵ်ႇ၊ ၾၢႆႇသိုၵ်းမၢၼ်ႈၶဝ်ႈၵုမ်းၵမ်ဝႆႉၶိုၼ်း ၼႂ်းဝဵင်း 12 ပွၵ်ႉ  သိုၵ်းၵဝ်ႈၵၢင်ႉတႄႉ ၵုမ်းၵမ်ဝႆႉ ၾၢႆႇၼွၵ်ႈဝဵင်း တႃႇ 70 ဢိူင်ႇသေ တိုတ်ႉၸၼ်ၶဝ်ႈဝႆႉပႃး ၼႂ်းၸႄႈဝဵင်းသႅၼ်ဝီ တင်း သဵင်ႈ  ။