ၶၼ်ၶမ်းလုမ်ႈၾႃႉၵိုင်ႉၵၢင်ႉပုင်ႈၶိုၼ်ႈ ၼိုင်ႈဢွၼ်ႊသ်လႂ် 5,000 တေႃႊလႃႊပၢႆလႄႈ ၶမ်းၼႂ်းမိူင်းႁူမ်ႈ တုမ် ၼိုင်ႈၵျၢပ်ႈၼႆႉ ထိုင်ၵႂႃႇ မွၵ်ႈ 106 သႅၼ်ပျႃး ၼႆယဝ်ႉ။

ၵႃႈၶၼ်ၶမ်းပုင်ႈၶိုၼ်ႈၵႂႃႇႁႅင်းၼႃႇလႄႈ ၵူၼ်းၵႃႉၶၢႆၶမ်း လႄႈ ႁၢၼ်ႉၶၢႆၶမ်းၵမ်ႈၼမ် ဢွၼ်ၵၼ်ၵိုတ်းယင်ႉဝႆႉ လွင်ႈသိုဝ်ႉၶၢႆၶမ်းၸူဝ်ႈၶၢဝ်းသေ ၸဝ်ႈႁၢၼ်ႉၶၢႆၶမ်းမၢင်ၸိူဝ်းမႆႈၸႂ်ၵူဝ်မီးၵၢၼ်တီႉၺွပ်းလႄႈ ၵမ်ႈၽွင်ႈလႆႈငိူင်ႉ ပၢႆႈယူႇလပ်ႉလပ်ႉဝႆႉၸူဝ်ႈၶၢဝ်း ၼႆယဝ်ႉ။

ၵူၼ်းႁဵတ်းၵၢၼ်ၵႃႉၶၢႆၶမ်း ၵေႃႉၼိုင်ႈတႄႉ လၢတ်ႈဝႃႈ “ၸဵမ်မိူဝ်ႈၶၼ်ၶမ်းၶိုၼ်ႈမႃးၸမ် 100 ၼၼ်ႉယဝ်ႉ ဢွၼ်ၵၼ်ၵိုတ်းဝႆႉၵၢၼ်ၵႃႉၶၢႆၶမ်းၸူဝ်ႈၶၢဝ်း။ တေလႆႈပႂ်ႉတူၺ်းငဝ်းလၢႆးလွၵ်းၵၢတ်ႇၵၢၼ်ၵႃႉၶၢႆၶမ်းၵွၼ်ႇ။ ပေႃးၶၼ်ၶမ်းၶိုၼ်ႈသုင်ႁႅင်းၸိူင်ႉၼႆ ၸၢင်ႈမီးၵၢၼ်တီႉၺွပ်း ဢဝ်လိူင်ႈ ၵူၼ်းႁဵတ်းၵၢၼ်ၵႃႉၶၢႆၶမ်းလႄႈ ႁၢၼ်ႉၶၢႆၶမ်းလူင်ၵမ်ႈၽွင်ႈလႆႈဢိုတ်းဝႆႉ ၸူဝ်ႈၶၢဝ်း။ ၶၼ်ၶမ်းၼႆႉၶိုၼ်ႈမႃးယူႇၵူႈမိုဝ်ႉဝၼ်း။ ဢမ်ႇၼိမ်သေ ဢိတ်း” ၼႆယဝ်ႉ။

ၶၼ်ၶမ်းၼႂ်းမိူင်းႁူမ်ႈတုမ်ၼႆႉ ၵိုင်ႉၵၢင်ႉပုင်ႈၶိုၼ်ႈမႃး ႁူဝ်ပီ 2026 ၼႆႉႁၢဝ်ႈႁႅင်းတေႉတေႉဝႃႈဝႃႈ မိူဝ်ႈဝၼ်းတီႈ 26 လိူၼ်ၵျႅၼ်ႊၼိဝ်ႊရီႇ ယၢမ်းၵၢင်ၼႂ်ၸဝ်ႉ ၶၼ်ၶမ်းတိုၵ်ႉမီး 100 သႅၼ်ပၢႆဢိတ်းၼိုင်ႈၵူၺ်းသေ ထိုင်ဝၢႆးဝၼ်းမႃး ၵိုင်ႉၵၢင်ႉ ၶိုၼ်ႈထိုင် 106 သႅၼ်ပျႃးၵမ်းသိုဝ်ႈ။

ၼႂ်းၶၢဝ်းတၢင်းဝူင်ႈလဵဝ်ၵူၺ်း ၼိုင်ႈၵျၢပ်ႈၼႆႉ ၶိုၼ်ႈၵႂႃႇပဵၼ် 6 သႅၼ်ပျႃးပၢႆ ၼႆယဝ်ႉ။

ၵူၼ်းႁဵတ်းၵၢၼ်ၵႃႉၶၢႆၶမ်းၶဝ်ၵမ်ႈၼမ်တႄႉ လၢမ်းၶၢတ်ႈဝႃႈ – ၶၼ်ၶမ်းၼႆႉ ၵိုင်ႉၵၢင်ႉပုင်ႈၶိုၼ်ႈၵႂႃႇႁႅင်းလႄႈ ၸွင်ႇၶၼ်တေၸၢင်ႈလူင်းၶိုၼ်းႁိုဝ်ၼႆတႄႉ လၢမ်းယၢပ်ႇတေႉတေႉ။ ၶၼ်ၶမ်းလုမ်ႈၾႃႉၼႆႉ ၼိုင်ႈဢွၼ်ႊသ်လႂ် ထိုင်ၵႂႃႇ 5000 တေႃႊလႃႊပၢႆယဝ်ႉ။ ဢမ်ႇထၢင်ႇဝႃႈ တေထိုင်မွၵ်ႈၼႆႉ ဝႃႈၼႆ။

ယၢမ်းလဵဝ် ၶၼ်ၶမ်း ၶိုၼ်ႈသုင်ႁႅင်းသေတႃႉ ၶၼ်လႅၵ်ႈငိုၼ်းတေႃႊလႃႊတႄႉ ယင်းတိုၵ်ႉတူၵ်းယူႇမိူၼ်ၵဝ်ႇ။ မိူဝ်ႈပူၼ်ႉမႃး ၼႂ်းဝူင်ႈတီႈသွင် လိူၼ်ၵျႅၼ်ႊၼိဝ်ႊရီႇၼႆႉ ၼိုင်ႈတေႃႊလႃႊ မီးယူႇ 4,100 ပျႃး။ မိူဝ်ႈၼႆႉဝၼ်းတီႈ 27/1/2026 ၼႆႉတႄႉ ၶၼ်လႅၵ်ႈငိုၼ်းတေႃႊလႃႊ ၾၢႆႇၼွၵ်ႈၼႆႉ မီးယူႇ 4,020 ပျႃး ။ မိူဝ်ႈဝႃး ဝၼ်းတီႈ 26/1/2026 သမ်ႉၶိုၼ်းမီး ၼိုင်ႈတေႃႊလႃႊ 4,025 ပျႃး ။

ၼႂ်းလွၵ်းၵၢတ်ႇၵၢၼ်ၵႃႉၶၢႆၶမ်း လုမ်ႈၾႃႉ လႄႈ ၼႂ်းမိူင်းႁူမ်ႈတုမ်တႄႉ လႅၵ်ႈလၢႆႈၸွမ်းယူႇၵူႈၶၢဝ်းယၢမ်းသေ ပုင်ႈၶိုၼ်ႈသုင်မႃးတိၵ်းတိၵ်းသေတႃႉ ၾၢႆႇၸုမ်းၵႃႉၶၢႆၶမ်းတီႈတိူင်းတႃႈ ၵုင်ႈ (YGEA) တႄႉ တင်ႈတႄႇ လိူၼ်တီႊသႅမ်ႊပိူဝ်ႊ ဝၼ်းတီႈ 24 ပီ 2025 မႃး ႁၢၼ်ႉတေႃႇထိုင်ဝၼ်းမိူဝ်ႈၼႆႉ 27/1/2026 တိုၵ်ႉပိုတ်ႇ ၶၼ်ၶမ်းဝႆႉ ၼိုင်ႈၵျၢပ်ႈလႂ် 60 သႅၼ်ပျႃးယူႇ ဢမ်ႇမီးလွင်ႈလႅၵ်ႈလၢႆႈသင်။