တႄႇၼႂ်းလိူၼ်ၵျႅၼ်ႊၼိဝ်ႊရီႊ ၼႆႉမႃးပျီႇတူႉၸိတ်ႉPNO တဵၵ်းၶၢၼ်း ၵူၼ်းဝၢၼ်ႈထီႇရီး ၊ ၼမ်ႉပွၼ် ၊ ၼမ်ႉဢုၼ်ႇဢၼ်မီးၼႂ်းထုင်ႉၸၢမ်ၵႃး ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း 15 ဝၼ်းၼိုင်ႈပွၵ်ႈ ဢဝ်ႁူမ်ႇလူမ်ႈၼႂ်းဝၢၼ်ႈၼႆယဝ်ႉ ။

ၵူၼ်းၵႂႃႇဢဝ်ႁူမ်ႇလူမ်ႈၼႆႉ လႆႈၼုင်ႈၶိူဝ်းပျီႇတူႉၸိတ်ႉပဢူဝ်းသေ ယိပ်းၵွင်ႈ ပႂ်ႉၸွမ်းပိုၼ်ႉတီႈPNO  ။ ၽွင်းပျီႇတူႉၸိတ်ႉၶၢၼ်းတႃႇဢဝ်ႁူမ်ႇလူမ်ႈၼၼ်ႉသင်ဝႃႈ ဢမ်ႇၶႂ်ႈၵႂႃႇၼႆၸိုင်ႇ လႆႈဢဝ်ငိုၼ်း 3သႅၼ်5 မိုၼ်ႇပျႃးၸၢင်ႈၵူၼ်းၵႂႃႇတႅၼ်းတၢင်ႇ ၼႆယဝ်ႉ ။

ၵူၼ်းၸၢႆးထုင်ႉၸၢမ်ၵႃးလၢတ်ႈၽူႈတွႆႇႁွၵ်ႈဝႃႈ -“ 15 ဝၼ်းၼိုင်ႈပွၵ်ႈ ၊ ၼိုင်ႈပွၵ်ႈၼႆႉ ၶဝ် ၶၢၼ်း ၵူၼ်း 10 ၵေႃႉ ၊ ဝၢၼ်ႈဢၼ်ၼႂ်းထုင်ႉၸၢမ်ၵႃးၼႆႉႁိူၼ်းဢၼ်မီးၵူၼ်းၸၢႆးၼၼ်ႉ လႆႈပၼ်ႇပုတ်ႈ ၵၼ်ၵႂႃႇၸိူင်ႉၼၼ် ။ ၵူၼ်းဢမ်ႇႁတ်းၵႂႃႇ ၊ ဢမ်ႇၶႂ်ႈၵႂႃႇၵေႃႈ လႆႈၸၢင်ႈၵူၼ်း ၵႂႃႇတႅၼ်းတၢင် ၼိုင်ႈၵေႃႉၼႆႉ 3 သႅၼ် 5 မိုၼ်ႇပျႃး ၊ မိူဝ်ႈဢွၼ်တၢင်း လႆႈပၼ် 5 သႅၼ်ပျႃးၵွၼ်ႇ ၵူၼ်းပိုၼ်ႉတီႈ ဢမ်ႇပၼ်လႆႈ ၼႆသေ ဢွၼ်ၵၼ်ၵႂႃႇတုၵ်းယွၼ်းဝႆႉလႄႈ ယွမ်းၵႂႃႇဢိတ်းၼိုင်ႈ ”- ဝႃႈၼႆ ။

လွင်ႈပျီႇတူႉၸိတ်ႉပဢူဝ်းႁွင်ႉဢဝ်ၵူၼ်းဝၢၼ်ႈၵႂႃႇဢဝ်ႁူမ်ႇလူမ်ႈပိုၼ်ႉတီႈ တီႈထုင်ႉၸၢမ်ၵႃးၼႆႉ မီးမွၵ်ႈ 3 – 4 လိူၼ်ယဝ်ႉ ၊ လိူဝ်ၼၼ်ႉ ၵူၼ်းဢၼ်မီးၼႂ်းဝၢၼ်ႈၸိူဝ်းၼၼ်ႉၵေႃႈ လႆႈသူင်ႇႁေႃႇၶဝ်ႈႁေႃႇၽၵ်းပၼ် တီႈပျီႇတူႉၸိတ်ႉပဢူဝ်းဢၼ်ဢဝ်ႁူမ်ႇလူမ်ႈၼႂ်းဝၢၼ်ႈၼၼ်ႉ  ႁဵတ်းႁႂ်ႈၵူၼ်းပိုၼ်ႉယူႇယၢပ်ႇၵိၼ်းၸႂ် ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၸဵမ်မိူဝ်ႈၶဝ်(PNO) ၶဝ်ႈမႃးၵုမ်းၼႂ်းဝၢၼ်ႈၼႆႉ ၶဝ်ၵဵပ်းၸိူင်ႉၼၼ်ယူႇၵူႈပွၵ်ႈ ၊ ပေႃးဢမ်ႇၵႂႃႇၵေႃႈဢမ်ႇလႆႈ ပေႃးတေၵႂႃႇၵေႃႈ သမ်ႉတေလႆႈၼုင်ႈၶိူဝ်းၶဝ် ဢမ်ႇမီးႁူမ်ႇလူမ်ႈၶႃႈ ၊ လႆႈႁႃၵူၼ်းၵႂႃႇတႅၼ်းတိၵ်းတိၵ်းဢေႃႈ ၼိုင်ႈပွၵ်ႈၼႆႉ 5 သႅၼ်ပျႃး”-ဝႃႈၼႆ ။

ယွၼ်ႉၵၢၼ်ႁႃၵိၼ်လဵင်ႉတွင်ႉယၢပ်ႇ ၊ ၵၢၼ်ၽုၵ်ႇသွမ်ႈဢမ်ႇပဵၼ်ၵၢၼ်လႄႈ ၵူၼ်းၸၢႆး ပိုၼ်ႉတီႈ မၢင်ၸိူဝ်း ၵိၼ်ၸၢင်ႈၵႂႃႇဢဝ်ႁူမ်ႇလူမ်ႈ ဢၼ်ပျီႇတူႉၸိတ်ႉၶၢၼ်းမႃးၼၼ်ႉၵေႃႈမီး – ၵူၼ်းပိုၼ်ႉတီႈလၢတ်ႈ ။

ၵဵဝ်ၵပ်းလွင်ႈၼႆႉ ၽူႈမီးၸၼ်ႉတီႈၸုမ်း PNO လၢတ်ႈၽူႈတွႆႇႁွၵ်ႈဝႃႈ -“လွင်ႈၼႆႉဢမ်ႇၸႂ်ႈ ၊ မိူဝ်ႈလဵဝ်ၼႆႉ ဢမ်ႇၸႂ်ႈၵၢပ်ႈပၢၼ်ၸႂ်ႉၵူၼ်းဢဝ်ႁူမ်ႇလူမ်ႈယဝ်ႉ ၊ ၸုမ်းႁဝ်းၶႃႈၼႆႉ ဢဝ်တရူၼ်ႊ ဢဝ်ႁူမ်ႇလူမ်ႈၵူၺ်း”-ဝႃႈၼႆ ။

မိူၼ်ၼင်ႇၼႆ ၼႂ်းလိူၼ်ဢွၵ်ႇထူဝ်ႇပိူဝ်ႊ ပီ2025 ပူၼ်ႉမႃးၼႆႉၵေႃႈ ပျီႇတူႉၸိတ်ႉ တဵၵ်းၸႂ်ႉၵူၼ်းဝၢၼ်ႈၵႂႃႇၼႃႈသိုၵ်းၼႆႉပဵၼ်ၵူၼ်းဝၢၼ်ႈၼမ်ႉဢုၼ်ႇလႄႈ ၊ ဝၢၼ်ႈထီႇရီး ဢၼ်ပဵၼ်ဝၢၼ်ႈယႂ်ႇၼႂ်းထုင်ႉၸၢမ်ၵႃး ၼိုင်ႈဝၢၼ်ႈ 20 ၵေႃႉ သူင်ႇၼႃႈသိုၵ်း တီႈတၢင်းၼႂ်းၸႄႈဝဵင်းပၢင်လွင်း – ၾၢႆႇၶုၼ် လႅၼ်လိၼ် တႆး- ယၢင်းလႅင် ၸိူဝ်းၼၼ်ႉ ဝႃႈၼႆ ။

ဝၢႆးလင် သိုၵ်းမၢၼ်ႈယိုတ်းမိူင်းမႃးၼႂ်းၶၢဝ်းတၢင်း 5 ပီၼႆႉ ပျီႇတူႉၸိတ်ႉပဢူဝ်း PNO ၶဝ်ၵဵပ်းၵူၼ်းၼႂ်းၸႄႈဝဵင်းသီႇသႅင် ၊ ပၢင်လွင်း ၊ ႁူဝ်ပူင်း သူင်ႇၾိုၵ်းၵၢၼ်သိုၵ်း သူင်ႇၼႃႈသိုၵ်း ၼႆယဝ်ႉ ၊ လိူဝ်ၼၼ်ႉ လႆႈတိုဝ်ႉတၢင်းၶဝ်ႈဢဝ်တီႈယူႇၼႂ်းဝၢၼ်ႈသေ ၵဵပ်းၵူၼ်းဝၢၼ်ႈ သူင်ႇၾိုၵ်းၵၢၼ်သိုၵ်းယဝ်ႉ ၼႄၶေႃႈဢၢင်ႈလွင်ႈၼိုင်ႈယဝ်ႉ လွင်ႈၼိုင်ႈ ၵဵပ်းၶွၼ်ႇၵူၼ်းမိူင်း ၼႂ်းထုင်ႉၸၢမ်ၵႃးမႃးၶိူဝ်းယႂ်း။