ပၢင်လိူၵ်ႈတင်ႈဢၼ်ၸတ်းႁဵတ်းယဝ်ႉတူဝ်ႈၵႂႃႇ ပွၵ်ႈၵမ်း 3 (ပွၵ်ႈလိုၼ်းသုတ်း) ၼႂ်းမိူင်းတႆး ၸတ်းႁဵတ်းၵႂႃႇ 9 ၸႄႈဝဵင်း။ ပႃႇတီႇသၢင်ႇသီႈ ပေႉၵိၼ်ၶၢတ်ႇၵႂႃႇ 4 ၸႄႈဝဵင်း၊ ပႃႇတီႇသိူဝ်ၽိူၵ်ႇ ပေႉ 3 ၸႄႈဝဵင်း၊ လႄႈ ပႃႇတီႇပဢူဝ်းပေႉ 2 ၸႄႈဝဵင်း ။

ၼႂ်းမိူင်းတႆးၼႆႉ ပႃႇတီႇသၢင်ႇသီႈ လႆႈၶႅပ်းၵၢင်ၸႂ်ၼမ်သုတ်းတီႈဝဵင်းၵျွၵ်ႉမႄး၊ ဝဵင်းမၢၵ်ႇမၢင်၊ ဝဵင်းမိူင်းသူႈ၊ ဝဵင်းၾၢႆၶုၼ်။ ပႃႇတီႇသိူဝ်ၽိူၵ်ႇတႄႉ ဢွင်ႇပေႉၵႂႃႇ တီႈဝဵင်းသီႇပေႃႉ၊ ဝဵင်းၵေးသီး၊ ဝဵင်းမိူင်းၼၢႆး ဝႃႈၼႆ။

ၸၢႆးသိူဝ်ႁၢၼ် ၼေႃႇၽူႈတႅၼ်း ပႃႇတီႇသိူဝ်ၽိူၵ်ႇ ၵေႃႉဢွင်ႇပေႉပၢင်လိူၵ်ႈတင်ႈ လၢတ်ႈတီႈၽူႈတွႆႇႁွၵ်ႈဝႃႈ “ မိူင်းၼၢႆးၼႆႉပေႉသွင်တီႈၶႃႈဢေႃႈ။ ပဵၼ်တီႈသၽႃးၵူၼ်းမိူင်း လႄႈ သၽႃးၸႄႈမိူင်းၶႃႈ။ တီႈၵေးသီးၵေႃႈ ဢွင်ႇပေႉဝႆႉတင်းသွင်တီႈၶႃႈ။ ပေႃးယဝ်ႉတီႈသီႇပေႃႉၵေႃႈ ဢွင်ႇပေႉဝႆႉ တင်းသွင်တီႈၶႃႈ။ သၽႃးၸႄႈမိူင်း လႄႈ သၽႃးၵူၼ်းမိူင်းၼႆၶႃႈ။ မိူင်းတႆးၼႆႉ ပႃႇတီႇသိူဝ်ၽိူၵ်ႇ ပေႉဝႆႉ 3 ၸႄႈဝဵင်းၵူၺ်းၶႃႈ။ မၢၵ်ႇမၢင်၊ မိူင်းသူႈ၊ ၵျွၵ်ႉမႄး၊ ယွင်ႁူၺ်ႈ၊ ပၢင်လွင်း တႄႉၵေႃႈ ဢမ်ႇပေႉၶႃႈ။ ၾၢႆၶုၼ်တႄႉ တီႈၼၼ်ႉ မီးပႃႇတီႇသၢင်ႇသီႈၸုမ်း လဵဝ်ၵူၺ်းဢမ်ႇမီးၽႂ်ၶႅင်ႇမၼ်းဝႆႉလႄႈ ၶဝ်ပေႉဝႆႉဢေႃႈ” ဝႃႈၼႆ။

ႁူဝ်ၼပ်ႉၼေႃႇၽွင်းတႅၼ်းၽွင်း ပႃႇတီႇသိူဝ်ၽိူၵ်ႇ ဢၼ်တေလႆႈၶဝ်ႈၵႂႃႇဢဝ်တီႈယူႇ ၼင်ႈၼႂ်းလုမ်းသၽႃး ၵူၼ်းမိူင်း လႄႈ သၽႃးၸႄႈမိူင်း (FPTP) ၼႆႉ ၸွမ်းၼင်ႇလႆႈႁူႉသဵၼ်ႈမၢႆဝႆႉၼၼ်ႉ မီးမွၵ်ႈ 20 ၵေႃႉပၢႆယဝ်ႉလႄႈ သင်လႆႈႁူႉၶေႃႈတွပ်ႇတႃႇတီႈၼင်ႈသၽႃးၸိူဝ်ႉၸၢတ်ႈ လႄႈ သၽႃးၸႄႈမိူင်း (PR) မႃးၸိုင် ႁူဝ်ၼပ်ႉၼေႃႇၽွင်းတႅၼ်းတေၼမ်တိူဝ်းမႃးထႅင်ႈယူႇၼႆ ၸၢႆးသိူဝ်ႁၢၼ် လၢတ်ႈၼင်ႇၼႆ။

“မိူဝ်ႈလဵဝ်ၼႆႉ 1 တေႃႇထိုင် 3 ၼႆႉ တီႈသၽႃးၵူၼ်းမိူင်းႁဝ်းၶႃႈ တင်းမူတ်းလႆႈဝႆႉ 7 တီႈၼင်ႈ။ 7 ၸႄႈဝဵင်း။ ပၢင်လိူၵ်ႈတင်ႈပွၵ်ႈၵမ်း -1 ထိုင် 3 ၼႆႉတႄႉ တႃႇတီႈၼင်ႈသၽႃးၵူၼ်းမိူင်းႁဝ်းလႆႈဝႆႉ 5 ၵေႃႉ။ ပဵၼ်တီႈဝဵင်းလၢင်းၶိူဝ်း၊ မိူင်းၼၢႆး၊ ၵုၼ်ႁဵင်၊ လၢႆးၶႃႈ၊ မိူင်းၵိုင်၊ ၵေးသီး၊ သီႇပေႃႉ။ တီႈသၽႃးၸိူဝ်ႉၸၢတ်ႈတႄႉ ပႆႇလႆႈႁုပ်ႈသဵၼ်ႈမၢႆမၼ်းလႄႈ ပႆႇလႆႈႁူႉလၢႆၵေႃႉၶႃႈ။ တၢင်းမိူင်းတႆးပွတ်းဢွၵ်ႇတႄႉၵေႃႈ မိူဝ်ႈပွၵ်ႈၵမ်းသွင်ၼၼ်ႉ ႁဝ်းၶႃႈလႆႈတီႈ PR ၵႂႃႇ 3 ၵေႃႉ။” ဝႃႈၼႆ။

ၼႂ်းမိူင်းတႆးပတ်းပိုၼ်ႉၼႆႉ ၶဵတ်ႇသဵင်လိူၵ်ႈတင်ႈ (မဲဆန္ဒနယ်) မီးယူႇ 6 တီႈ။ မိူင်းတႆးပွတ်းႁွင်ႇ ၼႆႉ ပဵၼ်ၶဵတ်ႇလိူၵ်ႈတင်ႈ 3 လႄႈ 6 ၊ မိူင်းတႆးပွတ်းၸၢၼ်းသမ်ႉပဵၼ် ၶဵတ်ႇလိူၵ်ႈတင်ႈ မၢႆ 1 လႄႈ 2 ၊ မိူင်းတႆးပွတ်းဢွၵ်ႇပဵၼ်ၶဵတ်ႇလိူၵ်ႈတင်ႈ မၢႆ 4 လႄႈ 5 ၼႆယဝ်ႉ။

တႃႇတီႈၼင်ႈၼႂ်းလုမ်းသၽႃးၸိူဝ်ႉၸၢတ်ႈၼႆႉ ၸိူဝ်းပဵၼ်ၼႃႈတီႈၽွင်းငမ်းႁင်းၶေႃၼႆႉ တေလႆႈၼိုင်ႈတီႈ 1 ၵေႃႉ။ တႃႇၶဵတ်ႇလိူၵ်ႈတင်ႈ မၢႆ 1 ထိုင် 6 ၼႆႉမီးသုၼ်ႇပဵၼ် တႅၼ်းၽွင်းၸိူဝ်ႉၸၢတ်ႈ 6 ၵေႃႉလႄႈ ႁူမ်ႈသဵၼ်ႈ တႅၼ်းၽွင်းသၽႃးၸိူဝ်ႉၸၢတ်ႈၼႆႉ တေမီးယူႇ 12 ၵေႃႉ ။

ၸႄႈတွၼ်ႈလၢင်းၶိူဝ်း၊ ၸႄႈတွၼ်ႈၵၢတ်ႇလေႃႉ၊ ၸႄႈတွၼ်ႈတူၼ်ႈတီး၊ ၼႃႈတီႈၽွင်းငမ်းႁင်းၶေႃပဢူဝ်း၊ ၼႃႈတီႈၽွင်းငမ်းႁင်းၶေႃ ထၼူႉၼႆသေ မီးယူႇ 13 ၸႄႈဝဵင်း ၼႆႉႁွင်ႉၶဵတ်ႇလိူၵ်ႈတင်ႈ မၢႆ 1။ ၶဵတ်ႇလိူၵ်ႈတင်ႈ မၢႆ -2 သမ်ႉပဵၼ် ၸႄႈတွၼ်ႈလွႆလႅမ်၊ ၸႄႈတွၼ်ႈမိူင်းသူႈ၊ ၸႄႈတွၼ်ႈၼမ်ႉၸၢင်ၼႆသေ ၸႄႈဝဵင်းမီး 8 ၸႄႈဝဵင်း ။