ပၢင်လိူၵ်ႈတင်ႈပွၵ်ႈၵမ်းသၢမ် ဝၼ်းလိုၼ်းသုတ်း ဢၼ်သိုၵ်းမၢၼ်ႈၸတ်းႁဵတ်း မိူဝ်ႈၼႆႉ 25/1/2026 တီႈၸႄႈဝဵင်းၵျွၵ်ႉမႄး တင်း ၸႄႈဝဵင်းသီႇပေႃႉၼႆႉ ပႃႇတီႇသိူဝ်ၽိူၵ်ႇ (SNDP) လႆႈၶႅပ်းၵၢင်ၸႂ် ၼမ်လိူဝ်ပိူၼ်ႈသုတ်းဝႆႉတီႈၼင်ႈ သၽႃးၵူၼ်းမိူင်း တီႈလဵဝ် ၼႆယဝ်ႉ။

ၼၢင်းယိင်းဢႃႇယု 30 ပီပၢႆ ၵေႃႉတူင်ႉၼိုင်ၸွႆႈထႅမ် ပႃႇတီႇသိူဝ်ၽိူၵ်ႇ SNDP တၢင်းမိူင်းတႆးပွတ်းႁွင်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈလဵဝ် တီႈဝဵင်းၵျွၵ်ႉမႄးၼႆႉ ၼပ်ႉ ဢၢၼ်ႇသဵင်ၵၢင်ၸႂ်ယဝ်ႉတူဝ်ႈ ၵႂႃႇသဵင်ႈယဝ်ႉ။ ပႃႇတီႇသၢင်ႇသီႈၶဝ် ပေႉၵိၼ်ၶၢတ်ႇၵႂႃႇတင်းသၢမ်တီႈၼင်ႈယဝ်ႉၶႃႈ။ တီႈဝဵင်း သီႇပေႃႉတႄႉၵေႃႈ ပႃႇတီႇယင်းတိုၵ်ႉၼပ်ႉဢၢၼ်ႇၶႅပ်း ၵၢင်ၸႂ်ၵၼ်ပႆႇယဝ်ႉတင်းသဵင်ႈၶႃႈ။ ၶႅပ်းၵၢင်ၸႂ် တၢင်းထုင်ႉၼမ်ႉလၼ်ႈၼႆႉ ပႆႇမႃးထိုင်တီႈႁူင်းပၼ်သဵင်တီႈသီႇပေႃႉၶႃႈ။ ၵူၺ်းၵႃႈ မိူဝ်ႈလဵဝ်ၼႆႉ ပႃႇတီႇသိူဝ်ၽိူၵ်ႇႁဝ်း လႆႈၶႅပ်းၵၢင်ၸႂ်ၼမ်လိူဝ်ပိူၼ်ႈသုတ်းဝႆႉဢေႃႈ တီႈၼင်ႈလုမ်းသၽႃးၵူၼ်းမိူင်းၼႆႉ” ဝႃႈၼႆ။

ပႃႇတီႇၸိူဝ်းၶဝ်ႈၸွမ်းပၢင်လိူၵ်ႈတင်ႈပွၵ်ႈၵမ်း 3 တီႈဝဵင်းသီႇပေႃႉ တင်းဝဵင်းၵျွၵ်ႉမႄးၼႆႉ ပိူင်ယႂ်ႇမၼ်း မီးပႃႇတီႇ သၢင်ႇသီႈ လႄႈ ပႃႇတီႇသိူဝ်ၽိူၵ်ႇ (SNDP) ၵူၺ်း ၼႆယဝ်ႉ။

လႆႈႁူႉဝႃႈ ယၢမ်းလဵဝ် ပႃႇတီႇသိူဝ်ၽိူၵ်ႇတီႈဝဵင်းသီႇပေႃႉၼႆႉ လႆႈၶႅပ်းၵၢင်ၸႂ်ၼမ်လိူဝ်ပႃႇတီႇသၢင်ႇသီႈ တႃႇဢွင်ႈတီႈၼင်ႈလုမ်းသၽႃးၵူၼ်းမိူင်းၼႆႉ မွၵ်ႈ 300 ၶႅပ်းပၢႆသေ တႃႇတီႈၼင်ႈသၽႃးၸႄႈမိူင်းတႄႉ တင်းပႃႇတီႇသၢင်ႇၼႆႉ တၢင်းၼမ်ၶႅပ်းၵၢင်ၸႂ်ဢမ်ႇပေႃးပိူင်ႈၵၼ်လႄႈ လႆႈမႆႈၸႂ်ဝႆႉ ၼႆယဝ်ႉ။

လိူဝ်ၼၼ်ႉ တီႈဝဵင်းၵျွၵ်ႉမႄးၼႆႉ ပႃႇတီႇသၢင်ႇသီႈ ဢွင်ႇပေႉပၢင်လိူၵ်ႈတင်ႈၵႂႃႇတင်းသၢမ်တီႈၼင်ႈ လုမ်းသၽႃးၵူၼ်းမိူင်း၊ သၽႃးၸႄႈမိူင်း လႄႈ သၽႃးၸိူဝ်ႉၸၢတ်ႈသေ တၢင်းၼမ်ၶႅပ်းၵၢင်ၸႂ်ၼႆႉ တီႈသၽႃးၵူၼ်းမိူင်းပိူင်ႈၵၼ်ဝႆႉ တႃႇ 4000 ပၢႆ ၊ တီႈသၽႃးၸိူဝ်ႉၸၢတ်ႈၼႆႉၵေႃႈ ပႃႇတီႇသၢင်ႇသီႈ ပေႉဝႆႉ တႃႇ 5000 ၶႅပ်းပၢႆ ၼႆယဝ်ႉ။

ပၢင်လိူၵ်ႈတင်ႈ ၵမ်း 1 လႄႈ ၵမ်း 2 ဢၼ်ယဝ်ႉၵႂႃႇၼႆႉပႃႇတီႇသိူဝ်ၽိူၵ်ႇ လႆႈဝႆႉတီႈၼင်ႈ 9 တီႈၼင်ႈသေ လႆႈဝႆႉၸၼ်ႉတီႈ 5။ ပၢင်လိူၵ်ႈတင်ႈၵမ်း 3 ၼႆႉတႄႉ တေႃႇထိုင်ၶၢဝ်းယၢမ်းတႅမ်ႈၶၢဝ်ႇယူႇယၢမ်းလဵဝ် 10 မူင်းၶိုင်ႈၼႆႉ ပႃႇတီႇသိူဝ်ၽိူၵ်ႇလႆႈဝႆႉ 4 တီႈၼင်ႈ။