ဝၼ်းတီႈ 25/01/2026 ပၢင်လိူၵ်ႈတင်ႈၵမ်းသၢမ် ၼႂ်းဝၼ်းမိူဝ်ႈၼႆႉ တီႈဝဵင်းမိူင်းၼၢႆး ပႃႇတီႇသိူဝ်ၽိူၵ်ႇ လႆႈသဵင်ၵၢင်ၸႂ် ၼမ်းၼႃႈဝႆႉတၢင်း 3 တီႈၼင်ႈ ဝႃႈၼႆ ။

ၽူႈပွင်ၵၢၼ်ၸႄႈဝဵင်းပႃႇတီႇသိူဝ်ၽိူၵ်ႇ ဝဵင်းမိူင်းၼၢႆး ယိုၼ်ယၼ်လၢတ်ႈတီႈၽူႈတွႆႇႁွၵ်ႈဝႃႈ – “ တီႈဝဵင်းမိူင်းၼၢႆးၼႆႉ ႁူင်းတွတ်ႈ ၶႅပ်းၵၢင်ၸႂ်မီး 39 တီႈ။ တေႃႇထိုင်ယၢမ်းၵင်ၶိုၼ်း 10 မူင်းၼႆႉသဵင်ၵၢင်ၸႂ်ဢၼ်ႁဝ်းၶႃႈလႆႈဝႆႉမီး 18000 ပၢႆ။ တပ်ႉသိုၵ်းမၢၼ်ႈလႄႈ ၶႅပ်းၵၢင်ၸႂ်လူင်ႈၼႃႈၼႆႉ ၶဝ်လႆႈဝႆႉမွၵ်ႈ 6000 ပၢႆၵူၺ်း။ ၵွပ်ႈၼႆတေႃႇထိုင်ယၢမ်းလဵဝ် တႄႉ ႁဝ်းၶႃႈလႆႈၼမ်လိူဝ်ဝႆႉယူႇ 1000 ပၢႆ။ ၵူၺ်းၵႃႈပႆႇတႅတ်ႈတေႃး ။ တေလႆႈပႂ်ႉတူၺ်းတေႃႇထိုင်ၼႂ်ၽုၵ်ႈယူႇၶႃႈ ၸင်ႇတေ လၢတ်ႈလႆႈတႅတ်ႈတေႃး။ ”- ဝႃႈၼႆ။

ယၢမ်းလဵဝ် 3 တီႈၼင်ႈ ဢၼ်ပႃႇတီႇသိူဝ်ၽိူၵ်ႇမိူင်းၼၢႆးဢွင်ႇပေႉဝႆႉၼႆႉတႄႉ ၼေႃႇၽူႈတႅၼ်းသၽႃးၵူၼ်းမိူင်း လုင်းၸၢႆးထုၼ်းလႅင်း ၊ ၼေႃႇၽူႈတႅၼ်းသၽႃးၸႄႈမိူင်း ဢူးမိၼ်းထုၼ်းဢွင်ႇ လႄႈ ၼေႃႇၽူႈတႅၼ်းသၽႃး ၸႄႈမိူင်း လုင်းၸၢႆးၵျေႃႇဝုၼ်း ။

တီႈဝဵင်းမိူင်းၼၢႆးၼႆႉ ၽူႈမီးသုၼ်ႇတွတ်ႈၶႅပ်းၵၢင်ၸႂ်မီး 28387 ၼႆ ၾၢႆႇၶွမ်ႊမသျိၼ်ႊ ပၢင်လိူၵ်ႈတင်ႈ တႂ်ႈသိုၵ်းမၢၼ်ႈ တႄႉပိုၼ်ၽၢဝ်ႇဝႆႉၼင်ႇၼႆ။