ပၢင်လိူၵ်ႈတင်ႈပွၵ်ႈၵမ်း 3 ဢၼ်သိုၵ်းမၢၼ်ႈယိုတ်းမိူင်းၸတ်းႁဵတ်း မိူဝ်ႈၼႆႉဝၼ်းတီႈ 25/1/2026 ၼႆႉ တီႈဝဵင်းၵျွၵ်ႉမႄး လႆႈၸတ်းႁဵတ်းၵႂႃႇ ၼႂ်းဝဵင်းတႃႇ 9 ပွၵ်ႉ လႄႈ 5 ဢိူင်ႇၵူၺ်းလႄႈ ပိုၼ်ႉတီႈမီးၵူၼ်းတႆး ယူႇသဝ်းဝႆႉ ၼမ်လိူဝ်ပိူၼ်ႈသုတ်း ဢမ်ႇမီးသုၼ်ႇလႆႈၵႂႃႇပၼ်သဵင်ၵၢင်ၸႂ် ဝႃႈၼႆ။

ပၢင်လိူၵ်ႈတင်ႈ မိူဝ်ႈပွၵ်ႈၵမ်း 1 တင်း ပွၵ်ႈၵမ်း 2 ပူၼ်ႉမႃးၼႆႉသမ်ႉ ပႃႇတီႇသၢင်ႇသီႈ USDP သမ်ႉဢွင်ႇပေႉ လႆႈတီႈၼင်ႈ ၼႂ်းလုမ်းသၽႃးဝႆႉ 397 တီႈၼင်ႈ ၼမ်လိူဝ်ပိူၼ်ႈသုတ်းဝႆႉယဝ်ႉလႄႈ တိူၵ်ႈတီႈပၢင်လိူၵ်ႈတင်ႈၵမ်းသၢမ်ဢမ်ႇပဵၼ်ၵေႃႈ ၶွတ်ႇၽွတ်ႈလူင်ပွင်ၸိုင်ႈလႆႈယဝ်ႉ။

ၾၢႆႇၼိုင်ႈ ၵွၼ်ႇတေပဵၼ်ပၢင်လိူၵ်ႈတင်ႈၵမ်းသၢမ်ၼႆႉ ၼေႃႇၽွင်းတႅၼ်းပႃႇတီႇသၢင်ႇသီႈ ၸႄႈဝဵင်းၵျွၵ်ႉမႄး ၵေႃႉယၢမ်ႈပဵၼ် ၽွင်းလူင်ၵဝ်ႇမႃးၼၼ်ႉသမ်ႉ ဢဝ်လွင်ႈၸႅၵ်ႇၼမ်ႉႁဵတ်းၾႆးပၼ်ၵူၼ်းမိူင်း ႁဵတ်းပဵၼ်ၶေႃႈဢၢင်ႈသေႁူၺ်းသူၼ်း ၵူၼ်းမိူင်း ၼႂ်းပိုၼ်ႉတီႈ ၽွင်းၵူၼ်းမိူင်းႁူပ်ႉလွင်ႈတူၵ်းၵိၼ်းတၢင်းယၢပ်ႇၽိုတ်ႇ။

လွင်ႈတၢင်းၸိူဝ်းၼႆႉ ၾၢႆႇပႃႇတီႇၸၢဝ်းၶိူဝ်း ၸိူဝ်းလူင်းလိူၵ်ႈတင်ႈၸွမ်း ၼႂ်းပိုၼ်ႉတီႈတေႉတေႉ ဢမ်ႇမီးႁႅင်း လႄႈ ဢမ်ႇမီးတၢင်းမုင်ႈမွင်း တႃႇဢွင်ႇပေႉပၢင်လိူၵ်ႈတင်ႈလႆႈငၢႆႈငၢႆႈၼႆ ၼေႃႇၽွင်းတႅၼ်းပႃႇတီႇ သိူဝ်ၽိူၵ်ႇ SNDP ဝဵင်းၵျွၵ်ႉမႄး လၢတ်ႈၼင်ႇၼႆ။

ၼၢင်းသႅင်ဢေး ၼေႃႇၽူႈတႅၼ်းပႃႇတီႇသိူဝ်ၽိူၵ်ႇ SNDP ဝဵင်းၵျွၵ်ႉမႄး လၢတ်ႈၼႄတီႈၽူႈတွႆႇႁွၵ်ႈဝႃႈ “ဢွင်ႈတီႈမီးပီႈၼွင်ႉတႆးႁဝ်းယူႇၼမ်ၼၼ်ႉသမ်ႉ ဢမ်ႇမီးသုၼ်ႇ တေလႆႈၵႂႃႇပၼ်သဵင်။ ၵူၼ်းမိူင်းၸိူဝ်းယူႇၸွမ်းသၢပ်ႇဝဵင်းၵျွၵ်ႉမႄး တႃႇ 5 ဢိူင်ႇဢၼ်မီးသုၼ်ႇလႆႈၵႂႃႇပၼ်သဵင် ၼၼ်ႉသမ်ႉ ထုၵ်ႇပႃႇတီႇသၢင်ႇသီႈ ဢဝ်လွင်ႈ ၾႆးၾႃႉ၊ သၢင်ႈၶူဝ်၊ ႁဵတ်းသဵၼ်ႈတၢင်း ၸိူဝ်းၼႆႉမႃးႁူၺ်းသူၼ်း။ ၵွပ်ႈၼႆလႄႈ ၼႂ်းဝဵင်းၼႆႉတႄႉ ႁဝ်းတိုၼ်းဢမ်ႇမီးတၢင်းမုင်ႈမွင်းသင်လႆႈတေႉတေႉ။ ၵွပ်ႈၼၼ် ဝဵင်းၵျွၵ်ႉမႄးၼႆႉတႄႉ လႆႈဝႃႈ ပႃႇတီႇသၢင်ႇသီႈ တေပေႉၵိၼ်ၶၢတ်ႇၵႂႃႇယူႇၵူၺ်း ” ၼႆယဝ်ႉ။

ၵူၺ်းၵႃႈတေႃႇထိုင်ယၢမ်းၵၢင်ၶမ်ႈ 9 မူင်းၶိုင်ႈ ၽွင်းတိုၵ်ႉတႅမ်ႈၶၢဝ်ႇယူႇၼႆႉ ပၢင်လိူၵ်ႈတင်ႈတီႈဝဵင်းၵျွၵ်ႉမႄး ဢမ်ႇပႆႇႁုပ်ႈလႆႈသဵင်ၵၢင်ၸႂ်တင်းမူတ်းလႄႈ ပႆႇၸၢင်ႈလၢတ်ႈဝႃႈပႃႇတီႇဢၼ်လႂ်ပေႉတႄႉတႄႉ။

ၵူၼ်းမိူင်းၸိူဝ်းမီးသုၼ်ႇၵႂႃႇပၼ်သဵင်ၵၢင်ၸႂ် တီႈဝဵင်းၵျွၵ်ႉမႄး တႃႇၼႂ်းဝဵင်း 9 ပွၵ်ႉ လႄႈ ဢိူင်ႇၸိူဝ်းတိတ်း ၸပ်း ၸွမ်းသၢပ်ႇဝဵင်း 5 ဢိူင်ႇၼၼ်ႉ ႁူမ်ႈသဵၼ်ႈမီးယူႇ 50296 ၵေႃႉဝႃႈၼႆသေတႃႉ ၵူၼ်းၸိူဝ်းၵႂႃႇပၼ်သဵင် ၼႂ်းဝၼ်းပၢင်လိူၵ်ႈတင်ႈၼႆႉ မီးမွၵ်ႈ 35% ၵူၺ်း ဝႃႈၼႆ။

ၼၢင်းသႅင်ဢေး ၼေႃႇၽူႈတႅၼ်းပႃႇတီႇသိူဝ်ၽိူၵ်ႇ ဝဵင်းၵျွၵ်ႉမႄး လၢတ်ႈၽူႈတွႆႇႁွၵ်ႈဝႃႈ “မိူဝ်ႈပႆႇထိုင် ဝၼ်းပၢင်လိူၵ်ႈတင်ႈ လႆႈလူင်းပိုၼ်ႉတီႈႁဵတ်းၵၢၼ်သူၼ်းတုမ်ယူႇသေတႃႉ ဢမ်ႇၸၢင်ႈႁဵတ်းလႆႈတဵမ်ထူၼ်ႈ ၸွမ်းၼင်ႇၵၢင်ၸႂ်ၵေႃႈပိူင်ၼိုင်ႈ။ ၾၢႆႇၼိုင်ႈၵေႃႈ ၵူၼ်းမိူင်းၵမ်ႈၼမ်ၼႆႉ ဢမ်ႇသူၼ်ၸႂ်ၼိူဝ်ပၢင်လိူၵ်ႈတင်ႈ ယွၼ်ႉဝႃႈ လႆႈထူပ်းၽေးသိုၵ်းသိူဝ်သေ လႆႈလူႉသုမ်း ဝႆႉၼမ်ၼႃႇယဝ်ႉ လႆႈဝႃႈဢိမ်ႇမိူဝ်ႇၵၼ်ၼႃႇယဝ်ႉ။ ထႅင်ႈလွင်ႈၼိုင်ႈသမ်ႉ ပိုၼ်ႉတီႈၸိူဝ်းမီးၵူၼ်းတႆးၼမ်ၼႆႉသမ်ႉ ဢမ်ႇမီးသုၼ်ႇ ၵႂႃႇပၼ်သဵင်ၵၢင်ၸႂ်လႆႈ – ၸိူဝ်းၼႆႉပဵၼ်လွင်ႈတၢင်းႁဵတ်းႁႂ်ႈႁဝ်းၶႃႈဢမ်ႇၸၢင်ႈမုင်ႈမွင်းလွင်ႈဢွင်ႇပေႉ” ၼႆယဝ်ႉ။

ပၢင်လိူၵ်ႈတင်ႈဢၼ်သိုၵ်းမၢၼ်ႈၼမ်းၸတ်း ႁႂ်ႈပဵၼ်ၵႂႃႇတင်းမိူင်းႁူမ်ႈတုမ်ပတ်းပိုၼ်ႉၼႆႉ ပႃႇတီႇသၢင်ႇသီႈ USDP ဢွင်ႇပေႉဝႆႉ ပဵၼ်ထီႉ 1 ၼမ်လိူဝ်ပိူၼ်ႈသုတ်းယူႇ ၼႆယဝ်ႉ။

ၼႂ်းၸႄႈဝဵင်းၵျွၵ်ႉမႄးၼႆႉ ႁူမ်ႈသဵၼ်ႈမီးယူႇ 81 ဢိူင်ႇ။ ၼႂ်းၼၼ်ႉ ၵူၼ်းမိူင်းၸိူဝ်းမီးသုၼ်ႇလႆႈၵႂႃႇပၼ်သဵင် ၵၢင်ၸႂ်ၼႆႉ မီး တႃႇ 5 ဢိူင်ႇ ၸိူဝ်းပဵၼ်ႁိမ်းႁွမ်းသၢပ်ႇဝဵင်း မိူၼ်ၼင်ႇဢိူင်ႇ ၵုင်းမၢၵ်ႇလၢင်း(ပိန္နဲကုန်း)၊ ၵျွၵ်ႉမႄးလူင် ၊ မၢၼ်ႈၵျွင်း ၊ ၶူဝ်မုင်းလႄႈ ၵျွႆးၵုင်း ၸိူဝ်းၼႆႉၵူၺ်းလႄႈ ၼပ်ႉလႆႈဝႃႈ သိုၵ်းမၢၼ်ႈၼႆႉၸတ်းႁဵတ်းပၢင်လိူၵ်ႈတင်ႈ ၼႂ်းဝဵင်းၵျွၵ်ႉမႄးလႆႈ တႃႇ 6 % ၵူၺ်း ဝႃႈၼႆ။