ၵွၼ်ႇၼႃႈတေထိုင်ဝၼ်းပၢင်လိူၵ်ႈတင်ႈ မိူဝ်ႈၽုၵ်ႈဝၼ်းတီႈ 25 လိူၼ်ၵျႅၼ်ႊၼိဝ်ႊရီႇၼႆႉ ပႃႇတီႇသၢင်ႇသီႈ ႁွင်ႉဢဝ်ပႃးၶႃႈႁၢပ်ႇၵၢၼ်ၶုၼ် ၾၢႆႇႁွင်ႈၵၢၼ်ၽွင်းငမ်း တႂ်ႈဢႃႇၼႃႇသိုၵ်းမၢၼ်ႈယိုတ်းမိူင်း လႄႈ ၸုမ်းၶွမ်ႊ မသျိၼ်ႊ ၵမ်ၵၢၼ်ပၢင်လိူၵ်ႈတင်ႈၶဝ် လူင်းႁဵတ်းၵၢၼ်သူၼ်းတုမ်ၸွမ်း ၼႆယဝ်ႉ။

တႄႇၵၢင်လိူၼ်ၵျႅၼ်ႊၼိဝ်ႊရီႇ ဝၢႆးပၢင်လိူၵ်ႈတင်ႈပွၵ်ႈၵမ်းသွင်ယဝ်ႉတူဝ်ႈၵႂႃႇၼၼ်ႉ ၸုမ်းပႃႇတီႇၵၢၼ်မိူင်း ၸိူဝ်းတေၶဝ်ႈပၢင်လိူၵ်ႈတင်ႈ ဢွၼ်ၵၼ်လူင်းႁဵတ်းၵၢၼ်သူၼ်းတုမ် ၼႂ်းၸႄႈဝဵင်းဢၼ်ပႃးၼႂ်းပွၵ်ႈၵမ်းသၢမ်။

တီႈၸႄႈဝဵင်းသီႇပေႃႉ ထုင်ႉၼမ်ႉလၼ်ႈၵေႃႈ ပႃႇတီႇသၢင်ႇသီႈလူင်းသူၼ်းတုမ် လႄႈ ၸတ်းပၢင်ၼႄလၢႆးၸႂ်ႉ ၶိူင်ႈၸၢၵ်ႈပၼ်သဵင်ယူႇသေတႃႉ ဢမ်ႇႁွင်ႉဢဝ်ပႃးၵူၼ်းမိူင်းၵႂႃႇႁပ်ႉ ထွမ်ႇတေႉတေႉဝႃႈဝႃႈၼႆ ၵူၼ်းမိူင်းပိုၼ်ႉတီႈ ၵေႃႉယူႇဝႆႉၼႂ်းထုင်ႉၼမ်ႉလၼ်ႈ လၢတ်ႈၼႄၼင်ႇၼႆ။

“ၶဝ်လူင်းႁဵတ်းၵၢၼ်သူၼ်းတုမ်ဝႃႇ။ ႁွင်ႉပႃးမႃး သိုၵ်းမၢၼ်ႈႁႄ ၸုမ်းထူၺ်ႇဢူၵ်ႉၶဝ် တင်း ၸုမ်း UEC ၶဝ်ပႃး။ တႃႇၵႂႃႇထွမ်ႇၶဝ်ၼၼ်ႉသမ်ႉ ႁွင်ႉဢဝ်ၽူႈၵွၼ်းပွၵ်ႉ၊ ၵွၼ်းဢိူင်ႇ ၸိူဝ်းမီးပုၼ်ႈၽွၼ်းၶဝ်ၵႂႃႇထွမ်ႇ ဢိတ်းဢွတ်းၵူၺ်း။ တမ်ႉဢမ်ႇႁွင်ႉဢဝ်ပႃးၵူၼ်းမိူင်းၵႂႃႇထွမ်ႇတင်းသဵင်ႈ။ ဝၢႆးၼၼ်ႉ ၵွၼ်းပွၵ်ႉ၊ ၵွၼ်းဢိူင်ႇ ၸိူဝ်းၸမ်ၸႂ်ၵၼ်တင်းသိုၵ်းမၢၼ်ႈ သမ်ႉပၢႆမႃးလၢတ်ႈၵူၼ်းဝၢၼ်ႈဝႃႈ ပေႃးၽႂ်ပႆႇၵႂႃႇပၼ်သဵင်ၵၢင်ၸႂ်ယဝ်ႉၼႆ တေဢမ်ႇၸၢင်ႈဢွၵ်ႇတၢင်းၵႂႃႇဝၢၼ်ႈတႂ်ႈမိူဝ်းၼိူဝ်ၼႆထႅင်ႈၵွၼ်ႇ” ဝႃႈၼႆ။

ပၢင်လိူၵ်ႈတင်ႈပွၵ်ႈၵမ်းသၢမ်ၼႆႉ ၼႂ်းမိူင်းတႆးပတ်းပိုၼ်ႉ တေလႆႈၸတ်းႁဵတ်းၵႂႃႇ တႃႇ 9 ၸႄႈဝဵင်း။ ပဵၼ်ၸႄႈဝဵင်းသီႇပေႃႉ၊ ၸႄႈဝဵင်းၵျွၵ်ႉမႄး၊ ၸႄႈဝဵင်းမၢၵ်ႇမၢင်၊ ၸႄႈဝဵင်းမိူင်းၼၢႆး၊ ၸႄႈဝဵင်းၾၢႆၶုၼ်၊ ၸႄႈဝဵင်းပွင်လွင်း၊ ၸႄႈဝဵင်းမိူင်းသူႈ၊ ၸႄႈဝဵင်းယွင်ႁူၺ်ႈ လႄႈ ၸႄႈဝဵင်းၵေးသီး ၸဵမ်ၸိူဝ်းၼႆႉ။

ၼႂ်းမိူင်းႁူမ်ႈတုမ်ပတ်းပိုၼ်ႉတႄႉ သိုၵ်းမၢၼ်ႈယိုတ်းမိူင်းတေၼမ်းၸတ်းႁဵတ်းၵႂႃႇ တႃႇ 63 ၸႄႈဝဵင်း ။

တီႈၼႂ်းထုင်ႉၼမ်ႉလၼ်ႈၼႆႉ သိုၵ်းမၢၼ်ႈပွႆႇဢဵၼ်ႁဵင်းၵူၼ်းသိုၵ်း မိူဝ်းယူႇသဝ်း ၶွၼ်ႈဝႆႉတင်းၼမ်လၢႆလႄႈ ၵူၼ်းမိူင်းမႆႈၸႂ်ဝႃႈ ၵူဝ်ၾၢႆႇသိုၵ်းမၢၼ်ႈၸႂ်ႉၶႅပ်းၵၢင်ၸႂ်လူင်ႈၼႃႈသေ ဢဝ်ပေႉပုၼ်ႈပႃႇတီႇတၢင်ႇၸုမ်း ဝႃႈၼႆ။

ၵူၼ်းမိူင်းၵေႃႉယူႇဝႆႉၼႂ်းထုင်ႉၼမ်ႉလၼ်ႈ လၢတ်ႈၼႄတီႈၽူႈတွႆႇႁွၵ်ႈဝႃႈ “တီႈၼမ်ႉလၼ်ႈႁဝ်းၼႆႉ မိူဝ်ႈလဵဝ် သိုၵ်းမၢၼ်ႈၶဝ် ဢဝ်ႁႅင်းၵူၼ်းသိုၵ်းၸိူဝ်းပွၵ်ႈပၢင်တိုၵ်း မႃးၶွၼ်ႈဝႆႉတီႈၼႆႈၼမ်ၼႃႇ။ ပိဝ်ႇႁႃႇမူး မႃးၼင်ႈဝႆႉတီႈ ၼမ်ႉလၼ်ႈၼႆႉပဵၼ် သွင်ၵေႃႉ ၵမ်းလဵဝ်။ ႁႅင်းသိုၵ်းၶဝ်ၵေႃႈၼမ်တေႉၼမ်ဝႃႈ။ ပေႃးဢဝ်ၶႅပ်းၵၢင်ၸႂ်ဢၼ်ပၼ် ၼႂ်းဝၼ်းပၢင်လိူၵ်ႈ တင်ႈၼၼ်ႉ ပႃႇတီႇတၢင်ႇၸုမ်းၸၢင်ႈလႆႈၼမ်ယူႇၵေႃႈ။ ၵူဝ်ၶဝ်ဢမ်ႇပေႉလႆႈ ၶႅပ်းၵၢင်ၸႂ် လူင်ႈၼႃႈသိုၵ်းမၢၼ်ႈၵူၺ်းယဝ်ႉ” ဝႃႈၼႆ။

ၼႂ်းၸႄႈဝဵင်းသီႇပေႃႉၼႆႉ မီးပႃႇတီႇသၢင်ႇသီႈ လႄႈ ပႃႇတီႇသိူဝ်ၽိူၵ်ႇ ၶဝ်ႈလိူၵ်ႈတင်ႈပဵၼ်လၵ်းသေ ပႃႇတီႇၵၢၼ်မိူင်းတၢင်ႇၸုမ်းတႄႉ တေႃႉတႄႉၶဝ်ႈပႃးလိူၵ်ႈတင်ႈ ၼႂ်းဢွင်ႈတီႈ ၼင်ႈလုမ်းသၽႃးၸိူဝ်ႉၸၢတ်ႈ ၵွႆး ၼႆယဝ်ႉ။

ပၢင်လိူၵ်ႈတင်ႈပွၵ်ႈၵမ်း 3 ဢၼ်တေၸတ်းႁဵတ်းၼႂ်းဝၼ်းတီႈ 25/1/2026 ၼၼ်ႉ ႁူင်းပၼ်သဵင်ႈမီးယူႇ 41 တီႈသေ သဵၼ်ႈမၢႆၵူၼ်းၸိူဝ်းမီးသုၼ်ႇပၼ်သဵင်ၼႆႉ မီးယူႇ 64914 ၵေႃႉ ၼႆယဝ်ႉ။

ၸႄႈဝဵင်းၼႂ်းမိူင်းတႆး ၸိူဝ်းဢမ်ႇၸတ်းႁဵတ်းလႆႈပၢင်လိူၵ်ႈတင်ႈၼႆႉ တင်းမိူင်းပတ်းပိုၼ်ႉမီးယူႇ 56 ၸႄႈဝဵင်း။ ၼႂ်းမိူင်းတႆးၼႆႉ ၸႄႈဝဵင်းၸိူဝ်းဢမ်ႇပဵၼ်ၸတ်းႁဵတ်းလႆႈ ပဵၼ်ၸႄႈ ဝဵင်းၼမ်ႉတူႈ၊ မၢၼ်ႈပဵင်း၊ ၵူတ်ႉၶၢႆ၊ သႅၼ်ဝီ၊ ၵုၼ်လူင်၊ ၼမ်ႉသၼ်ႇ၊ မၢၼ်ႈတူင်ႈ၊ ႁူဝ်ပၢင်ႇ၊ လၢဝ်ႇၵၢႆး(ၵၢတ်ႇၵဝ်ႇ) ၊ ၵွင်းၸၢင်ႉ၊ မိူင်းမိတ်ႈ၊ ပၢင်သၢင်း၊ မိူင်းမေႃး၊ ပၢင်ဝၢႆ ၊ ၼႃးၽၢၼ်း လႄႈ မိူင်းလႃး ၸဵမ်ၸိူဝ်းၼႆႉ ၼႆယဝ်ႉ။