ပျီႇတူႉၸိတ်ႉ PNO ႁၢမ်ႈၵူၼ်းမိူင်းထုင်ႉ ၸၢမ်ၵႃး ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း ၶဝ်ႈဢွၵ်ႇၼႂ်းဝၢၼ်ႈ ၼႂ်းဝၼ်းပၢင်လိူၵ်ႈတင်ႈသေ ဢဝ်ႁူမ်ႇလူမ်ႈဝႆႉ ႁၢဝ်ႈႁႅင်း ။
ပၢင်လိူၵ်ႈတင်ႈ ပွၵ်ႈၵမ်း 3 ၼႆႉ တေၸတ်းႁဵတ်း မိူင်းႁူမ်ႈတုမ်ပတ်းပိုၼ်ႉ 63 ၸႄႈဝဵင်း မိူဝ်ႈၽုၵ်ႈဝၼ်းတီႈ 25/1/2026 ။ ၼႂ်းမိူင်းတႆး ပႃး 9 ၸႄႈဝဵင်း ပဵၼ်ၸႄႈဝဵင်းမၢၵ်ႇမၢင်၊ ၸႄႈဝဵင်းပၢင်လွင်း၊ ၸႄႈဝဵင်းယွင် ႁူၺ်ႈ၊ ၸႄႈဝဵင်းၾၢႆၶုၼ်၊ ၸႄႈဝဵင်းမိူင်းၼၢႆး၊ ၸႄႈဝဵင်းၵေးသီး၊ ၸႄႈဝဵင်းမိူင်းသူႈ၊ ၸႄႈဝဵင်းသီႇပေႃႉ လႄႈ ၸႄႈဝဵင်းၵျွၵ်ႉမႄး ၸိူဝ်းၼႆႉ ။
ၵူၼ်းၸၢႆးထုင်ႉၸၢမ်ၵႃးလၢတ်ႈၽူႈတွႆႇႁွၵ်ႈဝႃႈ -“ တီႈထုင်ႉၸၢမ်ၵႃးၼႆႉတင်းသဵင်ႈဢေႃႈ မိူဝ်ႈၽုၵ်ႈၼႆႉ ပျီႇတူႉၸိတ်ႉPNO ၶဝ် ဢမ်ႇပၼ်ၶဝ်ႈဢွၵ်ႇ ယွၼ်ႉပိူဝ်ႈ ပဵၼ်ဝၼ်းပၢင်လိူၵ်ႈတင်ႈ ၼႆသေ ၶဝ်ဢဝ်ႁူမ်ႇလူမ်ႈဝႆႉ ၊ ပေႃးဝၢႆးပၢင်လိူၵ်ႈတင်ႈၼႆႉ တေပၼ်ၵႂႃႇမႃးၶိုၼ်းမိူၼ်ၵဝ်ႇယူႇၼႆဢေႃႈ”- ဝႃႈၼႆ ။
ၵူၼ်းမိူင်းၸိူဝ်းယူႇၼႂ်းထုင်ႉၼွင်ႁၢႆးယႃႈၵေႃႈ တေလႆႈၵႂႃႇပၼ်ၶႅပ်းၵၢင်ၸႂ်သေ ပႃႇတီႇၵၢၼ်မိူင်း ၸိူဝ်းၶဝ်ႈလိူၵ်ႈတင်ႈ ၼႂ်းၸႄႈဝဵင်းယွင်ႁူၺ်ႈၼႆႉ မီးပႃႇတီႇၸိူဝ်ႉၸၢတ်ႈၼွင် (အင်းအမျိုးသား အဖွဲ့ချုပ်ပါတီ INLP) ၊ ပႃႇတီႇၸၢဝ်းၶိူဝ်းၽွမ်ႉႁူမ်ႈ (တစည) ၊ ပႃႇတီႇၼမ်းၼႃႈ ၵူၼ်းမိူင်း (PPP) ၊ ပႃႇတီႇသၢင်ႇသီႈ(USDP) ၸဵမ်ၸိူဝ်းၼႆႉသေ ႁူင်းတွတ်ႈၶႅပ်းၵၢင်ၸႂ် ၼႂ်းၸႄႈဝဵင်းယွင်ႁူၺ်ႈ မီး 133 ႁူင်း- လႆႈႁူႉၼင်ႇၼႆ ။
ၾၢႆႇတင်းၶွမ်ႊမသျိၼ်ႊပၢင်လိူၵ်ႈတင်ႈတႄႉ ပိုၼ်ၽၢဝ်ႇ လူင်းပၼ်ပိုၼ်ႉႁူႉ ၵဵဝ်ၵပ်းလွင်ႈ လၢႆးတွတ်ႈၶႅပ်းၵၢင်ၸႂ်ပဵၼ်ၵူၼ်းၼႂ်းထုင်ႉၼွင်ႁၢႆးယႃႈယူႇၼႆသေတႃႉ ၵူၼ်းဝၢၼ်ႈမၢင်ၸိူဝ်း ယင်းဢမ်ႇပွင်ႇၸႂ်လၢႆးတွတ်ႈၶႅပ်းၵၢင်ၸႂ် – ၵူၼ်းပိုၼ်ႉတီႈလၢတ်ႈ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၶဝ်မႃးလၢတ်ႈဝႃႈပႃးသဵၼ်ႈမၢႆ တႃႇတေလႆႈၵႂႃႇ တွတ်ႈၶႅပ်းၵၢင်ၸႂ်ၼႆလႄႈ မိူဝ်ႈၽုၵ်ႈၼႆႉတေလႆႈၵႂႃႇတွတ်ႈၶႅပ်းၵၢင်ၸႂ်ၼႆဢေႃႈ ၊ ဢမ်ႇတွတ်ႈ ဢမ်ႇလႆႈၶႃႈ ။ ၵူၺ်းတေလႆႈတွတ်ႈပၼ်သင်ၵေႃႈ ဢမ်ႇႁူႉ ၊ မီးပႃႇတီႇသင်ၵေႃႈ ဢမ်ႇႁူႉ ၊ လၢႆးတွတ်ႈၶႅပ်းၵၢင်ၸႂ်ၵေႃႈ တၢင်းဝၢၼ်ႈႁဝ်းၼႆႉ ဢမ်ႇမီးၽႂ်မႃးသွၼ် ဢမ်ႇႁူႉလၢႆးတွတ်ႈ မၼ်းၶႃႈ”- ဝႃႈၼႆ ။
ပူၼ်ႉမႃးမိူဝ်ႈဝၼ်းတီႈ 27/12/2025 မီးၵူၼ်းၵႂႃႇယႃႉၽိုၼ်ၸေႈသဵၼ်ႈမၢႆၸိုဝ်ႈ ၵူၼ်းၸိူဝ်း တေလႆႈၵႂႃႇပၼ်သဵင်ၵၢင်ၸႂ် ဢၼ်ပႃႉဝႆႉတီႈႁူင်းႁဵၼ်း ဝၢၼ်ႈလႄႇပိၼ်ႇ (လယ်ပြင်) သေ ဢဝ်ၼမ်ႉယႃႈသီလႅင်ၵႂႃႇတႃး၊ ၵႂႃႇယႃႉပၢႆႉပႃႇတီႇသၢင်ႇသီႈ (USDP) ဢၼ်လူင်းသူၼ်း တုမ်ႁႃသဵင်ဝႆႉၼၼ်ႉ ၼႆယဝ်ႉ ။
သိုၵ်းမၢၼ်ႈၼႆႉ ၸတ်းႁဵတ်းပၢင်လိူၵ်ႈတင်ႈၸုမ်ႇၵူႈ ၼႂ်းမိူင်းႁူမ်ႈတုမ်ပတ်းပိုၼ်ႉၵႂႃႇ သၢမ်ပွၵ်ႈ။ ပွၵ်ႈၵမ်းၼိုင်ႈ ၸတ်းႁဵတ်း ဝၼ်းတီႈ 28 လိူၼ်တီႊသႅမ်ႊပိူဝ်ႊ ပီ 2025၊ ပွၵ်ႈၵမ်းသွင် ၸတ်း ယဝ်ႉၵႂႃႇ မိူဝ်ႈဝၼ်းတီႈ 11 လိူၼ်ၵျႅၼ်ႊၼိဝ်ႊရီႊ ပီ 2026 ၊ ပွၵ်ႈၵမ်းသၢမ်တႄႉ တေႁဵတ်းၵႂႃႇ ၼႂ်းဝၼ်းတီႈ 25 လိူၼ်ၵျႅၼ်ႊၼိဝ်ႊရီႊ ပီ 2026 ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ