ပျီႇတူႉၸိတ်ႉပဢူဝ်း ၵဵပ်းၶွၼ်ႇတီႈၵူၼ်းမိူင်း ၼႂ်းၸႄႈဝဵင်းပၢင်လွင်း ၼိုင်ႈပီၼႆႉ ဢၢၼ်ႇႁူဝ်သိပ်း သႅၼ်ပျႃးလႄႈ ႁဵတ်းႁႂ်ႈၵူၼ်းမိူင်းယၢပ်ႇၽိုတ်ႇၵိၼ်းၸႂ်ၼႆယဝ်ႉ။

သိုၵ်းပျီႇတူႉၸိတ်ႉပဢူဝ်း (PNO) ၼႆႉ တႄႇၵုမ်းၵမ် ၾၢႆႇဢွၵ်ႇဝဵင်းပၢင်လွင်း မိူဝ်ႈႁၢင်ပီ 2024 ၼၼ်ႉမႃး ၼႄၶေႃႈဢၢင်ႈလၢႆလွင်ႈသေ ၵဵပ်းၶွၼ်ႇတီႈၵူၼ်းမိူင်းပိုၼ်ႉတီႈမႃး ႁိုင်ၶၢဝ်းတၢင်း ၼိုင်ႈပီပၢႆ။

ၵူၼ်းၸၢႆးၵေႃႉယူႇၼႂ်းၸႄႈဝဵင်းပၢင်လွင်း လၢတ်ႈတီႈၽူႈတွႆႇႁွၵ်ႈဝႃႈ –“ ဝၢၼ်ႈဢၼ်မီးၾၢႆႇ ၸၢၼ်းဝဵင်းပၢင်လွင်း ဝၢၼ်ႈပျီႇတူႉၸိတ်ႉပဢူဝ်းၶဝ် ၵုမ်းၵမ်ဝႆႉၸိူဝ်းၼၼ်ႉ လႆႈသႂ်ႇပၼ် ၶွၼ်ႇ ၵူႈဝၢၼ်ႈယဝ်ႉ ၊ ဢမ်ႇဝႃႈဝၢၼ်ႈတႆး ၊ ဝၢၼ်ႈပဢူဝ်း ၵဵပ်းၵူႈဝၢၼ်ႈ ၶွၼ်ႇၶဝ်ၵဵပ်းၼႆႉၼမ်ၼႃႇ ။ တီႈဢႄႇသုတ်း 5 မိုၼ်ႇပျႃးၼႆႉတိုၼ်းလႆႈပၼ် မၢင်ႁိူၼ်းၼိုင်ႈလိူၼ်ၼႆႉ လႆႈပၼ် ၼိုင်ႈသႅၼ် သွင်သႅၼ် ၶွၼ်ႇဢၼ်ၶဝ်ၵဵပ်းၸိူဝ်းၼႆႉ ၼိုင်ႈပီၼႆႉ ဢၢၼ်ႇႁူဝ်သိပ်းသႅၼ်မၼ်း”– ဝႃႈၼႆ ။

ဝၢၼ်ႈဢၼ်ပျီႇတူႉၸိတ်ႉပဢူဝ်းၵဵပ်းၶွၼ်ႇၼႆႉ ပဵၼ်တၢင်းဝၢၼ်ႈသွင်းပျွင်း ၊ လူင်ပႅၼ်ႈ ၊ ၵေႃမႆႉ သၢင်း၊ ၼမ်ႉၼဵင်ႈၸိူဝ်းၼႆႉ။ ၵူၼ်းဝၢၼ်ႈၸိူဝ်းယူႇသဝ်းဝႆႉၼႂ်းပိုၼ်ႉတီႈၼၼ်ႉ ပဵၼ် ၵူၼ်းငိူင်ႉပၢႆႈ ၽေးပၢင်တိုၵ်းသေ ၵႂႃႇယူႇတၢင်ႇဝၢၼ်ႈတၢင်ႇဝဵင်းယဝ်ႉ ပွၵ်ႈမႃးယူႇႁိူၼ်းၶိုၼ်း ၵမ်ႈၼမ်လႄႈ ယၢပ်ႇၽိုတ်ႇၵိၼ်းၸႂ်ဝႆႉႁင်းၽႂ်မၼ်း ဝႃႈၼႆ ။

ၵူၼ်းၸၢႆးၵေႃႉယူႇဝဵင်းပၢင်လွင်းလၢတ်ႈၽူႈတွႆႇႁွၵ်ႈဝႃႈ -“ၵူၼ်းဝၢၼ်ႈမၢင်ၸိူဝ်းၼႆႉပဵၼ်ၵူၼ်း ပၢႆႈ ၽေးသိုၵ်းပွၵ်ႈမိူဝ်းၶိုၼ်း ၊ ၶွၼ်ႇၶဝ်ယွၼ်းၼမ်ၼႃႇ ၵူၼ်းၸိူဝ်းဢမ်ႇပၼ်လႆႈၵေႃႈ မီးၼမ်တေႉ တေႉ ၊ ပေႃးယွၼ်းဢမ်ႇပၼ်လႆႈၵေႃႈ လႆႈၶၢႆသူၼ်ၶၢႆၼႃးယဝ်ႉ ဢဝ်ငိုၼ်းၵႂႃႇပၼ်ၶွၼ်ႇၶဝ်ၵေႃႈမီး ။ ၵူၼ်းမိူင်းႁဝ်းၼႆႉလီဢေးလူၼႃႇၶႃႈ ႁႃၵိၼ်လဵင်ႉတွင်ႉပေႃးယၢပ်ႇ ၸႂ်ၼႃႇယဝ်ႉဢေႃႈ ၊ ပေႃးပဵၼ်ၵႃးၶႅမ်ႉၼႆ ၶဝ်ယွၼ်း ၶွၼ်ႇၵႃး 2 သႅၼ် ၊ ပေႃးၵႃးဢွၼ်ႇ ၼႆႉၶဝ်ယွၼ်း 5 မိုၼ်ႇၼႆႉဢေႃႈ။ ၼႆႉလႆႈဝႃႈပဵၼ်ၶၼ်ဢၼ်ဢေႇလိူဝ်ပိူၼ်ႈသုတ်ႈယဝ်ႉၼႆၶႃႈဝႃႇ” – ဝႃႈၼႆ ။

ၶွၼ်ႇဢၼ်ပျီႇတူႉၸိတ်ႉပဢူဝ်း (PNO) ၵဵပ်းတီႈၵူၼ်းမိူင်း ၼႂ်းၸႄႈဝဵင်းပၢင်လွင်းၵူႈလိူၼ်ၼႆႉ ပဵၼ်ၶွၼ်ႇၵႃး ၊ ၶွၼ်ႇႁၢပ်ႇၵၢၼ်သိုၵ်း ၊ ၵႃႈမၢၵ်ႇၵွင်ႈ ၊ ၵႃႈတၢင်းၵိၼ်တၢင်းယႅမ်ႉ ၸိူဝ်း ၼႆႉ။ လိူဝ်သေၵဵပ်းၶွၼ်ႇၼမ်ယဝ်ႉ ၵဵပ်းပႃးၵူၼ်းၼုမ်ႇ ၼႂ်းဝၢၼ်ႈ သူင်ႇၵႂႃႇၼႃႈသိုၵ်းၵမ်းသိုဝ်ႈ လႄႈ ႁဵတ်းႁႂ်ႈၵူၼ်းၼုမ်ႇၸၢႆး ပၢႆႈဢွၵ်ႇၼႂ်းဢိူင်ႇၼႂ်းဝၢၼ်ႈတင်းၼမ်ၼႆ – ၵူၼ်းပိုၼ်ႉတီႈလၢတ်ႈ။

ၵဵဝ်ၵပ်းလွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈႁဝ်းၶႃႈ ၶတ်းၸႂ်ၵပ်းသိုပ်ႇၸူး ၽူႈၶၢၼ်ပၢၵ်ႇ ပျီႇတူႉ ၸိတ်ႉ (PNO) ယူႇသေတႃႉ ၵပ်းသိုပ်ႇဢမ်ႇပႆႇလႆႈ။

တႄႇမိူဝ်ႈႁူဝ်လိူၼ် ၵျႅၼ်ႊၼိဝ်ႊရီႊမႃး ၵၢင်ႉၵႄႇၼႂ်းဢိူင်ႇဝၢၼ်ႈၽြႃးၽိူၵ်ႇ ဝဵင်းပၢင်လွင်းၵေႃႈ ၺႃးသိုၵ်းမၢၼ်ႈလွၵ်ႇငိုတ်ႈလႄႈ လႆႈႁႃၵူၼ်းၵႂႃႇႁၢပ်ႇၵၢၼ်သိုၵ်းမၢၼ်ႈ တႃႇ ၸုပ်ႈ 21 ပၼ်ၵူၺ်းဢမ်ႇၵႃး ႁႂ်ႈၵဵပ်းပၼ်ငိုၼ်းတီႈၵူၼ်းမိူင်း ၼိုင်ႈႁိူၼ်းလႂ် 1 မိုၼ်ႇပျႃး ၼႆယဝ်ႉ ။

ၵူၼ်းၸၢႆးဢႃယု 30 ပီ ၵေႃႉယူႇဝဵင်းပၢင်လွင်းလၢတ်ႈၽူႈတွႆႇႁွၵ်ႈဝႃႈ – “ပီၼႆႉ ၶၼ်ၶူဝ်းၵုၼ်ႇၵေႃႈ ၵႃႈၵူႈမဵဝ်း။ မၢၵ်ႇၶိူဝ်သူမ်ႈ ၊ ၽၵ်းမီႇႁေႃ ဢၼ်ၵူၼ်းဝၢၼ်ႈၽုၵ်ႇသမ်ႉဢမ်ႇလႆႈၶၼ်မၼ်းၶႅမ်ႉ ၊ ၶၢဝ်းၼႆႉပဵၼ်ၶိင်ႇႁႅင်ႈလႄႈ ႁဵတ်းၵၢၼ်ၵေႃႈ ဢမ်ႇမီးၵူၼ်းႁွင်ႉၶႃႈ ၊ ႁႃၵိၼ်လဵင်ႉတွင်ႉယၢပ်ႇၼႃႇ ။ သိုၵ်းပဢူဝ်း ၊ သိုၵ်းမၢၼ်ႈသမ်ႉ ၵဵပ်းၶွၼ်ႇၵူႈလိူၼ်ၸိူင်ႉၼႆဢေႃႈ ၊ ပေႃး ဢမ်ႇသႂ်ႇတေမႃးတီႉၺွပ်း ထိုင်ႁိူၼ်းၼႆဢေႃႈ” ဝႃႈၼႆ ။

မိူဝ်ႈၽွင်းႁၢင်ပီ 2024 ၼၼ်ႉ သိုၵ်းမၢၼ်ႈတင်း ပျီႇတူႉၸိတ်ႉပဢူဝ်း PNO ႁူမ်ႈၵၼ်သေ ယၢမ်ႈ ယိုဝ်းၵၼ်တင်း တပ်ႉသိုၵ်းၽွမ်ႉႁူမ်ႈယၢင်းလႅင် ႁိမ်းႁွမ်းဝၢၼ်ႈၼွၵ်ႇဝူဝ်း၊ လွႆၵဵင်ႈ၊ ဝၢၼ်ႈၼမ်ႉၽႃမူ၊ ၾၢႆၶုၼ်၊ ဝၢၼ်ႈသွင်းပျွင်း ၸိူဝ်းမီးဝႆႉ ၼႂ်းၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်းသေ ၵူၼ်း မိူင်း မွၵ်ႈ 2000 ၵေႃႉပၢႆ လႆႈငိူင်ႉပၢႆႈၽေးသိုၵ်း ၼႆယဝ်ႉ။

ဝၢႆးပၢင်တိုၵ်းယဵၼ် ပျီႇတူႉၸိတ်ႉပဢူဝ်း တဵၵ်းၸႂ်ႉၵူၼ်းပၢႆႈၽေးသိုၵ်း ပွၵ်ႈယူႇၶိုၼ်းႁိူၼ်းယေး ၽႂ်မၼ်းသေ ၵဵပ်းၶွၼ်ႇတီႈၵူၼ်းဝၢၼ်ႈယူႇဢမ်ႇထၢတ်ႇဢမ်ႇဝၢႆးလႄႈ ၵူၼ်းပိုၼ်ႉတီႈ ယူႇယၢပ်ႇၵိၼ်းၸႂ်ဝႆႉ ဝႃႈၼႆ။