တီႈၼႂ်းၸႄႈတွၼ်ႈ မီႊၶျီႊၵႅၼ်ႊ (Michigan) မိူင်းဢမေႊရိၵၼ်ႊ မူၺ်တူၵ်းၼႃႁႅင်းလႄႈ ရူတ်ႉၵႃးပဵၼ်ၽေးၵိုင်ႉၵၢင်ႉ ၽႃႇသွၼ်ႉၵၼ် မွၵ်ႈ 100 လမ်း ဝႃႈၼႆ။

လွင်ႈၼႆႉပဵၼ်ၵႂႃႇ မိူဝ်ႈဝႃး ၼႂ်းဝၼ်းတီႈ 19 လိူၼ်ၵျႅၼ်ႊၼိဝ်ႊရီႊ။ ၵႃးတၢင်ႇၵုၼ်ႇလူင် ဢိၵ်ႇပႃး ၵႃးဢွၼ်ႇတင်းၼမ် ၽႃႇၺႃးၵၼ်။

တီႈၼၼ်ႈ ယွၼ်ႉမူၺ်တူၵ်းၼႃႁႅင်းလႄႈ ဢမ်ႇလႆႈႁၼ်သဵၼ်ႈတၢင်းၸႅင်ႈလီ။ ရူတ်ႉၵႃး ၸိူဝ်းႁေႃႈတိတ်းတၢမ်းၵၼ်မႃးၾၢႆႇလင်ၵေႃႈ ဢမ်ႇတၼ်းၵုမ်းလႆႈပရိၵ်ႈသေ လႆႈၽႃႇသွၼ်ႉၵၼ်ၵႂႃႇ ပဵၼ်ထႅဝ်ယၢဝ်း ဝႃႈၼႆ။

ပလိၵ်ႈၽူႈမီးပုၼ်ႈၽွၼ်းၶဝ်လၢတ်ႈဝႃႈ – ယွၼ်ႉၽေးၵိုင်ႉၵၢင်ႉၼႆႉသေ မီးၵူၼ်းမၢတ်ႇၸဵပ်းတင်းၼမ်သေတႃႉ ဢမ်ႇထိုင်တီႈလႆႈမႆႈၸႂ်ႁႅင်း။ ယွၼ်ႉမူၺ်တူၵ်းတၼ်ႁႅင်း ဢမ်ႇႁၼ်သဵၼ်ႈတၢင်းလီသေ ဢွၼ်ၵၼ်ႁေႃႈၶပ်းမႃးလွႆးလွႆးၵူၺ်းလႄႈ ၸင်ႇဢမ်ႇမီးၵူၼ်းလူႉတၢႆ။ ယၢမ်းလဵဝ် တိုၵ်ႉၶတ်းၸႂ်ၽဵဝ်ႈပႅတ်ႈမူၺ် တီႈၼိူဝ်သဵၼ်ႈတၢင်း ဢၼ်ပဵၼ်ၽေးၵိုင်ႉၵၢင်ႉ ၼၼ်ႉလႄႈ ႁႂ်ႈဢွၼ်ၵၼ်ငိူင်ႉဝႄႈသဵၼ်ႈတၢင်းၼၼ်ႉဝႆႉၸူဝ်ႈၶၢဝ်း ဝႃႈၼႆ။

ၼႂ်းၸႄႈတွၼ်ႈ မီႊၶျီႊၵႅၼ်ႊ (Michigan) ၼႆႉ မၢင်ပိုၼ်ႉတီႈ ႁႅင်းလူမ်းမႆႈယွမ်းလူင်းထိုင် – 22 တီႊၵရီႊ သႄႊသီႊယႅတ်ႊ။

ယွၼ်ႉၾိင်ႈၾႃႉရႃႇသီႇႁၢႆႉႁႅင်းလႄႈ ၽူႈမီးပုၼ်ႈၽွၼ်းၶဝ်တိုၵ်းသူၼ်းဝႆႉ ႁႂ်ႈဢွၼ်ၵၼ် ႁေႃႈၶပ်းရူတ်ႉၵႃးလွႆးလွႆး ၼႆယဝ်ႉ။

ႁွင်ႈၵၢၼ်ၾၢႆႇၾိင်ႈၾႃႉၾူၼ်လူမ်း မိူင်းဢမေႊရိၵၼ်ႊ လၢတ်ႈဝႃႈ – ၼႂ်းၸႄႈတွၼ်ႈ မီႊၶျီႊၵႅၼ်ႊ (Michigan) ၼႆႉ မူၺ်တူၵ်း တၢင်းၼႃမီးမွၵ်ႈ 4 ထတ်း၊ လူမ်းၵတ်းၵေႃႈ ၽတ်ႉထွင်းဝႆႉႁၢဝ်ႈႁႅင်း ဝႃႈၼႆ။