ၶူးသွၼ်ၸၢႆး တီႈႁူင်းႁဵၼ်းၸၼ်ႉသုင် ဢွင်ႇမျေႇတိတ်ႉ (အောင်မြေသစ် ကိုယ်ပိုင်ကျောင်း) ဢၼ်မီးတီႈ ၼႂ်းပွၵ်ႉပႃႇမႆႉ (သစ်တောရပ်ကွက်) ၼႂ်းဝဵင်းတူၼ်ႈတီး မိူင်းတႆးပွတ်း ၸၢၼ်းၼၼ်ႉ လွၵ်ႇငိုတ်ႈလုၵ်ႈဢွၼ်ႇႁဵၼ်းယိင်းၵေႃႉၼိုင်ႈသေ ၵၼ်ႉၸၼ်လူလၢႆၵႂႃႇ ဝႃႈၼႆ။

လွင်ႈၼႆႉပဵၼ်ၵႂႃႇမိူဝ်ႈဝၼ်းတီႈ 15/01/2026 ယၢမ်းၵၢင်ဝၼ်း မွၵ်ႈ 1 မူင်းၼၼ်ႉသေ ယၢမ်းလဵဝ် ၾၢႆႇၸဝ်ႈၼႃႈတီႈပလိၵ်ႈၶဝ် တီႉၺွပ်းဢဝ် ၶူးသွၼ်ၸၢႆးၵေႃႉၼၼ်ႉ ယဵတ်ႈသႂ်ႇၶွၵ်ႈ ၶင် ၼႂ်းဝဵင်းတူၼ်ႈတီးဝႆႉ ဝႃႈၼႆ။

ယိင်းဢွၼ်ႇၼၼ်ႉ ပဵၼ်လုၵ်ႈႁဵၼ်း ယူႇၸၼ်ႉ 12 (Grade 12) တီႈႁူင်းႁဵၼ်းသုၼ်ႇလဵဝ် (အောင်မြေသစ် ကိုယ်ပိုင်ကျောင်း) သေ ၽွင်းတိုၵ်ႉၵႂႃႇႁဵၼ်းသွၼ်လိၵ်ႈယူႇၼၼ်ႉ မၼ်း ၼၢင်းႁူဝ်ၶႆႈသေ ယွၼ်းၶႂၢင်ႉတီႈမေႃသွၼ် ပွၵ်ႈမိူဝ်းလိုဝ်ႈတီႈႁွင်ႈၼွၼ်း (အဆောင်)သေ ၺႃးၶူးသွၼ်ၸၢႆးၵေႃႉပဵၼ်လုၵ်ႈၸၢႆး ၽူႈၵုမ်းႁူင်းႁဵၼ်း ၸိုဝ်ႈႁွင်ႉ ၸႃႇၼီႇတူၺ်း (ဇာနည်သွေး) လွၵ်ႇငိုတ်ႈသေ လူလၢႆၵႂႃႇ ၼႆယဝ်ႉ။

ၼၢင်းယိင်း ဢႃႇယု 40 ပၢႆ ၵေႃႉယူႇဝဵင်းတူၼ်ႈတီးသေ တူင်ႉၼိုင်ၸွႆႈထႅမ်ပၼ် ပၼ်ႁႃယိင်းဢွၼ်ႇၵေႃႉၺႃး လူလၢႆၵႂႃႇၼၼ်ႉ လၢတ်ႈၼႄတီႈၽူႈတွႆႇႁွၵ်ႈဝႃႈ “ယၢမ်းလဵဝ် တိုၵ်ႉႁွင်ႉ ၼၢင်းဢွၼ်ႇၼႆႉ ၵႂႃႇၵူတ်ႇထတ်းပၢႆးယူႇလီတီႈႁူင်းယႃဝႆႉယူႇ။ ႁဝ်းၶဝ်ၵေႃႈတိုၵ်ႉႁႃႁူႉလွင်ႈၼႆႉ မိူဝ်ႈဝႃး (18/01/2026) ၵူၺ်း။ ဢၢႆႈၼၼ်ႉတႄႉ မိူဝ်ႈလဵဝ် တူၵ်းၶွၵ်ႈဝႆႉယဝ်ႉ။ တႃႇဢဝ်လိူင်ႈလႆႈၼိူဝ်ၵေႃႉႁဵတ်းၽိတ်းၼၼ်ႉ တေလႆႈတေႃႇသူႈတေႉတေႉဝႃႈဝႃႈ။ ၵွပ်ႈဝႃႈ ၾၢႆႇၵေႃႉပူၼ်ႉပႅၼ်ၼႆႉ ႁူႉၸၵ်း လႄႈ မိုတ်ႈၵိုဝ်း ၸဝ်ႈၼႃႈတီႈ ၽူႈယႂ်ႇၵူၼ်းလူင်ၶဝ် တင်းၼမ်” ၼႆယဝ်ႉ။

ဢွင်ႈယူႇသဝ်းလုၵ်ႈႁဵၼ်းယိင်း တီႈႁူင်းႁဵၼ်းသုၼ်ႇလဵဝ်ဢွင်ႇမျေႇတိတ်ႉၼၼ်ႉ မီးဝႆႉ 4 ၸၼ်ႉ။ ဝၼ်းၼၼ်ႉ လုၵ်ႈႁဵၼ်းယိင်း ဢမ်ႇယူႇလီမီး 2 ၵေႃႉ၊ တႃႇၵေႃႉၼိုင်ႈယူႇၸၼ်ႉတႂ်ႈသုတ်း၊ ထႅင်ႈၵေႃႉၼိုင်ႈသမ်ႉယူႇ ၸၼ်ႉ 4 သေ လုၵ်ႈၸၢႆးၽူႈၵုမ်းႁူင်းႁဵၼ်းၼၼ်ႉ လွၵ်ႇငိုတ်ႈ လူလၢႆႁဵတ်းတီႈ ယိင်းဢွၼ်ႇၵေႃႉယူႇၸၼ်ႉတႂ်ႈသုတ်းၼၼ်ႉၵႂႃႇ ၼႆယဝ်ႉ။

ၼင်ႇႁိုဝ်လိူင်ႈလၢဝ်း ပၼ်ႁႃၼႆႉတေဢမ်ႇယႂ်ႇၵႂၢင်ႈၶိုၼ်ႈမႃးၼၼ်ႉ ၵေႃႉပဵၼ်မႄႈၵူၼ်းၸၢႆးဢၼ်ပူၼ်ႉပႅၼ် ၼၼ်ႉ ၵႂႃႇငူပ်ႉငီႉၵၼ်တင်း ၾၢႆႇၼၢင်းယိင်းၵေႃႉလူႉသုမ်းၼၼ်ႉဝႃႈ – ယႃႇႁႂ်ႈလွင်ႈၼႆႉပဵၼ်လွင်ႈယႂ်ႇ ၾၢႆႇလုၵ်ႈဢွၼ်ႇၼၼ်ႉ တုၵ်းယွၼ်းၸိူင်ႉႁိုဝ်မႃးၵေႃႈ တေႁဵတ်းပၼ်တင်းသဵင်ႈ – ဝႃႈၼႆ။

ဢူၺ်းၵေႃႉဢွၼ်ႇယိင်းၵေႃႉၺႃးပူၼ်ႉပႅၼ်ၼၼ်ႉ တႅမ်ႈတၢင်ႇၼိူဝ်သိုဝ်ႇတူင်ႇဝူင်းၵူၼ်းသုၼ်ႇတူဝ်မၼ်း ဝႆႉဝႃႈ “ပဵၼ်ၵႂႃႇမိူဝ်ႈဝၼ်းတီႈ 15 ၼၼ်ႉဢေႃႈ။ မိူဝ်ႈၵၢင်ၶမ်ႈ 14 ၼၼ်ႉ သမ်ႉ ႁဝ်းလႆႈႁဵတ်းလိၵ်ႈတင်းၶိုၼ်း တေႃႇထိုင် ၵၢင်ၼႂ်ၸဝ်ႉ 3 မူင်း။ ၽိူဝ်ႇၵႂႃႇၵျွင်းၵၢင်ၼႂ်မႃး မၼ်းႁူဝ်မဝ်းႁႄ ယူႇဢမ်ႇသႃႇ။ ၵွပ်ႈၼၼ် ထိုင်ၶၢဝ်းၵိၼ်ၶဝ်ႈဝၼ်း မၼ်းၸင်ႇယွၼ်း ၶႂၢင်ႉႁႄ မိူဝ်းၼွၼ်းၶိုင်ႈဝၼ်းၼိုင်ႈၼႆဢေႃႈ။ ၶူးသွၼ်ၼၼ်ႉ တဵၵ်းထႆႇၶႅပ်းႁၢင်ႈမၼ်းႁႄ ယွၼ်းပႃးငိုၼ်းမၼ်း 20 သႅၼ်ယဝ်ႉ ႁဵတ်းတီႈမၼ်းၵႂႃႇ။ ၽိူဝ်ႇႁဝ်းထိုင်ၶိုၼ်း တီႈႁွင်ႈ ၼွၼ်းၼႆႉ တႆးၵေႃႉၶႃႈၵႂႃႇပႅပ်ႉဝႆႉယူႇတႂ်ႈၵူႇၼွၼ်းႁႄလၢတ်ႈဝႃႈ ၶႂ်ႈမိူဝ်းႁိူၼ်း။ ၵူဝ်ၼႃႇၼႆႁေ သၼ်ႇယူႇတင်းတူဝ်။ ၽိူဝ်ႇထိုင် ဝၼ်းတီႈ 16 ၵၢင်ၼႂ်ၼၼ်ႉ ၵျွင်းဢူၵ်ႉ (ကျောင်းအုပ်) ႁူႉၵႂႃႇလွင်ႈၼႆႉ။ ဝႃႈတေသိုပ်ႇၾူၼ်းႁွင်ႉပၼ်ပေႃႈမႄႈမၼ်းမႃးႁပ်ႉၼႆၵေႃႈ ဢမ်ႇယွမ်းသိုပ်ႇပၼ်။ ၵူၺ်းလၢတ်ႈႁဝ်းဝႃႈ လွင်ႈၼႆႉ ယႃႇဢဝ်ၵႂႃႇလၢတ်ႈၼႄႁႂ်ႈပိူၼ်ႈႁူႉၼႆယူႇတိၵ်းတိၵ်း” ၼႆယဝ်ႉ။

ၸႃႇၼီႇတူၺ်း ဢႃႇယု 29 ပီ ၶူးသွၼ် (ႁိုဝ်) လုၵ်ႈၸၢႆး ၽူႈၵုမ်းႁူင်းႁဵၼ်း ဢွင်ႇမျေႇတိတ်ႉ ၵေႃႉပူၼ်ႉပႅၼ် ၼိူဝ် ဢွၼ်ႇယိင်းၼၼ်ႉ ၸဝ်ႈၼႃႈတီႈ ၶဝ်ၵႂႃႇတီႉၺွပ်းဢဝ်လႆႈ ႁိမ်းႁူင်း ႁႅမ်းတူၼ်ႈတီး ဢၼ်မီးၼိူဝ်သဵၼ်ႈတၢင်း ဢသျေႉမျူဝ်ႉပတ်ႉလၼ်း (အရှေ့မြို့ပတ်လမ်း) မိူဝ်ႈဝၼ်းတီႈ 18 ယၢမ်းၵၢင်ဝၼ်းၼၼ်ႉသေ ပိုတ်ႇလိူင်ႈဢဝ် တၢင်းၽိတ်းဝႆႉလူၺ်ႈမတ်ႉ တႃ 376 ဝႆႉ ၼႆယဝ်ႉ။

လႆႈႁူႉဝႃႈ ႁူင်းႁဵၼ်းသုၼ်ႇလဵဝ် ဢွင်ႇမျေႇတိတ်ႉ ဝဵင်းတူၼ်ႈတီးၼႆႉ မီးပၵ်းပိူင်ဝႆႉပၼ်လုၵ်ႈႁဵၼ်း မီးသုၼ်ႇယိပ်းၾူၼ်း ဝၼ်းဢႃးတိတ်ႉၵူႈဝူင်ႈသေတႃႉ ဝၢႆးလင်ၵိူတ်ႇပဵၼ်ပၼ်ႁႃ လွင်ႈၼႆႉယဝ်ႉ ၾၢႆႇၸဝ်ႈၼႃႈတီႈ ၼႂ်းႁူင်းႁဵၼ်းၶဝ် ဢမ်ႇပၼ်လုၵ်ႈႁဵၼ်းၶဝ်ၸႂ်ႉတိုဝ်းၾူၼ်းလႄႈ လုၵ်ႈႁဵၼ်းၶဝ် ဢွၼ်ၵၼ်ႁႆႈသေတုၵ်းယွၼ်းယဝ်ႉ ၸင်ႇမီးသုၼ်ႇယိပ်းၾူၼ်းလႆႈၶိုၼ်း ၼႆယဝ်ႉ။

တီႈႁူင်းႁဵၼ်းသုၼ်ႇလဵဝ် ဢွင်ႇမျေႇတိတ်ႉ ဝဵင်းတူၼ်ႈတီးၼႆႉ ႁူမ်ႈသဵၼ်ႈ မေႃသွၼ်မီးယူႇ 26 ၵေႃႉ၊ ၽူႈႁၢပ်ႇၵၢၼ် ၾၢႆႇၸတ်းၵၢၼ်ႁူင်းႁဵၼ်းမီး 9 ၵေႃႉသေ လုၵ်ႈဢွၼ်ႁဵၼ်းၸၢႆး မီး 178 ၵေႃႉ ၊ လုၵ်ႈႁဵၼ်းယိင်း မီး 246 ၵေႃႉ။ လုၵ်ႈႁဵၼ်းၸိူဝ်းယူႇၵိၼ်ၼွၼ်းတီႈႁူင်းႁဵၼ်းသုၼ်ႇလဵဝ်ၼၼ်ႉ လုၵ်ႈဢွၼ်ႇၸၢႆးမီး 101 ၵေႃႉ၊ လုၵ်ႈဢွၼ်ႇယိင်း မီး 106 ၵေႃႉ ႁူမ်ႈသဵၼ်ႈမီး 207 ၵေႃႉ ၼႆယဝ်ႉ။