မိူဝ်ႈဝၼ်းတီႈ 18/01/2026 တၢမ်တူဝ် ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ လူင်းပိုၼ်ႉတီႈ ၵႂႃႇဢႅဝ်ႇယဵမ်ႈ ၼႂ်းၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇ။
ၽွင်းမိၼ်းဢွင်ႇလၢႆႇလူင်းပိုၼ်ႉတီႈ ၵႂႃႇထႅဝ်ႇၼႂ်းဝဵင်းၵဵင်းတုင်ၼၼ်ႉ မီးၽူႈၼမ်းၼႂ်းၶွမ်ႊမသျိၼ်ႊ ၸွမ်သိုၵ်း လူင် ယႄးဝိၼ်းဢူး လႄႈ ၸွမ်ၽွင်းလူင်မိူင်းတႆး၊ ၽူႈၵုမ်းၵၢၼ်တိူင်းသိုၵ်းသၢမ်ၸဵင်ႇၶမ်းၶဝ်ၵႂႃႇၸွမ်း ဝႃႈၼႆ။
မိၼ်းဢွင်ႇလၢႆႇၼႆႉ လူင်းတူၺ်း ၵၢၼ်ၵေႃႇသၢင်ႈ ၵွင်းမူး “လောကသရဖူ” ဢၼ်မုင်ႉႁေႃႁိူၼ်းမၼ်း ထႃႇပၼႃႇတုမ်ႇသႅင် (သရဖူ) ဝႆႉတီႈၼႂ်းဝၢင်းသူၼ်ပုတ်ႉထ ၸဝ်ႈသြႃႇၽတ်ႉတၼ်ႇတ ၵေႃးဝိတ (ႁိုဝ်) ၸဝ်ႈဝၸီႇပဵၵ်ႉ တီႈဝဵင်းၵဵင်းတုင် ၼႆယဝ်ႉ။
မိူဝ်ႈပူၼ်ႉမႃး ပီ 2025 လိူၼ်မေႇၼၼ်ႉၵေႃႈ တၢမ်တူဝ် မိၼ်းဢွင်ႇလၢႆႇ ၸွမ်ၸိၵ်းသိုၵ်းမၢၼ်ႈယိုတ်းမိူင်း ၵေႃႉၵႂႃႇဢဝ်တုမ်ႇသႅင် (သရဖူ) ၼၼ်ႉ ထႃႇပၼႃႇသႂ်ႇၼႂ်းၵွင်းမူးၼၼ်ႉ ဝႃႈၼႆ။
ၸဝ်ႈသြႃႇၽတ်ႉတၼ်ႇတ ၵေႃးဝိတ (ႁိုဝ်) ၸဝ်ႈဝၸီႇပဵၵ်ႉ တီႈဝဵင်းၵဵင်းတုင်ၼႆႉ ပဵၼ်သြႃႇပၢၼ်းတၵ်ႉၵႃႇၵၼ် တင်း ၽူႈဢွၼ်ႁူဝ်ၸုမ်းသိုၵ်းမၢၼ်ႈ ၸဵမ်မိူဝ်ႈပီ 2000 တဵမ် ၽွင်းမိၼ်းဢွင်ႇလၢႆႇတိုၵ်ႉပဵၼ်ၸၼ်ႉ ၽူႈၵုမ်းၵၢၼ် တိူင်းသိုၵ်းသၢမ်ၸဵင်ႇၶမ်းၼၼ်ႉ ၼႆယဝ်ႉ။
မိၼ်းဢွင်ႇလၢႆႇၼႆႉ ႁဵတ်းတၵ်ႉၵႃႇလူင်သေ ဢဝ်တုမ်ႇသႅင် (သရဖူ) ဢၼ်မီးၵႃႈၶၼ်သုင် သႂ်ႇထႃႇပၼႃႇ ၸွမ်းၵွင်းမူး ၼႂ်းဝဵင်းတႃႈဝၢႆ (ထားဝယ်မြို့) ၊ ဝဵင်းဢႃႇဝၵဝ်ႇ (အင်းဝမြို့ဟောင်း) တိူင်းမၢၼ်းတလေး လႄႈ ဝဵင်းၵဵင်းတုင် မိူင်းတႆးပွတ်းဢွၵ်ႇယူႇၼၼ်ႉ ၶဝ်ႈပႃးၼႂ်းၽႅၼ်ၵၢၼ် ဢၼ်တေႁဵတ်းႁႂ်ႈၵမ်ႉၸွႆႈပၼ်မၼ်း မီးၵၢမ်ႇၶႅမ်ႉသေ လႆႈတီႈယူႇ ၶိုၼ်ႈပဵၼ်ၸၼ်ႉသုင်သုတ်း ၼႂ်းမိူင်းႁူမ်ႈတုမ် ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ