မိူဝ်ႈၼႆႉဝၼ်းတီႈ 17/01/2026 ၶၼ်ၶမ်းမိူင်းမၢၼ်ႈၼႆႉ ၸွမ်းႁၢၼ်ႉသိုဝ်ႉၶၢႆၶမ်းတၢင်းၼွၵ်ႈမၼ်း ထိုင်ၵႂႃႇ 9,840,000 ပျႃး ၼႆႉပဵၼ်ၶၼ်ဢၼ်တီႈႁၢၼ်ႉၶဝ်ၶၢႆပၼ်ႁဝ်း။ ပေႃးႁဝ်းမီး ၶမ်းသေၵႂႃႇၶၢႆၸိုင် ၼိုင်ႈၵျၢပ်ႈၼႆႉ တေလႆႈငိုၼ်းယူႇ 98 သႅၼ်ပျႃးတဵမ်တဵမ် ၼႆယဝ်ႉ။

ၶၼ်ၶမ်းလုမ်ႈၾႃႉတႄႉ ၼိုင်ႈဢွၼ်ႊသ်လႂ် တေလႆႈငိုၼ်းဢမေႊရိၵၼ်ႊ 4597 ၻေႃႊလႃႊသေ ၼႂ်းလွၵ်းၵၢတ်ႇၵႃႉၶၢႆၶမ်း တိူင်းတႃႈၵုင်ႈၶဝ်တႄႉ ပိုတ်ႇၵႃႈၶၼ်ၶမ်း (အကယ်ဒမီ မီးလင်းရွှေ) ၼႆႉ ၼိုင်ႈၵျၢပ်ႈလႂ် 60 သႅၼ်ပျႃးၵူၺ်း ၼႆယဝ်ႉ။

ၵူၺ်းၵႃႈ မိူဝ်ႈဝႃး ဝၼ်းတီႈ 16/1/2026 ဝၼ်းမိူဝ်ႈၼႆႉ ၶၼ်ၶမ်းမိူင်းမၢၼ်ႈၼိုင်ႈၵျၢပ်ႈ ပုင်ႈၶိုၼ်ႈထိုင် 99 သႅၼ်ပျႃး။

ယွၼ်ႉငဝ်းလၢႆးၵၢၼ်မိူင်း ၵၢၼ်သိုၵ်းၼႂ်းမိူင်းဢမေႊရိၵၼ်ႊ လႄႈ လုမ်ႈၾႃႉဢမ်ႇၼိမ်သဝ်းလႄႈ ၶၼ်ၶမ်းမိူင်းမၢၼ်ႈလႆႈပုင်ႈၶိုၼ်ႈသုင်ႁႅင်းတေႉတေႉ။ သင်တိုၵ်ႉတေသိုပ်ႇပဵၼ်ၼႆယူႇတိၵ်းတိၵ်းၸိုင် ၶၼ်ၶမ်းမိူင်းမၢၼ်ႈၼႆႉ ၸၢင်ႈထိုင်ၵႂႃႇလႆႈ ၼိုင်ႈၵျၢပ်ႈလႂ် 100 သႅၼ်ပျႃးဝႆးဝႆးယူႇ ဝႃႈၼႆ။

လႆႈႁူႉဝႃႈ ၼႂ်းၶၢဝ်းတၢင်း 15 ဝၼ်းၵူၺ်း ၶၼ်ၶမ်းလုမ်ႈၾႃႉၼႆႉ ပုင်ႈၶိုၼ်ႈၵႂႃႇ 300 ၻေႃႊလႃႊ။ မိူဝ်ႈဝူင်ႈထိၼိုင်ႈ လိူၼ်ၵျႅၼ်ႊၼိဝ်ႊရီႊၼႆႉ ၼိုင်ႈဢွၼ်ႊသ်လႂ် မီးယူႇ 4300 ၻေႃႊလႃႊၵူၺ်းသေတႃႉ မိူဝ်ႈဝၼ်းတီႈ 15 ပူၼ်ႉမႃးၼႆႉ ထိုင်ၵႂႃႇ 4600 ၻေႃႊလႃႊသေ မိူဝ်ႈၼႆႉ 17 ဝၼ်းတႄႉ လူင်းၵႂႃႇၶိုၼ်း 4597 ၻေႃႊလႃႊ ၼႆယဝ်ႉ။

ၵူၼ်းႁဵတ်းၵၢၼ်ၵႃႉၶၢႆၶမ်းမိူင်းမၢၼ်ႈတႄႉလၢတ်ႈဝႃႈ သင်ဝႃႈ ငဝ်းလၢႆး ၵၢၼ်မိူင်း ၵၢၼ်သိုၵ်းလုမ်ႈၾႃႉ တိုၵ်ႉတေသုၵ်ႉယုင်ႈမိူၼ်ၼႆၸိုင် ၶၼ်ၶမ်းတေသိုပ်ႇၶိုၼ်ႈထႅင်ႈ၊ ၶၼ်ငိုၼ်း ၻေႃႊလႃႊ တေဢမ်ႇၼိမ် ဝႃႈၼႆ။

ယၢမ်းလဵဝ် တီႈမိူင်းမၢၼ်ႈတႄႉ ႁၢၼ်ႉၶၢႆၶမ်းယႂ်ႇၵမ်ႈၼမ် ၵိုတ်းလိုဝ်ႈ ၵၢၼ်သိုဝ်ႉၶၢႆၶမ်းၸူဝ်ႈၶၢဝ်းယူႇ။ ၸိူဝ်းပိုတ်ႇသေသိုပ်ႇသိုဝ်ႉၶၢႆၶမ်းယူႇၼၼ်ႉၵေႃႈ ယုၵ်ႉၶၼ်ၶမ်းသေၶၢႆဝႆႉ။ ၶၼ်ၶမ်းဢၼ်သိုဝ်ႉၶၢႆၵၼ်တႄႉတႄႉတၢင်းၼွၵ်ႈမီးယူႇႁိမ်းၸမ် 100 သႅၼ် ၼႆသေတႃႉ ႁွင်ႈၵၢၼ်ၾၢႆႇသိုဝ်ႉၶၢႆၶမ်း တႂ်ႈသိုၵ်းမၢၼ်ႈယိုတ်းမိူင်းတႄႉ တိုၵ်ႉလႅၼ်တူဝ်ၵဝ်ႇ လႅၼ်လုမ်ႈၾႃႉ သေပိုၼ်ၽၢဝ်ႇဝႆႉပဵၼ်တၢင်းၵၢၼ်ယူႇဝႃႈ ၶၼ်ၶမ်းၼိုင်ႈၵျၢပ်ႈ 60 သႅၼ်ပျႃး- ဝႃႈၼႆဝႆႉ။