ၸဝ်ႈၼႃႈတီႈၾၢႆႇႁွင်ႈၵၢၼ်ၵူတ်ႇထတ်းၶဝ်ႈဢွၵ်ႇမိူင်း ၼႂ်းဝဵင်းမႄႈသွတ်ႇ ၸိူဝ်းတူင်ႉၼိုင်ယူႇၼႂ်းဝဵင်းဢၼ် တိတ်းၸပ်းယူႇတီႈလႅၼ်လိၼ် မိူင်းမၢၼ်ႈ- မိူင်းထႆးၼၼ်ႉ ဢွၵ်ႇတီႉ ၺွပ်းႁႅင်းၵၢၼ်မိူင်းမၢၼ်ႈ ၸိူဝ်းႁဵတ်းၵၢၼ်ၽိတ်းမၢႆမီႈယူႇ ၼႂ်းမိူင်းထႆး တင်ႈတႄႇဝၼ်းတီႈ 15 – 16 လိူၼ်ၵျႅၼ်ႊၼိဝ်ႊရီႊၼႆႉမႃး ဝႃႈၼႆ။

ႁႅင်းၵၢၼ်မိူင်းမၢၼ်ႈ ၸိူဝ်းၺႃးၵူတ်ႇထတ်းၼၼ်ႉ ပဵၼ်ၵူၼ်းၸိူဝ်းႁဵတ်းၵၢၼ်ဢၼ်ဢမ်ႇမႅၼ်ႈၸွမ်းပၵ်းပိူင် မိူင်းထႆး မိူၼ်ၼင်ႇ ႁဵတ်းၵၢၼ်ၼႂ်းႁၢၼ်ႉၵႅတ်းၶူၼ်ႁူဝ်၊ ႁၢၼ်ႉတၢင်းၶၢႆ၊ ႁၢၼ်ႉၶၢႆၼမ်ႉၼဵင်ႈၸဵမ်း လႄႈ ၵူၼ်းၸိူဝ်းလႄႇႁႃၶၢႆတၢင်းၶၢႆ ၸွမ်းၶၢင်ႈတၢင်းၸိူဝ်းၼၼ်ႉ ၼႆယဝ်ႉ။

ႁူဝ်ပဝ်ႈ ၵေႃႇမတီႇ ႁူမ်ႈႁဵတ်းၵၢၼ်ၸွမ်း ၵူၼ်းမိူင်းမၢၼ်ႈ JACBA လၢတ်ႈၼႄတီႈသိုဝ်ႇၶၢဝ်ႇဝႆႉဝႃႈ – “ယၢမ်းလဵဝ် ႁၢၼ်ႉၶၢႆတၢင်းၵိၼ်မိူင်းမၢၼ်ႈ ၼႂ်းဝဵင်းမႄႈသွတ်ႈ ၵမ်ႈၼမ်ၼႆႉ ဢိုတ်းဝႆႉမူတ်းယဝ်ႉ။ ၼႂ်းဝဵင်းၵေႃႈႁႅင်ႈႁဵဝ်ႇဝႆႉ ဢမ်ႇမီးၵူၼ်းၵႂႃႇၵူၼ်းပႆၼမ်။ မိူဝ်ႈလဵဝ် ၸဝ်ႈၵႃႉတၢင်းၶၢႆ ၸိူဝ်းဢဝ်လေႃႉႁႄ လႄႇႁႃၶၢႆ ၸွမ်းၶၢင်ႈတၢင်းၼၼ်ႉၵေႃႈ ၸွမ်းၵူတ်ႇထတ်း တီႉၺွပ်း။ ၵူၼ်းၸိူဝ်းဢမ်ႇမီးဝတ်းဝႂ်ပဵၼ်တၢင်းၵၢၼ်ၼၼ်ႉၵေႃႈ ၶဝ်ထတ်းႁႅင်းၼႃႇ” ဝႃႈၼႆ။

လႆႈႁူႉဝႃႈ ၵူၼ်းမိူင်းမၢၼ်ႈၸိူဝ်းၺႃးတီႉၺွပ်းၵႂႃႇၼႆႉ မီးမွၵ်ႈ 100 ၵေႃႉပၢႆသေတႃႉ ၵမ်ႈၼမ်ဢဝ်ငိုၼ်း ၵႂႃႇထုတ်ႇလႆႈၵမ်းလဵဝ်လႄႈ လႆႈဢွၵ်ႇမႃးၶိုၼ်းမီးမွၵ်ႈ 80 ၵေႃႉ။ ၵူၼ်းၸိူဝ်း ဢမ်ႇမီးငိုၼ်းၵႂႃႇထုတ်ႇဢဝ်မႃးၶိုၼ်းၼၼ်ႉတႄႉ ၺႃးတီႉၺွပ်းဝႆႉ ၼႆယဝ်ႉ။

ၵၢၼ်ငၢၼ်းၸိူဝ်းၵူၼ်းမိူင်းၼွၵ်ႈ ၸိူဝ်းပဵၼ်ႁႅင်းၵၢၼ် ဢမ်ႇလႆႈႁဵတ်းၼၼ်ႉ တင်းသဵင်ႈမီးယူႇ 27 လွင်ႈလႄႈ ၵူၼ်းၸိူဝ်းၺႃးတီႉၺွပ်းလူၺ်ႈတၢင်းၽိတ်းဢၼ်ၼႆႉၼၼ်ႉ သင်ဢမ်ႇပၼ်လႆႈငိုၼ်းၵႃႈထုတ်ႇတူဝ်ၸိုင် တေၺႃးတၢမ်ႇၶွၵ်ႈၶင်/ထွင်ႇ 12 ပီ ဝႃႈၼႆ။

ႁွင်ႈၵၢၼ်ၽွင်းလူင်ၾၢႆႇႁႅင်းၵၢၼ်ၼွၵ်ႈမိူင်း ယၢမ်ႈပိုၼ်ၽၢဝ်ႇဢွၵ်ႇဝႆႉဝႃႈ – ပေႃးၵူတ်ႇထတ်းႁၼ်ဝႃႈ ႁႅင်းၵၢၼ် ႁဵတ်းၵၢၼ်ဢမ်ႇမႅၼ်ႈၸွမ်းပိူင် ၼႂ်းမိူင်းထႆးၸိုင် တေၺႃးမၢပ်ႇမႂ်ငိုၼ်း 5 ႁဵင်ဝၢတ်ႇ ထိုင် 5 မိုၼ်ႇဝၢတ်ႇ၊ လိူဝ်ၼၼ်ႉ တေၺႃးယိုတ်းပႅတ်ႈဝႂ်ဢၼ်မီးသုၼ်ႇလႆႈႁဵတ်းၵၢၼ်ၼၼ်ႉ ႁိုင် 2 ပီသေ တေထုၵ်ႇသူင်ႇမိူဝ်းၶိုၼ်း မိူင်းၸဝ်ႈၵဝ်ႇ ၼႆယဝ်ႉ။