မိူဝ်ႈဝႃး ဝၼ်းတီႈ 15/1/2026 ယၢမ်းဝၢႆးဝၼ်း 2 မူင်း သိုၵ်းမၢၼ်ႈယိုတ်းမိူင်း ႁူမ်ႈတင်းၸုမ်းပလိၵ်ႈသေ ၵႂႃႇထူပ်းႁၼ်ထႅင်ႈ ႁူင်းၵၢၼ်ႁုင်ယႃႈမဝ်းၵမ် ၼႂ်းၸႄႈဝဵင်းမိူင်းယႆ၊ ယိုတ်းလႆႈပႃး ၶိူင်ႈၸႂ်ႉတိုဝ်း ၼႂ်းၵၢၼ်ႁုင်ယႃႈၵူႈသႅၼ်းသႅၼ်းထႅင်ႈၼႆ ၸုမ်းပလိၵ်ႈမိူင်းႁူမ်ႈတုမ် တႂ်ႈ ဢၢမ်းၼၢတ်ႈ သိုၵ်းမၢၼ်ႈပိုၼ်ၽၢဝ်ႇဢွၵ်ႇဝႆႉ။
သိုၵ်းမၢၼ်ႈ တင်းပလိၵ်ႈမၢၼ်ႈ ၶဝ်ႈၵႂႃႇၵူတ်ႇထတ်းၼႂ်းပိုၼ်ႉတီႈသေ ဝၼ်းတီႈ 9 -10-11 /01/2026 ၼၼ်ႉ ၸႂ်ႉႁိူဝ်းမိၼ်ပွႆႇမၢၵ်ႇသႂ်ႇ ၼႂ်းပိုၼ်ႉတီႈဢၼ်ၶဝ်လၢမ်းၶၢတ်ႈဝႃႈ မီးၸုမ်း ၵျႃႊၽျႅၼ်ႉ တီႈၸႄႈဝဵင်းသီႇပေႃႉ လႄႈ ၸႄႈဝဵင်းမိူင်းယႆတိတ်းၸပ်းၵၼ်ဝႆႉၼၼ်ႉ ။
မိူဝ်ႈဝၼ်းတီႈ 10-11 ၾၢႆႇသိုၵ်းမၢၼ်ႈ ၶဝ်ႈသွၵ်ႈတီႉၺွပ်း ယိုတ်းဢဝ်လႆႈ ႁူင်းႁုင်ယႃႈမဝ်းၵမ် တႃႇ 3 ဢွင်ႈတီႈ ။
ထိုင်မႃး ယၢမ်းဝၢႆးဝၼ်း မိူဝ်ႈဝႃး 15/01/2026 သိုၵ်းမၢၼ်ႈ ၶဝ်ႈၵႂႃႇယိုတ်း ပုင်းသီသွမ်ႇ ဢၼ်သႂ်ႇဝႆႉၼမ်ႉဢႅတ်ႉသိတ်ႉ 3500 လုၵ်ႈ၊ ပုင်းပေႇပႃႇလဵၵ်း 507 လုၵ်ႈ၊ တဝ်ႈၵႅတ်ႉသ် 243 လုၵ်ႈ၊ ၸၢၵ်ႈၾႆး 2 လုၵ်ႈ၊ ၸၢၵ်ႈႁဵတ်းဢွၵ်ႇမဵတ်ႉယႃႈ 9 လုၵ်ႈ၊ ပၢၼ်ႉဢၼ်သႂ်ႇမဵတ်ႉယႃႈသေ တၢၵ်ႇႁႅင်ႈၼၼ်ႉ 50 ဢၼ် ဝႃႈၼႆ။
လိူဝ်ၼၼ်ႉ ထူပ်းႁၼ်ပႃး ဢွင်ႈတီႈဢၼ်ထၢင်ႇထိူမ်လႆႈဝႃႈ ပဵၼ်ႁူင်းၸၢၵ်ႈၵူဝ်ႇတွင်ႇ ဢၼ် ႁဵတ်းဢွၵ်ႇ Happy Water ၼႆၼၼ်ႉ 1 တီႈ၊ သုမ်ႉတီႈၼွၼ်းၵူၼ်းယူႇသဝ်း တႃႇ 12 တီႈ၊ ၵူဝ်ႇတွင်ႇ တီႈဝႆႉ ပုင်းဢႅတ်ႉၸိတ်ႉ 7 တီႈ၊ သုမ်ႉဢၼ်ဝႆႉၶိူင်ႈၸႂ်ႉတိုဝ်း (ကုန်ကြမ်း) ၼႂ်းၶၵ်ႉၵၢၼ် ႁုင်ယႃႈ ၼၼ်ႉ 2 လုၵ်ႈၼႆ ၾၢႆႇၸုမ်းပလိၵ်ႈၶဝ် ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉ။
တီႈႁုင်ယႃႈမဝ်းၵမ် ဢၼ်သိုၵ်းမၢၼ်ႈ တင်း ၸုမ်းပလိၵ်ႈမၢၼ်ႈ ၵႂႃႇထူပ်းႁၼ်ထႅင်ႈၼၼ်ႉ ႁၢင်ႇၵႆၵၼ်တင်း ႁူင်းႁုင်ယႃႈမဝ်းၵမ် ဢၼ်သိုၵ်းမၢၼ်ႈယိုတ်းလႆႈ 2 တီႈၼၼ်ႉ တႃႇ 2.5 ၵီႊလူဝ်ႊမီႊတိူဝ်ႊသေ မီးၸဵင်ႇႁွင်ႇဝၼ်းဢွၵ်ႇ လႄႈ ဝဵင်းမိူင်းယႆ မွၵ်ႈ 34 ၵီႇလူဝ်ႊမီႊတိူဝ်ႊ၊ ယၢၼ်ၵႆၵၼ်တင်း ဝၢၼ်ႈၼႃးလင်း မွၵ်ႈ 14 ၵီႊလူဝ်ႊမီႊတိူဝ်ႊ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ