မိူဝ်ႈဝၼ်းတီႈ 15 လိူၼ်ၵျႅၼ်ႊၼိဝ်ႊရီႊ ယၢမ်းၵၢင်ၼႂ် မၢၵ်ႇတရူၼ်ႊတူၵ်းသႂ်ႇ တီႈႁူင်းပလိၵ်ႈသိုၵ်းမၢၼ်ႈ ဢၼ်မီးၼႂ်းပွၵ်ႉဝၼ်းဢွၵ်ႇ (အရှေ့ပိုင်း) ဝဵင်းမိူင်းၵုတ်ႈ ဝႃႈၼႆ။
ၵူၼ်းမိူင်းၵေႃႉယူႇၼႂ်းဝဵင်းမိူင်းၵုတ်ႈ လၢတ်ႈဝႃႈ “လႆႈငိၼ်းသဵင်မၼ်းလင်ႁႅင်းၼႃႇ။ မၢင်ၸိူဝ်းၵေႃႈဝႃႈ ပဵၼ်မၢၵ်ႇသျွတ်ႉ ၊ ၵူၺ်းၵမ်ႈၽွင်ႈၵေႃႈဝႃႈ ပဵၼ်မၢၵ်ႇတရူၼ်ႊၼႆယူႇ။ မၢၵ်ႇၵႂႃႇတူၵ်းသႂ်ႇတီႈႁိမ်းၸဵင်ႇ ႁူင်းယႃ ဢၼ် PDF ၶဝ်မႃးပွႆႇဝၼ်းၼၼ်ႉ။ ၵူၼ်းတႄႉ တိူဝ်ႉႁိုဝ်ဢမ်ႇတိူဝ်ႉၵေႃႈ ဢမ်ႇလႆႈႁူႉၸွမ်း” ၼႆယဝ်ႉ။
ဝဵင်းမိူင်းၵုတ်ႈၼႆႉ သိုၵ်းမၢၼ်ႈၶဝ်ႈၵုမ်းၵမ်ၶိုၼ်းဝႃႈၼႆသေတႃႉ တိုၵ်ႉဢဝ်လႆႈၶိုၼ်း ၼႂ်းဝဵင်းၵူၺ်းလႄႈ ၾၢႆႇၼွၵ်ႈဝဵင်းမိူင်းၵုတ်ႈၼႆႉ မီးၸုမ်းယိပ်းၵွင်ႈၵၢင်ႇၸၢဝ်းၶိူဝ်းလၢႆလၢႆၸုမ်း ယူႇသဝ်းတူင်ႉၼိုင်ၵႂႃႇမႃးဝႆႉ ၸွမ်းသဵၼ်ႈတၢင်း မိူင်းမိတ်ႈ-မိူင်းၵုတ်ႈ ။
ပူၼ်ႉမႃး မိူဝ်ႈဝၼ်းတီႈ 10 ထိုင် 12 လိူၼ်ၵျႅၼ်ႊၼိဝ်ႊရီႊၼၼ်ႉ သိုၵ်းမၢၼ်ႈ တင်း ၸုမ်းသိုၵ်း လုၵ်ႉၽိုၼ်ႉၵူၼ်းၼုမ်ႇ PDF ၶဝ် ယိုဝ်းၵၼ် ၸွမ်းသၼ်လွႆလႅၼ်ၶႅၼ်ႈ မိူင်းၵုတ်ႈ – မိူင်းမိတ်ႈ ၸၢပ်ႈၵၼ်ၼၼ်ႉ ၶၢဝ်းတၢင်း သၢမ်ဝၼ်း။ ၾၢႆႇသိုၵ်းမၢၼ်ႈ ၸႂ်ႉတိုဝ်းၶိူင်ႈၵွင်ႈလူင် ယိုဝ်းၸွႆႈၵႂႃႇႁၢဝ်ႈႁႅင်း ဝႃႈၼႆ။
မိူၼ်ၼႆၼင်ႇၵဝ်ႇ ၼႂ်းႁူဝ်ပီ 2026 မိူဝ်ႈပူၼ်ႉမႃးဝၼ်းတီႈ 4 ယၢမ်းၵၢင်ၼႂ်ၼၼ်ႉၵေႃႈ မၢၵ်ႇၶိူင်ႈၵွင်ႈလူင် တူၵ်းသႂ်ႇ ၼႂ်းဝၢင်းႁူင်းႁဵၼ်းၸၼ်ႉသုင် မၢႆ (4) ၾၢႆႇဢွၵ်ႇဝဵင်းမိူင်းၵုတ်ႈ ပွၵ်ႉလႄႇဢူး (လယ်ဦး) ၼၼ်ႉသေ ၼၢင်းယိင်းၵေႃႉၼိုင်ႈမၢတ်ႇၸဵပ်းသေ လူႉတၢႆၵႂႃႇၵေႃႉၼိုင်ႈ လႄႈ သင်ႇၶၸဝ်ႈ လူႉလွၼ်ႇၵႂႃႇၼိုင်ႈပႃး ၼႆယဝ်ႉ။
ဝၢႆးလင် သိုၵ်းတဢၢင်း TNLA ထွႆသၢႆသိုၵ်းဢွၵ်ႇၵႂႃႇ ၼႂ်းဝဵင်းမိူင်းၵုတ်ႈ- မိူင်းမိတ်ႈယဝ်ႉ သိုၵ်းမၢၼ်ႈဢဝ်ႁႅင်း သိုၵ်းၶဝ်ႈမႃးယူႇၶိုၼ်း ႁိုင်မွၵ်ႈ 1 လိူၼ်ပၢႆၵူၺ်း ပဵၼ်ပၢင်တိုၵ်းၵၼ်တင်း သိုၵ်း PDF ၶဝ်လႄႈ ႁၢၼ်ႉတေႃႇထိုင် ယၢမ်းလဵဝ်ၵေႃႈ ယင်းပႆႇၸၢင်ႈပၼ်ႇ ၵၢၼ်ၽွင်းငမ်း လႆႈလီငၢမ်း ။
ၵူၼ်းၸၢႆး ဢႃႇယု 40 ပီပၢႆ ၵေႃႉယူႇၼႂ်းမိူင်းမိတ်ႈၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈဝႃႈ “ၼႂ်းလိူၼ်ထူၼ်ႈ ၼိုင်ႈၼႆႉ ၵူၼ်းၼႂ်းထႃႇၼသႅင်ႇယႃႇၶဝ်ၵမ်ႈၽွင်ႈ တေၶဝ်ႈမႃးထႅင်ႈၼႆ ငိၼ်းဝႆႉၸိူင်ႉၼႆယူႇ။ မိူဝ်ႈလဵဝ်ၼႆႉ ၶဝ် ပႆႇၽုၺ်ႇလႆႈလုမ်းၶဝ်။ သိုၵ်းမၢၼ်ႈၵူၺ်းဢိူဝ်ႈ ၽိူမ်ႉႁႅင်းၶဝ်ၶဝ်ႈမႃးယူႇတိၵ်းတိၵ်း။ မီးပဵၼ်ၵႃႈႁိုဝ်ယဝ်ႉၵေႃႈ ဢမ်ႇႁူႉ။ ၾၢႆႇသိုၵ်း PDF ၶဝ်တႄႉ ၶိုင်ယိုဝ်းသိုၵ်းမၢၼ်ႈယူႇတိၵ်းတိၵ်းယဝ်ႉ” ဝႃႈၼႆ။
လိူၼ်ဢွၵ်ႉထူဝ်ႊပိူဝ်ႊ 27 – 28 ဝၼ်း ပီ 2025 ၼၼ်ႉ လူင်ပွင်ၸိုင်ႈမိူင်းၶႄႇ ယူႇၵၢင်ႁဵတ်းၶဵဝ်ပၼ်သေ ႁွင်ႉဢဝ်သိုၵ်းမၢၼ်ႈ တင်း သိုၵ်းတဢၢင်း ၵႂႃႇဢုပ်ႇဢူဝ်းၵၼ်ၼႂ်းမိူင်းၶႄႇသေ လႆႈၶေႃႈတူၵ်းလူင်းၵိုတ်း တိုၵ်းၵၼ်မႃးသေ ၾၢႆႇသိုၵ်းတဢၢင်း လႆႈထွႆဢွၵ်ႇဝဵင်းၵႂႃႇပၼ်။
ဝၢႆးလင်ၼၼ်ႉ သိုၵ်းမၢၼ်ႈ ၶဝ်ႈမႃးဢဝ်တီႈယူႇၶိုၼ်း ၼႂ်းဝဵင်းမိူင်းၵုတ်ႈ တင်း မိူင်းမိတ်ႈ ၼႂ်းႁၢင်လိူၼ်ၼူဝ်ႊ ဝႅမ်ႊပိူဝ်ႊ ပီ 2025 ။ တႄႇမိူဝ်ႈၼၼ်ႉမႃး သိုၵ်း PDF ၵေႃႈယူႇၾၢႆႇၼွၵ်ႈဝဵင်းသေ ပႂ်ႉငွႆးယိုဝ်း သိုၵ်းမၢၼ်ႈမႃး ဢမ်ႇထၢတ်ႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ