ၵူၼ်းမိူင်းႁူမ်ႈတုမ်မၢၼ်ႈ ၸိူဝ်းယိပ်းဝႆႉ ဝႂ်ႁဵတ်းၵၢၼ်ၼွၵ်ႈမိူင်း OWIC ၼၼ်ႉ သင်တေဢွၵ်ႇၼွၵ်ႈမိူင်း တိုၼ်းတေလႆႈပႃးဝႂ်ႁပ်ႉႁွင်း ႁွင်ႈၵၢၼ်ၾၢႆႇႁႅင်းၵၢၼ်သိုၵ်းမၢၼ်ႈ ၸင်ႇတေလႆႈသုၼ်ႇ ဢွၵ်ႇတီႈၶူင်ႇႁိူဝ်းမိၼ်တႃႈၵုင်ႈ ဝႃႈၼႆ။
ၵဵဝ်ႇၵပ်းလွင်ႈႁႅင်းၵၢၼ် ဢွၵ်ႇၵႂႃႇႁဵတ်းၵၢၼ်ၼွၵ်ႈမိူင်းသေ ပူၼ်ႉမႃး ဝၼ်းတီႈ 11 လိူၼ်ထူၼ်ႈၼိုင်ႈ ႁွင်ႈၵၢၼ်ၾၢႆႇႁႅင်းၵၢၼ်သိုၵ်းမၢၼ်ႈ ပိုၼ်ၽၢဝ်ႇဢွၵ်ႇမႃး မၢႆမီႈပၵ်းပိူင်မႂ်ႇ ၼင်ႇ ၼႆ။
ၵူၼ်းယိပ်းဝႆႉ ဝႂ်ႁဵတ်းၵၢၼ်ၼွၵ်ႈမိူင်း OWIC ၼၼ်ႉ တႃႇတေဢွၵ်ႇၼွၵ်ႈမိူင်း တေလႆႈတၢင်ႇယွၼ်းဝႂ်ႁပ်ႉႁွင်း တီႈႁွင်ႈၵၢၼ်ၾၢႆႇႁႅင်းၵၢၼ်သိုၵ်းမၢၼ်ႈ၊ ၽွင်းမိူဝ်ႈတၢင်ႇယွၼ်းၼၼ်ႉ တေလႆႈၼႄပႃး ဝီႊသႃႊ၊ ဝႂ်ၶၢမ်ႈမိူင်း၊ ဝႂ် OWIC၊ ဝႂ်ႁိူဝ်းမိၼ်ၸိူဝ်းၼႆႉ။
ဝၢႆးၼၼ်ႉ ႁွင်ႈၵၢၼ်ၾၢႆႇႁႅင်းၵၢၼ်သိုၵ်းမၢၼ်ႈ တေပိုၼ်ၽၢဝ်ႇဢွၵ်ႇသဵၼ်ႈၸိုဝ်း ၸိူဝ်းမီးသုၼ်ႇဢွၵ်ႇၼွၵ်ႈမိူင်း၊ ၸိူဝ်းဢမ်ႇပႃးၼႂ်းသဵၼ်ႈၸိုဝ်ႈၼၼ်ႉ တေဢမ်ႇမီးသုၼ်ႇဢွၵ်ႇ၊ ၵူၼ်းၸိူဝ်းပႃးၼႂ်းသဵၼ်ႈၸိုဝ်ႈသမ်ႉ တေလႆႈဢွၵ်ႇၼွၵ်ႈမိူင်း ၸွမ်းၼင်ႇဝၼ်းတီႈ ဢၼ်မၵ်းမၼ်ႈဝႆႉၼႂ်းဝႂ်တၢင်ႇယိုၼ်ႈ၊ သင်ဝႃႈ ပူၼ်ႉဝၼ်း ဢၼ်မၵ်းမၼ်ႈဝႆႉၼႆ တေလႆႈတၢင်ႇ ယိုၼ်ႈထႅင်ႈၵမ်းၼိုင်ႈ – ၼႂ်းပၵ်းပိူင်မႂ်ႇ ပႃးဝႆႉၼင်ႇၼႆ။
ယွၼ်ႉပၵ်းပိူင်မႂ်ႇၼၼ်ႉသေ ၵူၼ်းမိူင်းႁူမ်ႈတုမ်မၢၼ်ႈ ၸိူဝ်းႁၢင်ႈႁႅင်းတေဢွၵ်ႇၼွၵ်ႈမိူင်းၼၼ်ႉ မႃးထိုင်တီႈၶူင်ႇႁိူဝ်းမိၼ်တႃႈၵုင်ႈသေတႃႉ ဢမ်ႇၸၢင်ႈဢွၵ်ႇၼွၵ်ႈမိူင်း၊ လႆႈဝၢႆႇႁူဝ်ပွၵ်ႈမိူဝ်းၶိုၼ်းတင်းၼမ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ