မိူဝ်ႈဝႃး ဝၼ်းတီႈ 12/1/2026  သိုၵ်းတဢၢင်း TNLA ၸတ်းႁဵတ်းပၢင်ၵႅဝ်ႈမၢႆတွင်း ဝၼ်းလုၵ်ႉၽိုၼ်ႉၶဝ် ၶွပ်ႈတဵမ် 63 ပီ တီႈဝဵင်းမၢၼ်ႈတူင်ႈ ၸိုင်ႈတႆးပွတ်းႁွင်ႇ။

 တီႈပၢင်ၵႅဝ်ႈၼၼ်ႉ ၸႂ်ႉႁႅင်းသိုၵ်း ႁဵင်ပၢႆ မႃးၼႄၵၢၼ်သိုၵ်း၊  ဢဝ်ၶိူင်ႈၵွင်ႈယႂ်ႇလၢႆလၢႆသႅၼ်း ပႃးၸဵမ် ၸၢင်ႉလႄႈ ၵႃးၵၢပ်ႇလဵၵ်းၸိူဝ်းၼႆႉ ဢွၵ်ႇမႃး ၼႄပႃး ဝႃႈၼႆ။

ၸွမ်သိုၵ်းလူင် တႃးဢၢႆႈၽူင်း ႁူဝ်ပဝ်ႈ တပ်ႉသိုၵ်းတဢၢင်း PSLF/TNLA လၢတ်ႈဝႃႈ – “ၼႂ်းၼႃႈတီႈသိုၵ်းတဢၢင်းၵုမ်းဝႆႉၼႆႉ ပီႈၼွင်ႉတႆး၊ တဢၢင်း၊ ၶၢင်၊ ၶႄႇၵဝ်ႈၵၢင်ႉ၊ မၢၼ်ႈ၊ ၵေႃႇရၶႃး၊ လီႇသူႇ ဢိၵ်ႇပႃးထႅင်ႈလၢႆလၢႆၸၢဝ်းၶိူဝ်းယူႇသဝ်းႁူမ်ႈၵၼ်ဝႆႉ။ ယွၼ်ႉၼၼ် ၶိူဝ်းၼိုင်ႈတင်းၶိူဝ်းၼိုင်ႈ ႁႂ်ႈ  ဢဝ်ၸႂ်မဵတ်ႉတႃႇသေ ႁူမ်ႈၵၼ်ယူႇသဝ်းၵၼ်ၵႂႃႇ” – ဝႃႈၼႆ။

ဢိင်ၼိူဝ်လွင်ႈၼႆႉ ၵူၼ်းမိူင်း ၼႂ်းပိုၼ်ႉတီႈပွတ်းႁွင်ႇၵေႃႉၼိုင်ႈ ထတ်းသၢင်လၢတ်ႈဝႃႈ – ၶေႃႈတိုၵ်းသူၼ်း ႁူဝ်ပဝ်ႈသိုၵ်းတဢၢင်းၼၼ်ႉ ယႃႇႁႂ်ႈပဵၼ် ၶေႃႈလၢတ်ႈလၢႆလၢႆၵူၺ်း၊ ထုၵ်ႇလီလူင်းမိုဝ်းႁဵတ်းၸွမ်း ၼင်ႇၵႂၢမ်းလၢတ်ႈ၊   တေလႆႈပႂ်ႉတူၺ်းၵႂႃႇၸွမ်းထႅင်ႈ ဝႃႈၼႆ။

ၼႂ်းၸိုင်ႈတႆးပွတ်းႁွင်ႇၼႆႉ သိုၵ်းတဢၢင်း ယၢမ်ႈမီးပၼ်ႁႃၵၼ်တင်း သိုၵ်းၸၢဝ်းၶိူဝ်းတၢင်ႇၶိူဝ်း လၢႆလၢႆၵမ်း၊ ထိုင်တီႈလၢၵ်ႈၵွင်ႈယိုဝ်းၵၼ်ၵေႃႈ ယၢမ်ႈမီးမႃး။ ယၢမ်းလဵဝ် ပိုၼ်ၽၢဝ်ႇၵိုတ်းတိုၵ်းၵၼ်တင်းသိုၵ်းမၢၼ်ႈသေ ၵုမ်းၵမ်ဝႆႉ ဝဵင်းၼမ်ႉသၼ်ႇ၊ မၢၼ်ႈတူင်ႈ၊ ၼမ်ႉၶမ်း၊ ၼမ်ႉတူႈ၊ ၵူတ်ႉၶၢႆ၊ မိူင်းလူင် လႄႈ ဝဵင်းမိူင်းငေႃႉ။