ပၢင်လိူၵ်ႈတင်ႈဢၼ်သိုၵ်းမၢၼ်ႈယိုတ်းမိူင်း ၶပ်းၶိုင်ၸတ်းပွင်ႁဵတ်းၼႂ်းမိူင်းႁူမ်ႈတုမ် ႁႂ်ႈပဵၼ်တူဝ်ပဵၼ်တိၼ်ႇ ယူႇ ၼႂ်းႁၢင်ပီ 2025 လႄႈ ႁူဝ်ပီ 2026 ၼႆႉ မိၼ်းဢွင်ႇလၢႆႇ ၽူႈၼမ်းၸိၵ်းၸွမ်တပ်ႉသိုၵ်းမၢၼ်ႈ တူၵ်းလူင်း ၵၼ်တင်း ၸွမ်ၸိုင်ႈမိူင်းၶႄႇ  သျီႊၵျိၼ်ႉၽိင်ႊ ယဝ်ႉၵွၼ်ႇၼႆ တူဝ်တႅၼ်းလူင်ပွင်ၸိုင်ႈ မိူင်းၶႄႇ တဵင်ႉသျီႊၵျုၼ်ႊ ပိုတ်ႇပၢၵ်ႇလၢတ်ႈဢွၵ်ႇမႃးဝၢႆးလင်ၸတ်းပၢင်လိူၵ်ႈတင်ႈ ပွၵ်ႈၵမ်း 1 ဢၼ်ယဝ်ႉတူဝ်ႈၵႂႃႇၼၼ်ႉ။

တင်ႈတႄႇၼႂ်းမိူင်းႁူမ်ႈတုမ် မီးပၼ်ႁႃပၢင်တိုၵ်းသိုၵ်းသိူဝ်သေ ၵၢၼ်မိူင်းဢမ်ႇၼိမ်သဝ်း ဝၢၼ်ႈမိူင်းယုင်ႈယၢင်ႈမႃးႁၢဝ်ႈႁႅင်းၼႆႉ မိူင်းၶႄႇပိုၼ်ၽၢဝ်ႇပၢၵ်ႇလၢတ်ႈယူႇမႅၵ်းမႅၵ်းဝႃႈ ဢမ်ႇၶဝ်ႈၵႅဝ်ၸွမ်းလွင်ႈမိူင်းႁူမ်ႈတုမ် ဝႃႈၼႆ။

ဝၢႆးလင်ပၢင်လိူၵ်ႈတင်ႈပွၵ်ႈၵမ်း 1 ယဝ်ႉၼႆႉတႄႉ တၢမ်တူဝ်တူဝ်တႅၼ်းလူင်ပွင်ၸိုင်ႈမိူင်းၶႄႇ ၵေႃႉပိုတ်ႇပၢၵ်ႇ လၢတ်ႈဢွၵ်ႇမႃးယဝ်ႉလႄႈ ပွင်ႇဝႃႈ ၶေႃႈၵႂၢမ်းဢၼ်လူင်ပွင်ၸိုင်ႈမိူင်းၶႄႇ ထဵင်ပၢၵ်ႈမႃးယူႇၵူႈၶၢဝ်းယၢမ်းၼၼ်ႉ ယဵၼ်းပဵၼ်လွင်ႈတေႉမႃးၼၼ်ႉယဝ်ႉ။

ပၢင်လိူၵ်ႈတင်ႈၼႆႉ သိုၵ်းမၢၼ်ႈယိုတ်းမိူင်း ဢွၼ်ၼမ်းၸတ်းႁဵတ်းၵႂႃႇ ၼႂ်းၵႄႈၵူၼ်းမိူင်းႁူပ်ႉလွင်ႈတုၵ်ႉၶၢၼ်၊ လႆႈပၢႆႈလႆႈၼီ၊ လူႉတၢႆယွၼ်ႉမၢၵ်ႇႁိူဝ်းမိၼ်တိုၵ်းၶွင်ၸုမ်းသိုၵ်းမၢၼ်ႈ ပဵၼ်ၵေႃႇပဵၼ်ၵွင်၊ ၼႂ်းၵႄႈၼမ်ႉႁူၼမ်ႉတႃ လွင်ႈတုၵ်ႉတၢင်းယၢၵ်ႈၵူၼ်းမိူင်း။

ၸႄႈဝဵင်းၼႂ်းမိူင်းႁူမ်ႈတုမ်ၵမ်ႈၼမ် မီးၸုမ်းယိပ်းၵွင်ႈၵၢင်ႇလုၵ်ႉၽိုၼ်ႉၶဝ်ၵုမ်းၵမ်ဝႆႉလႄႈ သိုၵ်းမၢၼ်ႈၼႆႉ လႆႈၸတ်းႁဵတ်းပၢင်လိူၵ်ႈတင်ႈၵႂႃႇ သၢမ်ပွၵ်ႈ (သၢမ်ၶၵ်ႉတွၼ်ႈ)။

ၼင်ႇႁိုဝ်ၵူၼ်းမိူင်းတေဢမ်ႇႁတ်းသၢၼ်ၶတ်း ဢမ်ႇႁတ်းႁူမ်ႈႁႅင်းၵၼ်ယႃႉၵဝ်းႁႂ်ႈပၢင်လိူၵ်ႈတင်ႈ လူႉ ၼၼ်ႉၵေႃႈ သိုၵ်းမၢၼ်ႈယိုတ်းမိူင်း ၶဵၼ်ႇတႅမ်ႈ ပၵ်းပိူင်လၵ်းမိူင်း ဢၼ်ႁေႉၵင်ႈပၼ်ပၢင်လိူၵ်ႈတင်ႈမႃးသေ တီႉၺွပ်းဢဝ်ၵူၼ်းၸိူဝ်းမၼ်းထၢင်ႇထိူမ်ႇ ၸိူဝ်းဢၼ်ႁဵတ်းႁႂ်ႈမၢတ်ႇႁူမၢတ်ႇတႃၼၼ်ႉ ၼႄၵူၼ်းမိူင်းတင်း ၼမ်ဝႃႈ မၼ်းဢဝ်လိူင်ႈတေႉ  ၼႆယူႇ။

ပၢင်လိူၵ်ႈတင်ႈ ပွၵ်ႈၵမ်း 1 ပဵၼ်သင်ၵႂႃႇ

သိုၵ်းမၢၼ်ႈယိုတ်းမိူင်းၼႆႉ တႃႇပႃႇတီႇသၢင်ႇသီႈၶွင်မၼ်းတေလႆႈလွင်ႈဢွင်ႇပေႉသေ ယုၵ်ႉဢဝ်ၵူၼ်းသိုၵ်း ထၢၵ်ႈၶဝ်ႈၵႂႃႇၼင်ႈလႆႈၼႂ်းလုမ်းသၽႃး၊ ပိူဝ်ႈတႃႇယုၵ်ႉယွင်ႈဢဝ် မိၼ်းဢွင်ႇလၢႆႇ ပဵၼ်ၸွမ်ၸိုင်ႈလႆႈ ႁႂ်ႈၶဝ်ႈၶိုဝ်ႇ ၶဝ်ႈပေ မိူၼ်ၵူၼ်းၼၼ်ႉ ၶဝ်မိပ်ႇငႅၼ်း တဵၵ်းတဵင် လွၵ်ႇငိုတ်ႈတေႃႇၵူၼ်းမိူင်းၵူႈလၢႆးတၢင်း။

ၵွၼ်ႇၼႃႈတေထိုင်ဝၼ်းတီႈ (28/12/2025) ပၢင်လိူၵ်ႈတင်ႈပွၵ်ႈၵမ်း 1 ၼၼ်ႉ သိုၵ်းမၢၼ်ႈယိုတ်းမိူင်း လႄႈ ၶႃႈႁၢပ်ႇၵၢၼ်ၶုၼ် ၼႂ်းႁွင်ႈၵၢၼ် ၾၢႆႇၽွင်းငမ်းၶဝ် ႁႃၶေႃႈဢူၼ်ႈဢွၼ်ႇ ၵူၼ်းမိူင်းသေ ၵမ်ၵိၼ်း တဵၵ်းႁႂ်ႈၵႂႃႇပၼ် သဵင်ၵၢင်ၸႂ်ႁႂ်ႈပေႃးလႆႈ။

တၢင်းၸႄႈဝဵင်းမူႇၸေႊ မိူင်းတႆးပွတ်းႁွင်ႇတႄႉ ၶႃႈႁၢပ်ႇၵၢၼ်ၶုၼ်ၶဝ် မိပ်ႇငႅၼ်းတေႃႇၵူၼ်းမိူင်းဝႃႈ “ပေႃးဢမ်ႇၵႂႃႇတူၺ်း သဵၼ်ႈၸိုဝ်ႈၸဝ်ႈၵဝ်ႇ ၼႂ်းၽိုၼ်လိၵ်ႈဢၼ်ပိုၼ်ၽၢဝ်ႇဢွၵ်ႇဝႆႉ လွင်ႈမီးသုၼ်ႇတေလႆႈပၼ်ၶႅပ်းၵၢင်ၸႂ်ၼၼ်ႉ ယဝ်ႉ တေဢမ်ႇႁဵတ်းဢွၵ်ႇပၼ်ပပ်ႉလႅင်၊ ပပ်ႉဢၼ်ၸႂ်ႉတိုဝ်း တႃႇၶၢမ်ႈၽၵ်းတူလႅၼ်လိၼ် မိူင်းမၢၼ်ႈ-မိူင်းၶႄႇ” ဝႃႈၼႆ။

မိူင်းတႆးပွတ်းႁွင်ႇၼႆႉ ဝဵင်းမူႇၸေႊ၊ ဝဵင်းလႃႈသဵဝ်ႈ၊ ဝဵင်းၼွင်ၶဵဝ် လႆႈၸတ်းပၢင်လိူၵ်ႈတင်ႈၵႂႃႇ ဢွၼ်တၢင်းသုတ်း။

ၸႄႈဝဵင်းလႃႈသဵဝ်ႈၵေႃႈ ၵူၼ်းမိူင်းဢမ်ႇသူၼ်ၸႂ် ဢမ်ႇပၵ်းၸႂ်သႂ်ႇၼိူဝ် ပၢင်လိူၵ်ႈတင်ႈ ဢၼ်သိုၵ်းမၢၼ်ႈ ယိုတ်းမိူင်းၼမ်းၸတ်းၼႆႉလႄႈ ၵူၼ်းမိူင်းၸိူဝ်းယူႇၼႂ်းပိုၼ်ႉတီႈၵမ်ႈၼမ် ဢမ်ႇၵႂႃႇတူၺ်းသဵၼ်ႈၸိုဝ်ႈၵူၺ်း ဢမ်ႇၵႃး ဝၼ်းပၢင်လိူၵ်ႈတင်ႈၼၼ်ႉ မၢင်ၸိူဝ်းဢမ်ႇၵႂႃႇသႂ်ႇၶႅပ်းၵၢင်ၸႂ် လူးၵွၼ်ႇ။

ယွၼ်ႉၵူၼ်းမိူင်းၸိူဝ်းၵႂႃႇပၼ်သဵင်ၵၢင်ၸႂ် သႂ်ႇၶႅပ်းမႄး ဢမ်ႇမီးၼမ်မိူၼ်မိူဝ်ႈပၢင်လိူၵ်ႈတင်ႈ 2020 ၼၼ်ႉလႄႈ ထိုင်တီႈၽူႈၵွၼ်းပွၵ်ႉ၊ ၵွၼ်းဢိူင်ႇ ၸိူဝ်းမီးပုၼ်ႈၽွၼ်းၶဝ် ပေႃးလႆႈၸွမ်းႁွင်ႉၵူၼ်းဝၢၼ်ႈ ထိုင်ႁိူၼ်းထိုင်ယေး ႁႂ်ႈၵႂႃႇသႂ်ႇၶႅပ်းၵၢင်ၸႂ်ၼႆ လႆႈႁူႉတီႈၵူၼ်းမိူင်းဝဵင်းလႃႈသဵဝ်ႈၼင်ႇၼႆ။

မိူၼ်ၼၼ်ၼင်ႇၵဝ်ႇ တၢင်းမိူင်းတႆး ပွတ်းၸၢၼ်း လႄႈ မိူင်းတႆးပွတ်းဢွၵ်ႇၵေႃႈ ၵူၼ်းမိူင်းၵမ်ႈၼမ်ၵေႃႈ ယုမ်ႇယမ်ဝႃႈ “ပၢင်လိူၵ်ႈတင်ႈၼႆႉ ဢမ်ႇမီးလွင်ႈပူင်ႇသႂ်၊ ဢမ်ႇမီးလွင်ႈၽဵင်ႇပဵင်း” ၼႆလႄႈ ၸင်ႇဢမ်ႇတူင်ႉ ဢမ်ႇတိုၼ်ႇၵၼ်မိူၼ်မိူဝ်ႈပၢင်လိူၵ်ႈတင်ႈ ပီ 2020 ၼၼ်ႉ ၼႆယဝ်ႉ။

ပၢင်လိူၵ်ႈတင်ႈၼႆႉ သိုၵ်းမၢၼ်ႈယိုတ်းမိူင်း ၼမ်းၸတ်းၶိုင်ပွင်ၵႂႃႇ ၸွမ်းၼင်ႇလွၵ်းၽႅၼ်မၼ်းတမ်းဝၢင်းဝႆႉ လႄႈ ၼႂ်းမိူင်းတႆးပတ်းပိုၼ်ႉ ၸတ်းႁဵတ်းၵႂႃႇ 12 ၸႄႈဝဵင်းၼႆႉ ပႃႇတီႇသၢင်ႇသီႈ USDP ပေႉၵႂႃႇ 8 တီႈ၊ ပႃႇတီႇပဢူဝ်း PNO ပေႉၵႂႃႇ 3 တီႈ လႄႈ ပႃႇတီႇသိူဝ်ၽိူၵ်ႇ ပေႉၵႂႃႇ 1 တီႈ။

ၸွမ်းၼင်ႇၸုမ်းၶၢဝ်ႇၽူႈတွႆႇႁွၵ်ႈလဵပ်ႈႁဵၼ်းတူၺ်း ၵၢၼ်ဢွင်ႇပေႉ ပႃႇတီႇၵၢၼ်မိူင်း ၽွင်းပၢင်လိူၵ်ႈတင်ႈ ပွၵ်ႈၵမ်း 1 တႃႇ 102 ၸႄႈဝဵင်းၼၼ်ႉ ဢွင်ႈတီႈၼင်ႈလုမ်းသၽႃးၵူၼ်းမိူင်းၼၼ်ႉ ပႃႇတီႇသၢင်ႇသီႈ USDP ပေႉၵႂႃႇ 90 တီႈ။ ၼႂ်းၼၼ်ႉ တၢင်းၸႄႈဝဵင်းၼွင်မူၼ်း ၸႄႈမိူင်းၶၢင်ၼၼ်ႉ ပႃႇတီႇသၢင်ႇသီႈ ဢမ်ႇမီးၵူႈၶႅင်ႇလႄႈ ဢမ်ႇလူဝ်ႇၸတ်းပၢင်လိူၵ်ႈတင်ႈသင်သေ ပေႉၵႂႃႇ။

လိူဝ်ၼၼ်ႉ ၸႄႈဝဵင်းၸိူဝ်းတေလႆႈၸတ်းႁဵတ်းၼႂ်းပွၵ်ႈၵမ်း 2 တႃႇ 6 ၸႄႈဝဵင်း၊ ပွၵ်ႈၵမ်း 3 တႃႇ 8 ၸႄႈဝဵင်း ႁူမ်ႈသဵၼ်ႈ 14 ၸႄႈဝဵင်းၼၼ်ႉ မီးၼေႃႇတႅၼ်းၽွင်းၵေႃႉလဵဝ်ၵူၺ်းလႄႈ ဢမ်ႇလူဝ်ႇၸတ်းပၢင်လိူၵ်ႈတင်ႈ သင်သေ ပႃႇတီႇသၢင်ႇသီႈ USDP သမ်ႉပေႃးပေႉယူႇတႃႇ 13 တီႈယဝ်ႉ။ တႃႇထႅင်ႈၼိုင်ႈၸႄႈဝဵင်းတႄႉ ပဵၼ်ပႃႇတီႇသိူဝ်ၽိူၵ်ႇ (SNDP) ပေႉၵႂႃႇ တီႈၸႄႈဝဵင်းမိူင်းၼၢႆးၼႆ ၶွမ်ႊမသျိၼ်ႊၵမ်ၵၢၼ်ပၢင်လိူၵ်ႈတင်ႈ မိူင်းႁူမ်ႈတုမ် ပိုၼ်ၽၢဝ်ႇဢွၵ်ႇဝႆႉၵမ်းသိုဝ်ႈ။

ၵွပ်ႈၼၼ် ဢွင်ႈတီႈၼင်ႈ လုမ်းသၽႃးၵူၼ်းမိူင်းၼႆႉ ပႃႇတီႇသၢင်ႇသီႈ (USDP) ပေႉဝႆႉ တင်းသဵင်ႈ 103 တီႈၼင်ႈ။

တႃႇတီႈၼင်ႈ ၼႂ်းလုမ်းသၽႃးၸိူဝ်ႉၸၢတ်ႈၼႆႉ မိူဝ်ႈဝၼ်းတီႈ 9 လိူၼ်ၵျႅၼ်ႊၼိဝ်ႊရီႊ ၶွမ်ႊမသျိၼ်ႊၵမ်ၵၢၼ်ပၢင်လိူၵ်ႈတင်ႈမိူင်းႁူမ်ႈတုမ် ပိုၼ်ၽၢဝ်ႇဢွၵ်ႇဝႆႉ – တႃႇတီႈၼင်ႈ 31 ဢွင်ႈ။ ၼႂ်းၼၼ်ႉ ပႃႇတီႇသၢင်ႇသီႈ လႆႈတီႈၼင်ႈဝႆႉ 21 တီႈ။

ၼႂ်းမိူင်းတႆးတႄႉ ပႃႇတီႇဢၼ်လႆႈၶႅပ်းၵၢင်ၸႂ်ၼမ်လိူဝ်ပိူၼ်ႈသုတ်းဝႆႉ တီႈ FPTP တႃႇဢွင်ႈၼိုင်ႈၼႆႉ ပဵၼ်ပႃႇတီႇၸၢဝ်းၶိူဝ်းဝႃႉ (WNP) ။ မၼ်းၼႆႉၵေႃႈ ဢမ်ႇမီးၽႂ်ၶဝ်ႈၶႅင်ႇလႄႈ ပေႉဝႆႉ။ တီႈၼင်ႈၸိူဝ်းၵိုတ်းဝႆႉၼၼ်ႉတႄႉ ပဵၼ်ပႃႇတီႇၸၢဝ်းၶိူဝ်းဢွၼ်ႇၶဝ် ဢဝ်ဝႆႉ ၼႆယဝ်ႉ။

ပၢင်လိူၵ်ႈတင်ႈ ပွၵ်ႈၵမ်း 1 ၼႆႉ သိုၵ်းမၢၼ်ႈၸတ်းႁဵတ်းၵႂႃႇတင်းမိူင်းႁူမ်ႈတုမ်ပတ်းပိုၼ်ႉ 102 ၸႄႈဝဵင်း၊ ၼႂ်း မိူင်းတႆးပွတ်းႁွင်ႇ ပႃး 3 ၸႄႈဝဵင်း ၊ ပွတ်းၸၢၼ်း 6 ၸႄႈဝဵင်း၊ ပွတ်းဢွၵ်ႇ 3 ၸႄႈဝဵင်း။ ၸွမ်းၼင်ႇ ၶွမ်ႊမ သျိၼ်ႊပၢင်လိူၵ်ႈတင်ႈမိူင်းႁူမ်ႈတုမ် တႂ်ႈဢၢမ်းၼၢတ်ႈသိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဝႆႉၼၼ်ႉ မိူင်းတႆး ပတ်းပိုၼ်ႉ ဢၼ်ၸတ်းပၢင်လိူၵ်ႈတင်ႈၵႂႃႇလႆႈ မီး 159 ပွၵ်ႉ လႄႈ 228 ဢိူင်ႇ။ ႁူင်းပၼ်သဵင် မီး 920 သေ ၵူၼ်းမိူင်းၸိူဝ်းမီးသုၼ်ႇလႆႈပၼ်သဵင် မီးယူႇ 1216195 ၵေႃႉ ၼႆယဝ်ႉ။

ပေႃးပႆႇသႂ်ႇၶႅပ်းၵၢင်ၸႂ်ယဝ်ႉ တေဢမ်ႇလႆႈဢွၵ်ႇၶၢဝ်းတၢင်း

မိူဝ်ႈပၢင်လိူၵ်ႈတင်ႈ ပွၵ်ႈၵမ်း 1 ၼၼ်ႉ ၼႂ်းပိုၼ်ႉတီႈလႂ်ပိုၼ်ႉတီႈၼၼ်ႉ ဢမ်ႇပေႃးမီးၵူၼ်းမိူင်းၵႂႃႇပၼ်သဵင် တေႉတေႉဝႃႈဝႃႈလႄႈ ၼင်ႇႁိုဝ်ပၢင်လိူၵ်ႈတင်ႈ ပွၵ်ႈၵမ်း 2 ပေႃးတေဢွၵ်ႇမႃး ၾၢင်ႁၢင်ႈမီးၵူၼ်းၵိုၼ်းၶွၼ်ႈ ၼမ်ၸွမ်း ႁူင်းပၼ်သဵင်ၵူႈတီႈၵူႈတၢင်းၼၼ်ႉ သိုၵ်းမၢၼ်ႈယိုတ်းမိူင်း ၸႂ်ႉဢႃႇၼႃႇ ဢွၵ်ႇၶေႃႈပူင် သင်ႇလူင်း တီႈၽူႈၵွၼ်းပွၵ်ႉ၊ ၵွၼ်းဢိူင်ႇ လႄႈ ပွႆႇၶၢဝ်ႇလိုဝ်းဝႃႈ “ၵူၼ်းၸိူဝ်းဢႃႇယု 18 ပီ တဵမ်ယဝ်ႉတင်းသဵင်ႈ ပေႃးပႆႇသႂ်ႇၶႅပ်းၵၢင်ၸႂ်ယဝ်ႉသေ ဢွၵ်ႇတႃႈဢွၵ်ႇတၢင်းၼႆႉ တေၺႃးၵူတ်ႇထတ်းၸွမ်းၵဵတ်ႉလၢၼ်ႇ” ၼႆယဝ်ႉ။

ပၢင်လိူၵ်ႈတင်ႈပွၵ်ႈၵမ်း 2 ၼႆႉ ၸတ်းႁဵတ်းၵႂႃႇ တင်းမိူင်းႁူမ်ႈတုမ်ပတ်းပိုၼ်ႉ တႃႇ 100 ၸႄႈဝဵင်း ၼႂ်းၼၼ်ႉ မိူင်းတႆးပွတ်းႁွင်ႇပႃး 2 ၸႄႈဝဵင်း၊ မိူင်းတႆးပွတ်းၸၢၼ်း 9 ၸႄႈဝဵင်း လႄႈ မိူင်းတႆးပွတ်းဢွၵ်ႇ 6 ၸႄႈဝဵင်း ၼႆယဝ်ႉ။

ၼၢင်းယိင်း ဢႃႇယု 50 ပၢႆ ယူႇဝဵင်းမိူင်းယႆ လၢတ်ႈၼႄတီႈတီႈၽူႈတွႆႇႁွၵ်ႈဝႃႈ “ပွၵ်ႈၼႆႉတႄႉၵူၼ်းသူၼ်ၸႂ်မၼ်းဢေႇ။ မၢင်ၵေႃႉၵေႃႈ ဢမ်ႇႁူႉလၢႆးတွတ်ႈၶႅပ်းၵၢင်ၸႂ်၊ မၢင်ၵေႃႉၵေႃႈဢမ်ႇၶဝ်ႈၸႂ်၊ ၼႂ်းၵႃႈၶၢဝ်းတၢင်းသၢမ်သီႇဝၼ်း ၸူဝ်ႈၵႃႈပႆႇလႆႈတွတ်ႈၶႅပ်းၵၢင်ၸႂ်ၼႆႉ ယူႇတီႈၼႂ်းပွၵ်ႉၼႆႉ ဢဝ်ဢူတ်ႇဢူဝ်ႁႄ ၸွမ်းသေႃႇယူင်းႁႂ်ႈၵႂႃႇတွတ်ႈၶႅပ်းၵၢင်ၸႂ်ၼႆ ၵူႈဝၼ်းၵူႈဝၼ်း ၵူႈၶမ်ႈၵူႈၶမ်ႈၶႃႈဢေႃႈၼႆႉ။ ၵူႈဢၼ်ယၢမ်ႈလတ်းၽၢၼ်ႇပူၼ်ႉမႃး ပၢင်လိူၵ်ႈတင်ႈၵူႈပွၵ်ႈၼႆႉ မၼ်းဢမ်ႇမီးၶႃႈလူး လွင်ႈဝႃႈသေႃႇယူင်းၵၼ်ႁႂ်ႈၵႂႃႇတွတ်ႈၶႅပ်းၵၢင်ၸႂ်ၼႆႉ။ ယူႇတီႈႁႂ်ႈဝႃႈၽူႈမီးပုၼ်ႈၽွၼ်းၶဝ် ၵႂႃႇသေႃႇႁဵတ်းၼႆ မၼ်းဢမ်ႇမီးၶႃႈၼႃႇၼေႃႈ။ မီးတီႈဝႃႈပႃႇတီႇပၢႆးမိူင်းၶဝ် သေႃႇယူင်းဝႃႈ ႁႂ်ႈၵႂႃႇတွတ်ႈၶႅပ်းၵၢင်ၸႂ်ႁႄ သေႃႇဝႃႈႁႂ်ႈၵႂႃႇတွတ်ႈပၼ်ၽႂ်ၼႆၵူၺ်း။ ၵမ်းၼႆႉတႄႉ ႁဝ်းဝႃႈ ယူႇတီႈၽူႈမီးပုၼ်ႈၽွၼ်းၶဝ် လႄႇပၼ်ႇႁွၼ်ႈႁႄယဝ်ႉၵေႃႈ သေႃႇယူင်းႁႂ်ႈၵႂႃႇတွတ်ႈၶႅပ်းၵၢင်ၸႂ်ၼႆႉ လႆႈႁၼ်ဝႆႉၸိူင်ႉၼၼ်ယူႇ တေႃႇထိုင်ၵၢင်ၶမ်ႈဝႃး (10/01/2026) ၶႃႈဢေႃႈ” ဝႃႈၼႆ။  

သိုၵ်းမၢၼ်ႈယိုတ်းမိူင်းပိုၼ်ၽၢဝ်ႇဝႃႈ ၸႄႈဝဵင်းၸိူဝ်းၸုမ်းသိုၵ်းၸၢဝ်းၶိူဝ်းၵုမ်းၵမ်ဝႆႉ ဝၢႆးလင်ပၢင်တိုၵ်း 1027 တႃႇ 17 ၸႄႈဝဵင်းၼႆႉ ဢမ်ႇၸတ်းႁဵတ်းပၢင်လိူၵ်ႈတင်ႈလႆႈၼႆ ၶွမ်ႊမသျိၼ်ႊၵမ်ၵၢၼ်ပၢင်လိူၵ်ႈတင်ႈ ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉ။

ၼႂ်းမိူင်းတႆးၸႄႈဝဵင်းၸိူဝ်းၸတ်းႁဵတ်းပၢင်လိူၵ်ႈတင်ႈ ပွၵ်ႈၵမ်း 2 တႃႇ 17 ၸႄႈဝဵင်းၼႆႉ ယဝ်ႉတူဝ်ႈလီငၢမ်းၵႂႃႇ မိူဝ်ႈဝႃး ဝၼ်းတီႈ 11/01/2026 သေ လႆႈႁူႉဝႃႈ မိူင်းတႆးပွတ်းဢွၵ်ႇ တႃႇ 6 ၸႄႈဝဵင်းၼႆႉ ပႃႇတီႇသၢင်ႇသီႈ (USDP) ပေႉၵိၼ်ၶၢတ်ႇဝႆႉ၊ မိူင်းတႆးပွတ်းၸၢၼ်း တႃႇ 9 ၸႄႈဝဵင်းၼႆႉ ၸႄႈဝဵင်းယႂႃႇငၢၼ်ႇ၊ ၵၢတ်ႇလေႃႉ၊ လွၵ်ႉၸွၵ်ႇ၊ မိူင်းပၼ်ႇ၊ မွၵ်ႇမႆႇ ၸိူဝ်းၼႆႉ ပဵၼ်ပႃႇတီႇသၢင်ႇသီႈ လႆႈၶႅပ်းၵၢင်ၸႂ် ၼမ်လိူဝ်ပိူၼ်ႈသုတ်း။ မိူင်းတႆးပွတ်းႁွင်ႇ ၸႄႈဝဵင်းတၢင်ႉယၢၼ်း လႄႈ ၸႄႈဝဵင်းမိူင်းယႆ ပႃႇတီႇသၢင်ႇသီႈ ပေႉၵိၼ်ၶၢတ်ႇ တင်းသဵင်ႈ ၼႆယဝ်ႉ။

ပႃႇတီႇသိူဝ်ၽိူၵ်ႇ (SNDP) တႄႉ ပွၵ်ႈၵမ်းသွင်ၼႆႉ လႆႈၶႅပ်းၵၢင်ၸႂ်ၼမ်လိူဝ်ပိူၼ်ႈ တီႈဝဵင်းလၢႆးၶႃႈ၊ မိူင်းၵိုင် လႄႈ ၵုၼ်ႁဵင်ၸဵမ်ၸိူဝ်းၼႆႉသေ ၸႄႈဝဵင်းသီႇသႅင်ႇတႄႉ ပဵၼ်ပႃႇတီႇပဢူဝ်း (PNO) လႆႈၶႅပ်းၵၢင်ၸႂ်ၼမ်လိူဝ်ပိူၼ်ႈသုတ်းၼႆ- ၽူႈမီးပုၼ်ႈၽွၼ်းၼႂ်းပႃႇတီႇၵၢၼ်မိူင်း ၸိူဝ်းၵဵဝ်ႇၶွင်ႈၶဝ် တွပ်ႇလၢတ်ႈၼႄဝႆႉၼင်ႇၼႆ။

ၸွမ်းၼင်ႇၵူၼ်းမိူင်းတႆးၵူႈတီႈၵူႈတၢင်း ဢွၵ်ႇသဵင်ၵၢင်ၸႂ် ထတ်းသၢင်လၢတ်ႈၼႄလွင်ႈပၢင်လိူၵ်ႈတင်ႈဢၼ် သိုၵ်းမၢၼ်ႈယိုတ်းမိူင်းၼမ်းၸတ်းၼႆႉ ႁုပ်ႈလႆႈဝႃႈ – ပၢင်လိူၵ်ႈတင်ႈပွၵ်ႈၵမ်း 1 တင်း ပွၵ်ႈၵမ်း 2 ၼႆႉ ၵူၼ်းမိူင်းသူၼ်ၸႂ်ဢေႇႁႅင်းတေႉတေႉသေ ဢမ်ႇသူင်ၵၼ်ၵႂႃႇသႂ်ႇၶႅပ်းၵၢင်ၸႂ် ဢမ်ႇမီးၵၢၼ်တူင်ႉတိုၼ်ႇ။ ၵဵဝ်ႇလူၺ်ႈၶႅပ်းၵၢင်ၸႂ်လူင်ႈၼႃႈၵေႃႈ ဢမ်ႇမီးလွင်ႈတႅၵ်ႇလႅင်း ဢမ်ႇမီးလွင်ႈပူင်ႇသႂ်၊ ၵူၼ်းမိူင်းၺႃးၶႃႈႁၢပ်ႇၵၢၼ်ၶုၼ် တႂ်ႈသိုၵ်းမၢၼ်ႈ မိပ်ႇငႅၼ်းလွၵ်ႇငိုတ်ႈ ၸႂ်ႉလၢႆးတၢင်းဢွမ်ႈ တဵၵ်းတဵင်ႁႂ်ႈၵႂႃႇသႂ်ႇ ၶႅပ်းၵၢင်ၸႂ် ၸဵမ်ၸိူဝ်းၼႆႉ။

ၵွပ်ႈၼၼ် ပၢင်လိူၵ်ႈတင်ႈဢၼ်မိၼ်းဢွင်ႇလၢႆႇ ၸွမ်ၸိၵ်းသိုၵ်းမၢၼ်ႈဢွၼ်ၼမ်းၸတ်းႁဵတ်းၼႆႉ ဢမ်ႇမီးလွင်ႈၽဵင်ႇပဵင်း လႄႈ တေဢမ်ႇမႅၼ်ႈၸွမ်းပိူင်တီႊမူဝ်ႊၶရေႊၸီႇၾႅတ်ႊတရႄႊတေႉတေႉ ၸွမ်းၼင်ႇၵူၼ်းမိူင်းမုင်ႈမွင်းၶႂ်ႈလႆႈၼၼ်ႉတေႉတေႉၼႆ ယွၼ်းႁၢႆးငၢၼ်းပၢႆးၼႄၼင်ႇၼႆ။