ပၢင်လိူၵ်ႈတင်ႈၵမ်းထိ 2 ဢၼ်ၸတ်းႁဵတ်းၼႂ်းဝၼ်းတီႈ 11/1/2026 တႃႇ 100 ဝဵင်း (ၼႂ်း 12 ၸႄႈမိူင်းလႄႈတိူင်း) ၼႆႉၼၼ်ႉ ပႃႇတီႇသၢင်ႇသီႈ USDP ဢွင်ႇပေႉၼမ်သုတ်းဝႃႈၼႆ။
တေႃႇထိုင်မိူဝ်ႈဝႃးဝၼ်းတီႈ 12/1/2026 ယူႇတီႈ UEC ၶွင်ၸုမ်းသိုၵ်းမၢၼ်ႈပႆႇပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်သေတႃႉ ၸွမ်းၼင်ႇ ၶေႃႈမုလ်းလုၵ်ႈၸုမ်းပႃႇတီႇၽႂ်မၼ်းဢွၵ်ႇဝႆႉတႄႉ ပႃႇတီႇသၢင်ႇသီႈ USDP ဢွင်ႇပေႉဝႆႉ 76 ၸႄႈဝဵင်း၊ ပႃႇတီႇသိူဝ်ၽိူၵ်ႇ SNDP ဢွင်ႇပေႉဝႆႉ 3 ဝဵင်း၊ ပႃႇတီႇမွၼ်း MUP 4 ဝဵင်း၊ သုၼ်ႇလဵဝ် 1 ဝဵင်း(ၸႄႈဝဵင်းၵျီႉမျိၼ်ႇတၢႆႇ ၼႂ်းတိူင်းတႃႈၵုင်ႈ) ၊ တၸၺ NUP 1 ဝဵင်းလႄႈ ပႃႇတီႇ PP ဢွင်ႇပေႉ 1 ဝဵင်း ၼႆႉ ၶၢဝ်ႇ BBC ၵေႃႈဢွၵ်ႇဝႆႉၼင်ႇၼႆ။
ၼႂ်းပၢင်လိူၵ်ႈတင်ႈၵမ်းတီႈ 2 ၼႆႉ သိုၵ်းမၢၼ်ႈပိုၼ်ၽၢဝ်ႇဝႆႉတေၸတ်းၼႂ်း 100 ၸႄႈဝဵင်းၼႆသေတႃႉ ဢိင်ၼိူဝ်ငဝ်းလၢႆးၵၢၼ်သိုၵ်းသေ ဢမ်ႇၸတ်းႁဵတ်းလႆႈၵူႈၸႄႈဝဵင်း။
မိူၼ်ၼင်ႇၼႂ်းမိူင်းတႆးသမ်ႉ ပၢင်လိူၵ်ႈတင်ႈၵမ်း 2 ၼႆႉ ပႃး 17 ၸႄႈဝဵင်း။ မိူင်းတႆးပွတ်းႁွင်ႇပဵၼ် ဝဵင်းတၢင်ႉယၢၼ်းလႄႈမိူင်းယႆ၊ မိူင်းတႆးပွတ်းဢွၵ်ႇပဵၼ် မိူင်းၽျၢၵ်ႈ၊ မိူင်းယွင်း၊ မိူင်းယၢင်း၊ မိူင်းၶၢၵ်ႇ၊ မိူင်းတူၼ်၊ မိူင်းပဵင်း လႄႈ မိူင်းတႆးပွတ်းၸၢၼ်းပဵၼ် – ဝဵင်းမိူင်းၵိုင်၊ လၢႆးၶႃႈ၊ မွၵ်ႇမႆႇ၊ မိူင်းပၼ်ႇ၊ ၵုၼ်ႁဵင်၊လွၵ်ႉၸွၵ်ႇ၊ ၵၢတ်ႇလေႃႉ၊သီႇသႅင်ႇ၊ ဝၢၼ်ႈငႂ်ႈ(ယႂႃႇငၢၼ်ႇ) ၸိူဝ်းၼႆႉ။
ၼႂ်း 17 ဝဵင်းၼၼ်ႉ ပႃႇတီႇသၢင်ႇသီႈဢွင်ႇပေႉၵိၼ်ၶၢတ်ႇၼႂ်း 12 ၸႄႈဝဵင်း၊ ပႃႇတီႇသိူဝ်ၽိူၵ်ႇဢွင်ႇပေႉ 3 ၸႄႈဝဵင်း( မိူင်းၵိုင်၊ လၢႆးၶႃႈ လႄႈ ၵုၼ်ႁဵင်) ၊ ပႃႇတီႇပဢူဝ်း ဢွင်ႇပေႉ 1 (တီႈဝဵင်းသီႇသႅင်ႇ) လႄႈ ပႃႇတီႇထၼူႉ ဢွင်ႇပေႉ 1 ၸႄႈဝဵင်း (တီႈဝဵင်းယႂႃႇငၢၼ်ႇ / ဝၢၼ်ႈငႂ်ႈ)။
ပၢင်လိူၵ်ႈတင်ႈၵမ်းတီႈ 1 ဢၼ်ၸတ်းယဝ်ႉတူဝ်ႈၵႂႃႇမိူဝ်ႈဝၼ်းတီႈ 28/12/2025 ၼၼ်ႉတႄႉ ၼႂ်းမိူင်းမၢၼ်ႈပတ်းပိုၼ်ႉ ၸတ်းႁဵတ်းတႃႇ 102 ဝဵင်း။ ၼၼ်ႉၵေႃႈပတ်းပိုၼ်ႉၸိုင်ႈမိူင်းၼႆႉ ပႃႇတီႇသၢင်ႇသီႈ ဢွင်ႇပေႉဝႆႉ 96 တီႈ။ NUP 1 ၊ SNDP 1 လႄႈ သုၼ်ႇတူဝ်ဢိၵ်ႇပႃႇတီႇတၢင်ႇဢၼ် 12 တီႈ။
ပၢင်လိူၵ်ႈတင်ႈၵမ်းတီႈ 1 ၼႆႉ မိူင်းတႆးပႃး 12 ဝဵင်း။ ပႃႇတီႇသၢင်ႇသီႈဢွင်ႇပေႉၼႂ်း 11 ဝဵင်း။ ပႃႇတီႇသိူဝ်ၽိူၵ်ႇ ဢွင်ႇပေႉ သၽႃးၵူၼ်းမိူင်းတီႈၼိုင်ႈ တီႈဝဵင်းလၢင်းၶိူဝ်း။
ပၢင်လိူၵ်ႈတင်ႈၵမ်းတီႈ 3 ဢၼ်တေၸတ်းၼႂ်းဝၼ်းတီႈ 25/1/2026 သမ်ႉ ပတ်းပိုၼ်ႉၸိုင်ႈမိူင်းတေၶေႉၶဵင်ႇ 63 ၸႄႈဝဵင်း။ ၼႂ်းၼၼ်ႉမိူင်းတႆးတေပႃး 9 ၸႄႈဝဵင်း ။ မိူင်းတႆးပွတ်းႁွင်ႇတေပဵၼ် သီႇပေႃႉ၊ ၵျွၵ်ႉမႄး မိူင်းတႆးပွတ်းၸၢၼ်းပဵၼ်ဝဵင်း ပၢင်လွင်း၊ ယွင်ႁူၺ်ႈ၊ၾၢႆၶုၼ်၊ မိူင်းၼၢႆး၊ ၵေးသီး၊ မိူင်းသူႈ လႄႈ မိူင်းတႆးပွတ်းဢွၵ်ႇ ပဵၼ်ဝဵင်းမၢၵ်ႇမၢင် ။
ပၢင်လိူၵ်ႈတင်ႈဢၼ်ၸတ်းႁဵတ်းမႃးသွင်ၵမ်းၼႆႉ ၵမ်ႈၼမ်လၢႆလၢႆဝဵင်း ဢမ်ႇမီးၵူႈၶႅင်ႇလႄႈပႃႇတီႇသၢင်ႇသီႈ ဢွင်ႇပေႉၵႂႃႇႁင်းၵူၺ်းၵေႃႈ မီးၼမ် – ၼႆ သိုဝ်ႇၶၢဝ်ႇယႂ်ႇလၢႆလၢႆဢၼ် တႅမ်ႈတၢင်ႇဝႆႉၼင်ႇၼႆ။
ပၢင်လိူၵ်ႈတင်ႈ ၵမ်းသၢမ်ၼႆႉၵေႃႈ တီႈဝဵင်းမိူင်းၼၢႆး တီႈၼင်ႈသၽႃးၵူၼ်းမိူင်းၼၼ်ႉ ပႃႇတီႇသိူဝ်ၽိူၵ်ႇ တေဢွင်ႇပေႉ လူၺ်ႈဢမ်ႇမီးၵူႈၶေႉၶဵင်ႇ။
ႁူဝ်ၼပ်ႉဢၼ်ႁၢႆးငၢၼ်းၼေၼႆႉပဵၼ်ဢၼ်တီႈၽူႈတွႆႇႁွၵ်ႈ ၵဵပ်းႁွမ်လႆႈဝႆႉၵူၺ်း။ ႁူဝ်ၼပ်ႉတင်းသဵင်ႈတႄႉ ဝၢႆးလင်ပၢင်လိူၵ်ႈတင်ႈၵမ်း 3 ၸင်ႇတေႁူႉလႆႈ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ