ဝၼ်းပၢင်လိူၵ်ႈတင်ႈၵမ်းထိ 2 ဝၼ်းတီႈ 11/1/2026 ၼၼ်ႉ ၸုမ်းယိပ်းၵွင်ႈၵၢင်ႇၶဝ်ႈပိုတ်းယိုဝ်းလၢႆလၢႆဝဵင်းၼႂ်းမိူင်းမၢၼ်ႈတူင်ႈပဵင်း။

ပၢင်တိုၵ်းၽႅၼ်ယၼ်ႇသိုၵ်း ၼႃႈလိၼ်သိုၵ်းမၢႆ 2 ၼႆသေ ၸုမ်းသိုၵ်းယၢင်းလႄႈ PDF ႁူမ်ႈၵၼ်ပိုတ်းယိုဝ်းသိုၵ်းမၢၼ်ႈ ၼႂ်းတိူင်းပႃႇၵိူဝ် မိူၼ်ၼင်ႇၼႂ်းၸႄႈဝဵင်းၽိဝ်း ၊ ၸႄႈဝဵင်းထၢၼ်းတပိၼ်ႇ၊ ၸႄႈဝဵင်းပွင်းတီႇ လႄႈ မိၼ်းလႃႉ ၸိူဝ်းၼႆႉ ႁဵတ်းႁႂ်ႈ ၽူႈမီးၸၼ်ႉၼႂ်းႁွင်ႈၵၢၼ်ၾၢႆႇၽွင်းငမ်းၵူႈလွင်ႈလွင်ႈ ၵေႃႉၼိုင်ႈ ဢိၵ်ႇ သိုၵ်းမၢၼ်ႈ ၽူႈမီးၸၼ်ႉတၢႆ 2 ၵေႃႉဝႃႈၼႆ။

တီႈဝဵင်းထၢၼ်းတပိၼ်ႇၼၼ်ႉသိုၵ်း PDF ပိုတ်းယိုဝ်းလုမ်းၾၢႆႇၽွင်းငမ်းၵူႈလွင်ႈလွင်ႈ ၽွင်းတိုၵ်ႉမီးပၢင်ၵုမ်တႃႇပၢင်လိူၵ်ႈတင်ႈ ။ ႁဵတ်းႁႂ်ႈ ၵႅမ်ၽူႈၸိသင်ႇ ၵေႃႉၼိုင်ႈတၢႆထင်တီႈ၊ ၼွၵ်ႈလိူဝ်ၼၼ်ႉၶႃႈႁၢပ်ႇၵၢၼ်ၾၢႆႇၽွင်းငမ်းမၢတ်ႇၸဵပ်းၵႂႃႇလၢႆလၢႆၵေႃႉဝႃႈၼႆ။

လိူဝ်ၼၼ်ႉၶဝ်ႈပိုတ်းယိုဝ်းတီႈတပ်ႉပၢင်သဝ်း သႃႇၵုၼ်း ၼႂ်းၸႄႈဝဵင်းၽိဝ်း ၼၼ်ႉၵေႃႈ သိုၵ်းမၢၼ်ႈမၢတ်ႇၸဵပ်းလူႉတၢႆတင်းၼမ်။

ၼႂ်းဝၼ်းလဵဝ်ၵၼ်ၼၼ်ႉၵူၺ်း ၶဝ်ႈယိုဝ်းတီႈႁူင်းပလိၵ်ႈဝဵင်းထၢၼ်းတပိၼ်ႇ သိုၵ်းမၢၼ်ႈတၢႆထႅင်ႈ 2 ၵေႃႉ မၢတ်ႇၸဵပ်း 3 ၵေႃႉပႃးတင်းၸၼ်ႉၸဝ်ႈႁၢၼ်ၵေႃႉၼိုင်ႈ။

ၼႂ်းဝၼ်းၼၼ်ႉ PDF ၶဝ်ႈပိုတ်းယိုဝ်း သိုၵ်းမၢၼ်ႈဢၼ်ဢဝ်ႁူမ်ႇလူမ်ႈပၼ် ပၢင်လိူၵ်ႈတင်ႈတီႈဝဵင်းမိၼ်းလႃႉ တီႈၼိုင်ႈလႄႈ ၊ ပွႆႇမၢၵ်ႇသႂ်ႇ သိုၵ်းမၢၼ်ႈဢၼ်ဢဝ်ႁူမ်ႇလူမ်ႈႁူင်းပၢင်လိူၵ်ႈတင်ႈ တီႈဝဵင်း ပွင်းတီႇ 3 တီႈ။ ဝၢႆးၼၼ်ႉ ဢဝ်ၵွင်ႈလူင်ပိုတ်းယိုဝ်း တပ်ႉသိုၵ်းမၢၼ်ႈတီႈဝၢၼ်ႈပွၵ်ႉတေႃးထႅင်ႈ။

ပၢင်တိုၵ်းၽႅၼ်ယၼ်ႇသိုၵ်းၼႆႉပဵၼ်သိုၵ်း PDF တပ်ႉၵွင် 3502 တႂ်ႈပိဝ်ႇႁႃႇ 23၊ တပ်ႉၻရူၼ်ႊ၊ တပ်ႉၵွင် 3802 တႂ်ႈတပ်ႉပိဝ်ႇႁႃႇ 22 ၊ တပ်ႉၽႄ 4 ၊ တပ်ႉၵွင် 3601 တႂ်ႈတပ်ႉပိဝ်ႇႁႃႇ 21 ၊ တပ်ႉၵွင် ဢီႇရႃႇဝတီႇ မၢႆ 3 ၊ တပ်ႉၵႅတ်ႇၶႄၵူၼ်းမိူင်းၽိဝ်း၊ ဝဵင်းမိၼ်းလႃႉ ၸိူဝ်းၼႆႉႁူမ်ႈၵၼ်သေ ၶဝ်ႈပိုတ်းယိုဝ်းသိုၵ်းမၢၼ်ႈ ၸင်ႇဝႃႈယိုဝ်းလႆႈတင်းၼမ်ဝႃႈၼႆ။

ၼႂ်းဝၼ်းမိူဝ်ႈၼႆႉၵေႃႈ ၸုမ်းယိပ်းၵွင်ႈလုၵ်ႉၽိုၼ်ႉသိုၵ်းမၢၼ်ႈၼႆႉ တိုၵ်ႉပၼ်ႇလဵပ်ႈတူင်ႉၼိုင်ယူႇသဝ်း ၼႂ်းၼႃႈလိၼ်တိူင်းသိုၵ်းပႃႇၵိူဝ်ယူႇလႄႈၵူၼ်းမိူင်းဝဵင်းပႃႇၵိူဝ် ၵူဝ်ပဵၼ်ပၢင်တိုၵ်းလႄႈ ဢမ်ႇမီးလွင်ႈႁူမ်ႇလူမ်ႈ။

မိူၼ်ၼႆၼင်ႇၵဝ်ႇတီႈဝဵင်းၵၢၼ်ႉၵေႃး တိူင်းမၵူၺ်းၵေႃႈ သိုၵ်းၵႅတ်ႇၶႄၵူၼ်းမိူင်း ၸုမ်းသိုၵ်းယေႃး ပွႆႇမၢၵ်ႇသျွတ်ႉ ပိုတ်းယိုဝ်းသိုၵ်းမၢၼ်ႈမိူဝ်ႈဝၼ်းတီႈ 10/1/2026 ၵွၼ်ႇၼႃႈပၢင်လိူၵ်ႈတင်ႈဝၼ်းၼိုင်ႈ။သိုၵ်းမၢၼ်ႈမၢတ်ႇၸဵပ်းဢမ်ႇယွမ်း 5 ၵေႃႉဝႃႈၼႆ။ မၢၵ်ႇသျွတ်ႉၼၼ်ႉ တူၵ်းသႂ်ႇပႃး ၼိူဝ်လင်ၶႃးႁိူၼ်းၵူၼ်းမိူင်းလႄႈ ၵူၼ်းမိူင်းမၢတ်ႇၸဵပ်း 3 ၵေႃႉဝႃႈၼႆ။

ပၢင်လိူၵ်ႈတင်ႈ ၵမ်း 2 ၼႆႉၸတ်း သိုၵ်းမၢၼ်ႈပိုၼ်ၽၢဝ်ႇဝႃႈတေၸတ်းႁဵတ်းပႃးတီႈၸႄႈဝဵင်းၵၢၼ်ႉၵေႃး ဝႃႈၼႆသေတႃႉ ဢိင်ၼိူဝ်ပၢင်တိုၵ်းသိုၵ်းသိူဝ်တိုၵ်ႉလိူင်ႇၼမ်ယူႇၼႆႉသေ ၼႂ်းၸႄႈဝဵင်းၵၢၼ်ႉၵေႃးၼႆႉ ၼႂ်းဝဵင်း 7 ပွၵ်ႉၼႆႉ ႁူင်းတွတ်ႈၶႅပ်းၵၢင်ၸႂ် မီး 4 ႁူင်းၵူၺ်းသေ ၼွၵ်ႈဝဵင်း 70 ဢိူင်ႇသမ်ႉ ၸၢင်ႈပိုတ်ႇႁူင်းပၼ်သဵင်တီႈ ဢိူင်ႇလဵဝ်ၵူၺ်းၼႆ ၶၢဝ်ႇ BBC ၵေႃႈပိုၼ်ၽၢဝ်ႇဝႆႉၼင်ႇၼႆ။

Ref; BBC, DVB