ဢီႊရၼ်ႊပၼ်ၾၢင်ႉဝႃႈ သင်ဢမေႊရိၵၼ်ႊ ဢဝ်ၶေႃႈဢၢင်ႈ ယွၼ်ႉငဝ်းလၢႆးၼႂ်းဝၢၼ်ႈမိူင်းဢမ်ႇၼိမ် သဝ်းၼႆသေ ၶဝ်ႈၵႅဝ်ၸွမ်းၼႆၸိုင် ဢီႊရၼ်ႊ တိုၼ်းတေတုမ်ႉတွပ်ႇၵႂႃႇၶိုၼ်း ဢမ်ႇႁၢင်ႉ ဝႃႈၼႆ။

တႄႇဢဝ်ဝၼ်းတီႈ 28/12/2025 ပူၼ်ႉမႃးၼႆႉ ၵူၼ်းမိူင်းဢီႊရၼ်ႊၶဝ် ၼႄၵၢင်ၸႂ်သၢၼ်ၶတ်းတေႃႇ လူင်ပွင်ၸိုင်ႈ ႁၢဝ်ႈႁႅင်း၊ ၽူႈမီးပုၼ်ႈၽွၼ်းၾၢႆႇလူင်ပွင်ၸိုင်ႈၶဝ် ၸႂ်ႉတိုဝ်းလၢႆးႁူၵ်းႁၢႆႉသေ ၽဵဝ်ႈမူၺ်ႉၵူၼ်းမိူင်း ၸိူဝ်းၼႄၵၢင်ၸႂ်လႄႈ မီးၵူၼ်းမၢတ်ႇၸဵပ်းလူႉတၢႆ ၼပ်ႉႁူဝ်ပၢၵ်ႇၵေႃႉ။

ယွၼ်ႉငိုၼ်းဢမ်ႇမီးၵႃႈၶၼ် (ငိုၼ်းၽိူဝ်ႈ) ၼႆသေ ၵူၼ်းၵႃႉၶၢႆၶဝ် ဢွၼ်ၵၼ်ဢွၵ်ႇၼႄၵၢင်ၸႂ်တေႃႇလူင်ပွင်ၸိုင်ႈ တီႈဝဵင်းလူင် တီႊႁီႊရၼ်ႊ၊ မိူင်းဢီႊရၼ်ႊ။ ႁိုင်မႃးၶၢဝ်းတၢင်း 2 ဝူင်ႈၼႆႉ ပၢင်ၼႄၵၢင်ၸႂ် ၸွတ်ႇတူဝ်ႈၵႂႃႇပတ်းပိုၼ်ႉၸိုင်ႈမိူင်း ထိုင်ၸွမ်းဝၢၼ်ႈၸွမ်းသူၼ်၊ ပၢင်ၼႄၵၢင်ၸႂ်ၵေႃႈလႅၵ်ႈလၢႆႈယဵၼ်းပဵၼ် လွင်ႈသၢၼ်ၶတ်း ဢၼ်ၽူႈဢွၼ်ႁူဝ်သႃသၼႃ ၶဝ် ႁဵတ်းလူင်ပွင်ၸိုင်ႈသေ ဢုပ်ႉပိူင်ႇၽွင်းငမ်းဝၢၼ်ႈမိူင်းဝႆႉ။

ၸုမ်းၶၢဝ်ႇဢၼ်တူင်ႉၼိုင်လွင်ႈသုၼ်ႇလႆႈသုၼ်ႇပဵၼ်ၵူၼ်း HRANA ငဝ်ႈလုမ်းပၵ်းတီႈမိူင်းဢမေႊရိၵၼ်ႊတႄႉလၢတ်ႈဝႃႈ – ၵူၼ်းမိူင်းၸိူဝ်းၼႄၵၢင်ၸႂ် လူႉတၢႆ 495 ၵေႃႉ၊ ၽူႈမီးပုၼ်ႈၽွၼ်းၾၢႆႇႁူမ်ႇလူမ်ႈ လူႉတၢႆဢမ်ႇယွမ်း 48 ၵေႃႉ ဝႃႈၼႆ။

လူင်ပွင်ၸိုင်ႈမိူင်းဢီႊရၼ်ႊလၢတ်ႈမၢပ်ႇမႂ်လႄႈ လွၵ်ႇငိုတ်ႈဝႆႉဝႃႈ – ၵူၼ်းမိူင်းၸိူဝ်းၼႄၵၢင်ၸႂ်ၼႆႉ ပဵၼ်ၵူၼ်း ၸိူဝ်းၵေႃႇၵၢၼ်ႁၢႆႉ။ သင်မီးလွင်ႈတုမ်ႉယွၼ်ႈၼိူဝ် ၵၢၼ်ႁူမ်ႇလူမ်ႈၸိုင်ႈ မိူင်းလႄႈ ၵၢၼ်ဢုပ်ႉပိူင်ႇၽွင်းငမ်း ဢိတ်ႉသလမ်ႇမိတ်ႉမႃးၸိုင် တိုၼ်းတေတုမ်ႉတွပ်ႇၵႂႃႇႁၢဝ်ႈႁႅင်း ဝႃႈၼႆ။

ၾၢႆႇၼိုင်ႈၵေႃႈ ၸွမ်ၸိုင်ႈ မိူင်းဢမေႊရိၵၼ်ႊ တေႃႊၼႄႊလ်ထရမ်ႉ လၢတ်ႈဝႃႈ – သင်လူင်ပွင်ၸိုင်ႈ မိူင်းဢီႊရၼ်ႊ သိုပ်ႇၵေႃႇၵၢၼ်ႁၢႆႉၶႃႈႁႅမ်ၵူၼ်းမိူင်း ၸိူဝ်းၼႄၵၢင်ၸႂ်ယူႇၸိုင် ပိူဝ်ႈတႃႇတေၵႅတ်ႇၶႄပၼ် လွင်ႈႁူမ်ႇလူမ်ႈၵူၼ်းမိူင်းၼၼ်ႉ ဢမေႊရိၵၼ်ႊတိုၼ်းတေလႆႈဢဝ်ၵၢၼ်သိုၵ်းသေ ၶဝ်ႈၵႅဝ်ၸွမ်းဝႃႈၼႆ။ ၵူၺ်းၵႃႈ တေဢမ်ႇသူင်ႇတပ်ႉလိၼ်မိူင်းဢမေႊ ရိၵၼ်ႊ ၶဝ်ႈၵႂႃႇၼႂ်းၼႃႈလိၼ်မိူင်းဢီႊရၼ်ႊ ၼႆယဝ်ႉ။

မိူၼ်ၼႆ ဝၼ်းတီႈ 11/1/2026 (မိူဝ်ႈဝႃး)ၼႆႉ ႁူဝ်ပဝ်ႈသၽႃးမိူင်းဢီႊရၼ်ႊလၢတ်ႈဝႃႈ – သင်ဢမေႊရိၵၼ်ႊတႄႇတိုၵ်းတေႃးဢီႊရၼ်ႊဢွၼ်တၢင်းၸိုင် ႁွင်ႈၵၢၼ်ၾၢႆႇၵၢၼ်ၵပ်းသိုပ်ႇ သဵၼ်ႈတၢင်းၼမ်ႉ ၾၢႆႇၵၢၼ်သိုၵ်း ၶွင်ဢမေႊရိၵၼ်ႊ လႄႈတင်း ဢိတ်ႉသရေႊ ၸိူဝ်းမီးဝႆႉၼႂ်းတူင်ႇတၢင်ႇပိုၼ်ႉတီႈၼၼ်ႉ တေၸၢင်ႈပဵၼ်မႃး ပဝ်ႉမၢႆၵၢၼ်သိုၵ်း တႃႇဢီႊရၼ်ႊ တေၶဝ်ႈတိုၵ်းတေႃးပဵၼ်တၢင်းၵၢၼ် ၼႆယဝ်ႉ။